မိူဝ်ႈၼႆႉဝၼ်းတီႈ 9 လိူၼ်ၾႅပ်ႉပိဝ်ႊရီႊ ယၢမ်းၵၢင်ဝၼ်း 12 မူင်း သိုၵ်းၵဝ်ႈၵၢင်ႉ MNDAA ပွႆႇပၼ်ၶိုၼ်း ၵူၼ်းမိူင်း ဝၢၼ်ႈၸေႈ ၸႄႈဝဵင်းလႃႈသဵဝ်ႈ ၸိူဝ်းထုၵ်ႇတီႉၺွပ်းၵႂႃႇၶင်ၶွၵ်ႈဝႆႉၼၼ်ႉ တႃႇ 4 ၵေႃႉ၊ ၵိုတ်းယူႇထႅင်ႈ 5 ၵေႃႉ ပႆႇယွမ်းပွႆႇမႃးပၼ်ၶိုၼ်း ။

ၵူၼ်းမိူင်းၵေႃႉယူႇဝႆႉၼႂ်းထုင်ႉၼမ်ႉပွင်ႈ ႁူႉၸွမ်းပိူင်ပဵၼ်ပၼ်ႁႃၼႆႉငဝ်ႈတေႃႇပၢႆ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈၼႆႉၵၢင်ဝၼ်း 12 မူင်းၶဝ်ပွႆႇမႃးတႃႇ 4 ၵေႃႉ။ ႁၢၼ်ႉတေႃႇထိုင်ယၢမ်းလဵဝ် ဝၢႆးဝၼ်း 3 မူင်းၶိုင်ႈယဝ်ႉၵေႃႈ ပႆႇႁွတ်ႈထိုင်တီႈႁိူၼ်းၵွၼ်ႇ။ ၵွၼ်းဢိူင်ႇၶဝ် တေၵႂႃႇႁပ်ႉတီႈ ဝၢၼ်ႈတၢၼ်ႇလုၼ်ႇ။ ၵိုတ်း 5 ၵေႃႉၼၼ်ႉတႄႉ ပႆႇယွမ်းပွႆႇမႃး။ မိူဝ်ႈတႄႇမၼ်းငိၼ်းဝႃႈ ၶဝ်တေပွႆႇ မႃးၶိုၼ်းတႃႇ 6 ၵေႃႉၼႆဢေႃႈ။ ၶဝ်တေၶႂ်ႈသွၼ်ၵႄႇၵူၼ်းမိူင်းထႅင်ႈ ယႃႇပေႁႂ်ႈၽႂ်ႁတ်းဢွၼ်ႁူဝ်သေ လုၵ်ႉၽိုၼ်ႉၶဝ်ထႅင်ႈၸိူင်ႉၼၼ်ၶႃႈၵႂႃႈ” ဝႃႈၼႆ။

ၵူၼ်းမိူင်းဝၢၼ်ႈၸေႈ 4 ၵေႃႉ ၸိူဝ်းသိုၵ်းၵဝ်ႈၵၢင်ႉပွႆႇမႃးပၼ်ၶိုၼ်းၼႆႉ ပဵၼ်ၸၢႆးပုၼ်ႉ ဢႃႇယု 35 ပီ၊ ၸၢႆးမွင်ႇ ဢႃႇယု 37 ပီ၊ ၸၢႆးပၢၼ်းၸိင်ႇ ဢႃႇယု 45 ပီ၊ ၸၢႆးလူႇ ဢႃႇယု 45 ပီ။ ထႅင်ႈ 5 ၵေႃႉ ၸိူဝ်းတိုၵ်ႉၺႃးသိုၵ်းၵဝ်ႈၵၢင်ႉ ၵုမ်းၶင်တူဝ်ဝႆႉယူႇၼၼ်ႉ ပဵၼ် ၸၢႆးထုၼ်းၵျေႃႇ ဢႃႇယု 36 ပီ၊ ၸၢႆးသၢမ် ဢႃႇယု 44 ပီ၊ ၸၢႆးၺုၼ်ႉ ဢႃႇယု 42 ပီ၊ ၸၢႆးမျႃႉ ဢႃႇယု 34 ပီ၊ ၸၢႆးတၢၼ်း ဢႃႇယု 30 ပီ ၼႆယဝ်ႉ။

ၼင်ႇႁိုဝ် ၵူၼ်းဝၢၼ်ႈၸေႈ 9 ၵေႃႉၸိူဝ်းၺႃးသိုၵ်းၵဝ်ႈၵၢင်ႉ တီႉၺွပ်းႁွင်ႉၵႂႃႇၵုမ်းၶင်တူဝ်ဝႆႉ (ယွၼ်ႉဢွၵ်ႇသၢၼ်ၶတ်း ၵၢၼ်ၶုတ်းၶမ်း သိုၵ်းၵဝ်ႈၵၢင်ႉ လႄႈ လၢဝ်းပၢၼ်းၶႄႇ ၼႂ်းထုင်ႉ ၼမ်ႉပွင်ႈ) တေၸဵဝ်းပူၼ်ႉလွတ်ႈမႃးလူၺ်ႈလွတ်ႈၽေးလီၼၼ်ႉ ပႃႇတီႇမႂ်ႇသုင်ၸိုင်ႈတႆး SSPP/SSA လႆႈတႅမ်ႈလိၵ်ႈယိုၼ်ႈထိုင်ၸူး ၽူႈယႂ်ႇၵူၼ်းလူင်တီႈငဝ်ႈငုၼ်းသိုၵ်းၵဝ်ႈၵၢင်ႉ ၵူၺ်းဢမ်ႇၵႃး ၸုမ်းတူင်ႇဝူင်းၵူၼ်းတႆးလၢႆၸုမ်းၵေႃႈ ႁဵတ်းလိၵ်ႈပိုၼ်ၽၢဝ်ႇသၢၼ်ၶတ်း ၸုမ်းသိုၵ်းၵဝ်ႈၵၢင်ႉဝႆႉပႃးထႅင်ႈ။

မိူဝ်ႈဝၼ်းတီႈ 6/2/2026 ၼၼ်ႉၵေႃႈ ၽူႈႁူႉႁၼ်ၸမ်ၸႂ်ၵၼ်တင်းသိုၵ်း SSPP/SSA ၸဝ်ႈၼိုင်ႈ ယၢမ်ႈလၢတ်ႈတီႈၽူႈတွႆႇႁွၵ်ႈဝႃႈ – သင်ၾၢႆႇသိုၵ်းၵဝ်ႈၵၢင်ႉ ဢမ်ႇပွႆႇပၼ်ၶိုၼ်းၵူၼ်း မိူင်းဝၢၼ်ႈၸေႈဝႆးဝႆးၸိုင် တေၵႂႃႇဢုပ်ႇဢူဝ်းတီႈၽူႈယႂ်ႇၵူၼ်းလူင်ၶဝ်တီႈလၢဝ်ႇၵၢႆး – ၼႆယဝ်ႉ။

လႆႈႁူႉဝႃႈ ၵူၼ်းမိူင်းဝၢၼ်ႈၸေႈ 3 ၵေႃႉၸိူဝ်းဢၼ်သိုၵ်းၵဝ်ႈၵၢင်ႉ ၵုမ်းၶင်တူဝ်ဝႆႉ ႁင်းၽႂ်မၼ်း ၼိုင်ႈၵေႃႉၼိုင်ႈႁွင်ႈသေ ဢမ်ႇပွႆႇဢွၵ်ႇမႃး ပၼ်ၶိုၼ်းၼႆႉ ပဵၼ်ၵူၼ်းၼုမ်ႇသႅၼ်း လၢတ်ႈလႆႈၶႆႈၸၢင်ႈသေ ၾၢႆႇသိုၵ်းၵဝ်ႈၵၢင်ႉ မၵ်းမၼ်ႈ ပဵၼ်ၽူႈဢွၼ်ႁူဝ်တူင်ႉ တိုၼ်ႇႁႂ်ႈၵူၼ်းမိူင်း လုၵ်ႉႁိုၼ်ႇသၢၼ်ၶတ်းၸုမ်းသိုၵ်းၵဝ်ႈၵၢင်ႉ လႄႈ လၢဝ်းပၢၼ်းၶႄႇၶဝ်။ တႃႇထႅင်ႈ 2 ၵေႃႉဢၼ် ဢမ်ႇယွမ်းပွႆႇမႃး ပၼ်ၶိုၼ်းၼႆႉတႄႉ ဢမ်ႇပႆႇလႆႈႁူႉလွင်ႈတၢင်းႁူဝ်ယွႆႈ ၼႆယဝ်ႉ။

ယွၼ်ႉပၼ်ႁႃၵၢၼ်သိုဝ်ႉၶၢႆတီႈလိၼ်၊ ၵၢၼ်ၶုတ်းၶမ်း ၸွမ်းထုင်ႉၼမ်ႉပွင်ႈၼၼ်ႉသေ သိုၵ်းၵဝ်ႈၵၢင်ႉ တီႉၺွပ်းဢဝ် ၵူၼ်းမိူင်းၸိူဝ်း လုၵ်ႉႁိုၼ်ႇ သၢၼ်ၶတ်း တီႈဢိူင်ႇဝၢၼ်ႈၸေႈၵႂႃႇ မိူဝ်ႈဝၼ်းတီႈ 2/2/2026 ၼၼ်ႉ တႃႇ 36 ၵေႃႉ။ ဝၼ်းတီႈ 3/2/2026 ယွၼ်ႉၵွၼ်းဢိူင်ႇ လႄႈ ၵေႃႇမတီႇဢိူင်ႇၶဝ် ၵႂႃႇၸွႆႈလၢတ်ႈ ငူပ်ႉငီႉသေ ၾၢႆႇသိုၵ်းၵဝ်ႈၵၢင်ႉ ပွႆႇမႃးပၼ်ၶိုၼ်း တႃႇ 27 ၵေႃႉ။

ၵူၼ်းမိူင်းၸိူဝ်းၵိုတ်းထႅင်ႈ တႃႇ 9 ၵေႃႉတႄႉ သိုပ်ႇၺႃးၶင်ဝႆႉၼႂ်းၶွၵ်ႈဝႆႉၼၼ်ႉ ၵူၼ်းၸမ်ၸႂ်ၵၼ်တင်း SSPP/SSA ၸဝ်ႈၼိုင်ႈတႄႉဝႃႈ မီးဝႆႉၼႂ်းတပ်ႉတီႈဝၢၼ်ႈတၢၼ်ႇလုၼ်ႇ ဢၼ်သိုၵ်းၵဝ်ႈၵၢင်ႉ မၵ်းမၼ်ႈၸၼ်ၶဝ်ႈပႃးၼႂ်းၸႄႈတွၼ်ႈသႅၼ်ဝီၼၼ်ႉၼႆသေတႃႉ ၵူၼ်းမိူင်းပိုၼ်ႉတီႈ ၼႂ်းထုင်ႉၼမ်ႉပွင်ႈၵေႃႉႁူႉႁၼ်ၸွမ်း ပိူင်ပဵၼ်ပၼ်ႁႃၼႆႉတႄႉတွပ်ႇလၢတ်ႈတီႈၽူႈတွႆႇႁွၵ်ႈဝႃႈ – ၵူၼ်းမိူင်း 9 ၵေႃႉၼႆႉ ထုၵ်ႇႁွင်ႉၵႂႃႇၶင် တီႈတပ်ႉသိုၵ်းၵဝ်ႈၵၢင်ႉ ၼႂ်းဝဵင်းသႅၼ်ဝီ ၼႆယဝ်ႉ။

ၵူၼ်းမိူင်းဝၢၼ်ႈၸေႈ ထုင်ႉၼမ်ႉပွင်ႈ ၸႄႈဝဵင်းလႃႈသဵဝ်ႈၼႆႉ ၺႃးသိုၵ်းၵဝ်ႈၵၢင်ႉႁွင်ႉတူဝ်ၵႂႃႇၵုမ်းၶင်ဝႆႉ ႁိုင်ၶၢဝ်းတၢင်းမွၵ်ႈ 10 ဝၼ်းယဝ်ႉ တိုၵ်ႉတေလႆႈဢွၵ်ႇမႃးၶိုၼ်းဝႃႈၼႆသေတႃႉ MNDAA ယင်းဢမ်ႇပႆႇယွမ်းပွႆႇပၼ်တင်းသဵင်ႈ ၼႆယဝ်ႉ။

လွင်ႈတၢင်းဢၼ်လႆႈပဵၼ်ပၼ်ႁႃၵၼ်ၼႆႉ မိူဝ်ႈဝၼ်းတီႈ (30/1/2026) သိုၵ်းၵဝ်ႈၵၢင်ႉ ၵႂႃႇတူၺ်း ၸွမ်း ႁွင်ႈၼမ်ႉပွင်ႈ ၶႂ်ႈဢဝ်ႁိူဝ်းသေ ၶုတ်းဢဝ်ၶမ်းၼႂ်းၼမ်ႉပွင်ႈ ဢၼ်မီးၾၢႆႇဢွၵ်ႇဝၢၼ်ႈၸေႈ။ ၵူၼ်းမိူင်း သမ်ႉတေၵေႃႇသၢင်ႈၶူဝ်ၶၢမ်ႈၼမ်ႉပွင်ႈ ဢၼ်လုၵ်ႉတီႈဝၢၼ်ႈၸေႈ ၶၢမ်ႈၸူး ဝၢၼ်ႈၵွင်းဝဵင်း- ပဵင်းလူင် သိုၵ်းၵဝ်ႈၵၢင်ႉ ဢမ်ႇၶႂ်ႈပၼ်ႁဵတ်း ယွၼ်ႉလူဝ်ႇဢဝ်ႁိူဝ်း ၶိုၼ်ႈၸွမ်းၼမ်ႉ ။ ထိုင်တီႈလႆႈထဵင်မေႃး ၽိတ်းၵၼ်သေ ထိုင်မႃးဝၼ်းတီႈ 2/2/2026 မႃးတီႉဢဝ်ၵူၼ်းဝၢၼ်ႈၵႂႃႇ။

ဝၢႆးလင်သိုၵ်းမၢၼ်ႈယိုတ်းဢဝ်ဢႃႇၼႃႇၸိုင်ႈမိူင်းသေ ပဵၼ်မႃးၽႅၼ်ၵၢၼ်ယၼ်ႇသိုၵ်း 1027 ၽွင်း သိုၵ်းၵဝ်ႈၵၢင်ႉ ၵုမ်းၵမ်ပၼ်ၵၢၼ်ႇၽွင်းငမ်း ဝႆႉတီႈထုင်ႉၼမ်ႉပွင်ႈပဵၼ်တၢင်းၵၢၼ်မႃး ၶၢဝ်းတၢင်း 2 ပီပၢႆၼၼ်ႉ လၢဝ်းပၢၼ်းၶႄႇ ႁူမ်ႈတင်း သိုၵ်းၵဝ်ႈၵၢင်ႉသေ ႁႃတဵၵ်းသိုဝ်ႉ တီႈလိၼ် သူၼ်ႁႆႈၼႃး ၵူၼ်းမိူင်းၸိူဝ်းယူႇၼႂ်းပိုၼ်ႉတီႈၼၼ်ႉ ဢမ်ႇထၢတ်ႇၼႆ ၵူၼ်းမိူင်း ၵေႃႉယူႇၼႂ်းထုင်ႉၼမ်ႉပွင်ႈ လၢတ်ႈၼင်ႇၼႆ။