ၽွင်းပၢင်လိူၵ်ႈတင်ႈ မၢၵ်ႇတႅၵ်ႇလၢႆလၢႆတီႈ ၼႂ်းမိူင်းမၢၼ်ႈ မိူၼ်ၼင်ႇတီႈဝဵင်းလိူဝ်ႇ ၊ တီႈဝဵင်းမျႃႉဝတီႇ မိူင်းမွၼ်း လႄႈ ဝဵင်းတႃႈဝၢႆ တိူင်းတၼၢဝ်းသီ ၸိူဝ်းၼႆႉ။

ဝၼ်းတီႈ 28/12/2025 တီႈဝဵင်းလိူဝ်ႇ ၺႃးမၢၵ်ႇလူင်သျွတ်ႉပွႆႇသႂ်ႇ 4 တီႈ။

ႁွင်ႈၵၢၼ်ၶၢဝ်ႇ BBC တႅမ်ႈတၢင်ႇဝႆႉဝႃႈ ၸွမ်ၽွင်းလူင်တိူင်းတႃႈလိူဝ်ႇ ဢူးမဵဝ်းဢွင်ႇ ယိုၼ်ယၼ်လၢတ်ႈဝႃႈ – မၢၵ်ႇလူင်သျွတ်ႉ(ရှော့တိုက်ဒုံး) ၶဝ်ယိုဝ်းမႃး 4 လုၵ်ႈ။ တႃႇ 3 လုၵ်ႈၼႆႉ တူၵ်းသႂ်ႇၼႂ်းၶူးၶွင်းမိူင်းလႄႈဢမ်ႇမီးလွင်ႈမၢတ်ႇၸဵပ်း။ တႃႇလုၵ်ႈၼိုင်ႈတူၵ်းသႂ်ႇၼႂ်းဝဵင်း ဢွင်ႇမျေႇတႃႇၸၢၼ်ႇ လႄႈ တိူဝ်ႈၵူၼ်းမၢတ်ႇၸဵပ်း 2 ၵေႃႉ” ဝႃႈၼႆ။

ၵူၼ်းမၢတ်ႇၸဵပ်းၼၼ်ႉပဵၼ် 2 ၵေႃႉၽူဝ်မေး တိုၵ်ႉၼွၼ်းယူႇ ယၢမ်းၵၢင်ၼႂ်ၸဝ်ႉ။ ၸၢၵ်ႇမၢၵ်ႇတိူဝ်ႉမၢတ်ႇၶေႃႈတိၼ်မေးမၼ်း မၢတ်ႇၸဵပ်းႁႅင်းဝႆႉဝႃႈၼႆသေတႃႉ ၸွမ်ၽွင်းလူင် တိူင်းတႃႈလိူဝ်ႇတႄႉလၢတ်ႈဝႃႈ လွင်ႈမၢၵ်ႇတႅၵ်ႇၼႆႉဢမ်ႇတုမ်ႉတိူဝ်ႉပၢင်လိူၵ်ႈတင်ႈ ဝႃႈၼႆ။

မၢၵ်ႇၼႆႉပဵၼ်ၼမ်ႉမိုဝ်းၽႂ်ႁဵတ်းပွႆႇမႃးတႄႉဢမ်ႇမီးၽႂ်ယိုၼ်ယၼ်လႆႈ။

ၼႃႈတီႈဝဵင်းဢွင်ႇမျေႇတႃႇၸၢၼ်ႇၼႆႉ ပဵၼ်တီႈဢၼ်တူဝ်ၸွမ်ၽွင်းလူင်တိူင်းတႃႈလိူဝ်ႇၶဝ်ႈၶႄႉၶႅင်ႇလိူၵ်ႈတင်ႈဝႆႉလႆႈႁူႉၼင်ႇၼႆ။

မိူဝ်ႈၼႆႉ 28/12/2025 ယၢမ်းၵၢင်ၼႂ်ၸဝ်ႉၼႆႉၼင်ႇၵဝ်ႇ တီႈဝဵင်းတႃႈဝၢႆ တိူင်းတၼၢဝ်းသီ ၵေႃႈမၢၵ်ႇလူင်တူၵ်းသႂ်ႇလုမ်းတိူင်းသိုၵ်းမၢၼ်ႈလႄႈ ၵူၼ်းတၢႆ 2 ၵေႃႉ။ မၢၵ်ႇလူင်ၼႆႉတူၵ်းသႂ်ႇၼႃႈလုမ်းၼၼ်ႉ 5 လုၵ်ႈ။ ၽူႈၵွၼ်းၾၢႆႇၵူတ်ႇထတ်းၵူၼ်းၶဝ်ႈမိူင်း လဝၵ လႄႈ ၽူႈမီးၸၼ်ႉၼႂ်းတပ်ႉသိုၵ်းမၢၼ်ႈၵေႃႉၼိုင်ႈတၢႆထင်တီႈ ဝႃႈၼႆ။

ၵွၼ်ႇၼႃႈပၢင်လိူၵ်ႈတင်ႈဝၼ်းၼိုင်ႈ မိူဝ်ႈဝႃးဝၼ်းတီႈ 27/12/2025 ယၢမ်းၵၢင်ၶမ်ႈသမ်ႉ မၢၵ်ႇတႅၵ်ႇတီႈဝဵင်းမျႃႉဝတီႇ ၸႄႈမိူင်းယၢင်းၽိူၵ်ႇ 5 လုၵ်ႈ မီးၵူၼ်းမၢတ်ႇၸဵပ်း 10 ပၢႆ တၢႆၵေႃႉၼိုင်ႈ။

မၢၵ်ႇၼႆႉတူၵ်းတႅၵ်ႇတီႈ လုမ်းပႃႇတီႇသၢင်ႇသီႈ USDP တီႈၵျွင်းမုၼ်ၸဝ်ႈမွၼ်း၊ တီႈႁူင်းႁဵၼ်း ဢမၵ 6 လႄႈတီႈႁိမ်းၶူဝ်ၶၢမ်ႈလႅၼ်လိၼ်ၸိူဝ်းၼႆႉ ။ ၼႂ်းၼၼ်ႉ ဢၼ်တႅၵ်ႇတီႈလုမ်းပႃႇတီႇသၢင်ႇသီႈ 2 လုၵ်ႈၼၼ်ႉႁႅင်းသုတ်းၼႂ်းၼၼ်ႉ မၢတ်ႇၸဵပ်းၵူၼ်း 10 ၵေႃႉ ။ လုၵ်ႈဢွၼ်ႇယိင်းတၢႆၵေႃႉၼိုင်ႈ – ၵူၼ်းမိူင်းမျႃႉဝတီႇလၢတ်ႈၼင်ႇၼႆ။

ၵွပ်ႈၼႆလႄႈ တီႈဝဵင်းမျႃႉဝတီႇၼႆႉ တေႃႇထိုင်ၼႂ်ၼႆႉယၢမ်းၵၢင်ၼႂ် ငဝ်းလၢႆးပၢင်လိူၵ်ႈတင်ႈၼႆႉ ဢမ်ႇမီးလွင်ႈႁူမ်ႇလူမ်ႈ။ ၵူၼ်းမိူင်းတိုၵ်ႉမီးလွင်ႈၵူဝ်ႁႄယူႇ။ ၼႂ်းဝဵင်းၵေႃႈဢမ်ႇမီးလွင်ႈၵတ်းယဵၼ်ၼိမ်သဝ်းသေ သိုၵ်း/ပလိၵ်ႈမၢၼ်ႈၵႂႃႇမႃးၶဝ်ႈဢွၵ်ႇ ပွၵ်ႉၼိုင်ႈယဝ်ႉပွၵ်ႉၼိုင်ႈဝႃႈၼႆ။

ပၢင်လိူၵ်ႈတင်ႈဝၼ်းမိူဝ်ႈၼႆႉၸတ်းႁဵတ်းတီႈဝဵင်းမျႃႉဝတီႇ၊ ဝဵင်းၽႃဢၢင်ႇ လႄႈ ဝဵင်းတၢၼ်ႇတွင်ႇၵျီးၸိူဝ်းၼႆႉပႃး။