ၵူၼ်းမိူင်းပိုၼ်ႉတီႈၸိူဝ်းယူႇၼႂ်းၸႄႈဝဵင်းမိူင်းၼၢႆး ၺႃးၽူႈၵွၼ်းၸႄႈဝဵင်း ႁူမ်ႈၵၼ်တင်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းသေ ၵဵပ်းငိုၼ်း ၵူႈႁိူၼ်း ၼိုင်ႈလိူၼ်လႂ် 20000 ပျႃး ဢမ်ႇၸႅင်ႈဝႃႈ တေဢဝ်ၸႂ်ႉတိုဝ်းၼႂ်းၶၵ်ႉ တွၼ်ႈ ၵၢၼ်ဢၼ်လႂ်တေႉတေႉ- ဝႃႈၼႆ။

တႄႇႁူဝ်ပီ 2026 မႃးၼႆႉ သိုၵ်းမၢၼ်ႈၵေႃႈ ၵဵပ်းသိုၵ်းမႂ်ႇသေ ၶွတ်ႇၽွတ်ႈၸုမ်းပျီႇတူႉၸိတ်ႉပၼ် ၸွမ်းၼႂ်းပွၵ်ႉ ႁႂ်ႈပဵၼ်တႃႇဢဝ်ႁူမ်ႇလူမ်ႈဝႆႉ ။

ၵူၼ်းမိူင်းပိုၼ်ႉတီႈၵေႃႉယူႇဝႆႉ ၼႂ်းၸႄႈဝဵင်းမိူင်းၼၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “တေဝႃႈ ဢဝ်ငိုၼ်းၵႂႃႇပၼ်ၵူၼ်းဢၼ်ၵိၼ်ၸၢင်ႈၵႂႃႇႁဵတ်းသိုၵ်းမၢၼ်ႈၼႆၼၼ်ႉၵေႃႈ သမ်ႉမီးၼိုင်ႈဢိတ်းၵူၺ်း။ ယဝ်ႉၵေႃႈ ပျီႇတူႉၸိတ်ႉဢၼ်ဢဝ်ႁူမ်ႇလူမ်ႈပၼ်ၼႂ်းပွၵ်ႉၼၼ်ႉၵေႃႈ မီးဢမ်ႇပူၼ်ႉသိပ်းၵေႃႉ။ ငိုၼ်းသမ်ႉ ၶဝ်ၵဵပ်းၼိုင်ႈႁိူၼ်းၼႆႉပဵၼ် 2 မိုၼ်ႇပျႃးၵူႈလိူၼ်။ ဢၼ်ၵဵပ်းငိုၼ်းၼႆႉ လုၵ်ႉတီႈၽူႈၵွၼ်းၸႄႈဝဵင်း (မြို့နယ်အထွေထွေအုပ်ချုပ်ရေးရုံး) ၸီႉသင်ႇလူင်းတီႈ ၽူႈၵွၼ်းပွၵ်ႉ။ ငိၼ်းၶၢဝ်ႇဝွင်းဝႅင်းဝႃႈ ၵူၼ်းလူင်ၼႂ်းလုမ်းၶဝ် ႁူမ်ႈၵၼ်တင်း သိုၵ်းတႆး (RCSS) ဢၼ်တူၵ်းပုၼ်ႈၽွၼ်းယူႇၼႂ်းဝဵင်းႁဝ်းၼႆႉႁႄ ႁဵတ်းၵိၼ်ၼႆယူႇဢေႃႈ။ ပၢႆသလိူဝ်ၵူၼ်းမိူင်းဢမ်ႇမီးၵၢၼ်ၶႅမ်ႉ ငိုၼ်းၶဝ်ႈဢမ်ႇလႆႈၼမ်မိူၼ်ဢွၼ်တၢင်း ၵႃႈၸႂ်ႉၸၢႆႇ ၼႂ်းႁိူၼ်းၼႂ်းယေးၵေႃႈ သုင်ၶိုၼ်ႈတိၵ်းတိၵ်းၸိူင်ႉၼႆ ၵူၼ်းၸိူဝ်းမီးဢႃႇၼႃႇၶဝ်သမ်ႉ ႁူမ်ႈၵၼ်ႁဵတ်းၵိၼ်ၸိူင်ႉၼႆၼႆႉ ဢမ်ႇထုၵ်ႇလီပဵၼ်။ ႁဝ်းၵူၼ်းမိူင်းတႄႉ ၵိၼ်းၸႂ်တေႉဢေႃႈ” ဝႃႈၼႆ။

မိူဝ်ႈပီၵၢႆပူၼ်ႉမႃးၼႆႉ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈၸႄႈဝဵင်းမိူင်းၼၢႆး လႆႈပၼ်ငိုၼ်းၸိူင်ႉၼႆ တီႈၽူႈၵွၼ်းပွၵ်ႉ ၵွၼ်းဢိူင်ႇၶဝ်ယူႇသေတႃႉ ဢမ်ႇၸႂ်ႈၵူႈလိူၼ်။ ၼိုင်ႈပီၼႆႉၵူၺ်းလႆႈပၼ်ယူႇမွၵ်ႈ 5 ပွၵ်ႈၵူၺ်း ၼႆယဝ်ႉ။

တီႈဝဵင်းမိူင်းၼၢႆးၼႆႉ လင်ႁိူၼ်းၵူၼ်းမိူင်းၸိူဝ်းယူႇၼႂ်းပွၵ်ႉလွႆဝႄႈ ဝဵင်းမိူင်းၼၢႆးၼၼ်ႉပွၵ်ႉလဵဝ်ၵူၺ်း မီးမွၵ်ႈ 1000 လင် ပၢႆ ပွၵ်ႉပေႃႈမိူင်း၊ ပွၵ်ႉၼွင်ၵႅဝ်း၊ ပွၵ်ႉၼႃးႁွင်ႇ၊ ပွၵ်ႉဢူးယဵၼ်ႇ ၸိူဝ်းၼႆႉၵေႃႈ ၼိုင်ႈပွၵ်ႉၼႆႉဢေႇသုတ်းမီးယူႇလင်ႁိူၼ်း 500 ဢေႇသုတ်းၸိူဝ်းၼႆႉလႄႈ ၼိုင်ႈလိူၼ်ၼႆႉ ၽူႈမီးပုၼ်ႈၽွၼ်းၶဝ် လႆႈငိုၼ်း ၸမ်ႁူဝ်ႁဵင်သႅၼ်ပျႃး သဵၼ်ႈမၢႆငိုၼ်းၶဝ်ႈ ဢွၵ်ႇလၢႆးႁူဝ်ယွႆႈမၼ်းသမ်ႉ ၽူႈယႂ်ႇၵူၼ်းလူင်ၼႂ်းပွၵ်ႉၼႂ်းဢိူင်ႇ ၼႂ်းဝဵင်း ဢမ်ႇသပ်းၸႅင်ႈၼႄၶိုၼ်း ႁႂ်ႈၵူၼ်းမိူင်းလႆႈႁူႉႁၼ်ၸွမ်း ၼႆယဝ်ႉ။

ၵဵဝ်ႇလူၺ်ႈၽူႈၵွၼ်းၸႄႈဝဵင်း ၵွၼ်းဢိူင်ႇ ၵွၼ်းပွၵ်ႉၶဝ် ၵဵပ်းငိုၼ်းတီႈၵူၼ်းမိူင်းၼႆႉသေ ၵူၼ်းမိူင်းၼႂ်းပိုၼ်ႉတီႈဢွၼ်ၵၼ်လၢတ်ႈဝႃႈ – ၶွင်ႇသီႇဢဝ်ၶိုၼ်းၸိုင်ႈတႆး၊ တပ်ႉသိုၵ်း ၸိုင်ႈတႆး (RCSS) ၵေႃႈယူႇသဝ်းတူင်ႉၼိုင်ဝႆႉလႄႈ ၶႂ်ႈႁႂ်ႈၸွႆႈၵႄႈလိတ်ႈပၼ်လွင်ႈၼႆႉ။ သင်ဢမ်ႇလၢတ်ႈသင်ၸွမ်း ဢမ်ႇၵႄႈလိတ်ႈၸွႆႈၼႆ ၵူၼ်းမိူင်းၸၢင်ႈမီးလွင်ႈထၢင်ႇထိူမ်ၼိူဝ်သိုၵ်းတႆးပႃး ၵူၼ်းမိူင်းၼၢႆးလၢတ်ႈၼင်ႇၼႆ။

“မိူဝ်ႈလဵဝ် ၽူႈၵွၼ်းၸႄႈဝဵင်းၵေႃႉၼႆႉၵေႃႈ ၸိုဝ်ႈသဵင်ယႂ်ႇဝႆႉ လွင်ႈၵိၼ်သူးၵိၼ်လၢပ်ႈယူႇ။ မၼ်းပဵၼ်ၵေႃႉ ပၼ်သုၼ်ႇလႆႈ ပိုတ်ႇပၢင်တေႃႇလွင်းၼႂ်းဝဵင်း။ ဢၼ်ၵဵပ်းငိုၼ်းတီႈၵူၼ်းမိူင်း ၵူႈလိူၼ်ၼိုင်ႈႁိူၼ်း 2 မိုၼ်ႇၼႆႉၵေႃႈ လၢႆးတၢင်းမၼ်းလၢတ်ႈၼႆႉ မိူၼ်သိုၵ်းတႆး ဢႃႇၸီႇၶဝ်ၸႂ်ႉၵဵပ်းလူဝ်လူဝ်၊ သိုၵ်းမၢၼ်ႈၸႂ်ႉၵဵပ်းလူဝ်လူဝ်ဝႆႉႁႄ ယွၼ်းတီႈၵူၼ်းမိူင်း။ လွင်ႈၼႆႉသင်ဝႃႈ ၸုမ်းသိုၵ်းတႆး RCSS ဢမ်ႇလႆႈၵဵဝ်ႇသင်ၸွမ်းၼႆတႄႉ လီၸႅင်ႈႁႂ်ႈၵူၼ်းမိူင်းႁူႉၸွမ်းတႅၵ်ႇလႅင်းယူႇ။ လီၸွႆႈထႅမ်ၵႄႈလိတ်ႈပၼ်ၵူၼ်းမိူင်းၽွင်ႈယူႇ။ သိုၵ်းတႆးႁဝ်းၼႆႉ ၶဝ်ႈဝႃႈ တႃႇၵႅတ်ႇၶႄႁႄႉၵင်ႈပၼ်ၵူၼ်းမိူင်းၼႆၼႃႇ။ ၶဝ်ယင်းမီးဢႃႇၼႃႇ မၵ်းမၼ်ႈပၼ်လႆႈ ၽူႈၵွၼ်းၸႄႈဝဵင်းပဵၼ်ၵေႃႉ မွၵ်ႈလွင်ႈၵၢၼ်ၵဵပ်းငိုၼ်းၵဵပ်းၶွၼ်ႇၼႆႉၵူၺ်းတႄႉ ၶဝ်ထုၵ်ႇလီမႃးၸႅင်ႈၼႄယူႇ။ ပေႃးဢမ်ႇဢွၵ်ႇမႃးၸႅင်ႈၼႄ ၵူၼ်းမိူင်း ပဵၼ်တၢင်းၵၢၼ်တႄႉ ပွင်ႇဝႃႈၶဝ်ၵေႃႈ ၵဵဝ်ႇၶွင်ႈၸွမ်းယူႇၼၼ်ႉယဝ်ႉ” ၵူၼ်းမိူင်းၼၢႆး လၢတ်ႈၼင်ႇၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈၽူႈတွႆႇႁွၵ်ႈၶတ်းၸႂ်တိတ်းတေႃႇၸူး ၽူႈမီးပုၼ်ႈၽွၼ်း ၽူႈၶၢၼ်ပၢၵ်ႇ RCSS ယူႇၵေႃႈၵပ်းသိုပ်ႇတိတ်းတေႃႇဢမ်ႇလႆႈ။

ယွၼ်ႉၽူႈမီးပုၼ်ႈၽွၼ်း ႁဵတ်းၵၢၼ်ၽွင်းငမ်းၼႂ်းၸႄႈဝဵင်း လႄႈ ၽူႈမီးဢႃႇၼႃႇ ၼႂ်းတပ်ႉသိုၵ်း တင်း ၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈၶဝ် ႁူမ်ႈၵၼ်ၵဵပ်းၵိၼ်ငိုၼ်းၵူၼ်းမိူင်းၼမ်လူၼ်ႉလိူဝ် ဢၼ်လူဝ်ႇၸႂ်ႉတိုဝ်းတေႉတေႉၼၼ်ႉလႄႈ ႁဵတ်းႁႂ်ႈ ၵူၼ်းမိူင်းၸိူဝ်းႁဵတ်းၵၢၼ်ႁႃၸဝ်ႉၵိၼ်ၶမ်ႈယူႇၼၼ်ႉ ႁူပ်ႉတၢင်းယၢပ်ႇၽိုတ်ႇၵိၼ်းၸႂ်လိူဝ်ႁႅင်းယူႇ – ၼႆယဝ်ႉ။

ဝဵင်းမိူင်းၼၢႆးၼႆႉ ပဵၼ်ၸုမ်းသိုၵ်းမၢၼ်ႈယိုတ်းမိူင်း ၵုမ်းၵမ်ဝႆႉသေတႃႉ မီးဝႆႉပႃးၸုမ်းသိုၵ်းပျီႇတူႉၸိတ်ႉ လႄႈ ၶွင်ႇသီႇဢဝ်ၶိုၼ်းၸိုင်ႈတႆး၊ တပ်ႉသိုၵ်းၸိုင်ႈတႆး RCSS/SSA တူင်ႉၼိုင် ၵႂႃႇမႃး ပၼ်ႇၵၢၼ်ၽွင်းငမ်းဝႆႉၸွမ်းမိူၼ်ၵၼ်။