မိူဝ်ႈဝၼ်းတီႈ 23/6/2026 ၸုမ်းၶူၼ်ႉၶႂႃႉၶေႃႈမုၼ်း လွင်ႈမိူင်းႁူမ်ႈတုမ် ISP-Myanmar ႁၢႆးငၢၼ်းဝႃႈ ပီ 2026-2027 ၼႆႉ ယွၼ်ႉလွင်ႈတၢင်းၵူႈလွင်ႈလွင်ႈသေ လုၵ်ႈဢွၼ်ႇႁဵၼ်း တႃႇ 6.3 လၢၼ်ႉၵေႃႉပၢႆ လႆႈၸုၼ်ႉပွႆႇႁၢင်ႇၵႆယၢၼ်ၵၼ်တင်းႁူင်းႁဵၼ်းဝႆႉ ဝႃႈၼႆ။

ပီၵၢၼ်ႁဵၼ်း 2026-2027 ၼႆႉ လုၵ်ႈဢွၼ်ႇၸိူဝ်းၵႂႃႇသႂ်ႇသဵၼ်ႈမၢႆ တႃႇႁဵၼ်းသွၼ်လိၵ်ႈ မီးယူႇ 6.7 လၢၼ်ႉၵူၺ်း ပေႃးတႅၵ်ႈၵၼ်တင်း ပီပူၼ်ႉမႃးၸိုင် လႆႈဝႃႈ လိူဝ်မႃးယူႇမွၵ်ႈ 6 သႅၼ် ၵေႃႉသေတႃႉ ၸွမ်းၼင်ႇၶေႃႈမုၼ်း ပီၵၢၼ်ႁဵၼ်း 2019 လႄႈ 2024 ၸိုင် လုၵ်ႈဢွၼ်ႇၸိူဝ်းမီးသုၼ်ႇႁဵၼ်းသွၼ်လိၵ်ႈ ၼၼ်ႉ မီးယူႇႁိမ်းႁွမ်း 13 လၢၼ်ႉၵေႃႉပၢႆ ဝႃႈၼႆ။

ယွၼ်ႉပၢင်တိုၵ်းသိုၵ်းသိူဝ်သေ လုၵ်ႈဢွၼ်ႇႁဵၼ်းၵမ်ႈၼမ်ၵုမ်ႇလႆႈငိူင်ႉပၢႆႈၽေးသိုၵ်း ႁူပ်ႉတၢင်းယၢပ်ႇ တႃႇဢဝ် ဝႂ်ၶၢႆႉႁူင်းႁဵၼ်း ၾၢႆႇၼိုင်ႈၵေႃႈ ၵႃႈၶၼ်ၶူဝ်းၵုၼ်ႇပုင်ႈၶိုၼ်ႈသုင်ႁႅင်းတိၵ်းတိၵ်းသေ ပေႃႈမႄႈဢမ်ႇမီးငိုၼ်းတွင်းႁဵတ်းႁႃၵိၼ်ယၢပ်ႇ လႆႈတေႃႇသူႈၸွမ်းၵၢၼ်ႁႃၵိၼ်လဵင်ႉတွင်ႉလႄႈ ႁဵတ်းႁႂ်ႈလုၵ်ႈဢွၼ်ႇႁူပ်ႉတၢင်းယၢပ်ႇၽိုတ်ႇ ၼႂ်းၵၢၼ်ႁဵၼ်းၼႆ ၸုမ်းၶူၼ်ႉၶႂႃႉ ၶေႃႈမုၼ်း လွင်ႈမိူင်းႁူမ်ႈတုမ် ႁၢႆးငၢၼ်းဝႆႉၼင်ႇၼႆ။

ၸွမ်းၼင်ႇၽိုၼ်လိၵ်ႈႁၢႆးငၢၼ်း လူင်ပွင်ၸိုင်ႈၵူၼ်းမိူင်း NUG ပိုၼ်ၽၢဝ်ႇဝႆႉၼၼ်ႉတႄႉ ပီၵၢၼ်ႁဵၼ်း 2023-2024 ပူၼ်ႉမႃးၼၼ်ႉ ႁူဝ်ၼပ်ႉလုၵ်ႈဢွၼ်ႇၸိူဝ်းႁဵၼ်းသွၼ်လိၵ်ႈမီးယူႇ 727,860 ၵေႃႉၼႆသေတႃႉ တွၼ်ႈတႃႇပီၵၢၼ်ႁဵၼ်းပီၼႆႉတႄႉ ဢမ်ႇပႆႇႁၼ်ပိုၼ်ၽၢဝ်ႇသဵၼ်ႈမၢႆဢွၵ်ႇမႃး။

ၸုမ်းၶူၼ်ႉၶႂႃႉၶေႃႈမုၼ်း လွင်ႈမိူင်းႁူမ်ႈတုမ် ထတ်းသၢင်ၼႄလွင်ႈၵၢၼ်ႁဵၼ်း ပၢႆးပၺ်ႇၺႃႇမိူင်းႁူမ်ႈတုမ် (မိူင်းမၢၼ်ႈ) ဝႆႉဝႃႈ တွၼ်ႈတႃႇပၢႆးပၺ်ႇၺႃႇ မိူင်းႁူမ်ႈတုမ် တေၶိုတ်းၸၼ်ႉ ၶိုၼ်ႈသုင်မႃးထႅင်ႈလိူဝ်ၵဝ်ႇၼၼ်ႉ ဢမ်ႇပႆႇႁၼ်ငဝ်းလၢႆးမၼ်းတိုဝ်ႉတၢင်းမၼ်းလႃးလႃး ၼႆယဝ်ႉ။