သိုၵ်းမၢၼ်ႈယိုတ်းမိူင်း ၶိၼ်ၸတ်းပၢင်လိူၵ်ႈတင်ႈယဝ်ႉ မီးမႃးသၽႃး ။ ၵမ်ႈၼမ် ဢမ်ႇႁၼ်လီၸွမ်းသေတႃႉ ၼႂ်းသၽႃးတႄႉ မီးလွင်ႈဢုပ်ႇဢူဝ်းၵၼ်မႃးလၢႆၶၵ်ႉလၢႆတွၼ်ႈ ။ တႅၼ်း ၽွင်းၸိူဝ်းလႆႈတီႈယူႇမႃးၸိူဝ်းၼႆႉၵေႃႈ ၸွမ်းၼင်ႇ ပုၼ်ႈၽွၼ်းတႅၼ်းၽွင်းမီးၼၼ်ႉ ဢွၼ်ၵၼ်တၢင်ႇၶေႃႈထၢမ်လႄႈသင် ၶေႃႈတုၵ်းယွၼ်းလႄႈသင် ၸိူဝ်းၼႆႉမႃးသေတႃႉ မၢင်ဢၼ်ၵေႃႈလႆႈ မၢင်ဢၼ်ၵေႃႈဢမ်ႇလႆႈ ။

ၼႂ်းလိူၼ်ၵျူႊလၢႆႊၼႆႉ တႅၼ်းၽွင်းၵူၼ်းမိူင်း လၢင်းၶိူဝ်း ပိုတ်ႇၶေႃႈထၢမ်ၼႂ်းသၽႃး လွင်ႈၵဵတ်ႉလႅၼ်လိၼ်တႆး-ထႆး တီႈႁူဝ်မိူင်း ဢၼ်တိတ်းၸပ်းၸႄႈတွၼ်ႈမႄႈႁွင်ႈသွၼ် ၸွင်ႇတေပိုတ်ႇဢမ်ႇပိုတ်ႇ ။ ၵူၼ်းၼမ်ၵေႃႈ ၶႂ်ႈႁူႉဝႃႈ သွင်ၸိုင်ႈမိူင်း ၸွင်ႇပႃႈတူၵ်းလူင်းလႆႈၸႂ်ၵၼ်ၼႆၸိူဝ်းၼႆႉ ။

ၵဵတ်ႉလၢၼ်ႇ လႅၼ်ၶႅၼ်ႈၸိုင်ႈမိူင်း ထႆး- မၢၼ်ႈ ဢၼ်ၵမ်ႈၼမ် ဢမ်ႇပေႃးတူၵ်ႇထိုင်ပဵၼ်ၸၼ်ႉၸိုင်ႈမိူင်းၼႆႉ ပႃးၵဵတ်ႉလၢၼ်ႇတီႈၼႃးမူၼ်း ၸႄႈတွၼ်ႈလၢင်းၶိူဝ်း ၸိုင်ႈတႆး ပွတ်းၸၢၼ်းၼႆႉ တီႈၼိုင်ႈ ။

ၼႂ်းလိူၼ်ၵျူႊလၢႆႊ ဝၼ်းတီႈ 22 ၼႆႉ ၸၢႆးထုၼ်းၸၢမ်ႇ(ႁိုဝ်) ၸၢႆးသိူဝ်ႁၢၼ် တႅၼ်းၽွင်းၵူၼ်းမိူင်း လၢင်းၶိူဝ်း ဢဝ်လွင်ႈၵဵတ်ႉလၢၼ်ႇၼႆႉ ပိုတ်ႇၶေႃႈထၢမ် တီႈၼႂ်းသၽႃးလႄႈ ႁဵတ်းႁႂ်ႈၵူၼ်းမိူင်းတင်းသွင်ၾင်ႇ ဢွၼ်ၵၼ်သူၼ်ၸႂ်ၵၼ်မႃးၼမ် ။

ၵဵတ်ႇလၢၼ်ႇ တီႈ ၼႃးမူၼ်း ၸႄႈတွၼ်ႈလၢင်းၶိူဝ်း ဢၼ်တေႃႇသဵၼ်ႈတၢင်း သၢႆလဵဝ်ၵၼ်တင်း ၵဵတ်ႉလၢၼ်ႇ ႁူၺ်ႈၽိုင်ႈ ၸႄႈတွၼ်ႈမႄႈႁွင်ႈသွၼ် ၸိုင်ႈထႆး ၼႆႉ ၸဵမ်လႂ်ၵေႃႈ တိုၼ်းမီးလွင်ႈၶဝ်ႈဢွၵ်ႇၵၼ်မႃးယူႇသေတႃႉ ပႆႇၸႂ်ႈသဵၼ်ႈတၢင်းဢၼ်သွင်ၸိုင်ႈမိူင်း ၵႃႉၶၢႆၸူးၵၼ်ပဵၼ်တၢင်းၵၢၼ် ။

သဵၼ်ႈတၢင်းၵႃႉၶၢႆသွင်ၸိုင်ႈမိူင်း ဢၼ်ထႆးလႄႈမိူင်းႁူမ်ႈတုမ်မၢၼ်ႈ တူၵ်းလူင်းပဵၼ်တၢင်းၵၢၼ်ၼႆႉ ပဵၼ် တႃႈၶီႈလဵၵ်း -မႄႈသၢႆ ၊ မျႃႉဝတီႇ-မႄႈသွတ်ႇ ၊ ၵေႃႇသွင်-ရၼွင်း ၸိူဝ်းၼႆႉ ဢၼ်မၵ်းမၼ်ႈမႃး ၽွင်း ပီ 1997 ။ ထိုင်မႃး 2016 ၼႆႉ ၵဵတ်ႉလၢၼ်ႇလႅၼ်ၶႅၼ်ႈၸိူဝ်းၼႆႉ ယုၵ်ႉၶိုၼ်ႈပဵၼ် ၸၼ်ႉၸိုင်ႈမိူင်း ပဵၼ်တၢင်းၵၢၼ်လူးၵွၼ်ႇ ။ ၵူၺ်းၵႃႈ လႅၼ်ၶႅၼ်ႈတၢင်ႇတီႈတႄႉ ပႆႇႁၼ်ၼပ်ႉပႃး။

လႅၼ်လိၼ်ဢၼ်တိတ်းၸပ်းၵၼ်တင်းထႆးၼႆႉ မီးလၢႆတီႈ ၊ သင်ပိုတ်ႇၵႃႉၶၢႆၸူးၵၼ်ပဵၼ်တၢင်းၵၢၼ်ၵေႃႈ ၸၢင်ႈမီးငဝ်းလၢႆးလႅၵ်ႈလၢႆႈမႃးလၢႆၸိူဝ်ႉလၢႆပိူင် ။ မၢင်တီႈၵေႃႈ ယွၼ်ႉပိုၼ်ႉတီႈဢမ်ႇၼိမ်သဝ်းလႄႈ ပိုတ်ႇပဵၼ်တၢင်းၵၢၼ်သေတႃႉ တႃႇတေႃႉၵုၼ်ႇၶဝ်ႈဢွၵ်ႇယၢပ်ႇယဵၼ်း ။

ဢိင်ၼိူဝ်လွင်ႈၼႆႉ မုင်ႈမွင်း ၽွၼ်းပၢင်ႈလၢႆဢၼ်သေ ၾၢႆႇတႅၼ်းၽွင်းလၢင်းၶိူဝ်း ၸၢႆးသိူဝ်ႁၢၼ် ၸင်ႇ ပိုတ်ႇၶေႃႈထၢမ်ၼႂ်းသၽႃး ဝႃႈ တႃႇပိုတ်ႇၵဵတ်ႉလၢၼ်ႇၼႃးမူၼ်း ပဵၼ် တၢင်းၵၢၼ်ၼၼ်ႉ ၸွင်ႇတေမီးၽႅၼ်ၵၢၼ်ဢမ်ႇမီး ။

လွင်ႈၼႆႉ ၵႅမ်ၽွင်းလူင်ၾၢႆႇႁွင်ႈၵၢၼ်ပၢႆးမၢၵ်ႈမီးလႄႈၾၢႆႇၵပ်းသိုပ်ႇၵပ်းသၢၼ် ဢူးမိၼ်းမိၼ်း ဢၼ်သိုၵ်းမၢၼ်ႈတႅင်ႇတင်ႈဝႆႉတႄႉ လၢတ်ႈၼႂ်းသၽႃးဝႃႈ – တႃႇပိုတ်ႇၵဵတ်ႉလၢၼ်ႇ တီႈၼႃးမူၼ်းၼႆႉ ပႆႇမီး – ၶၢဝ်ႇ kanbawzatai ႁၢၼ်းငၢၼ်းဝႆႉ။

တႃႇပိုတ်ႇသဵၼ်ႈတၢင်းၵႃႉၶၢႆၶဝ်ႈဢွၵ်ႇပဵၼ်တၢင်းၵၢၼ်ၵၼ်ၼႆႉ ဢၼ်လမ်ႇလွင်ႈသုတ်းၵေႃႈ သွင်ၸိုင်ႈမိူင်း လူဝ်ႇၶဝ်ႈဢွၵ်ႇဢုပ်ႇဢူဝ်းၵၼ်ၵွၼ်ႇ ၊ ပၼ်ႁႃသွင်ၸိုင်ႈမိူင်းၵေႃႈ ယႃႇႁႂ်ႈမီးၵွၼ်ႇ ၊ လူဝ်ႇႁႂ်ႈ လႅၼ်လိၼ်တိတ်းၸပ်းၵၼ်တင်းသွင်ၾင်ႇမီးလွင်ႈၼိမ်သဝ်းၵွၼ်ႇ ၸင်ႇတေၸၢင်ႈပိုတ်ႇၵဵတ်ႉလၢၼ်ႇၶဝ်ႈဢွၵ်ႇၸူးၵၼ်လႆႈ ၼႆယဝ်ႉ။

ထႅင်ႈၾၢႆႇၼိုင်ႈ တႃႇပိုတ်ႇၵဵတ်ႉလၢၼ်ႇၼႆႉ ယူႇတီႈၾၢႆႇမိူင်းမၢၼ်ႈ လၢတ်ႈယူႇႁင်းၵူၺ်း ဢမ်ႇလႆႈ ၊ ၾၢႆႇမိူင်းထႆးၵေႃႈ လူဝ်ႇလႆႈတူၵ်းလူင်းႁၼ်လီၸွမ်းၵွၼ်ႇ ။ လႅၼ်လိၼ်ၾင်ႇတႆး- ၾင်ႇထႆး ဢၼ်တိတ်းၸပ်းၵၼ်ဝႆႉ တီႈလၢင်းၶိူဝ်း – မႄႈႁွင်ႈသွၼ်ၼႆႉ တင်းသွင်ၾၢႆႇ ပႆႇယၢမ်ႈဢွၵ်ႇပိူင်မၵ်းမၼ်ႈလႅၼ်ၶႅၼ်ႈမႃးသေပွၵ်ႈ။

ၸင်ႇၼၼ်လႄႈ တႄႇမိူဝ်ႈလဵဝ်ၼႆႉ တင်းသွင်ၸိုင်ႈမိူင်း တၵ်းလူဝ်ႇလႆႈ ဢုပ်ႇဢူဝ်းတူၵ်းလူင်းၵၼ်လီလီသေ လူင်းတႅၵ်ႈၼႃႈလိၼ်ၽႂ်မၼ်းႁႂ်ႈတႅတ်ႈတေႃးလူးၵွၼ်ႇ ၸင်ႇတေၸၢင်ႈမၵ်းမၼ်ႈပဵၼ်တၢင်းၵၢၼ် ။ ၵွၼ်ႇသွင်ၸိုင်ႈမိူင်း ပႆႇတူၵ်းလူင်းသင်ၵၼ်တႅတ်ႈတေႃးၼႆႉ ၾင်ႇမိူင်းတႆးၵေႃႈ တၵ်းလူဝ်ႇ ၸတ်းပွင် သဵၼ်ႈတႃႈသၢႆတၢင်း ႁႂ်ႈပေႃးၶိုတ်းၸွမ်းၵၢပ်ႈၸွမ်းပၢၼ် ။

မိူၼ်ၼင်ႇ ႁူဝ်မိူင်း ဢၼ်မီးၵဵတ်ႉလၢၼ်ႇၶၢမ်ႈမိူင်း တႆး-ထႆး ၼႆႉ ယၢၼ်ၵၼ်တင်းဝဵင်းလၢင်းၶိူဝ်း 150 ၵီႊလူဝ်ႊမီႊတိူဝ်ႊ ပၢႆၵူၺ်း ၽႂ်ဢမ်ႇတွၼ်ႉ ယုၵ်ႉၶိုၼ်ႈ ပဵၼ်ၸၼ်ႉၵူႈမိူင်းမိူင်း တႃႇၵႃႉၶၢႆၶဝ်ႈဢွၵ်ႇၵၼ်ပဵၼ်တၢင်းၵၢၼ်မႃးသေပွၵ်ႈ ။ ၾၢႆႇၼိုင်ႈၵေႃႈ သဵၼ်ႈတႃႈသၢႆတၢင်း ဢၼ်တိတ်းၸမ်းလႅၼ်ႈလိၼ်တႆး-ထႆးၸိူဝ်းၼႆႉ ပႆႇထိုင်တီႈလႆႈပူၵ်းပွင်တဵမ်တီႈမႃး။တိုၵ်ႉ ပဵၼ်ထိူၼ်ႇပဵၼ်ၶိူဝ်းၵူၺ်း ။

တေႃႇထိုင်မိူဝ်ႈလဵဝ် ၶူဝ်တႃႈသူပ်းတဵင်း ဢၼ်ၵၢႆႇပၼ်ၼႂ်းၵႄႈလၢင်းၶိူဝ်း – ႁူဝ်မိူင်း ယင်းပႆႇၶႅမ်ႉလႅပ်ႈ ၊ သဵၼ်ႈတႃႈသၢႆတၢင်းၵေႃႈ မၢင်တီႈၵႂၢင်ႈမၢင်တီႈၵႅပ်ႈ ပႆႇလႆႈယုၵ်ႉမုၼ်းၸွမ်းၼင်ႇလၵ်းၸဵင်သဵၼ်ႈတၢင်းမီးဝႆႉ ။ တႃႇပိုတ်ႇလၢၼ်ႇတႄႉ တေၵိုတ်းထႅင်ႈၵႆယူႇ ၼႆ ၵူၼ်းၸိူဝ်းယၢမ်ႈလတ်းၽၢၼ်ႇၵႂႃႇမႃးလၢတ်ႈၼင်ႇၼႆ ။

သင်ဝႃႈ ၶူဝ်တႃႈသူပ်းတဵင်းၵေႃႈယဝ်ႉတူဝ်ႈ သဵၼ်ႈတၢင်းၵေႃႈ မႄးၶႂၢၵ်ႈမႄးသိူဝ်ႇပူၶႅမ်ႉလႅပ်ႈယဝ်ႉတႄႉ တႃႇပၵ်းလုမ်းၵဵပ်းၶွၼ်ႇ တင်းသွင်ၸိုင်ႈမိူင်းၵေႃႈ လူဝ်ႇႁၢင်ႈႁႅၼ်းထႅင်ႈ ။ တႃႇမၵ်းမၼ်ႈ ႁႂ်ႈၵဵတ်ႉလၢၼ်ႇၼႃးမူၼ်းၼႆႉ ပဵၼ်ၵဵတ်ႉလၢၼ်ႇသွင်ၸိုင်ႈမိူင်းၶဝ်ႈဢွၵ်ႇၵၼ်ပဵၼ်တၢင်းၵၢၼ်ၼႆႉ လၢႆႁွင်ႈၵၢၼ်ၼႂ်းမိူင်းႁူမ်ႈတုမ်မၢၼ်ႈၵေႃႈ ယင်းလူဝ်ႇလႆႈဢုပ်ႇဢူဝ်းတူၵ်းလူင်းၵၼ်လၢႆၶၵ်ႉလၢႆတွၼ်ႈလူးၵွၼ်ႇ ။ ပေႃးဢုပ်ႇၵၼ်ယဝ်ႉ ၸင်ႇၶိုၼ်းမႃးၸႅင်ႈၼႂ်းသၽႃးၶိုၼ်းၼႆ မီးလွင်ႈတုမ်ႉတွပ်ႇၵၼ်ၼႂ်းသၽႃးၼၼ်ႉၼင်ႇၼႆ။

တႃႇပိုတ်ႇ ၵဵတ်ႉလၢၼ်ႇပဵၼ်တၢင်းၵၢၼ်ၼႆႉ ၸၢႆးထုၼ်းၸၢမ်ႇ(ႁိုဝ်) ၸၢႆးသိူဝ်ႁၢၼ် တႅၼ်းၽွင်းၵူၼ်းမိူင်း လၢင်းၶိူဝ်း လၢတ်ႈၼႄဝႆႉၼင်ႇၼႆ –

တႃႇပိုတ်ႇလၢၼ်ႇတီႈႁူဝ်မိူင်းၼႆႉ ဢွၼ်တၢင်းသုတ်းတႄႉ ၶူဝ်တႃႈသူပ်းတဵင်းၼၼ်ႉၼႃႇၼေႃႈ ။ ၶူဝ်ၼႆႉ တႄႇႁဵတ်းမႃးၼႆႉ 2022 ၊ ပီၵၢႆၼႆႉ ပတ်ႉၵျတ်ႉမၼ်းဢမ်ႇလူင်း ၊ ပီၼႆႉ ႁဝ်းတၢင်ႇယွၼ်းသေ လႆႈ 12000 လၢၼ်ႉ ။ ဢၼ်ၼႆႉ ႁဝ်းထၢမ်ၼႂ်းသၽႃးသေ ၶဝ်ၶိုၼ်းတွပ်ႇဝႃႈ ၶူဝ်ၼႆႉ ၶဝ်တေႁဵတ်းႁႂ်ႈမၼ်းယဝ်ႉ ၼႂ်းပီ 2028-2029 ။ ယွၼ်ႉဝႃႈ မၼ်းပဵၼ်သဵၼ်ႈတၢင်းဢၼ်လမ်ႇလွင်ႈတႃႇ ထႆး-မၢၼ်ႈၵပ်းသိုပ်ႇၶဝ်ႈဢွၵ်ႇၸူးၵၼ် ၾၢႆႇပုၼ်ႉၾၢႆႇၼႆႉ ။ ဝႃႈၼႆလႄႈ ပွင်ႇဝႃႈတႄႉ တႃႇပိုတ်ႇၵဵတ်ႇလၢၼ်ႇၼႃးမူၼ်းၼႆႉ မၼ်းမီးႁူဝ်ပၢၵ်ႇတဵမ်ၼႆၼၼ်ႉၵႂႃႈ

သိုပ်ႇလၢတ်ႈဝႃႈ တႃႇမႄးၶႂၢၵ်ႈမႄးသိူဝ်ႇသဵၼ်ႈတၢင်း ၼႂ်းၵႄႈလၢင်းၶိူဝ်း – ႁူဝ်မိူင်း ၸိူဝ်းၼႆႉၵေႃႈ ပတ်ႉၵျတ်ႉ တႅပ်းတတ်းဝႆႉယဝ်ႉ ၊ ၾၢႆႇတင်းမိူင်းထႆးၵေႃႈ တၵ်းတေလႆႈသိူဝ်ႇတၢင်းၶႂၢၵ်ႈတၢင်း ထိုင်တီႈလႅၼ်လိၼ်ဢၼ်တိတ်းၸပ်းၵၼ် ဢၼ်လုၵ်ႉမႄႈႁွင်ႈသွၼ်ထိုင် လၢၼ်ႇႁူၺ်ႈၽိုင်ႈ ၸိူဝ်းၼႆႉ ။ ၸင်ႇၼၼ်လႄႈ ပဵၼ်ၽႅၼ်ၵၢၼ်ၶၢဝ်းယၢဝ်း ႁႂ်ႈပေႃးလၢတ်ႈၵမ်းလဵဝ် လႆႈၵမ်းလဵဝ်တႄႉ ပႆႇၸႂ်ႈဝႃႈၼႆ။

လိူဝ်သေ တူၵ်းလူင်းၵၼ်တင်းသွင်ၸိုင်ႈမိူင်း လူင်ပွင်ၸိုင်ႈထႆး-မၢၼ်ႈၵူၺ်းပႆႇယဝ်ႉ တၵ်းလူဝ်ႇဢုပ်ႇဢူဝ်းတူၵ်းလူင်းၵၼ်တင်းၸုမ်းယိပ်းၵွင်ႈၵၢင်ႇၸိူဝ်းတူင်ႉၼိုင်ၼႂ်းၵႄႈသဵၼ်ႈတၢင်းလႄႈဢွင်ႈတီႈၸိူဝ်းၼႆႉ ။

ၵဵဝ်ႇလူၺ်ႈလွင်ႈၼႆႉ ၸၢႆးသိူဝ်ႁၢၼ် တႅၼ်းၽွင်းၵူၼ်းမိူင်း သိုပ်ႇလၢတ်ႈၼင်ႇၼႆ –

ဢၼ်ၸုမ်းယိပ်းၵွင်ႈၵၢင်ႇၼႆ မိူၼ်ၼင်ႇ တီႈႁူဝ်မိူင်းၵေႃႈ တေမီးပျီႇတူႉၸိတ်ႉ SSS ၸုမ်းၸဝ်ႈမႁႃႇၵျႃႇၶဝ် ။ ပိူၼ်ႈၵေႃႈ ယူႇမႃးႁိုင်ယဝ်ႉ ။30 ပီယဝ်ႉ ၵူၺ်းၼႃႇ ၶဝ်ၵေႃႈ ၶႂ်ႈႁႂ်ႈၶိုတ်းၵၢပ်ႈမႃး ။ မိူၼ်ၸိူင်ႉၼင်ႇဝႃႈ ၵႃႉၶၢႆၵၼ်လွတ်ႈလွတ်ႈလႅဝ်းလႅဝ်း ၊ ၶဝ်ၵေႃႈ ၽွမ်ႉယူႇၶႃႈ။ တႃႇပိုတ်ႇၵဵတ်ႉပဵၼ်တၢင်းၵၢၼ်ၼႆႉ ၶဝ်ၵေႃႈႁၼ်လီၸွမ်းႁဵတ်းၼႆဢေႃႈ

သိုပ်ႇလၢတ်ႈဝႃႈ ပေႃးမီးၵဵတ်ႉလၢၼ်ႇပဵၼ်တၢင်းၵၢၼ်ၼႆ ၶွၼ်ႇၵူႈလွင်ႈလွင်ႈၵေႃႈ ၸၢင်ႈၶဝ်ႈၸိုင်ႈမိူင်းပဵၼ်တၢင်းၵၢၼ် တေမီးၶွပ်ႇမီးပိူင် ၊ သင်ဝႃႈ ဢမ်ႇမီးၶွပ်ႇမီးပိူင် တေႃႉၵုၼ်ႇတေႃႉၶူဝ်းၸိူဝ်းၼႆႉ ပေႃးၸုမ်းပႂ်ႉမၼ်း ၵဵပ်းၼမ်ၵေႃႈ ၶၼ်ၵုၼ်ႇတေၶိုၼ်ႈသုင် ၊ ပေႃးၸုမ်းပႂ်ႉတၢင်း ၵဵပ်းဢေႇၵေႃႈ ၶၼ်ၵုၼ်ႇသႃႇဢိတ်းၼိုင်ႈ ၊ ပွင်ႇဝႃႈ ၶၼ်ၵုၼ်ႇၵေႃႈ ယူႇတီႈသူပ်းတီႈၵႂၢမ်းၵူၼ်းပႂ်ႉတၢင်းၵူၺ်း ။ သင်ဝႃႈ မီးၵဵတ်ႉဢၼ်ၸွမ်းပၵ်းၸွမ်းပိူင်ယဝ်ႉတႄႉ ၶၼ်ၵုၼ်ႇၵေႃႈ တေၼိမ်ၵူၼ်းမိူင်းၵေႃႈလႆႈလူမ်ၸႂ် ဝႃႈၼႆ။

ၼၢႆးၽႃႊၼဝတ်ႊ တူဝ်ႊဝိၸိတ်ႇ ၾၢႆႇၵႃႉၸွမ်းလႅၼ်လိၼ်တီႈမႄႈႁွင်ႈသွၼ်တႄႉ လၢတ်ႈဝႃႈ – “ သင်ဝႃႈ ပိုတ်ႇပဵၼ်တၢင်းၵၢၼ်တေႉတႄႉ မၼ်းၵေႃႈ တိုၼ်းမီးၽွၼ်းလီတေႃႇၵူၼ်းမိူင်းတင်းသွင်ၾင်ႇယူႇ။ ၵူၺ်းၵႃႈ ၼႂ်းၵႄႈၼႆႉ လူင်ပွင်ၸိုင်ႈတင်းသွင်ၾင်ႇ တေတူၵ်းလူင်းၵၼ်ၸိူင်ႉႁိုဝ်ၼႆတႄႉ လူဝ်ႇလႆႈပႂ်ႉတူၺ်းငဝ်းလၢႆးယူႇ ” – ဝႃႈၼႆ။

ၼႂ်းၸႄႈတွၼ်ႈမႄႈႁွင်ႈသွၼ်ၼႆႉ ဢၼ်တင်ႈၵဵတ်ႉလၢၼ်ႇၸူဝ်ႈၶၢဝ်း ၵႃႉၶၢႆၸွမ်းလႅၼ်လိၼ်ယူႇၼႆႉ မီး 5 တီႈ ၊ 1)ၵဵတ်ႉဢၼ်မီးတီႈဝၢၼ်ႈႁူၺ်ႈၽိုင်ႈ ဢိူင်ႇႁူၺ်ႈၽႃ 2)ဝၢၼ်ႈၼမ်ႉပဵင်းလိၼ် ဢိူင်ႇၽႃပွင်ႇ 3)ဝၢၼ်ႈႁူၺ်ႈတူၼ်ႈၼုၼ်ႉ ဢိူင်မႄႈငဝ်း ဝဵင်းၶုၼ်ယူမ်း 4)ဝၢၼ်ႈသဝ်ႁိၼ် ဢိူင်ႇမႄႈသလဵင်း 5) ဝၢၼ်ႈသၢမ်လႅပ်ႉ ဢိူင်ႇသၢမ်လႅပ်ႉ ဝဵင်းသူပ်းမိူၺ်း ။

မိူဝ်ႈဢွၼ်တၢင်း သဵၼ်ႈတၢင်း ဢၼ်တေႃႇၵၼ်တင်းဝၢၼ်ႈႁူၺ်ႈတူၼ်ႉၼုၼ်ႉၾင်ႇထႆး လႄႈ မႄႈၸႄႉ ၾင်ႇမိူင်းယၢင်းလႅင်ၼၼ်ႉ မီးတိုဝ်ႉတၢင်းတႃႇပိုတ်ႇၵဵတ်ႉလၢၼ်ႇပဵၼ်တၢင်းၵၢၼ်သွင်ၸိုင်ႈမိူင်းၼမ်လိူဝ်သေ တီႈႁူဝ်မိူင်းၼႆႉ ။ ၵူၺ်းၵႃႈ ဢိင်ၼိူဝ် ၵၢၼ်သိုၵ်းၵၢၼ်မိူင်းယုင်ႈလႄႈ ဢမ်ႇၸၢင်ႈပဵၼ်။

တႃႇပိုတ်ႇၵဵတ်ႉလၢၼ်ႇလႅၼ်လိၼ်တႆး-ထႆးၼႆႉ ၾၢႆႇသိုၵ်းဝႃႉ UWSA ၵေႃႈ ၽွင်းၵႂႃႇထူပ်းသိုၵ်းမၢၼ်ႈၼေႇပျီႇတေႃႇ လိူၼ်ဢေႃႊၵတ်ႉသ် ဝၼ်းတီႈ 3-4 ၼၼ်ႉ ဢဝ်ဢုပ်ႇဢူဝ်းၸွမ်း ။ ဢၼ်ၶဝ်ယိူင်းဢၢၼ်းၶႂ်ႈႁႂ်ႈပိုတ်ႇတႄႉ ပဵၼ်ၵဵတ်ႉလၢၼ်ႇ BP1 ဢၼ်မီးၼႂ်းၸႄႈဝဵင်းပုင်ႇပႃႇၶႅမ် ပွတ်းတၢင်းမိူင်းတူၼ် ၸိုင်ႈတႆးပွတ်းဢွၵ်ႇ ဝႃႈၼႆ ။