ႁူဝ်လိူၼ်ၵျုၼ်ႊၼႆႉ သိုၵ်းၶၢင် KIA ၸိူဝ်းတူင်ႉၼိုင်ပၼ်ႇၵၢၼ်ၽွင်းငမ်းယူႇၼႂ်းၸႄႈဝဵင်းမူႇၸေႊ ႁဵတ်းလိၵ်ႈသူင်ႇထိုင် ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ယွၼ်းငိုၼ်း ႁႂ်ႈၵႂႃႇသႂ်ႇၶွၼ်ႇ ၵႃႈပိုတ်ႇႁူင်းႁဵၼ်း၊ ပိုတ်ႇႁၢၼ်ႉတၢင်းၶၢႆၵုၼ်ႇယွႆႈၵူႈသႅၼ်းသႅၼ်း လႄႈ ႁၢၼ်ႉၶၢႆၾူၼ်း၊ ႁၢၼ်ႉၶၢႆၶမ်း ၸဵမ်ၸိူဝ်းၼႆႉ ဝႃႈၼႆ။

ၵူၼ်းမိူင်းဝဵင်းမူႇၸေႊ လႆႈႁပ်ႉလိၵ်ႈတႃႇႁႂ်ႈၵႂႃႇသႂ်ႇၶွၼ်ႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ၸူဝ်ႈဝူင်ႈၼႆႉသိုၵ်းၶၢင်ၶဝ်မႃးသူင်ႇလိၵ်ႈ ယွၼ်းၵဵပ်းၶွၼ်ႇၼႆဝႃႇ။ ၽိူဝ်ႇတူၺ်းဝၼ်းမၼ်း ၼႂ်းၽိုၼ်လိၵ်ႈ ၼၼ်ႉ သမ်ႉပေႃးမူတ်းဢႃယုၵႂႃႇယဝ်ႉ။ ပဵၼ်ၵူၼ်းတၢင်းတႂ်ႈၶဝ် ဢဝ်လိၵ်ႈၶွၼ်ႇဢၼ်ၵဝ်ႇသေ ႁဵတ်းၵိၼ် ၵူၺ်းႁႃႉၵေႃႈဢမ်ႇႁူႉၼႆၵေႃႈ မီးလွင်ႈထၢင်ႇထိူမ်ယူႇ။ ၵူၺ်း ၵႃႈ ပေႃးဢမ်ႇၵႂႃႇသႂ်ႇၶွၼ်ႇပၼ်ၶဝ်သမ်ႉ ၵႆႉဢဝ်မၢၵ်ႇမႃးဝိုတ်ႉသႂ်ႇၼၼ်ႉၼႃႇ။ ၵူၼ်းမိူင်းတႄႉ ယၢပ်ႇၸႂ်ႁႅင်းဝႆႉဢေႃႈ။ လွင်ႈၵၢၼ်ၵဵပ်းၶွၼ်ႇၼႆႉ ၸႂ်ႈတေႉႁႃႉဢမ်ႇၸႂ်ႈၼႆ ၶႂ်ႈႁႂ်ႈၵူၼ်းလူင် ၶဝ်ထတ်းပၼ်ၽွင်ႈဢေႃႈ” ဝႃႈၼႆ။

ယွၼ်ႉၸုမ်းသိုၵ်းၸၢဝ်းၶိူဝ်း ၵူႈၸုမ်းမိူၼ်ၼင်ႇ သိုၵ်းတႆး၊ သိုၵ်းၶၢင်၊ သိုၵ်းလွႆ၊ သိုၵ်းမၢၼ်ႈ လႄႈ သိုၵ်း PDF ၶဝ်လၢႆၸုမ်းၵေႃႈ ၵဵပ်းၶွၼ်ႇတီႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ၼိုင်ႈပီၼႆႉ ဢေႇသုတ်း ၼိုင်ႈၸုမ်း လႆႈပၼ်ယူႇ 10 သႅၼ်ပျႃး တေႃႇထိုင် 20 သႅၼ်ပျႃးၼႆလႄႈ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ်ႁႅင်းဝႆႉ ဝႃႈၼႆ။

ၸဝ်ႈႁၢၼ်ႉၶၢႆၶူဝ်းၵုၼ်ႇ ယူႇဝဵင်းမူႇၸေႊၵေႃႉၼိုင်ႈၵေႃႈ လၢတ်ႈတီႈၽူႈတွႆႇႁွၵ်ႈဝႃႈ “ဢမ်ႇၸႂ်ႈဝႃႈ ၸဝ်ႈၵုၼ်ႇပိုတ်ႇႁၢၼ်ႉတၢင်းၶၢႆၵူၺ်းလႆႈပၼ်။ မိူၼ်ၼင်ႇ ႁူင်းႁဵၼ်းသုၼ်ႇလဵဝ် ၸိူဝ်းပိုတ်ႇဝႆႉ ၸၼ်ႉၼိုင်ႈ ထိုင် ၸၼ်ႉ 12 ၵေႃႈ လႆႈပၼ်ဢေႃႈ။ ၶဝ်ယွၼ်းမႃးၼႆႉ မၼ်းၼမ်ႁႅင်းၼႃႇ ႁဝ်းဢမ်ႇပွင်ပဵၼ်လႆႈမူတ်းလႄႈ ပေႃးဢမ်ႇပၼ်လႃးလႃးၵေႃႈ သမ်ႉၵူဝ်ၶဝ်ဢဝ်မၢၵ်ႇမႃးပွႆႇၼင်ႇၵဝ်ႇ။ ၵွပ်ႈၼၼ် လႆႈယွၼ်းတွင်းပၢၼ်ႇႁႄ ငူပ်ႉငီႉၵႃႈၶွၼ်ႇ ၸွမ်းၼင်ႇႁဝ်းပဵၼ်လႆႈၼၼ်ႉဢေႃႈ” ဝႃႈၼႆ။

လွင်ႈၼႆႉယူႇတီႈၽူႈတွႆႇႁွၵ်ႈ လႆႈတိတ်းတေႃႇၸူးတူၺ်းတီႈၾၢႆႇပွင်ႇၶၢဝ်ႇၸုမ်းသိုၵ်းၶၢင်ယူႇၵေႃႈတိတ်းတေႃႇ ဢမ်ႇလႆႈ။

လႆႈႁူႉဝႃႈ ၼႂ်းပီ 2026 ၼႆႉၵူၺ်း မီးၸုမ်းယိပ်းၵွင်ႈၵၢင်ႇ ဢဝ်မၢၵ်ႇပွႆႇသႂ်ႇ ၸွမ်းႁၢၼ်ႉၶၢႆၶမ်း ၼႂ်းၵၢင်ဝဵင်း မူႇၸေႊ သွင်ပွၵ်ႈ။ တႃႇပွၵ်ႈၼိုင်ႈတႄႉ တႅၵ်ႇ ၊ တႃႇပွၵ်ႈၼိုင်ႈတႄႉ ဢမ်ႇတၼ်းတႅၵ်ႇ ။

ၼႂ်းၸႄႈဝဵင်းမူႇၸေႊၼႆႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း လၢႆၸုမ်း လႄႈ သိုၵ်းမၢၼ်ႈ တင်း ပျီႇတူႉၸိတ်ႉ မွၵ်ႈ 15 ၸုမ်း တူင်ႉၼိုင်ယူႇသဝ်းၵႂႃႇမႃးဝႆႉ ၵူၺ်းဢမ်ႇၵႃး ၸုမ်းၵျႃႊၽျႅၼ်ႉ ၸိူဝ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်း တင်းဢွၼ်ႊလၢႆးၼၼ်ႉၵေႃႈ မီးဝႆႉတင်းၼမ်လႄႈ ႁဵတ်းႁႂ်ႈ ၵူၼ်းမိူင်း ၸိူဝ်းယူႇဝႆႉၼႂ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။