ပေႃးဝႃႈ မုင်ႉႁေႃႁိူၼ်းလႂ် မီးၵူၼ်းဢၼ်ၾိင်ႈယၢမ်ႈလူႉၸိုင် ၼႃႈႁိူၼ်းၼၼ်ႉ တေဢမ်ႇမူၼ်း ၊ ၵူၼ်းႁူမ်ႈႁိူၼ်းၵေႃႈ ပဵၼ်ႁွၼ်ႉပဵၼ်မႆႈၸွမ်း ။ ဝၢၼ်ႈၼိုင်ႈဝၢၼ်ႈ မိူင်းၼိုင်ႈမိူင်းၼၼ်ႉ ပေႃးမီးၵူၼ်းၾိင်ႈယၢမ်ႈလူႉၼမ် ၵူၼ်းယူႇႁူမ်ႈဝၢၼ်ႈလဵဝ်မိူင်းလဵဝ်ၵၼ်ၵေႃႈ လႆႈသုၵ်ႉၸွမ်း ။ မိူၼ်ငဝ်းလၢႆးၵၢပ်ႈဝၢၼ်ႈပၢၼ်မိူင်းမိူဝ်ႈလဵဝ် ဢိင်ၼိူဝ် ၵူၼ်းၵေႃႇၵၢၼ်ႁၢႆႉၼမ်မႃးလႄႈ ၵူၼ်းၸိူဝ်းႁဵတ်းႁႃၵိၼ်သိုဝ်ႈယူဝ်းၵေႃႈ လႆႈယၢပ်ႇၸွမ်း ။

တီႈၶူဝ်ၶၢမ်ႈတႃႈၶီႈလဵၵ်း-မႄႈသၢႆၼႆႉ မီးၵူၼ်းၼႄၼႃႈတိူဝ်ႈဝႃႈ တေႃႉၶူဝ်းၵုၼ်ႇၼႆသေ ၽိူဝ်ႇ ၸဝ်ႈၼႃႈတီႈၶဝ်ထတ်းတူၺ်းသမ်ႉ ႁၼ် ယႃႈမဝ်းၵမ် ။ ဝၢႆးႁူႉၸိူင်ႉၼၼ်ယဝ်ႉ ၸဝ်ႈၼႃႈတီႈဢၼ်ပႂ်ႉၶူဝ်တင်းသွင်ၾင်ႇ ၵူတ်ႇထတ်းႁၢဝ်ႈႁႅင်းလႄႈ ၵူၼ်းၸိူဝ်းတေႃႉၶူဝ်းၵုၼ်ႇၸွမ်းပၵ်းၸွမ်းပိူင်သမ်ႉ လႆႈသုၵ်ႉၸႂ် ၊ လႆႈသုမ်းၶၢဝ်းယၢမ်းၸွမ်း။

ၽွင်းငဝ်းလၢႆးဝၢၼ်ႈမိူင်းဢမ်ႇၼိမ်ၼႆႉ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇႁႅင်းသေ ၵူၼ်းလီၵေႃႈ ၸၢင်ႈပဵၼ်ၵူၼ်းႁၢႆႉ ။ မၢင်ၸိူဝ်းၼႄၼႃႈတိူဝ်ႈႁဵတ်းၵၢၼ်သႅၼ်းၼိုင်ႈ သမ်ႉလၵ်ႉလွမ်ၵႃႉၶၢႆသႅၼ်းၼိုင်ႈ ။

ပေႃးတူၺ်း ၶူဝ်မိုတ်းၵိုဝ်းမၢႆၼိုင်ႈ တႃႈၶီႈလဵၵ်း-မႄႈသၢႆၼႆႉ ပဵၼ်ၶူဝ်ဢၼ် ၵူၼ်းပိုၼ်ႉတီႈတႃႈၶီႈလဵၵ်း-မႄႈသၢႆ လႆႈပိုင်ႈ ၸႂ်ယႂ်ႇတႃႇၵႃႉၶၢႆႁႃၵိၼ်လဵင်ႉတွင်ႉ။ တႃႇ ၵူၼ်းမိူင်းၼိုင်ႈလႄႈမိူင်းၼိုင်ႈ ၵပ်းသိုပ်ႇၶဝ်ႈဢွၵ်ႇၵၼ်ငၢႆႈၵေႃႈ ၶူဝ်ၼႆႉလမ်ႇလွင်ႈတေႉ ။ ဢၼ် ႁဵတ်းႁႂ်ႈဝၢၼ်ႈမိူင်းၸဵဝ်းၶိုၼ်ႈယႂ်ႇမုၼ်းလႅင်းၵေႃႈ ပဵၼ်ယွၼ်ႉၵၢၼ်ၵပ်းသိုပ်ႇတိတ်းတေႃႇၵၼ်ငၢႆႈၸိူဝ်းၼႆႉ ။

ၽိူဝ်ႇထိုင်မိူင်းႁူမ်ႈတုမ်မၢၼ်ႈသုၵ်ႉယုင်ႈဢူၼ်ၵဝ်းယွၼ်ႉၵၢၼ်ဝၢၼ်ႈၵၢၼ်မိူင်းယဝ်ႉ ၶူဝ်တႃႈၶီႈလဵၵ်း-မႄႈသၢႆၼႆႉၵေႃႈ ယဵၼ်းပဵၼ်ၶိူင်ႈမိုဝ်းသိုၵ်းမၢၼ်ႈတႃႇၵုမ်းၵမ်ၵူၼ်းမိူင်းထႅင်ႈ ။ ၸဵမ်မိူဝ်ႈ 2021 ၼ

ၼ်ႉမႃး ႁွင်ႈၵၢၼ်ဢၼ်ယူႇတႂ်ႈသိုၵ်းမၢၼ်ႈ ဢဝ်ၶေႃႈဢၢင်ႈဝႃႈ တႃႇၵူတ်ႇထတ်းၵူၼ်းၸိူဝ်းလုၵ်ႉၽိုၼ်ႉၶဝ်ၼႆသေ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ဢမ်ႇထၢင်ႇႁၢင်ႈလတ်းၵႂႃႇမႃး ။
ၽွင်းမိူဝ်ႈသိုၵ်းမၢၼ်ႈထႅမ်ႁႅင်းၵူတ်ႇထတ်းတႃႇၵမ်ၵိၼ်းၸုမ်းလုၵ်ႉၽိုၼ်ႉၶဝ်ၵူၺ်းၵေႃႈ ၵူၼ်းဝၢၼ်ႈၵူၼ်းမိူင်းသမ်ႉပေႃးယူႇယၢပ်ႇႁႅင်းယဝ်ႉ ၵမ်းၼႆႉသမ်ႉ မီးၵူၼ်းဢဝ်တိုဝ်ႉတၢင်းဢၼ်ဝၢၼ်ႈမိူင်းယုင်ႈၼႆႉသေ ႁဵတ်းၵၢၼ်ဢၼ်ဢမ်ႇထုၵ်ႇၸွမ်းမၢႆမီႈ ဢမ်ႇၸွမ်းၾိင်ႈမိူင်း ႁႃငိုၼ်းတၢင်းလတ်း ၵႃႉၶူဝ်းၽိတ်း ၼႆၸိူဝ်းၼႆႉ။

ၼႂ်းလိူၼ်ၵျူႊလၢႆႊ ဝၼ်းတီႈ 5 ၼႆႉၵူၺ်း ၵူၼ်းဢၼ်ယိပ်းမၢႆၾၢင်မိူင်းတႆးၵေႃႉၼိုင်ႈ ႁေႃႈသၢမ်လေႃႉ ၼႄၼႃႈတိူဝ်ႈဝႃႈ တၢင်ႇမၢၵ်ႇမႆႉၼႆသေ တၢင်းၼႂ်းမၼ်းသမ်ႉ ဢဝ်ယႃႈမဝ်းၵမ်သွၼ်ႉမႃးတင်းၼမ်တင်းလၢႆ ။

ၵေႃႉဢၼ်ႁေႃႈသၢမ်လေႃႉၼၼ်ႉ ပဵၼ် ၶုၼ်ႇတဵင်းဢူး ဢႃယု 42 ပီ ယူႇတႃႈၶီႈလဵၵ်း ၸိုင်ႈတႆးပွတ်းဢွၵ်ႇၵူၺ်း ၊ တီႉၺွပ်းလႆႈ ၽွင်းလုၵ်ႉတႃႈၶီႈလဵၵ်း ၶၢမ်ႈၶူဝ်လတ်းၸူးမႄႈသၢႆ ။ ပၢႆႉရူတ်ႉသၢမ်လေႃႉ မၼ်းပဵၼ် SHN-4U 1293 သီလႅင် – ၼႆ ၼႂ်းသိုဝ်ႇမႄႈသၢႆၼၼ်ႉ ဢွၵ်ႇဝႆႉၼင်ႇၼႆ ။

မိူဝ်ႈၸဝ်ႈၼႃႈတီႈထႆး ၵူတ်ႇထတ်းတူၺ်းၼႂ်းသၢမ်လေႃႉ ဢၼ်တေႃႉတၢင်ႇမၢၵ်ႇမႆႉမႃးၼၼ်ႉ ၸင်ႇႁၼ်မီးဝႆႉ ယႃႈၶေႊတမိၼ်ႊ 111.82 ၵီႊလူဝ်ႊၵရမ်ႊ ယႃႈမ 6 သႅၼ်မဵတ်ႉ ။ ဢဝ်ထူင်သီၶဵဝ် သီလိူင် ပူၵ်ႉႁေႃႇ ဝႆႉ ငၢႆးမိူၼ်ထူင်သႂ်ႇၼဵင်ႈႁႅင်ႈ ။ ၵူၺ်းၵႃႈ သမ်ႉတွၵ်ႇဝႆႉမိၵ်ႈမၢႆလူဝ်ႇၵူဝ်ႇ လၢဝ် 5 လူင်ႇလႄႈ 9 သၢမ်တူဝ်ၸဵမ်ၸိူဝ်းၼႆႉ ၼႆ Maesaipress တၢင်ႇလၢတ်ႈဝႆႉၼင်ႇၼၼ် ။
ၵူၼ်းႁေႃႈရူတ်ႉသၢမ်လေႃႉၼၼ်ႉ လၢတ်ႈတီႈၸဝ်ႈၼႃႈတီႈဝႃႈ လႆႈၵႃႈၸၢင်ႈ 10000 (ၼိုင်ႈမိုၼ်ႇ) ၿၢတ်ႇလႄႈ တေႃႉၶၢမ်ႈပၼ် ၼႆယူႇ။
ယွၼ်ႉမီးၵူၼ်းၵိၼ်ၸၢင်ႈတေႃႉၶူဝ်းၽိတ်းပၵ်းပိူင်ၸိူင်ႉၼႆလႄႈ ၵူၼ်းႁေႃႈသၢမ်လေႃႉ ၸိူဝ်းတေႃႉၶူဝ်းၵုၼ်ႇၵႃႉတၢင်းၶၢႆၽဵၼ်ႈၽဵၼ်ႈၵေႃႈ ၺႃးၸဝ်ႈၼႃႈတီႈသွၵ်ႈတဝ်ၵုၼ်ႇၵူႈသႅၼ်းသႅၼ်း။

ၵူတ်ႇထတ်းယွႆႈယႅမ်းၼႃႇဢႃႇလႃးလႄႈ ၶၢဝ်းယၢမ်းၵေႃႈ သုမ်း ၊ ၶူဝ်းၵုၼ်ႇ မၢင်သႅၼ်းဢမ်ႇၵိုင်ႇလီပိုတ်ႇတူၺ်းၵေႃႈ ပိုတ်ႇ- ၵိၼ်းၸႂ်ၼႃႇၼႆ – ၵူၼ်းႁေႃႈသၢမ်လေႃႉတႃႈၶီႈလဵၵ်း-မႄႈသၢႆၵေႃႉၼိုင်ႈလၢတ်ႈၼင်ႇၼႆ-

ၸႂ်ႈဢေႃႈ ပေႃးႁဝ်း တေႃႉၶူဝ်းၼႆ ႁဝ်းၵႆႉတေႃႉပႃး တၢင်းၵိၼ်တၢင်းယႅမ်ႉပီႈၼွင်ႉႁဝ်း ၸိူဝ်းၼႆႉ။ မၢင်ပွၵ်ႈတေႃႉ ၽၵ်းၵၢတ်ႇသူမ်ႈၶၢမ်ႈၶူဝ် ၊ သမ်ႉၺႃးၸဝ်ႈၼႃႈတီႈ တင်းသွင်ၾင်ႇၵူတ်ႇထတ်းတူၺ်းၼႂ်းမၼ်း ။ ၶဝ်ၵူဝ်ႁဝ်းဢဝ် ယႃႈမဝ်းၵမ်သႂ်ႇၼႂ်းမၼ်းၼႆယူဝ်ႉ။ ၵူၺ်းၵႃႈ ႁဝ်းတႄႉတေႃႉၶူဝ်းယူဝ်းယူဝ်းၵူၺ်းၼႃႇ ၊ ၵူၼ်းၸိူဝ်းဢၼ်ႁဵတ်းၽိတ်းၵေႃႈသမ်ႉမီးတေႉလႄႈ ဢၼ်ယၢပ်ႇၸႂ်သမ်ႉ ပဵၼ်ႁဝ်းၸိူဝ်းဢမ်ႇႁဵတ်းၽိတ်းသင်

ဢမ်ႇၸႂ်ႈဝႃႈ ၵူၼ်းႁေႃႈသၢမ်လေႃႉၵူႈၵေႃႉ တေတေႃႉယႃႈတင်းမူတ်းသေတႃႉ ဝၢႆးသေ ၵူတ်ႇထတ်းႁၼ်သေ ၵေႃႉၼိုင်ႈၵေႃႈ ၸဝ်ႈသၢမ်လေႃႉၵူႈၵေႃႉ မိူၼ်မီးတင်းၽိတ်းဝႆႉ ။ တီႈတေႉမၼ်း ၶဝ်ထုၵ်ႇလီႁႄႉႁၢမ်ႈ ၽဵဝ်ႈမူၺ်ႉပႅတ်ႈတီႈႁူင်းႁဵတ်းဢွၵ်ႇမၼ်းၵမ်းသိုဝ်ႈ ၼႆ ၵူၼ်းပိုၼ်ႉတီႈသိုပ်ႇလၢတ်ႈၼင်ႇၼႆ။

ၸွမ်းၼင်ႇ Maesaipress သိုပ်ႇႁၢႆးငၢၼ်းထတ်းသၢင်ဝႆႉတႄႉ – ႁေႃႇယႃႈမဝ်းၵမ် ငၢႆးႁေႃႇၼဵင်ႈသီၶဵဝ်ၼုမ်ႇၼၼ်ႉ ၵမ်ႈၼမ် ၵႆႉတီႉလႆႈၸွမ်းၼႂ်းၶဵတ်ႇၵဵင်းႁၢႆး ၵဵင်းမႂ်ႇ ။ ယိုၼ်ယၼ်လႆႈဝႃႈ ႁေႃႇယႃႈမဝ်းၵမ်သႅၼ်းၼႆႉ မၼ်းလုၵ်ႉမႃး ၼႂ်းပိုၼ်ႉတီႈ သိုၵ်းဝႃႉ တပ်ႉ171 ၸိူဝ်းၼႆႉမႃး။ ၵမ်ႈၼမ် တေတေႃႉၼႂ်းထိူၼ်ႇၼႂ်းပႃႇသေ ၸင်ႇႁွတ်ႈၼႂ်းမိူင်းထႆး။မၢင်ပွၵ်ႈ ပၢႆသႂ်ႇမႃးပႃး ယႃႈႁႄႊရူဝ်ႊဢိၼ်ႊဢၼ်ပဵၼ်တႅင်ႈ မီးမိၵ်ႈမၢႆသၢင်ႇသီႈၼိုင်ႈၵူႈ လႄႈ မၢင်ဢၼ်ၵေႃႈ သႂ်ႇၼႂ်းၼမ်ႉသူမ်ႈသပွၼ်ႊသိူဝ်ႊ ။ ၶူဝ်းၸိူဝ်းၼႆႉ မၼ်းလုၵ်ႉမႃးတီႈမိူင်းယွၼ်း ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ ။

ၼႂ်းၶၢဝ်းတၢင်းလိူၼ် 2 လိူၼ်ၼႆႉ ၵူၼ်းတေႃႉယႃႈၵေႃႈ ႁတ်းငၢၼ်မႃးလိူဝ်ၵဝ်ႇ ဢမ်ႇတေႃႉတၢင်းလတ်းသေ ၶႂ်ႈတေႃႉၶဝ်ႈၼႂ်းဝၢၼ်ႈၼႂ်းဝဵင်းၵမ်းသိုဝ်ႈလႄႈ ၸဝ်ႈၼႃႈတီႈၾင်ႇထႆးၾင်ႇမၢၼ်ႈၵေႃႈ ၸင်ႇၶဵင်ႈၶႅင်ၵၢၼ်ၵူတ်ႇထတ်းၵူၼ်းၶဝ်ႈဢွၵ်ႇလတ်းၵႂႃႇမႃးၸိူဝ်းၼႆႉ ။

တႄႇဢဝ်မိူဝ်ႈ ဝၼ်းတီႈ 5 ၼၼ်ႉမႃးသေ ၶူဝ်မၢႆၼိုင်ႈ တႃႈၶီႈလဵၵ်း-မႄႈသၢႆၼႆႉ ၸဝ်ႈၼႃႈတီႈႁၢမ်ႈ – ဢမ်ႇပၼ်တေႃႉၶူဝ်းၵုၼ်ႇတႃႇ ၵႃႉတႃႇၶၢႆသင် ။ တေႃႈၼင်ႇ ၵုၼ်ႇဢၼ်ၸႂ်ႉၼႂ်းသိုင်ႇၾႆး မိူၼ်ၼင်ႇ ၼမ်ႉသီဢိဝ်ႉလမ်(ၵျႃႇၺူဝ်ႉ) မွၵ်ႈ 10 တိူၵ်ႈၼႆႉၵူၺ်း ဢမ်ႇပၼ်တေႃႉ ။ ၶဝ်တေပိုတ်ႇၶိုၼ်း မိူဝ်ႈလႂ် ပႆႇႁူႉတႅတ်ႈၼႆ – ၵူၼ်းႁေႃႈသၢမ်လေႃႉၵေႃႉၼိုင်ႈ သိုပ်ႇလၢတ်ႈၼင်ႇၼႆ-

ၶဝ်ပိၵ်ႉၵုၼ်ႇဝႆႉ ဢမ်ႇပၼ်ၵုၼ်ႇၶဝ်ႈ။ဢိတ်းဢွတ်းတႄႉ လႆႈယူႇ ဢမ်ႇပဵၼ်ႁင် ။ ၶဝ်တေၶိုၼ်းပိုတ်ႇမိူဝ်ႈလႂ်ဢမ်ႇႁူႉ ။ ငိၼ်းဝႃႈတႄႉ မိူဝ်ႈႁိုဝ်းၼႆဢေႃႈ။ဢၼ်တေႃႉၶူဝ်းၽိတ်းၸိူဝ်းၼႆႉ ၺႃးၺွပ်းထပ်းၵၼ်ၼမ်ၼႃႇၼေႈ ။ ၵမ်းပူၼ်ႉသမ်ႉ ၺွပ်းၺႃးငိုၼ်း ထႅင်ႈၵမ်းသမ်ႉ ၺွပ်းၺႃးယႃႈ

မိူၼ်ၼင်ႇ ၼႂ်းဝၼ်းတီႈ 4 လိူၼ်ၵျူႊလၢႆႊ ၼႆႉၵေႃႈ ၸဝ်ႈၼႃႈတီႈထႆးတီႉၺွပ်းလႆႈ ယႃႈမ 5 လၢၼ်ႉမဵတ်ႉပၢႆ တီႈမႄႈတႅင် ၸႄႈတွၼ်ႈၵဵင်းမႂ်ႇ ၊ ထူင်သႂ်ႇမၼ်းၵေႃႈ မီးပႃႈလိၵ်ႈမၢၼ်ႈ ဢၼ်တႅမ်ႈဝႆႉဝႃႈ နဂါးနီ ၼႆလႄႈ ၸဝ်ႈၼႃႈတီႈလၢမ်းၶၢတ်ႈလႆႈဝႃႈ လုၵ်ႉလႅၼ်လိၼ်သေ သူင်ႇၶဝ်ႈမိူင်းထႆး ။

ၽွင်းမိူဝ်ႈၸဝ်ႈၼႃႈတီႈ ထၢင်ႇထိူမ်သေ လမ်းၸွမ်းယူႇၼၼ်ႉ ၵူၼ်းႁေႃႈၵႃးလမ်းၼၼ်ႉ ၵိုတ်းၵႃးသေ ဢွၵ်ႇပၢႆႈ ပွႆႇပႅတ်ႈယႃႈမဝ်းၵမ်ၵိုၵ်းၵႃးဝႆႉၵူၺ်း ။ ၼႂ်းရူတ်ႉၼၼ်ႉ ထူင် ယႃႈမ ဢၼ်ပႃးတူဝ်လိၵ်ႈၼၵႃးၼီႇ မီး 23 ထူင် ။ ႁူမ်ႈသဵင်ႈယႃႈမႃႉ မီး 5200000 (ႁႃႈလၢၼ်ႉသွင်သႅၼ်) မဵတ်ႉ လႆႈႁူႉၼင်ႇၼႆ။

ဢမ်ႇတီႉလႆႈ ၵူၼ်းႁေႃႈရူတ်ႉလမ်းၼၼ်ႉသေတႃႉ ၵူၼ်းႁေႃႈရူတ်ႉၶိူင်ႈသေ ၼမ်းၼႃႈရူတ်ႉတၢင်ႇယႃႈမဝ်းၵမ်ၼၼ်ႉတႄႉ ဢမ်ႇတၼ်းပၢႆႈလွတ်ႈ ။ ၸွမ်းၼင်ႇ ၸဝ်ႈၼႃႈတီႈ ၵူတ်ႇထတ်းသေ ၵူၼ်းႁေႃႈရူတ်ႉၶိူင်ႈၼၼ်ႉ လၢတ်ႈၼႄတႄႉ တူဝ်မၼ်းဢမ်ႇလႆႈႁူႉႁၼ်သင်ၸွမ်းလွင်ႈၵႃႉလွင်ႈၶၢႆယႃႈမဝ်းၵမ် ၊ တေႃႉတႄႉ လႆႈငိုၼ်းၸၢင်ႈ 6000(ႁူၵ်းႁဵင်)ၿၢတ်ႇ လႄႈ ၼမ်းတၢင်းပၼ်ၵူၺ်း ဝႃႈၼႆ။

မိူဝ်ႈဝၼ်းတီႈ 26/06/2026 ၼၼ်ႉသမ်ႉ တီႈၶူဝ်တႃႈၶီႈလဵၵ်း-မႄႈသၢႆၵူၺ်းၼင်ႇၵဝ်ႇ ၸဝ်ႈၼႃႈတီႈထႆး ၵူတ်ႇထတ်း ႁၼ်ၺႃး ၵူၼ်းတေႃႉငိုၼ်းထႆး 23 လၢၼ်ႉၿၢတ်ႇ ။ ၵွပ်ႈႁူဝ်ၼပ်ႉငိုၼ်းၼမ်လႄႈ ၸွင်ႇၵွင်ႉၵၢႆႇၸွမ်းယႃႈမဝ်းၵမ် လႄႈ ၵၢၼ်ၽိတ်းပၵ်းပိူင် ၼႆ ၸဝ်ႈၼႃႈတီႈထႆး တိုၵ်ႉသိုပ်ႇၸွပ်ႇတူၺ်းယူႇ။ ၵူၼ်းတေႃႉမၼ်းတႄႉ ၺႃးဢဝ်တၢင်းၽိတ်းဝႆႉလူၺ်ႈ ယိပ်းငိုၼ်းၼမ်ဢမ်ႇမီးဝႂ်ၶွၼ်ႇၸိုင်ႈမိူင်းဢၼ်မႅၼ်ႈၸွမ်းပိူင် ဝႃႈၼႆ။
ၸင်ႇၼၼ်လႄႈ မိူဝ်ႈလဵဝ် ၵူၼ်းပိုၼ်ႉတီႈမႄႈသၢႆ တႃႈၶီႈလဵၵ်း လႄႈ ၵူၼ်းမိူင်းတၢင်ႇတီႈ ၸိူဝ်းႁဵတ်းၵၢၼ်ႁႃၵိၼ်လဵင်ႉတွင်ႉသိုဝ်ႈယူဝ်း မႆႈၸႂ်ၵူဝ်ႁဵတ်းၵၢၼ်ယၢပ်ႇၵႂႃႇမိူဝ်းၼႃႈထႅင်ႈ ယွၼ်ႉမီးၵူၼ်းၵႃႉၶၢႆၶူဝ်းၽိတ်းၸိူဝ်းၼႆႉၼမ်မႃး ဝႃႈၼႆ။