ဝၢႆးလင်ၸုမ်းသိုၵ်းဝႃႉ UWSA ၵႂႃႇ ၼေႇပျီႇတေႃႇႁူပ်ႉထူပ်းဢုပ်ႇဢူဝ်းၸွမ်း ၵေႃႇမတီႇၵေႃႇသၢင်ႈၶၵ်ႉၵၢၼ်ငမ်းယဵၼ် လႄႈ ၽွမ်ႉႁူမ်ႈၸိူဝ်ႉၸၢတ်ႈ NSPNC တင်း ဢူးမိၼ်းဢွင်ႇလၢႆႇ ၸွမ်ၸိုင်ႈ ဢၼ်လုၵ်ႉတီႈသိုၵ်းမၢၼ်ႈယိုတ်းမိူင်းၶိုၼ်ႈမႃးၼၼ်ႉယဝ်ႉ ၽူႈၼမ်းၸုမ်းသိုၵ်းပျီႇတူႉၸိတ်ႉပဢူဝ်း PNO ၵေႃႈ ဢွၵ်ႇၶၢဝ်းတၢင်းၵႂႃႇ ဝဵင်းပၢင်သၢင်းသေ ႁူပ်ႉထူပ်းဢုပ်ႇဢူဝ်း ၸွမ်း ၽူႈၼမ်းၸုမ်းသိုၵ်းဝႃႉ – လႆႈႁူႉၼင်ႇၼႆ။

ဝၼ်းတီႈ 4/08/2026 ဝၼ်းဢၢင်းၵၢၼ်းပူၼ်ႉမႃးၼႆႉ ၽူႈၼမ်းၸုမ်းသိုၵ်းပျီႇတူႉၸိတ်ႉပဢူဝ်း ဢူးၶုၼ်ႇတဵင်းၽေႇ တႅမ်ႈလိၵ်ႈၽႃႇသႃႇပဢူဝ်း လႄႈ ၶႅပ်းႁၢင်ႈဢၼ်ႁူပ်ႉၵၼ်တင်း ၽူႈ ၼမ်းၸုမ်းသိုၵ်းဝႃႉ လေႃႇၵွၵ်းၵၼ်ယူႇ တီႈဝဵင်းပၢင်သၢင်းၼၼ်ႉတၢင်ႇၶိုၼ်ႈမႃးတီႈၾဵတ်ႉသ်ပုၵ်ႉသုၼ်ႇတူဝ်မၼ်းၸၢႆး ။

ႁဵတ်းႁႂ်ႈၵူၼ်းလဵၼ်ႈသူဝ်ႊသျႄႊလ်ဢွၼ်ၵၼ်ဝႃႈ ပျီႇတူႉၸိတ်ႉပဢူဝ်း ၵႂႃႇဝဵင်းပၢင်သၢင်း ပိူဝ်ႈတႃႇဢုပ်ႇဢူဝ်းငူပ်ႉငီႉ သိုဝ်ႉၶိူင်ႈၵွင်ႈၵၢင်ႇ ဝႃႈၼႆ။ လွင်ႈၼႆႉဢူးၶုၼ်ႇတဵင်းၽေႇတႄႉ တုမ်ႉတွပ်ႇဝႆႉဝႃႈ – ပဵၼ်ၵၢၼ်ၵႂႃႇဢႅဝ်ႇယဵမ်ႈတွင်ႈ တဵဝ်းလၢႆလၢႆၵူၺ်း -ဝႃႈၼႆ။

“ၵႂႃႇၵူတ်ႇထတ်းပၢႆးယူႇလီၸွမ်း ၵူၼ်းၼႂ်းမုင်ႉႁေႃႁိူၼ်း လႄႈ ဢူၺ်းၵေႃႉ တၢင်းမိူင်းထႆးယဝ်ႉသေ ၶဝ်ႈမႃးဝႄႉလႄႇလၢႆလၢႆၵူၺ်း။ ၽိူဝ်ႇဢူၺ်းၵေႃႉႁဝ်း ၸိူဝ်းမီးတၢင်းမိူင်းဝႃႉၼႆႉႁူႉဝႃႈ ႁဝ်းၵႂႃႇၼႆ ၶဝ်ၶႂ်ႈႁူပ်ႉလႄႈ ၵႂႃႇႁူပ်ႉၵၼ်လၢႆလၢႆၵူၺ်း။ ၶႅပ်းႁၢင်ႈၼၼ်ႉ ပဵၼ်ဢၼ်ထႆႇဝႆႉၸဵမ်မိူဝ်ႈလိူၼ်ၵျုၼ်ႊပုၼ်ႉ ” – မၼ်းၸၢႆးတႅမ်ႈတၢင်ႇဝႆႉၼင်ႇၼႆ။

ၸွမ်းၼင်ႇၶႅပ်းႁၢင်ႈဢၼ် ဢူးၶုၼ်ႇတဵင်းၽေႇ ဢဝ်တၢင်ႇဝႆႉၼိူဝ်သိုဝ်ႇၼႅင်ႈသၢၼ် ၾဵတ်ႉသ်ပုၵ်ႉသုၼ်ႇတူဝ်မၼ်းဝႆႉၼၼ်ႉ လႆႈႁၼ်ပႃး ၽူႈႁပ်ႉပုၼ်ႈၽွၼ်း ၵၢၼ်ပၢႆးမၢၵ်ႈမီး ၸုမ်းပျီႇတူႉၸိတ်ႉပဢူဝ်း ၸဝ်ႈႁၢၼ် ၶုၼ်ႇလႃႉၽေႇယူႇလႄႈ ႁဵတ်းႁႂ်ႈၵူၼ်းႁဵတ်းၵၢၼ် ၼႂ်းၸုမ်းယိပ်းၵွင်ႈၵၢင်ႇ တၢင်ႇၸုမ်းၶဝ် ယုမ်ႇယမ်ဝႃႈ ၶၢဝ်းတၢင်းပွၵ်ႈၼႆႉ ပဵၼ်တႃႇၵႂႃႇဢုပ်ႇဢူဝ်းသိုဝ်ႉ ၶိူင်ႈၵွင်ႈၵၢင်ႇၽိူမ်ႉ – ဝႃႈၼႆ ။

လိူဝ်ၼၼ်ႉ ယင်းလႆႈႁူႉထႅင်ႈဝႃႈ ၸုမ်းသိုၵ်းပျီႇတူႉၸိတ်ႉပဢူဝ်းၼႆႉ ၵႂႃႇႁူပ်ႉၸွမ်း ၽူႈၼမ်းၸုမ်းသိုၵ်းဝႃႉ တီႈဝဵင်းပၢင်သၢင်း ၵူၺ်း ဢမ်ႇၵႃး ၵႂႃႇႁူပ်ႉပႃး ၽူႈၼမ်းၸုမ်းသိုၵ်းမိူင်းလႃး ထႅင်ႈ ဝႃႈၼႆ။

လႆႈႁူႉဝႃႈ ၵူၼ်းၵေႃႉဢၼ် ဢူးၶုၼ်ႇတဵင်းၽေႇၵႂႃႇႁူပ်ႉထူပ်းၸွမ်းၼၼ်ႉ ပဵၼ် ဢူးၸၢဝ်ႉဢၢႆႈၼပ်း ၽူႈၵေႃႇတင်ႈပႃႇတီႇဝႃႉ UWSP ၵေႃႉၼိုင်ႈ။ လုၵ်ႈၸၢႆးမၼ်းၼႆႉ ၸိုဝ်ႈႁွင်ႉ ဢူး ၸၢဝ်ႉယီႇလၢႆး ပဵၼ်ၽူႈၼမ်းၼႂ်းပႃႇတီႇဝႃႉ UWSPသေ မိူဝ်ႈပူၼ်ႉမႃးသီႇပီၼၼ်ႉ မၼ်းၸၢႆးလႆႈထုၵ်ႇမၵ်းမၼ်ႈပဵၼ် ၽူႈၵွၼ်းႁွင်ႈၵၢၼ်လူင် ၵၢၼ်မိူင်း တီႈငဝ်ႈငုၼ်း ။

ၸွမ်းၼင်ႇၶေႃႈမုၼ်းၶၢဝ်ႇသၢၼ်ဢၼ်လႆႈမႃးတီႈ ၵူၼ်းၵေႃႉၸမ်ၸႂ်ၵၼ်တင်း တူင်ႇဝူင်းၸုမ်းသိုၵ်းပျီႇတူႉၸိတ်ႉပဢူဝ်းၵေႃႉၼိုင်ႈၼၼ်ႉတႄႉ လၢတ်ႈဝႆႉဝႃႈ – ၶၢဝ်းတၢင်းပွၵ်ႈၼႆႉ ပႃး လွင်ႈသိုဝ်ႉၶၢႆ ၶိူင်ႈၵွင်ႈၵၢင်ႇႁိုဝ် ဢမ်ႇပႃးၼၼ်ႉတႄႉ ဢမ်ႇယိုၼ်ယၼ်လႆႈသေတႃႉ မိူဝ်ႈပူၼ်ႉမႃး ၾၢႆႇၸုမ်းပျီႇတူႉၸိတ်ႉပဢူဝ်း ယၢမ်ႈၵႂႃႇသိုဝ်ႉ ၶိူင်ႈၵွင်ႈၵၢင်ႇတီႈ သိုၵ်းဝႃႉယူႇ မိူၼ်ၵၼ် ၼႆယဝ်ႉ။