ၼႂ်းၵၢင်လိူၼ်ၵျုႊလၢႆႊၼႆႉ ၾူၼ်တူၵ်းႁၢဝ်ႈႁႅင်းထပ်းၵၼ်လၢႆဝၼ်း တၢင်းမိူင်းၶၢင် ၸႄႈဝဵင်းၽႃၵၢၼ်ႉ ၵႄးၼမ်ႉဢုရုၼွင်းၶိုၼ်ႈမႃးထူမ်ႈၸွမ်းဝဵင်းမဵဝ်ႉမ၊ ငႅၵ်ႉပျေႃးတေႃး၊ ၵျွၵ်ႉဝၢႆး၊ ဢေးမျႃႉတႃႇယႃႇ၊ မေႃႇဝၼ်း၊ မသျီႊၵထွင်ႊ၊ သၢၼ်းၵျွႆႇ၊ လူင်းၶိၼ်း၊ ၽႃးပိၼ်ႇဢွၵ်ႉလၢၼ်း၊ ၼမ်ႉမၽိတ်ႉ၊ မမူင်ႇၸၢၼ်ႇပျႃႉယႂႃႇၸဵမ်ၸိူဝ်း ၼႆႉလႄႈ ႁဵတ်းႁႂ်ႈၵူၼ်းၼႂ်းပွၵ်ႉ ၼႂ်းဝၢၼ်ႈ ႁူပ်ႉၽေးၼမ်ႉထူမ်ႈယူႇႁၢဝ်ႈႁႅင်းၼႆယဝ်ႉ။

ၾူၼ်တႄႇတူၵ်း ဝၼ်းတီႈ 18 လိူၼ်ၵျူႊလၢႆႊမႃး ႁၢၼ်ႉတေႃႇထိုင်ဝၼ်းမိူဝ်ႈၼႆႉသေ ၵႄးၼမ်ႉဢုရု တင်း ၼမ်ႉႁူၺ်ႈၼမ်ႉလွႆ ၼွင်းလေႃႇလူင်းမႃးလုပ်ႇထူမ်ႈ ၼႂ်းဝဵင်းၽႃၵၢၼ်ႉတင်းသဵင်ႈ – ၼႆယဝ်ႉ။

ၵူၼ်းမိူင်းၵေႃႉယူႇၼႂ်းဝဵင်းၽႃၵၢၼ်ႉၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “တေႃႇထိုင်မိူဝ်ႈၼႆႉၵေႃႈ ၾူၼ်ပႆႇႁိူတ်ႇ။ ၵူဝ်ၼမ်ႉသိုပ်ႇၶိုၼ်ႈမႃးထႅင်ႈတိၵ်းတိၵ်းၵူၺ်းယဝ်ႉ။ ၵူၼ်းၼႂ်းပွၵ်ႉၼႂ်းဝၢၼ်ႈၵေႃႈ ဢမ်ႇၸၢင်ႈၶၢႆႉၶူဝ်းၶၢႆႉလဵင်းသင်ယဝ်ႉ။ ၶူဝ်းၼႂ်းႁိူၼ်းၵေႃႈ ၼမ်ႉထူမ်ႈႁႄ ၵွႆမူတ်းယဝ်ႉဢေႃႈ။ ၵမ်ႈၼမ်ၼႆႉ လူဝ်ႇတၢင်းၸွႆႈထႅမ် လွင်ႈၵိၼ်လွင်ႈယမ်ႉ ၶူဝ်းၼုင်ႈတၢင်းဝႆၸိူဝ်း ၼႆႉယူႇ။ ပေႃးပဵၼ်ၼႆယူႇၵူႈဝၼ်းတႄႉ” ဝႃႈၼႆ။

လႆႈႁူႉဝႃႈ ၼွၵ်ႈလိူဝ်ၼမ်ႉၼွင်းထူမ်ႈပွၵ်ႉဝၢၼ်ႈႁိူၼ်းယေးၵူၼ်းမိူင်းယဝ်ႉ လိၼ်ၵူၼ်ႇလွႆပင်းၸိူဝ်းၼႆႉၵေႃႈ သိုပ်ႇပဵၼ်မႃးပႃးလႄႈ ၸုမ်းၸိူဝ်းႁဵတ်းၵၢၼ်ၸွႆႈထႅမ် ၵူၼ်းထူပ်းၽေးၶဝ် ဢမ်ႇၸၢင်ႈၶဝ်ႈၵႂႃႇၸွႆႈထႅမ်လႆႈ ၵူႈတီႈ – ၼႆယဝ်ႉ။

ၼႂ်းပီ 2026 ၶၢဝ်းၾူၼ်ၼႆႉၵူၺ်း ၼမ်ႉၼွင်းထူမ်ႈ ၼႂ်းၸႄႈဝဵင်းၽႃၵၢၼ်ႉ မီးမွၵ်ႈ 5 ပွၵ်ႈယဝ်ႉၼႆ ၵူၼ်းမိူင်းပိုၼ်ႉတီႈလၢတ်ႈ။