ႁၢင်လိူၼ်မေႊၼႆႉ လူင်ပွင်ၸိုင်ႈထႆး ပိုၼ်ၽၢဝ်ႇပိုတ်ႇၶိုၼ်းလၢၼ်ႇၵႃႉၶၢႆ လႅၼ်လိၼ် ထႆး-မၢၼ်ႈ လၢႆလၢႆတီႈ မိူၼ်ၼင်ႇ လၢၼ်ႇၵႃႉၶၢႆ မၢႆ 2 တီႈမျႃႉဝတီႇ – မႄႈသွတ်ႇ လႄႈလၢၼ်ႉၵႃႉၶၢႆ ၽၵ်းတူလႅၼ်လိၼ် ႁူၺ်ႈၽိုင်ႈ မႄႈႁွင်ႈသွၼ် ၼႃးမူၼ်းၸိူဝ်းၼႆႉ။

လၢၼ်ႇၵႃႉၶၢႆ မျႃႉဝတီႇ – မႄႈသွတ်ႇၼႆႉ ပိုတ်ႇၶိုၼ်းၼႂ်းဝၼ်းတီႈ 28/05/2026 ၼႆႉ ။

ယွတ်ႈၽူၼ်း ဝိၶျယႃးၵုၼ်း ၾၢႆႇၵဵပ်းၶွၼ်ႇ လၢၼ်ႇမႄႈသွတ်ႇလၢတ်ႈဝႃႈ – ပိုတ်ႇလၢၼ်ႇၵမ်းၼႆႉ ဝူၼ်ႉဝႃႈ တေယုၵ်ႉမုၼ်း ၸွႆႈၵၢၼ် ၵႃႉၶၢႆလႅၼ်လိၼ်လီငၢမ်းယူႇ။ ၾၢႆႇတၢင်းၵၢၼ်ၵႃႉၶၢႆလႄႈၵဵပ်းၶွၼ်ႇၾၢႆႇမၢၼ်ႈ ၵပ်းသိုပ်ႇမႃးတႃႇႁႂ်ႈပိုတ်ႇလၢၼ်ႇၶိုၼ်းၼႆလႄႈ ၸင်ႇလႆႈ ၸႂ်ၵၼ်သေပိုတ်ႇၶိုၼ်းဢေႃႈ။ ပိုတ်ႇယဝ်ႉၼႆသေတႃႉၵေႃႈပႆႇၶိုၼ်းမိူၼ်ၵဝ်ႇႁူဝ်ပၢၵ်ႇတဵမ်ၼင်ႇၵဝ်ႇ။ လွႆးလွႆး တေတဵမ်ထူၼ်ႈမႃးၶိုၼ်း ယူႇၵႂႃႈ – ဝႃႈၼႆ။

လၢၼ်ႇလႅၼ်လိၼ် မႄႈသွတ်ႇ- မျႃႉဝတီႇ မၢႆ 2 ၼႆႉ တႄႇပိၵ်ႉမႃးမိူဝ်ႈ လိူၼ်ထူၼ်ႈ 8 ပီၵၢႆ။ ယွၼ်ႉလွင်ႈပိၵ်ႉလၢၼ်ႇၼႆႉသေ ႁဵတ်းႁႂ်ႈၵၢၼ်ၵႃႉၶၢႆလူတ်းယွမ်းလူင်းၵႂႃႇ 50 % ။ ယၢမ်းလဵဝ်ၵေႃႈ ၼႃႈလၢၼ်ႇၼႆႉ ပဵၼ်ရူတ်ႉၵႃးတၢင်ႇၵုၼ်ႇ ၵိုတ်းၸွတ်ႇဝႆႉတႃႇၶၢမ်ႈ ၶူဝ်သူင်ႇၶူဝ်းဝႆႉယူႇတင်းၼမ် – ၽူႈၵွၼ်းၾၢႆႇၵဵပ်းၶွၼ်ႇလၢတ်ႈၵႂႃႇတီႈၶၢဝ်ႇထႆးဝႆႉၼင်ႇၼႆ။

မိူၼ်ၼင်ႇၼႆ ဝၼ်းတီႈ 26/05/2026 ၼၼ်ႉၵေႃႈ ၸဝ်ႈၼႃႈတီႈသွင်ၾင်ႇၸိုင်ႈမိူင်းလႆႈၸႂ်ၵၼ် ပိုတ်ႇၽၵ်းတူလႅၼ်လိၼ် ၵၢၼ်ၵႃႉၶၢႆပိုၼ်ႉတီႈ တီႈဝၢၼ်ႈႁူၺ်ႈၽိုင်ႈ ဢိူင်ႇႁူၺ်ႈၽႃ မႄႈႁွင်ႈသွၼ်။ ၾင်ႇမိူင်းတႆးပဵၼ်ဝၢၼ်ႈၼႃးမူၼ်း ဝဵင်းႁူဝ်မိူင်း။

ဝိပုၼ်း ဝႅဝ်းပၼ်းတိတ်ႇ ၾၢႆႇၵႂၢမ်းမၼ်ႈၶူင်းလၢတ်ႈပဵၼ်တၢင်းၵၢၼ်ဝႃႈ -ၼိုင်ႈဝူင်ႈ တေပၼ်ရူတ်ႉၵႃးႁပ်ႉသူင်ႇၶူဝ်းၵုၼ်ႇၶဝ်ႈဢွၵ်ႇတႃႇ 6 ဝၼ်း။ တွၼ်ႈၵၢင်ၼႂ် ပၼ်ၵႃးတၢင်ႇၶူဝ်းၵုၼ်ႇၶဝ်ႈဢွၵ်ႇ။ ယၢမ်းၵၢင်ဝၼ်းသမ်ႉတေပၼ်ရူတ်ႉၵႃးမိုဝ်းသွင်ၵျပၼ်ႊ ဢွၵ်ႇ။ ၼိုင်ႈဝၼ်းဢမ်ႇပၼ်ပူၼ်ႉ 40 လမ်း။ ဝၼ်းတိတ်ႉတႄႉ ပၼ်ၵူၼ်းမိူင်းၵႂႃႇမႃးၶဝ်ႈဢွၵ်ႇမိူၼ်ၵဝ်ႇ ၵူၺ်းၵႃႈ ဢမ်ႇပၼ်ၶူဝ်းၵုၼ်ႇၶဝ်ႈဢွၵ်ႇ- ဝႃႈၼႆ။

ပိူင်ဢၼ်ပိုတ်ႇလၢၼ်ႇႁူၺ်ႈၽိုင်ႈၶိုၼ်းၵမ်းၼႆႉ ၾၢႆႇထႆးတေတင်ႈလၢၼ်ႇၵူတ်ႇထတ်းတီႈဝၢၼ်ႈႁွင်ႉႁႅင်ႈထႅင်ႈၵမ်းၼိုင်ႈ။ တႃႇၵူတ်ႇထတ်းၶူဝ်းၵုၼ်ႇလီငၢမ်း ၊ ၼင်ႇႁိုဝ်တေဢမ်ႇမီးလွင်ႈလၵ်ႉသူင်ႇ ယႃႈမဝ်းၵမ် ၶူဝ်းပၢႆႈၶွၼ်ႇ လႄႈၶူဝ်းၽိတ်းမၢႆမီႈၸိူဝ်းၼႆႉ။ လိူဝ်ၼၼ်ႉတေၶတ်းၸႂ်ၵူတ်ႇထတ်း သဵၼ်ႈတၢင်းငဝ်ႈႁၢၵ်ႈလွင်ႈသူင်ႇၶူဝ်းၵုၼ်ႇ ႁူဝ်ယွႆႈ တင်းၵူၼ်းသူင်ႇလႄႈၵူၼ်းႁပ်ႉ ၸိူဝ်းၼႆႉပႃး တႃႇႁႂ်ႈမီးလွင်ႈလွတ်ႈၽေး ၶၢဝ်းယၢဝ်း ဝႃႈၼႆ။