ယွၼ်ႉမၢၵ်ႇမႅင်းၾင်လိၼ်လိူင်ႇၼမ် ၵူၼ်းပၢႆႈၽေးသိုၵ်းၸိူဝ်းပွၵ်ႈယူႇၶိုၼ်းႁိူၼ်း တီႈဝၢၼ်ႈသွင်းပျွင်း ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ဢမ်ႇၸၢင်ႈႁဵတ်းႁႃၵိၼ်လဵင်ႉတွင်ႉ ယၢပ်ႇၽိုတ်ႇၵိၼ်းၸႂ်ဝႆႉဝႃႈၼႆ ။
မိူဝ်ႈၽွင်းႁၢင်ပီ 2024 ၼၼ်ႉ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ႁူမ်ႈၵၼ်သေ ယိုဝ်းၵၼ်တင်း တပ်ႉသိုၵ်းၽွမ်ႉႁူမ်ႈယၢင်းလႅင် ႁိမ်းႁွမ်းဝၢၼ်ႈၼွၵ်ႇဝူဝ်း၊ လွႆၵဵင်ႈ၊ ဝၢၼ်ႈ ၼမ်ႉၽႃမူ၊ ၾၢႆၶုၼ်၊ ဝၢၼ်ႈသွင်းပျွင်းၵူၼ်းမိူင်း မွၵ်ႈ 2000 ၵေႃႉပၢႆ လႆႈငိူင်ႉပၢႆႈၽေးသိုၵ်းဝႆႉ ။
ဝၢႆးၼၼ်ႉၽွင်းၼႂ်းလိူၼ်ၵျႃၼ်ႊ ပီ 2025 ပၢင်တိုၵ်းယဵၼ်လႄႈ ပျီႇတူႉၸိတ်ႉပဢူဝ်း ႁူၺ်းႁွင်ႉၵူၼ်းပၢႆႈၽေးသိုၵ်းပွၵ်ႈယူႇၶိုၼ်းႁိူၼ်းယေးၽႂ်မၼ်း။ ၵူၺ်းၵႃႈ ၸုမ်းယိပ်းၵွင်ႈၵၢင်ႇ ၸိူဝ်းပိုတ်ႇပၢင်တိုၵ်း ဢမ်ႇၽဵဝ်ႈပၼ် မၢၵ်ႇမႅင်းလႄႈ ၵူၼ်းမိူင်းၸိူဝ်းလႆႈပၢႆႈၽေးပၢင်တိုၵ်းသေ ပွၵ်ႈမိူဝ်းယူႇၶိုၼ်းႁိူၼ်းၼၼ်ႉ ၸၢင်ႈထူပ်းၽေးဝၢႆးပၢင်တိုၵ်း ။
တီႈဝၢၼ်ႈသွင်းပျွင်းၼႆႉ လင်ႁိူၼ်း မီး 600 ပၢႆ ၊ ယၢမ်းလဵဝ် ၵူၼ်းပိုၼ်ႉတီႈဢွၼ်ၵၼ်ပွၵ်ႈယူႇၶိုၼ်း 3 ပုၼ်ႈ မီးမွၵ်ႈ 2 ပုၼ်ႈ ။ ၽွင်းပၢင်တိုၵ်းၼၼ်ႉႁိူၼ်းယေးၵူၼ်းဝၢၼ်ႈသွင်းပျွင်း ထုၵ်ႇၾႆးမႆႈလူႉၵွႆ 50 လင်ပၢႆ ။ ၵူၼ်းပၢႆႈၽေးသိုၵ်းမၢင်ၸိူဝ်း ဢမ်ႇၸၢင်ႈပွၵ်ႈမႃးၶိုၼ်း ဢၼ်ပွၵ်ႈမႃးယူႇၶိုၼ်းႁိူၼ်းၼၼ်ႉၵေႃႈ ဢမ်ႇပႆႇမီးလွင်ႈႁူမ်ႇလူမ်ႈ ၼႆယဝ်ႉ ။
သဵၼ်ႈတၢင်း ပၢင်လွင်း -သွင်းပျွင်း – ၾၢႆၶုၼ်ၼႆႉ ယူႇတီႈသိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း (PNO) ၵုမ်းၵမ်ဝႆႉသေတႃႉ ၊ ၾၢႆႇတူၵ်းဝဵင်းၾၢႆၶုၼ်ၼၼ်ႉတႄႉ သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်းလႄႈ တပ်ႉသိုၵ်းၽွမ်ႉႁူမ်ႈယၢင်းလႅင် ပဵၼ်ပၢင်တိုၵ်းၵၼ်ဝႆႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉယူႇ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ