တႄႇႁူဝ်လိူၼ်ၵျုၼ်ႊၼႆႉမႃး သိုၵ်းၶႄႇၵဝ်ႈၵၢင်ႉ (MNDAA) တင်း သိုၵ်းဝႃႉ (UWSA) ၸိူဝ်းပၼ်ႇၵၢၼ်ၽွင်းငမ်း တင်ႈၵဵတ်ႉလၢၼ်ႇဝႆႉ ၼိူဝ်သဵၼ်ႈတၢင်းလူင် လႃႈသဵဝ်ႈ- မိူင်းၵႅတ်ႈ- မိူင်းယေႃၼၼ်ႉ ပႂ်ႉၵူတ်ႇထတ်း ၵူၼ်းမိူင်း တီႉၺွပ်း ဢဝ်လိူင်ႈလူၺ်ႈယႃႈလမ် လႄႈ ယႃႈမဝ်းၵမ် ၵူႈသႅၼ်းသႅၼ်း ။

ၵူၼ်းမိူင်းထုင်ႉမိူင်းၵႅတ်ႈ ၵေႃႉၵႆႉလတ်းၽၢၼ်ႇၵႂႃႇမႃး ၼိူဝ်သဵၼ်ႈတၢင်းလူင် ဢၼ်မီးသိုၵ်းဝႃႉ တင်း သိုၵ်းၶႄႇ ပႂ်ႉၵူတ်ႇထတ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ၸူဝ်ႈသွင်ဝူင်ႈၼႆႉ သိုၵ်းဝႃႉ တင်း သိုၵ်းၶႄႇၶဝ် ႁႄႉၵူၼ်းၸိူဝ်းၵႂႃႇမႃးသေ သွၵ်ႈၶူဝ်း သွၵ်ႈရူတ်ႉ ။ ပႂ်ႉၺွပ်း ယႃႈလမ်။ ပေႃးလုၵ်ႉတၢင်းဝၢၼ်ႈမၢၵ်ႇမႃးမိူင်းယေႃၵေႃႈ ၺႃးၸႅတ်ႈယဝ်ႉၶႃႈ။ ပေႃးပဵၼ်ၵဵတ်ႉလၢၼ်ႇဢၼ်ၶဝ်ပႂ်ႉၼၼ်ႉ ထတ်းၵူႈတီႈယဝ်ႉဢေႃႈ။ ၵမ်ႈၽွင်ႈၵေႃႈ ၺႃးတီႉဢဝ်ယႃႈလမ်ၵႂႃႇ ႁူဝ်သိပ်းၸွႆႉမၼ်းၼင်ႇၵဝ်ႇဢေႃႈ။ မိူဝ်ႈၽုၵ်ႇမၼ်းၼၼ်ႉ ၶဝ်သမ်ႉဢမ်ႇဝႃႈသင် သမ်ႉပၼ်ၶႂၢင်ႉၽုၵ်ႇယူႇ။ ၽိူဝ်ႇတေၶၢႆမႃး သမ်ႉဝႃႈၺွပ်းၼႆႉ မၼ်းၵေႃႈ ၵိၼ်းၸႂ်ဝႆႉၼင်ႇၵဝ်ႇၶႃႈဢေႃႈ” ဝႃႈၼႆ။

တပ်ႉသိုၵ်းဝႃႉ (UWSA) တႄႉပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ – ၸဝ်ႈၼႃႈတီႈ ၾၢႆႇတပ်ႉသိုၵ်းဝႃႉ တေၵူတ်ႇထတ်း ဝႂ်ၶပ်းရူတ်ႉၵႃး၊ ဝႂ်လၢႆႊသိၼ်ႊ လႄႈ မၢႆၾၢင် (မၢတ်ႈပုင်ႇတိၼ်ႇ)- ဢိၵ်ႇပႃး ယႃႈမဝ်းၵမ် – ၼႂ်းပိုၼ်ႉတီႈ သိုၵ်းဝႃႉ ၵုမ်းၵမ် 4 ၸႄႈတွၼ်ႈ ၼႂ်းဝၼ်းတီႈ 15-25/06/2026 ႁိုင် 11 ဝၼ်း – ဝႃႈၼႆ ။

ၽူႈမီးပုၼ်ႈၽွၼ်း ၼႂ်းၸုမ်းသိုၵ်းဝႃႉ တွပ်ႇလၢတ်ႈတီႈႁွင်ႈၵၢၼ်သိုဝ်ႇသိုၵ်းဝႃႉဝႆႉဝႃႈ – “ပဵၼ်ၵၢၼ်တူင်ႉၼိုင် တႃႇဝၼ်းၵႂၢတ်ႇလၢင်ႉၽဵဝ်ႈမူၺ်ႉယႃႈမဝ်းၵမ်လုမ်ႈၾႃႉ ( ဝၼ်းတီႈ 26/06/2026 )။ ၼႂ်းၼႃႈတီႈသိုၵ်းဝႃႉႁဝ်းၵေႃႈ ႁဵတ်းပၢင်ၽဝ်ယႃႈမဝ်းၵမ် လႄႈ ပၼ် တူတ်ႈတၢမ်ႇ ၵူၼ်းၸႂ်ႉတိုဝ်း ၵႃႉၶၢႆယႃႈမဝ်းၵမ်ယူႇၵူႈပီ” ဝႃႈၼႆ။

ၾၢႆႇၼိုင်ႈၵေႃႈ ၵူၼ်းမိူင်းၸိူဝ်းယူႇၼႂ်းၼႃႈတီႈသိုၵ်းဝႃႉ တင်း သိုၵ်းၵဝ်ႉၵၢင်ႉၵုမ်းၵမ်ယူႇ ၼႂ်းမိူင်းတႆးပွတ်းႁွင်ႇၼႆႉ ထုၵ်ႇၶၢၼ်းႁွင်ႉၵႂႃႇ ၶဝ်ႈႁၢပ်ႇၵၢၼ်သိုၵ်း ၼိုင်ႈဝၢၼ်ႈလႂ် ဢေႇသုတ်း ၼိုင်ႈၵေႃႉယူႇလႄႈ ႁဵတ်းႁႂ်ႈမီးလွင်ႈမႆႈၸႂ်ဝႃႈ ၵၢၼ်တီႉၺွပ်းယႃႈမဝ်းၵမ်ပွၵ်ႈၼႆႉ ပဵၼ်ၶေႃႈဢၢင်ႈဢၼ်တေတီႉၺွပ်းပႃးၵူၼ်းပိုၼ်ႉတီႈ တႃႇၵႂႃႇႁဵတ်းသိုၵ်းၵူၺ်း- ဝႃႈၼႆ။

ၵူၼ်းမိူင်းပိုၼ်ႉတီႈ ၵေႃႉယူႇဝႆႉၼႂ်းထုင်ႉမိူင်းယေႃ ၸႄႈဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ၶႂ်ႈႁႂ်ႈဢွၼ်ၵၼ်ဝႆႉသတိယူႇၵိၼ်ၵၼ်။ မိူဝ်ႈလဵဝ်ၼႆႉ ၵူၼ်းမိူင်းပဵၼ်တူဝ်ယိူဝ်ႇယႃႈမဝ်း ၵမ် လႄႈ သိုၵ်းၵႂႃႇယဝ်ႉ။ ပေႃးပဵၼ်လႆႈ ယႃႇပေလဵၼ်ႈယႃႈလဵၼ်ႈၽိၼ်ႇၼၼ်ႉၼႃႇ။ တီႈတေႉတေႉ ပေႃး ဢဝ်ၵႂၢမ်းလၢတ်ႈသိုဝ်ႈဝႃႈ သိုၵ်းၵေႃႈပဵၼ်ယႃႈ ယႃႈၵေႃႈပဵၼ်သိုၵ်းၵူၺ်း တၢင်း ၽိတ်းၼႆႉ မီးတီႈသိုၵ်းမူတ်းမူတ်းယဝ်ႉ။ မၼ်းဢမ်ႇမီးတီႈၵူၼ်းမိူင်း။ သင်ၸိူဝ်ႉၶဝ်ဢမ်ႇပၼ်ၶႂၢင်ႉႁဵတ်း သူၼ်ယႃႈၵေႃႈ ၵူၼ်းမိူင်းတေဢမ်ႇႁတ်းၽုၵ်ႇၼင်ႇၵဝ်ႇ။ မိူဝ်ႈလဵဝ်သမ်ႉ ပၼ် ၶႂၢင်ႉၽုၵ်ႇယႃႈႁႄ ဢမ်ႇပၼ်ၶၢႆယႃႈၼႆႉႁဵတ်းႁႂ်ႈ ၵူၼ်းမိူင်းတုၵ်ႉၶ ယၢပ်ႇၵိၼ်း သုမ်းတိုၼ်းလၢင်းလၢႆလၢႆၵူၺ်း” ဝႃႈၼႆ။

ၼႃႈတီႈသိုၵ်းဝႃႉၵုမ်းၵမ် 4 ၸႄႈတွၼ်ႈ (ဢၼ်သိုၵ်းဝႃႉပိုၼ်ၽၢဝ်ႇဝႆႉၼၼ်ႉ)ပဵၼ် ၸႄႈဝဵင်းႁူဝ်ပၢင်ႇ၊ မိူင်းမႂ်ႇ၊ မိူင်းပွၵ်ႉ၊ မိူင်းလင်း ၸဵမ်ၸိူဝ်းၼႆႉ။ ဝႃႈၼၼ်သေတႃႉၵေႃႈ ယၢမ်းလဵဝ် ၼႂ်း ၸႄႈဝဵင်းလႃႈသဵဝ်ႈၵေႃႈ သိုၵ်းဝႃႉပႂ်ႉၵူတ်ႇထတ်းၵူၼ်းမိူင်း တီႉၺွပ်း ယႃႈမဝ်းၵမ် ၼႆယူႇဢမ်ႇထၢတ်ႇ။