မိူဝ်ႈဝႃးဝၼ်းတီႈ 20/04/2026 သိုၵ်းမၢၼ်ႈဢဝ်ႁိူဝ်းမိၼ်ပိုတ်းယိုဝ်းသိုၵ်းယၢင်း KNU တီႈလႅၼ်လိၼ် ယၢင်း- ထႆး ႁဵတ်းႁႂ်ႈမၢၵ်ႇလူင် တူၵ်းသႂ်ႇၼႂ်းလိၼ်ထႆးလႄႈ လူင်ပွင်ၸိုင်ႈထႆး သိုၵ်းထႆးသင်ႇၵူၼ်းဝၢၼ်ႈၸွမ်းလႅၼ်လိၼ်ထႆး ၶၢႆႉတီႈယူႇ။
ၶၢဝ်းယၢမ်းၵၢင်ၼႂ်မွၵ်ႈ 10 မူင်း 45 မိၼိတ်ႉ သိုၵ်းမၢၼ်ႈဢဝ်ႁိူဝ်းမိၼ်မႃးပွႆႇမၢၵ်ႇသႂ်ႇတီႈၾင်ႇၼမ်ႉၶူင်း ၼႂ်းၸႄႈဝဵင်းၽူးထူဝ်ႇ ၸႄႈတွၼ်ႈမူႇတရေႃး မိူင်းယၢင်းၽိူၵ်ႇ (ဢၼ်မီးတေႃႇၼႃႈဝၢၼ်ႈမႄႈသၢမ်လႅပ်ႈ ဝဵင်းသူပ်းမူၺ်း ၸႄႈတွၼ်ႈမႄႈႁွင်ႈသွၼ်)။ မၢၵ်ႇလူင်တူၵ်း ဢမ်ႇယွမ်း 9 လုၵ်ႈ တူၵ်းသႂ်ႇႁိမ်းဝၢၼ်ႈ ဢူးမႄႈထႃး ။ တႃႇလုၵ်ႈၼိုင်ႈ တူၵ်းသႂ်ႇႁိမ်းၾင်ႇၼမ်ႉၶူင်း ႁိမ်းၸမ်ဝၢၼ်ႈမႄႈဝႅၼ် ဢိူင်ႇမႄႈယူမ်း ဝဵင်းမႄႈသရဵင်း ၸႄႈတွၼ်ႈမႄႈႁွင်ႈသွၼ် ၾင်ႇမိူင်းထႆး ။
ၽူႈၵွၼ်းဢိူင်ႇသၢမ်လႅပ်ႈ လူင်းပိုၼ်ႉတီႈသင်ႇႁႂ်ႈၵူၼ်းဝၢၼ်ႈ ဢွၼ်ၵၼ်ၶၢႆႉပၢႆႈၽေးသိုၵ်း။ တေႃႉဢဝ်ၵူၼ်းဝၢၼ်ႈၵႂႃႇဝႆႉတီႈ ႁူင်းႁဵၼ်းလုၵ်ႈဢွၼ်ႇလဵၵ်ႉၼႂ်းဢိူင်ႇသၢမ်လႅပ်ႈ။ ၵူၼ်းဝၢၼ်ႈၵမ်ႈၽွင်ႈလူင်းယူႇၼႂ်းလုၵ်းပဵမ်ႇ။ ၾၢႆႇႁူမ်ႇလူမ်ႈပိုၼ်ႉတီႈမိူင်းထႆး လႆႈၵႂႃႇၸွႆႈဢဝ်ဢွၵ်ႇမႃးသူင်ႇဝႆႉတီႈလွတ်ႈၽေး။
လွင်ႈၼႆႉလူင်ပွင်ၸိုင်ႈထႆး ပိုၼ်ၽၢဝ်ႇငဝ်းလၢႆးၶိုၵ်ႉၶၵ်ႉၼႂ်းၸႄႈတွၼ်ႈမႄႈႁွင်ႈသွၼ်သေ သင်ႇႁႂ်ႈၾၢႆႇႁူမ်ႇလူမ်ႈၼႂ်းၸႄႈတွၼ်ႈ ၵဵင်းႁၢႆး၊ ၵဵင်းမႂ်ႇ၊ တၢၵ်ႇ၊ မႄႈႁွင်ႈသွၼ် 4 ၸႄႈတွၼ်ႈ ႁႂ်ႈလူင်းပိုၼ်ႉတီႈသေ ပႂ်ႉၸွႆႈထႅမ်ၵူၼ်းမိူင်းထႆးၸိူဝ်းယူႇၸွမ်းသၢပ်ႇၼမ်ႉလႅၼ်လိၼ်။ ပႂ်ႉတူၺ်းငဝ်းလၢႆးဝႆႉ 24 ၸူဝ်ႈမူင်း ။ ႁႂ်ႈပႂ်ႉၵူတ်ႇထတ်းၵူၼ်းၶဝ်ႈ/ဢွၵ်ႇၸွမ်းၵဵတ်ႉ/လၢၼ်ႇ။ ႁႂ်ႈၸုမ်းႁူမ်ႇလူမ်ႈလဵပ်ႈၼႂ်းဝၢၼ်ႈၼႂ်းဢိူင်ႇ။ ႁႂ်ႈပႂ်ႉဝႆႉတီႈၽၵ်းတူၸွမ်းလႅၼ်လိၼ် ၼႂ်းၸႄႈတွၼ်ႈမႄႈႁွင်ႈသွၼ် လီငၢမ်းၼႅၼ်ႈၼႃ။
လိူဝ်ၼၼ်ႉ ႁႂ်ႈလူင်းၸွႆႈထႅမ်ပၼ်ၵူၼ်းမိူင်းၸွမ်းလႅၼ်လိၼ်၊ ႁႂ်ႈၸွႆႈၶဝ်ႈၼမ်ႉတၢင်းၵိၼ်လႄႈ ယႃႈယႃ။ ဢိၵ်ႇပႃးတႃႇပူၵ်းပွင်ၶိုၼ်းတီႈယူႇတၼ်းသဝ်းလႄႈႁိူၼ်းယေး ဝၢၼ်ႈသူၼ်။
ႁႂ်ႈသူင်ႇမေႃယႃတႃႇပႂ်ႉတူၺ်းၸွႆႈထႅမ် ယူတ်းယႃပၼ်ၵူၼ်းဝၢၼ်ႈၵူၼ်းမိူင်းၸိူဝ်းမၢတ်ႇၸဵပ်း- ၼႆၸိူဝ်းၼႆႉ။
ပၢင်တိုၵ်းတီႈလႅၼ်လိၼ်ထႆးၼႆႉ သိုၵ်းမၢၼ်ႈဢဝ်ႁိူဝ်းမိၼ်မႃးပွႆႇမၢၵ်ႇဢမ်ႇထၢတ်ႇ ၶႂ်ႈဝႃႈမီးမွၵ်ႈၼိုင်ႈဝူင်ႈယဝ်ႉ။ ဝၼ်းတီႈ 20/04/2026 ၼႆႉ ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ဢၼ်ၶိုၼ်ႈပဵၼ်ၸွမ်ၸိုင်ႈ ၸိုင်ႈမိူင်းႁင်းၵူၺ်းၼၼ်ႉ ၸင်ႇႁႃ ပိုၼ်ၽၢဝ်ႇႁွင်ႉႁႂ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း လႄႈ PDF တႃႇဢုပ်ႇဢူဝ်းလွင်ႈငမ်းယဵမ်ယူႇ ။ ထိုင်မႃးဝၼ်းတီႈ 21/04/2026 သိုၵ်းမၢၼ်ႈၵေႃႈဢဝ်ႁိူဝ်းမိၼ်ပွႆႇမၢၵ်ႇသႂ်ႇဝၢၼ်ႈသူၼ်ႁိူၼ်းယေးၵူၼ်းမိူင်း ထိုင်တီႈတူၵ်းၶဝ်ႈၼႂ်းလိၼ်ထႆး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ