ၸဵမ်မိူဝ်ႈ 1962 ၼၼ်ႉမႃး သိုၵ်းမၢၼ်ႈမၢပ်ႇၼႄးဝႃႈ ၸဝ်ႈၾႃႉတႆး ၶႂ်ႈသၢင်ႈမိူင်းတႅၵ်ႇယၢႆႈ ၶႂ်ႈၽၢတ်ႇဢွၵ်ႇ မိူင်းႁူမ်ႈတုမ် ၼႆသေ ဢဝ်ဢဵၼ်ႁႅင်းသိုၵ်း မိပ်ႇငႅၼ်းယိုတ်းဢႃႇၼႃႇၸဝ်ႈၾႃႉမိူင်းတႆးသေဢမ်ႇၵႃး ပေႉၵိၼ်လူလၢႆ ၵူၼ်းၼႂ်းမိူင်းတႆး ၼပ်ႉႁူဝ်ႁဵင်။ တႄႇဢဝ်ၼၼ်ႉမႃး မိူင်းတႆး ပဵၼ်ၽိုၼ်းပဵၼ်ၾႆးမႃးဢမ်ႇထၢတ်ႇ ။

တပ်ႉသိုၵ်းမိူင်းတႆး MTA ယၢမ်ႈႁိူင်း မႃးၵေႃႈ ၺႃးသိုၵ်းမၢၼ်ႈ သေႃႇသူၼ်းႁႂ်ႈဝၢင်းၶိူင်ႈပႅတ်ႈလုမ်းလုမ်း။ၽွင်းၼၼ်ႉ တပ်ႉၵွင် 202 ဢၼ်ၸဝ်ႈယွတ်ႈသိုၵ်း ဢွၼ်ႁူဝ်တႄႉ ဢမ်ႇယွမ်းဝၢင်းၶိူင်ႈပၼ်သိုၵ်းမၢၼ်ႈသေ ႁႃလၢႆးတၢင်း တင်ႈတပ်ႉတေႃႇသူႈသိုၵ်းမၢၼ်ႈ ။တႄႇၼၼ်ႉမႃး လူင်ပွင်ၸိုင်ႈသိုၵ်းမၢၼ်ႈ ဢွၵ်ႇပိူင် ၵႂၢတ်ႇလၢင်ႉငဝ်ႈႁၢၵ်ႈတူၼ်ႈတေႃ ၸုမ်းလုၵ်ႉၽိုၼ်ႉတႆး 1996-1997-1998 ဢၼ် ႁွင်ႉဝႃႈ ပၢၼ်တႅပ်း 4 တႅပ်း ပီငရၢႆးလူင် ။ လွင်ႈၼႆႉ မၢင်ၸိူဝ်းထၢင်ႇဝႃႈ ႁိုင်ႁီးယဝ်ႉ ၸူမ်ႁၢႆယဝ်ႉဝႃႈၼႆသေတႃႉ တေႃႇထိုင် မိူဝ်ႈလဵဝ် ၵူၼ်းၸိူဝ်းတိုၵ်ႉလႆႈ ၶၢမ်ႇၸၢၵ်ႇမၼ်း ၸိူဝ်း တုမ်ႉတိူဝ်ႉပၢႆးတူဝ်ပၢႆးၸႂ် တိုၵ်ႉမီးယူႇထိုင် ယၢမ်းလဵဝ်။

မီးလိၵ်ႈသူင်ႇထိုင် ၵၢင်ႉၵႄႇၼႂ်းဝၢၼ်ႈ ပႃးၶေႃႈပူင်ၵႂၢမ်းၼၵ်းဝႆႉဝႃႈ ပေႃးသၢမ်ဝၼ်းတဵမ်ယဝ်ႉလႄႈ ဢမ်ႇပၢႆႈဢွၵ်ႇဝၢၼ်ႈဢွၵ်ႇမိူင်း တေၺႃးၽဝ်ႁိူၼ်းယေး ဝႃႈၼႆၵူၺ်း ဢမ်ႇႁူႉလွင်ႈႁူႉတၢင်းသင်တႄႉတႄႉသေ လႆႈပၢႆႈလိပ်းပၢႆႈလႅင် – ၼႆ လုင်းဢိင်ႇတႃႇ ၵေႃႉဢၼ်လႆႈ ပၢႆႈၽေး ပၢၼ်တႅပ်း 4 တႅပ်း မိူဝ်ႈပူၼ်ႉမႃး ၶၢဝ်းတၢင်း 30 ပီပၢႆ လၢတ်ႈၼင်ႇၼႆ။

လုင်းဢိင်ႇတႃႇၼႆႉ မိူဝ်ႈလဵဝ် ဢႃယု 68 ပဵၼ်ၵူၼ်း ဝၢၼ်ႈၼႃးၵိဝ်ႇ ဢိူင်ႇလွႆၵႅင်း ဝဵင်းၵဵင်းၶမ်း ။ ယၢမ်းလဵဝ် ၵဵင်းၶမ်း ယူႇတႂ်ႈၸႄႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း ။
ဝၢႆးသေ လႆႈႁူႉၸွမ်းဝႃႈ သိုၵ်းမၢၼ်ႈ ပူင်ၵႂၢမ်းၼၵ်း သူင်ႇလိၵ်ႈယိုၼ်ႈၸူးယဝ်ႉၼၼ်ႉ ပဵၼ်ၸႂ်ဢမ်ႇလီလူင်လၢင် ယွၼ်ႉဝႃႈ တေလႆႈၽၢတ်ႈယၢၼ် ႁိူၼ်းတီႈယူႇ ၵူႇတီႈၼွၼ်း ။

ၽွင်းၼၼ်ႉ လုင်းဢိင်ႇတႃႇ တိုၵ်ႉသၢင်ႈႁိူၼ်းလင်မႂ်ႇ ယင်းပႆႇတၼ်းယဝ်ႉတူဝ်ႈ သမ်ႉပေႃး ငိၼ်းၶၢဝ်ႇႁုၵ်ႉႁၢႆႉဝႃႈ တေလႆႈပၢႆႈယၢၼ် ။ မိုဝ်းဢၼ်တိုၵ်ႉယိပ်းၶွၼ်ႉၸွၵ်းသေ တိုၵ်ႉသၢင်ႈႁိူၼ်းယူႇၼၼ်ႉ ၵိုင်ႉၵၢင်ႉ ဢူၼ်ႈဢၢၼ်ႈလူင်ၵႂႃႇ သမ်ႉပေႃးဢမ်ႇမီးႁႅင်းယိပ်းၵမ်လႆႈ ၼႆ လုင်းဢိင်ႇတႃႇ လၢတ်ႈၼႄတူဝ်ထူပ်းၼင်ႇၼႆ –

“ႁိူၼ်းဢူႈလုင်းၼႆႉ တိုၵ်ႉႁဵတ်းမႂ်ႇမႂ်ႇၼၼ်ႉၼႃႈ ။ တိုၵ်ႉဢၢင်ႈႁဵတ်းၸၢၼ်း တိုၵ်ႉဢၢင်ႈႁဵတ်းသိုင်ႇၾႆးထႅင်ႈယူႇ ။တိုၵ်ႉယိပ်းၶွၼ်ႉၸွၵ်းသေ တွႆႇယူႇ ။ ၽိူဝ်ႇငိၼ်းဝႃႈ တေလႆႈပၢႆႈၵေႃႈ တိၼ်ဢူၼ်ႈမိုဝ်းဢူၼ်ႈသေ ၽႃႈပႅတ်ႈ ။မိူင်းလႅင်းမႃးၵေႃႈ ဢဝ်လေႃႉဢဝ်ဝူဝ်း တၢင်ႇလုၵ်ႈတၢင်ႇလၢင်းသေ လူင်းမႃးယူႇ ဢိူင်ႇဝူဝ်းလူင်”

ဢၼ်ပဵၼ်ၸႂ်ဢမ်ႇလီၼႆႉ ဢမ်ႇၸႂ်ႈႁိူၼ်းလုင်းဢိင်ႇတႃႇၶဝ်ၵူၺ်း ဢၼ်ယူႇၼႂ်းဢိူင်ႇလွႆၵႅင်း တင်းမူတ်းလႄႈ ပီႈၼွင်ႉၵဵင်းၶမ်းၸိူဝ်းယၢမ်ႈယူႇႁူမ်ႈၵၼ်မႃးၵတ်းၵတ်းယဵၼ်ယဵၼ် ပဵၼ်ၸႂ်ဢမ်ႇသိူဝ်းသႃႇၸႂ်ၵၼ်ၵူႈၵေႃႉ ။

သိုၵ်းမၢၼ်ႈ တဵၵ်းလိုပ်ႈၵူၼ်းဢိူင်ႇလွႆၵႅင်းလႄႈ မုင်ႉႁေႃႁိူၼ်း လုင်းဢိင်ႇတႃႇတင်းႁိူၼ်း လႆႈသွင်ႉပၢႆႈ ဝႄႈသွၼ်ႈဝႆႉ တီႈၼႂ်း ဢိူင်ႇဝူဝ်းလူင် ။ ၵူၼ်းဝၢၼ်ႈၵူၼ်းသူၼ် မၢင်ၸိူဝ်းၵေႃႈ ပၢႆႈထိုင် ပွတ်းဢွၵ်ႇၶူင်း ပွတ်းတၢင်းဝၢၼ်ႈသီႈပေႃႉ မိူင်းပူးလူင် ၸိူဝ်းၼႆႉ။

ၽွင်းၼၼ်ႉ ၸိူဝ်းမီးလေႃႉၵေႃႈၶီႇလေႃႉ ၸိူဝ်းဢမ်ႇမီးလေႃႉၵေႃႈ ႁွပ်ႇဢုမ်ႈလုၵ်ႈလၢၼ်လိၼ် တေႃႉတႄႉ ဢဝ်ၶူဝ်းၸႂ်ႉသွႆ တႃႇၵိၼ်ယမ်ႉ ဢၼ်ပေႉလႆႈဢိတ်းဢွတ်းသေ ၼႅတ်ႈပၢႆႈ ယွၼ်ႉၵူဝ်သုမ်းသၢႆၸႂ် ၼႂ်းၵႄႈသိုၵ်းသိူဝ် ။ ၸိူဝ်းမီးလေႃႉတႄႉ တေႃႉတၢင်ႇၶူဝ်းၼၵ်းလႆႈၵမ်ႈၽွင်ႈသေတႃႉ ၸိူဝ်းဢမ်ႇမီးတႄႉ လႆႈႁၢပ်ႇ လႆႈႁၢမ် လႆႈတဵင်ႇ လႆႈၸေး ။

ၶူဝ်းႁိူၼ်းၶူဝ်းယေးလႄႈ သတ်းလဵင်ႉတီႈႁိူၼ်းမိူၼ်ၼင်ႇ မူမႃၵႃၵႆႇ မႃႉလႃးဝူဝ်းၵႂၢႆး ၸိူဝ်းၼႆႉတႄႉ ၵႃႈလႆႈပွႆႇပိုၼ်ႉပွႆႇပႅတ်ႈ လိူဝ်သေ သေလၢႆ ဢမ်ႇၸၢင်ႈႁဵတ်းႁိုဝ်ၼႆ လုင်းဢိင်ႇတႃႇ လၢတ်ႈၼႄၼင်ႇၼႆ။

ယွၼ်ႉလႆႈၵိုင်ႉၵၢင်ႉပၢႆႈလႄႈ မၢင်ႁိူၼ်း ၶဝ်ႈတႃႇၵိၼ်ၵူၺ်း ဢမ်ႇတၼ်းလႆႈ ။ ၸိူဝ်းတၼ်းလႆႈၵေႃႈ ၵုမ်ႇလႆႈဝႆႉ သၢႆၸႂ်ၵူၼ်းပဵၼ်ယႂ်ႇၵူၺ်းလႄႈ ၶဝ်ႈသၢၼ်ၵေႃႈ တေႃႉတႄႉတၼ်းလႆႈဢဝ် တႃႇပေႃးၵိၼ်ၶၢဝ်းတၢင်းၽၢၵ်ႇလိူၼ် သၢဝ်းဝၼ်းၵူၺ်း ။

ၼႂ်းဢိူင်ႇလွႆၵႅင်းၼႆႉ မီးဝၢၼ်ႈၵုၼ်ၶႃး ၼႃးလႃႉ ၼႃးၵွင်း ၼႃးသၢႆး ၵုၼ်လူင် ႁူဝ်ႁႃႉ လႄႈ ဝၢၼ်ႈၼႃးၵိဝ်ႇ ဢၼ်ပဵၼ်ဝၢၼ်ႈမုင်ႉႁေႃႁိူၼ်း လုင်းဢိင်ႇတႃႇ ယူႇသၢင်ႈၵိၼ်သဝ်း ။ လိူဝ်ၼၼ်ႉ ဢိူင်ႇၵုၼ်ပူႉ ၵေႃႈ လႆႈပၢႆႈမိူၼ်ၵၼ်ဝႃႈၼႆ ။

မိူၼ်ၼင်ႇ မုင်ႉႁေႃႁိူၼ်း လုင်းဢိင်ႇတႃႇတႄႉ ၶၢႆႉပၢႆႈသွၼ်ႈယူႇဝႆႉတီႈဢိူင်ႇဝူဝ်းလူင် မၢင်ႇၵိူဝ်းဝႃႈ တေလွတ်ႈၽေးယဝ်ႉၼႆသေတႃႉ တၼ်းလႆႈယူႇ 3 ပီၵူၺ်း ၺႃး သိုၵ်းမၢၼ်ႈ လမ်းလိုပ်ႈပႅတ်ႈထႅင်ႈ ။ သမ်ႉပေႃး လႆႈၶၢႆႉပၢႆႈ မိူဝ်းယူႇ ပွတ်းတၢင်း ၸႄႈဝဵင်းၵုၼ်ႁဵင်ထႅင်ႈ ၼႆယူႇ။

ၽွၼ်းၼၼ်ႉ သိုၵ်းမၢၼ်ႈ ယိူင်းၸူး သိုၵ်းတႆးသေ ၽႅၼ်ၵၢၼ် တႅပ်း 4 တႅပ်း မိူၼ်ၼင်ႇ တတ်းၶၢတ်ႇ ၶဝ်ႈၼမ်ႉတၢင်းၵိၼ် ၊ တတ်းၶၢတ်ႇတႃႇလႆႈငိုၼ်းၵမ်ႉၸွႆႈ ၊ တတ်းၶၢတ်ႇယႃႇႁႂ်ႈႁူႉၶၢဝ်ႇငၢဝ်း ၊ တတ်းၶၢတ်ႇ ၵူၼ်းမိူင်း ယႃႇႁႂ်ႈၵွင်ႉၵၢႆႉၵၼ်တင်းၸုမ်းယိပ်းၵွင်ႈၵၢင်ႇ ယႃႇႁႂ်ႈၸုမ်းယိပ်းၵွင်ႈၵၢင်ႇၶဝ်ႈဢွၵ်ႇၵူၼ်းမိူင်း ၼႆၸိူဝ်းၼႆႉ။

သိုၵ်းမၢၼ်ႈတႄႉလၢတ်ႈဝႃႈ ၵမ်ၵိၼ်းသိုၵ်းဢၼ်လုၵ်ႉၽိုၼ်ႉၶဝ်ၵူၺ်းဝႃႈၼႆသေတႃႉ ၵူၼ်းမိူင်းတႆး ၺႃးသိုၵ်းမၢၼ်ႈၵၼ်ႉၸၼ်လူလၢႆ ဢဝ်တၢႆ မိူၼ်ၼင်ႇမူတ်ႉၼင်ႇပူၵ်ႇ ။ လွင်ႈသိုၵ်းမၢၼ်ႈ ပေႉၵိၼ်လူလၢႆၵူၼ်းမိူင်းၵႃႈႁိုဝ်ၼႆၼၼ်ႉ မုၵ်ႉၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး ယင်းတၢင်ႇၽိုၼ်ႁၢႆးငၢၼ်းၼႄလုမ်ႈၾႃႉဝႆႉ ယူႇ ဝႃႈ 1996-1999 ၼၼ်ႉ ၵူၼ်းမိူင်းတႆး ထူပ်းၽေးႁုၵ်ႉႁၢႆႉမိူၵ်ႈမႂ်ႈ။

ဝၢႆးသေ ပၢႆႈထိုင်ၵုၼ်ႁဵင်ယဝ်ႉ လုင်းဢိင်ႇတႃႇ လႄႈတင်းမေးၼၢင်း ၶတ်းၸႂ် ဢဝ်ပုၼ်ႈၽွၼ်းပေႃႈမႄႈလီတဵမ်တီႈသေ ၶတ်းၸႂ် ႁဵတ်းၵၢၼ်ႁႃၵိၼ်လဵင်ႉတွင်ႉ လဵင်ႉလူလုၵ်ႈလၢင်းယူႇသေတႃႉ ႁဵတ်းဢမ်ႇပေႉၵိၼ်ဢမ်ႇပေႃး ယွၼ်ႉဝႃႈ လႆႈတႄႇတင်ႈၸၢတ်ႈပၢၼ်မႂ်ႇ လူၺ်ႈပဵၼ်ၵူၼ်းပၢႆႈၽေး ဢမ်ႇမီးတိုၼ်းလၢင်း ၽွင်းတူၵ်းထင်ယူႇတၢင်ႇဝၢၼ်ႈတၢင်ႇမိူင်း ။

မုင်ႈမွင်း ႁႂ်ႈၸဵဝ်းလႆႈ ပွၵ်ႈၶိုၼ်း ဝၢၼ်ႈၵဝ်ႇမိူင်းလင်ယူႇသေတႃႉ ၼင်ႇထုင်းၵႂၢမ်းမီးဝႃႈ ဢထၢင်ႇဢမ်ႇပေႉ တၢင်းၵၢတ်ႈ ယႃႇဝႃႈ တေလႆႈပွၵ်ႈၶိုၼ်း ၵဵင်းၶမ်း သမ်ႉပၢႆလႆႈ ပၢႆႈၵႆလိူဝ်သေၼၼ်ႉ ။ တၼ်းလႆႈထင်သဝ်း တီႈၵုၼ်ႁဵင် မွၵ်ႈ 8-9 ပီ ၵမ်းလိုၼ်းၵေႃႈ ဢိင်ၼိူဝ်ငဝ်းလၢႆးသေ ပၢႆႈဢွၵ်ႇမိူင်းတႆးသေ မုင်ႈသူႇမိူင်းထႆး ။

ၽွင်းထင်ယူႇၵုၼ်ႁဵင်ၼႆႉ ဢမ်ႇလွတ်ႈသိုၵ်းမၢၼ်ႈၼင်ႇၵဝ်ႇ ပေႃးၶွပ်ႈဝူင်ႈၶွပ်ႈဝၼ်းမၼ်းမႃး လႆႈႁၢပ်ႇၶျေႃးပၼ်သိုၵ်းမၢၼ်ႈ ။ ဢမ်ႇၵႂႃႇၵေႃႈဢမ်ႇလႆႈ ။ ၸင်ႇၼၼ်လႄႈ ႁႃတၢင်းပၢႆႈထႅင်ႈ ၼႆ လုင်းဢိင်ႇတႃႇ လၢတ်ႈၼႄတူဝ်ထူပ်း ၼင်ႇၼႆ –

“တေဝႃႈႁဵတ်းၼႃးၼႆၵေႃႈ ႁဝ်းဢမ်ႇမီး ၊ ႁဵတ်းသူၼ်ၵေႃႈ ဢမ်ႇလႆႈသင် ။ မၼ်းပဵၼ်ၸိူင်ႉၼၼ် ။ ပေႃးယူႇၵေႃႈ သမ်ႉတုၵ်ႉၶ ။ၵမ်ႉဝႃႈ ႁၢပ်ႇမၢၼ်ႈ ၵမ်ႉဝႃႈ တၢင်ႇမၢၼ်ႈဝႃႇ ။ ပဵၼ်ၶၢဝ်းႁိုဝ်ႉၶၢဝ်းၾူၼ်လူင်ၵေႃႈ ၶွပ်ႈဝူင်ႈၶွပ်ႈဝၼ်း ၸႂ်ႉၵၼ်ၵႂႃႇတိၵ်းတိၵ်း ။မၢင်တီႈၼႆႉ လေႃႉၼႆႉ လႆႈလၢၵ်ႈၶၢမ်ႈဢဝ်ၼေႈ မၼ်းဢမ်ႇလႆႈႁေႃႈၶၢမ်ႈ”

တေႃႇထိုင်မိူဝ်ႈလဵဝ် မုင်ႉႁေႃႁိူၼ်း လုင်းဢိင်ႇတႃႇ တိုၵ်ႉလႆႈပဵၼ်ၽဝ တႆးယၢၼ်မိူင်းဢၼ်ယူႇလူၺ်ႈတၢင်းမုင်ႈမွင်းႁႂ်ႈမိူင်းတႆးၵတ်းယဵၼ်လွတ်ႈၶဵၼ် ။
ယွၼ်ႉလႆႈပၢႆႈယဝ်ႉ ပၢႆႈထႅင်ႈ ၊ ပၢႆႈပူၼ်ႉမိူင်းၵိူတ်ႇယဝ်ႉသေတႃႉ ပႆႇပူၼ်ႉလႆႈပၢၼ်တႆးယၢၼ်မိူင်း ၊ ပႆႇပူၼ်ႉလႆႈတၢင်းယၢပ်ႇၽိုတ်ႇၵိၼ်းၸႂ် ။ တိုၵ်ႉၵပ်ႉၵိၼ်းယူႇ ထိုင် ၵၢပ်ႈလုၵ်ႈပၢၼ်လၢၼ် ။

ၸၢႆးဢွင်ႇမိူင်း လုၵ်ႈၸၢႆးလုင်းဢိင်ႇတႃႇ လၢတ်ႈဝႃႈ ” ၽွင်းပေႃႈမႄးတေပၢႆႈၶဝ်ႈမိူင်းထႆးၼၼ်ႉ ၸူးၸႂ်တႄႉဢမ်ႇၶႂ်ႈပၢႆႈၸွမ်းသေဢိတ်း ၵူၺ်းၵႃႈ ဢမ်ႇၸၢင်ႈယူႇ ဢမ်ႇၸၢင်ႈပိုင်ႈၽႂ် ၵႃႈလႆႈပၢႆႈၸွမ်း ” – ဝႃႈၼႆ။

ဢိင်ၼိူဝ် ၵူၼ်းမိူင်းတႆး လႆႈပၢႆႈလၢႆၵမ်းလၢႆပွၵ်ႈ ထပ်းၵၼ်ၼႃႇလႄႈ လိူဝ်သေ ယၢပ်ႇၽိုတ်ႇၵၢၼ်ႁႃၵိၼ်လဵင်ႉတွင်ႉၼႂ်းၼႃႈႁိူၼ်းယဝ်ႉ လုၵ်ႈဢွၼ်ႇၵေႃႈ ႁၢမ်းၵၢၼ်ႁဵၼ်းၵၢၼ်သွၼ် ။ ႁၢမ်းၵၢၼ်ပူၵ်းပွင်တူဝ်ၵဝ်ႇ ။ သုမ်းသုၼ်ႇလႆႈ ဢၼ်ၵူၼ်းမိူင်းၼိုင်ႈၵေႃႉထုၵ်ႇလီလႆႈ ၸိူဝ်းၼႆႉ ။

ၽွင်းပၢၼ်တႅပ်း 4 တႅပ်းၼၼ်ႉ ၵူၼ်းဝၢၼ်ႈဢၼ်လႆႈပၢႆႈၼမ်လိူဝ်သေပိူၼ်ႈပဵၼ် ၼႂ်းၸႄႈဝဵင်းမိူင်းၵိုင် လၢႆးၶႃႈ ၵေးသီး မိူင်းၼွင် ၶူဝ်လမ် ၵုၼ်ႁဵင် ပၢင်လူင် ၼမ်ႉၸၢင် မိူင်းၼၢႆး လၢင်းၶိူဝ်း မွၵ်ႇမႆႇ ၵဵင်းတွင်း မိူင်းပၼ်ႇ မိူင်းပဵင်း ႁူဝ်ပူင်း ။ ၽွင်းပၢၼ် တႅပ်း 4 တႅပ်းၼၼ်ႉ မိူင်းတႆးပွတ်းၵၢင်ပွတ်းၸၢၼ်းၼႂ်း 7000 လွၵ်းလၵ်းပၼ်ႇမူၼ်း ၼႂ်း 3 ၸႄႈတွၼ်ႈ 11 ၸႄႈဝဵင်း 1400 ဝၢၼ်ႈပၢႆ ႁူဝ်ၵူၼ်း သၢမ်သႅၼ်ပၢႆ ၺႃးသိုၵ်းမၢၼ်ႈ လိုပ်ႈႁေႃႈ ၶၢႆႉဝၢၼ်ႈၶၢႆႉသူၼ် ။ မၢင်ၸိူဝ်းၺႃးၶႃႈတၢႆလူလၢႆ ၸူမ်ႁၢႆၵႂႃႇပႅတ်ႈလၢႆလၢႆ ။ဢမ်ႇလႆႈၵႃႈသၢႆႈတႅၼ်းသင် ။

ၽွင်းပၢႆႈၼၼ်ႉၵေႃႈ ဢမ်ႇမီးမူႇလႂ်ၸုမ်းလႂ် ယိုၼ်းမိုဝ်း ၸွႆႈထႅမ်သင်ၵူၼ်းမိူင်းတႆး ။ လႆႈဝႃႈ ၵူၼ်းမိူင်းတႆး သုမ်းသုၼ်ႇလႆႈသုၼ်ႇပဵၼ် ႁၢဝ်ႈႁႅင်းလူၼ်ႉလိူဝ်တႄႉတႄႉဝႃႈဝႃႈ ။ ၸင်ႇၼၼ်လႄႈ မိူဝ်ႈပီ 2020 ၼၼ်ႉ ယူႇတီႈ ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး (CSSU) ပိုၼ်ၽၢဝ်ႇ မၵ်းမၢႆ ဝၼ်းတီႈ 16 လိူၼ် ၵျုၼ်ႊၼႆႉ ႁႂ်ႈပဵၼ်ဝၼ်းသုၼ်ႇလႆႈ ၸိူဝ်ႉၸၢတ်ႈတႆး။ ၼင်ႇႁိုဝ် ပိုၼ်းႁၢႆႉၸႃႉ ဢၼ်သိုၵ်းမၢၼ်ႈ ပူၼ်ႉပႅၼ်ၶႃႈႁႅမ်၊ လူလၢႆ ၵူၼ်းမိူင်းတႆး မိူဝ်ႈပူၼ်ႉမႃး ၶၢဝ်းတၢင်း 30 ပီပၢႆၼၼ်ႉ တေဢမ်ႇၵိူတ်ႇၶိုၼ်ႈထႅင်ႈ ။