ဝၼ်းတီႈ 14/02/2026 ၸုမ်းလုၵ်ႈႁဵၼ်း တီႈႁူင်းႁဵၼ်းႁွင်ႈသွၼ်သိုၵ်ႇသႃ ဢၼ်ၶဝ်ႈပႃးၼႂ်းၶူင်းၵၢၼ်ၶုၼ်ႁေႃၶမ်းတူၺ်းလူၸွႆႈ ထႅမ်ဝႆႉ ၼႂ်းဝဵင်းမႄႈႁွင်ႈသွၼ်(โรงเรียนห้องสอนศึกษา ในพระอุปถัมภ์ฯ จ.แม่ฮ่องสอน) လႆႈၵႂႃႇၶဝ်ႈၶေႉၶဵင်ႇႁွင်ႉၽဵင်းၵႂၢမ်းထႆး လုၵ်ႈထုင်ႉ ၼႂ်းႁူဝ်ၶေႃႈ “ထိူဝ်ႊၶိုဝ်ႊၻူင်ႊၵျႆႊ เธอคือดวงใจ ” လႄႈ “ၵူဝ်ႊၻမ်ႊ โกดำ” မီးပႃးၸိူင်းတၢင်းၵႃႈၸွမ်း တီႈလၢႆးၵၢၼ် ၶျိင်ႊၶျႃႊသဝၼ်ႊ ชิงช้าสวรรค์ (ဢွၵ်ႇလၢႆးၵၢၼ်ၵူႈ ဝၼ်းသဝ် ၶၢဝ်းယၢမ်းဝၢႆးဝၼ်း 3 မူင်း 45 မိၼိတ်ႉ) တီႈၶျွင်ႉဝွၵ်ႉၽွႆႉ (Work Point) ထီႊဝီႊထႆး။
လုၵ်ႈႁဵၼ်းၸုမ်းၼႆႉ သႂ်ႇသိူဝ်ႈၶူဝ်းတႆး လႄႈ ၾိင်ႈထုင်းတႆး ပဵၼ်ငဝ်ႈၶၢမ်ႇပိုၼ်ႉမၼ်းသေ ၶိုၼ်းမႄးတႅင်ႇႁၢင်ႈႁႂ်ႈမၼ်းၶဝ်ႈၵၼ်တင်း တၢင်းၵႃႈၼႂ်းၽဵင်းၵႂၢမ်း။ ႁွင်ႉၵႂၢမ်းတႆးပႃးတွၼ်ႈၼိုင်ႈ ဢဝ်တၢင်းၵႃႈတူဝ်းလႄႈ ၼူၵ်ႉၵိင်ႇၵလႃႇ မႃးပိုတ်ႇပၢင်ပႃး။ ၸုမ်းတၢင်းၵႃႈၼႆႉ ဢွင်ႇပေႉၸုမ်းၵူႈၶႅင်ႇသေဢမ်ႇၵႃး ဢွင်ႇပေႉပႃးတႃႇၶဝ်ႈႁွပ်ႈႁိမ်တီႈယူႇ Semifinal Round ။
ပိူဝ်ႈတႃႇလႆႈႁပ်ႉသူးၵွၵ်းၶမ်း ၼႂ်းတွၼ်ႈၵၢၼ်ၶေႉၶဵင်ႇ ပီ 2026 ၼႆႉ ႁူင်းႁဵၼ်းၼႂ်းမိူင်းၸိုင်ႈထႆး 10 တီႈၸိူဝ်းဢွင်ႇပေႉၵူႈၶႅင်ႇမႃး ၼႂ်းလၢႆးၵၢၼ်ၼၼ်ႉ တေလႆႈၶိုၼ်းမႃးၶႅင်ႇၵၼ်ထႅင်ႈၵမ်းၼိုင်ႈ။
ဢၼ်ဢွင်ႇပေႉၶဝ်ႈႁွပ်ႈၵႂႃႇၵမ်းၼႆႉ ၸုမ်းလုၵ်ႈႁဵၼ်းမႄႈႁွင်ႈသွၼ်လႆႈႁပ်ႉသူးၵႂႃႇပႃး ငိုၼ်းၼိုင်ႈမိုၼ်ႇဝၢတ်ႇ ။
ၸွမ်းၼင်ႇပိူင်ပေႃႇလသီႇလၢႆးၵၢၼ်ၼႆႉတႄႉ ၽူႈဢွင်ႇပေႉတေလႆႈသိုပ်ႇၶေႉၶဵင်ႇထႅင်ႈ 2 ၵမ်း။ သင်ဝႃႈဢွင်ႇပေႉထႅင်ႈတင်း 2 ၵမ်းၸိုင် တေလႆႈသူးၵွၵ်းၶမ်း လႄႈငိုၼ်းသူး ဢၼ်ၸဝ်ႈၼၢင်းသီႇရိထွၼ်း (ၼွင်ႉယိင်းၸဝ်ႈမုၼ်ယႂ်ႇၶုၼ်ႁေႃၶမ်းထႆးယၢမ်းလဵဝ်) ယိုၼ်ႈမႅင်ႇပၼ်။
ၸွမ်းၼင်ႇပိူင်လၢႆးၵၢၼ်ၼႆႉတႄႉ – ဢၼ်ၸုမ်းလုၵ်ႈႁဵၼ်းမႃးၶေႉၶဵင်ႇၼႆႉ တေလႆႈပဵၼ်လုၵ်ႈႁဵၼ်းၸၼ်ႉသုင် ။ ၼိုင်ႈၸုမ်းၼႆႉ ၵူၼ်းတွႆႇတိုင်ႈ ၵူၼ်းၵႃႈ လႄႈၵူၼ်းႁွင်ႉၵႂၢမ်းႁူမ်ႈၵၼ် တေလႆႈမီးလုၵ်ႈၸုမ်းဢမ်ႇယွမ်း 30 ၵေႃႉ။ တေလႆႈမီး ၸုမ်းတွႆႇတိုင်ႈႁင်းၵူၺ်း၊ ႁွင်ႉၽဵင်းၵႂၢမ်းသဵင်ဝၢၼ် ၊ တၢင်းၵႃႈၵေႃႈတေလႆႈၶႅမ်ႉ၊ ၶူဝ်းၼုင်ႈတၢင်းဝႆ လွင်ႈႁဵတ်းႁၢင်ႈႁဵတ်းၾၢင်ၵေႃႈ တေပဵၼ်ၸွမ်းၾိင်ႈထုင်းသေ တေလႆႈၶိုတ်းၵၢပ်ႈပၢၼ်။ တၢင်းယၢဝ်းၽဵင်းၵႂၢမ်းတေလႆႈမီး ၼႂ်းၵႄႈ 7 မိၼိတ်ႉထိုင် 12 မိၼိတ်ႉ။
ႁူဝ်ပီ 2026 ၼႆႉတေပဵၼ် လွင်ႈၶေႉၶဵင်ႇႁွပ်ႈႁႅၵ်ႈ ပိုတ်ႇဝူင်း(Opening Round)။ ပေႃးဢွင်ႇပေႉ တေလႆႈၶဝ်ႈၶေႉၶဵင်ႇထႅင်ႈႁွပ်ႈ ႁိမ်တီႈယူႇ(Semifinal Round) ။
ၼႂ်းႁွပ်ႈ Semifinal Round ၼႆႉ တေမီး 10 ၸုမ်း ဢၼ်တေလႆႈၶေႉၼႂ်းၽဵင်းၵႂၢမ်းထိူင်းလႄႈၽဵင်းၵႂၢမ်းဝႆး။ တေလႆႈၶေႉၶဵင်ႇ ႁႂ်ႈပေႃးဢွင်ႇပေႉ တေႃႇပေႃးၵိုတ်း 3 ႁူင်းႁဵၼ်း။
လိုၼ်းသုတ်း 3 ႁူင်းႁဵၼ်းၼၼ်ႉ တေလႆႈၶေႉၶဵင်ႇၵၼ် ႁွပ်ႈလိုၼ်းသုတ်း ( Grand Final) သေ တေမီးႁူင်းႁဵၼ်းလဵဝ် ဢၼ်ၶႅမ်ႉသုတ်းဢွင်ႇပေႉလႆႈထိၼိုင်ႈ တႃႇႁပ်ႉၵွၵ်းၶမ်း ဢၼ်ၸဝ်ႈၼၢင်းသီႇရိထွၼ်း ယိုၼ်ႈမႅင်ႇ။
တူၺ်းလၢႆးၵၢၼ်တၢင်းၵႃႈ လွင်ႈႁွင်ႉၽဵင်းၵႂၢမ်း ၸုမ်းလုၵ်ႈႁဵၼ်းႁူင်းႁဵၼ်းမႄႈႁွင်ႈသွၼ် တဵၵ်းတူၺ်းတီႈၼႆႉ- https://www.facebook.com/reel/1850683315646521
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ