ၵေႃႇမတီႇဢုပ်ႇဢူဝ်းလွင်ႈငမ်းယဵၼ် လႄႈ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ (NSPNC) တင်း သိုၵ်းလွႆ (တဢၢင်း) TNLA ဢုပ်ႇၵၼ် တီႈဝဵင်းၼေႇပျီႇတေႃႇ သိုၵ်းလွႆယွၼ်းတင်ႈၸႄႈမိူင်း ႁင်းၶေႃ ပၼ်ၵႂၢမ်းမၼ်ႈတီႈ သိုၵ်းမၢၼ်ႈဝႃႈ ဢမ်ႇမီးၵၢင်ၸႂ်တႃႇၽၢတ်ႇဢွၵ်ႇ မိူင်းႁူမ်ႈတုမ်လႃးလႃး – ဝႃႈၼႆ။

မိူဝ်ႈဝၼ်းတီႈ 22 လိူၼ်ၵျူႊလၢႆႊ ယၢမ်းၵၢင်ၶမ်ႈ ၽိုၼ်လိၵ်ႈမၢႆတမ်း ပၢင်ဢုပ်ႇဢူဝ်း တင်းသွင်ၸုမ်း ၽႄႈဢွၵ်ႇမႃးတၢင်းသိုဝ်ႇၼႅင်ႈသၢၼ်တူင်ႇဝူင်းၵူၼ်းသေ ၼႂ်းၼၼ်ႉ ပႃးမႃးၶေႃႈ ဢုပ်ႇဢူဝ်း လႄႈ ၶေႃႈတုမ်ႉတွပ်ႇလၢတ်ႈၵၼ်ဝႆႉ ႁူဝ်ယွႆႈမၼ်း ။

ၼႂ်းၽိုၼ်လိၵ်ႈမၢႆတမ်းၼၼ်ႉ ၾၢႆႇသိုၵ်းလွႆ (တဢၢင်း) ဢဝ်လွင်ႈၵၢၼ်ႁုၼ်ႈမုၼ်းၼႂ်းၼႃႈတီႈ ၸိူဝ်းၶဝ်ႁဵတ်းသၢင်ႈမႃး ၶၢဝ်းတၢင်းပၢင်ယၼ်ႇသိုၵ်း 1027 ၼၼ်ႉသေ လၢတ်ႈႁႂ်ႈသိုၵ်းမၢၼ်ႈယွမ်းႁပ်ႉႁၼ်လီၵမ်ႉထႅမ်ၸွမ်း။ ပေႃးၼၼ်ၸင်ႇ TNLA တေ ၶဝ်ႈႁူမ်ႈပႃးၸွမ်း ၼႂ်းၶၵ်ႉၵၢၼ်ငမ်းယဵၼ် တႂ်ႈဢႃႇၼႃႇသိုၵ်းမၢၼ်ႈ မိူၼ်ၼင်ႇ ၸုမ်းသိုၵ်းဝႃႉ UWSA လႄႈ ၸုမ်းသိုၵ်းမိူင်းလႃး NDAA လၢတ်ႈၵႂႃႇၼင်ႇၼႆ။

ၼင်ႇႁိုဝ် ပိုၼ်ႉတီႈၸၢဝ်းၶိူဝ်းပလွင်ႈ တေမီးလွင်ႈၵတ်းယဵၼ်ၼိမ်တဵင်ႈၼၼ်ႉ ၶႂ်ႈလႆႈ ၶႂ်ႈသၢင်ႈၸႄႈမိူင်း တဢၢင်းႁင်းၶေႃ ၼင်ႇပၵ်းပိူင်လၵ်းမိူင်းမီးဝႆႉ ပဵၼ်တၢင်းၵၢၼ် ႁႂ်ႈလႆႈႁပ်ႉသုၼ်ႇလႆႈတဵမ်ထူၼ်ႈ မိူၼ်တၢင်ႇၸႄႈမိူင်း ။ တိုၼ်းတေဢမ်ႇၽၢတ်ႇဢွၵ်ႇ မိူင်းႁူမ်ႈတုမ်သေ ယိူင်းဢၢၼ်းဝႆႉ တေႁူမ်ႈၵၼ်ၵေႃႇသၢင်ႈ မိူင်းႁူမ်ႈတုမ်ၵႂႃႇ- ၼႆ သိုၵ်းလွႆ (တဢၢင်း) TNLA ဢုပ်ႇလၢတ်ႈယွၼ်းတီႈသိုၵ်းမၢၼ်ႈဝႆႉၼင်ႇၼႆ။

လိူဝ်ၼၼ်ႈၶဝ်ဢုပ်ႇလၢတ်ႈၵႂႃႇပႃးထႅင်ႈဝႃႈ- ဝဵင်းမိူင်းၵုတ်ႈ လႄႈ ဝဵင်းမိူင်းမိတ်ႈၵေႃႈ လႆႈမွပ်ႈပၼ်ၶိုၼ်း သိုၵ်းမၢၼ်ႈ မႅၼ်ႈၸွမ်းၶၢဝ်းယၢမ်းၵူၺ်းဢမ်ႇ ၵႃး လႆႈတိုဝ်းၵမ်ၶေႃႈႁၢမ်ႈ ၵၢၼ် ၽွင်းငမ်းၼႂ်းပိုၼ်ႉတီႈ၊ ၵၢၼ်ၵိုတ်းတိုၵ်း၊ ၵၢၼ်ၸႅၵ်ႇၽႄၵဵတ်ႉလၢၼ်ႇၸွမ်းလႅၼ်လိၼ် လႄႈ ယႅၵ်ႈၵၼ်ဢဝ်ႁူမ်ႇလူမ်ႈၼိူဝ်သဵၼ်ႈတၢင်းၵၢၼ်ၵႃႉၶၢႆ ယႃႇႁႂ်ႈမီးပၼ်ႁႃ ၸွမ်းၼင်ႇတူၵ်း လူင်းၵၼ်တင်းသိုၵ်းမၢၼ်ႈဝႆႉၼၼ်ႉ လီငၢမ်း ၸဵမ်ၸိူဝ်းၼႆႉ ။

လိူဝ်ၼၼ်ႉ ႁဵတ်းသၢင်ႈဢဝ်ႁူမ်ႇလူမ်ႈပၼ်ပႃး ၶူင်းၵၢၼ်ပၢႆးမၢၵ်ႈမီး ဢၼ်လမ်ႇလွင်ႈတႃႇမိူင်းၶႄႇၸဵမ်ၸိူဝ်း ၼႆႉသေ ၽဵဝ်ႈမူၺ်ႉပၼ်ပႃး ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ (ၵျႃႊၽျႅၼ်ႉ)၊ ၵၢၼ်မႄႈမွၵ်ႇယႃႈ (ပြည့်တန်ဆာလုပ်ငန်း)၊ ၵၢၼ်တေႃႇလွင်း လႄႈ ယႃႈမဝ်းၵမ် ၸဵမ်ၸိူဝ်းၼႆႉထႅင်ႈ – ဝႃႈၼႆ ။

ၵွပ်ႈၼၼ် ၶႂ်ႈတုၵ်းယွၼ်းႁႂ်ႈ လူင်ပွင်ၸိုင်ႈ မီးၼမ်ႉၸႂ်ယႂ်ႇၵႂၢင်ႈသေ ၸွႆႈထႅမ်ပၼ် တူၺ်းလူပၼ် ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ သိုၵ်းတဢၢင်းၵုမ်းၵမ် ႁႂ်ႈယူႇငၢႆႈၵိၼ်လူမ် ၶိုၼ်ႈယႂ်ႇႁုၼ်ႈမုၼ်းလိူဝ်ၵဝ်ႇလႄႈ ၶႂ်ႈႁႂ်ႈမူၼ်ႉမႄးပၼ်ၶိုၼ်း ၶူဝ်လူင်မိူင်းတၢင်ႈ (မိုးတေတံတား) ဢၼ်မီးၼႂ်းဝဵင်းသီႇပေႃႉၼၼ်ႉယူႇ- ဝႃႈၼႆ။