ၸႄႈဝဵင်းၼမ်ႉၶမ်းၼႆႉ လင်ပၢင်တိုၵ်းယၼ်ႇသိုၵ်း 1027 မႃး သိုၵ်းတဢၢင်း TNLA ပိုၼ်ၽၢဝ်ႇ ပၼ်ႇၵၢၼ်ၽွင်းငမ်းႁင်းၶဝ်ဝႆႉ ထိုင်မိူဝ်ႈလဵဝ် ။ မၢင်ၸိူဝ်းၵေႃႈ လၢတ်ႈဝႃႈ သိုၵ်းၸၢဝ်းၶိူဝ်းၽွင်းငမ်းၼႆႉ ၶႅၼ်းသေ သိုၵ်းမၢၼ်ႈၽွင်းငမ်းၼႆသေ ၶတ်းၸႂ်ယူႇၸွမ်းႁႂ်ႈလႆႈ ။

မၢင်ၸိူဝ်းၵေႃႈ ဝႃႈ သိုၵ်းၸၢဝ်းၶိူဝ်းၽွင်းငမ်းၼႆႉ ပႆႇမီးပၵ်းမီးပိူင်သင်ၵႅၼ်ႇၶႅင် လႄႈ ဢဝ်ၵူၼ်းမိူင်းလႆႈတူၵ်းၼႂ်းၵႄႈၽေးၵူႈပိူင်ပိူင် ၼႆၵေႃႈမီး ။ ၼႂ်းၵႄႈၼႆႉ သိုၵ်းတဢၢင်း ၵႆႉပၼ်ႇလဵပ်ႈၸွမ်းဝၢၼ်ႈသူၼ်ၵူၼ်းမိူင်းလႄႈ ၵူၼ်းမိူင်းၼမ်ႉၶမ်း မႆႈၸႂ်လၢႆပိူင် ဢမ်ႇတမ်းၸႂ် ဢမ်ႇၵတ်းၸႂ်လႆႈ ။ မိူၼ်မိူဝ်ႈလဵဝ် ဢဝ်ၶေႃႈဢၢင်ႈဝႃႈ တႃႇမူၺ်ႉယႃႈမဝ်းၵမ်ၼႆသေ တင်ႈၵဵတ်ႉၼႂ်းမူႇၼႂ်းဝၢၼ်ႈထႅင်ႈ ၵူၼ်းမိူင်းယိင်ႈၶႅၼ်းမႆႈၸႂ် ။

ဝၢႆးသေ သိုၵ်းတဢၢင်း TNLA ပၼ်ႇၵၢၼ်ၽွင်းငမ်းၵူၼ်းမိူင်းတီႈၼမ်ႉၶမ်းမႃးၼႆႉ ၸဵမ်ဢဝ် ၶွၼ်ႇရူတ်ႉၶွၼ်ႇၵႃး ၶွၼ်ႇၵုၼ်ႇၵႃႉတၢင်းၶၢႆ ၶွၼ်ႇၾႆးၾႃႉ ၶွၼ်ႇၵူႈလွင်ႈလွင်ႈ လႅၵ်ႈလၢႆႈမႃး ။
ၽွင်း ပၢင်ယၼ်ႇသိုၵ်း 1027 ၼၼ်ႉ ၵူၼ်းမိူင်းဢမ်ႇၶၢမ်ႇတၢမ်ႇ ၽေးသိုၵ်းၽေးသိူဝ်လႆႈလႄႈ ဢွၼ်ၵၼ်ၽူင်ႉပၢႆႈ ထိုင်လၢႆတီႈလၢႆတၢင်း ။

ၸိူဝ်းဢမ်ႇပၢႆႈၵေႃႈ ဢမ်ႇလွတ်ႈတၢင်းမႆႈၸႂ် ။ လႆႈမႆႈၸႂ် ၶွၼ်ႇလၢႆၸိူဝ်ႉလၢႆပိူင် လႄႈ မႆႈၸႂ် ပိူင်သိုၵ်းၵူႈလွင်ႈလွင်ႈ ။
ၵႃႈၵွၼ်ႇပူၼ်ႉမႃး ၼမ်ႉၶမ်း ၼႆႉ ၸၢဝ်းၶိူဝ်း ယူႇသဝ်းဝႆႉလၢႆၸၢဝ်းၶိူဝ်းၼႆသေတႃႉ ပေႃးဢမ်ႇၵဵဝ်ႇၵၼ်တင်းသိုၵ်းတႄႉ ၵူၼ်းမိူင်း ဢမ်ႇတွၼ်ႉမီးလွင်ႈၸႃႉသင်တေႃႇၵၼ်။

မိူဝ်ႈလဵဝ်တႄႉ ၼမ်ႉၶမ်းၼႆႉ မီးသိုၵ်းတဢၢင်းမႃး ၵုမ်းဝႆႉလႄႈ ႁဵတ်းႁႂ်ႈ ၸၢဝ်းၶိူဝ်းၸိူဝ်းယူႇၼႂ်းပိုၼ်ႉတီႈ ယူႇယၢပ်ႇမႃး ။ ၵူၼ်းမိူင်းမႆႈၸႂ်ဝႃႈ ပေႃးၵူၼ်းမိူင်း ဢဝ်လွင်ႈၸၢဝ်းၶိူဝ်းသေ ႁၼ်ၽိတ်းၵၼ်မႃး တႅၵ်ႇၸတ်ႉၵၼ်မႃး တိူဝ်းတေယူႇယၢပ်ႇမႃးထႅင်ႈလိူဝ်ၵဝ်ႇ ။

ၼင်ႇႁိုဝ် ၸၢဝ်းၶိူဝ်းတေဢမ်ႇတႅၵ်ႇၵၼ်ၼႆႉ ယူႇတီႈသိုၵ်းတဢၢင်း တေႁဵတ်းႁိုဝ်ၵွၼ်းၵိူင်ႈသေ ပၼ်ႇၵၢၼ်ၽွင်းငမ်းၵႂႃႇတႄႉပႆႇႁူႉသေတႃႉ ၸၢဝ်းၶိူဝ်းၼႂ်းပိုၼ်ႉတီႈတႄႉ ၵူဝ်ပၼ်ႁႃၸၢဝ်းၶိူဝ်းယႂ်ႇမႃးၸွမ်းထႅင်ႈ ၊ ယွၼ်ႉဝႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼႆႉ ဢိင်ၼိူဝ် တၢင်းလူဝ်ႇ ၶိူဝ်းၽႂ်မၼ်းသေ ယိပ်းၵွင်ႈလုၵ်ႉၽိုၼ်ႉမႃးၵူၺ်းလႄႈ ဝၢႆးမႃး ၵူဝ်ၵူၼ်းမိူင်းၼင်ႇၵၼ် သိုပ်ႇပဵၼ်ၽိုၼ်းပဵၼ်ၾႆးၵႂႃႇထႅင်ႈၼႆ ၵူၼ်းၼမ်ႉၶမ်း ဢၼ်ႁဵတ်းၵၢၼ်တူင်ႇၵူၼ်းၵေႃႉၼိုင်ႈလၢတ်ႈၼင်ႇၼႆ ။

လိူဝ်ၼၼ်ႉယဝ်ႉ ၵူၼ်းမိူင်း ၵူဝ် သိုၵ်းမၢၼ်ႈယူႇၼႂ်းၵႄႈမၼ်းသေ ၸႂ်ႉလၢႆးႁုၵ်ႉႁၢႆႉ ႁိမ်ၸိင်းဢဝ်ဢႃႇၼႃႇၼႂ်းပိုၼ်ႉတီႈၶိုၼ်း ထႅင်ႈ။သမ်ႉပဵၼ်လႅၼ်လိၼ်ဢၼ်တိတ်းၸပ်းမိူင်းၶႄႇပႃးလႄႈ ၶႄႇၵေႃႈ ႁႃလၢႆးတၢင်း တႃႇလႆႈၽွၼ်းလီမၼ်းယူႇတႃႇသေႇ။ ၸင်ႇၼၼ်လႄႈ ၼမ်ႉၶမ်း တေသုၵ်ႉႁႃႉတေၼိမ်ၵေႃႈ ၸၢင်ႈဢိင်ၼိူဝ် လူင်ပွင်ၸိုင်ႈၶႄႇထႅင်ႈပိူင်ၼိုင်ႈ ။

ၼႂ်းလိူၼ်ဢေႃႊၵတ်ႉသ်ၼႆႉ သိုၵ်းတဢၢင်း ဢဝ်ၶေႃႈဢၢင်ႈဝႃႈ တႃႇတိုၵ်းတေႃးၽဵဝ်ႈမူၺ်ႉယႃႈမဝ်းၵမ်ၼႆသေ ၶဝ်ႈတင်ႈၵဵတ်ႉ ၼႂ်းဝၢၼ်ႈၼႂ်းသူၼ် ထႅင်ႈလႄႈ ၵူၼ်းဝၢၼ်ႈ မႆႈၸႂ် ၵူဝ်ၶဝ်ႈဢွၵ်ႇၵႂႃႇမႃးယၢပ်ႇ ။

မိူဝ်ႈလဵဝ် ၸွမ်း ဝၢၼ်ႈၼွင်ၶၢင် ဝၢၼ်ႈၵွင်းဝဵင်း ပွၵ်ႉဝဵင်းသႃႇ မၢၼ်ႈၶမ်း ၵွင်းဝဵင်း ၵုင်းသႃႇ (ၵူၼ်းပိုၼ်ႉတီႈႁွင်ႉဝႃႈ မူႇဝၢၼ်ႈ သၢႆလွႆ ယွၼ်ႉဝႃႈ တိတ်းၸပ်းသၼ်လွႆ ) ဝၢၼ်ႈၸိူဝ်းၼႆႉ မီး ၾၢႆႇတၢင်းၸၢၼ်းသဵၼ်ႈတၢင်းလူင် ။ ဝၢၼ်ႈဢၼ်ယူႇ တိတ်းၸပ်း ၾင်ႇၼမ်ႉၶမ်းၼၼ်ႉတႄႉ ပႆႇၶဝ်ႈတင်ႈၵဵတ်ႉ ၼႆ ၵူၼ်းပိုၼ်ႉတီႈလၢတ်ႈ ။

တင်ႈတႄႇ သိုၵ်းတဢၢင်း ၽွင်းငမ်းမႃးၼႆႉ ၶဝ်ပႂ်ႉယူႇတၢင်းၶဝ်ႈတၢင်းဢွၵ်ႇဝဵင်းလႄႈ ပွတ်းတၢင်းလူင်ၸိူဝ်းၼၼ်ႉၵူၺ်း ။ ဢၼ်ၶဝ်ႈယူႇၸွမ်းဝၢၼ်ႈၼႆႉတႄႉပႆႇမီး ။ၵမ်းၼႆႉသမ်ႉ သိုၵ်းတဢၢင်းတင်ႈၸႂ်ၶဝ်ႈပၵ်းၵဵတ်ႉၼႂ်းဝၢၼ်ႈလၢတ်ႈဝႃႈ တႃႇၵုမ်းယႃႈမဝ်းၵမ် ။

လၢႆးၵုမ်းယႃႈမဝ်းၵမ်ၼႆႉ ႁဵတ်းလႆႈလၢႆလၢႆးယူႇ ၊ ဢမ်ႇတၢပ်ႈလူဝ်ႇ ပၵ်းၵဵတ်ႉပၵ်းလၢၼ်ႇၼႂ်းဝၢၼ်ႈ ။ ဝၢၼ်ႈၸိူဝ်းၼႆႉ ပဵၼ်ဝၢၼ်ႈဢၼ်ၵူၼ်းတႆးယူႇသဝ်းၼမ် ၊ ၼိုင်ႈဝၢၼ်ႈလႂ် ႁူဝ်ႁိူၼ်း မီး 100 ပၢႆ ထိုင်200 ၼႆႉ ။ မိူၼ်တင်း တင်ႈၸႂ်ႁႂ်ႈၵူၼ်းဝၢၼ်ႈယူႇယၢပ်ႇ ၵူၺ်း ၼႆ – ၵူၼ်းၸၢႆး ၼမ်ႉၶမ်းၵေႃႉၼိုင်ႈလၢတ်ႈၼင်ႇၼႆ –

ပေႃးတူၺ်း ၶဝ်တင်ႈၸႂ်ဢဝ်တီႈယူႇဝႆႉၼႂ်းဝၢၼ်ႈတႆးၵူႈဝၢၼ်ႈ ၊ လႅပ်ႈၶဝ်ၶႂ်ႈပႂ်ႉတူၺ်းငဝ်းလၢႆးလွင်ႈတူင်ႉၼိုင်ၵူၼ်းတႆး ။ ႁဝ်းတူၺ်းတႄႉ လႅပ်ႈတေမီးၽႅၼ်ၵၢၼ်လူင်ဝႆႉသေမဵဝ်းသေမဵဝ်းယဝ်ႉ ။ ဝၢၼ်ႈတႆးၼႆႉ ၶဝ်ၶဝ်ႈပႅတ်ႈၵူႈဝၢၼ်ႈၵူႈဝၢၼ်ႈယဝ်ႉလူး ၊ ပိူင်လူင် ပေႃးလူဝ်ႇၵႂႃႇသူၼ်ၵႂႃႇၼႃး ၵႂႃႇၵႃႉၵႂႃႇၶၢႆၸိူဝ်းၼႆႉ တေလႆႈလတ်းၶဝ်ယဝ်ႉ ။ တူၺ်းၶဝ် လႅပ်ႈတေပၵ်းယူႇဝႆႉႁိုင်။ ဢဝ်ၶေႃႈဢၢင်ႈဝႃႈ တႃႇၽဵဝ်ႈမူၺ်ႉယႃႈမဝ်းၵမ် တီႈတႄႉမၼ်း ဢမ်ႇၵဵဝ်ႇသင် ၶဝ်ဢမ်ႇၸႂ်ႈႁွင်ႈၵၢၼ်ၾၢႆႇယႃႈမဝ်းၵမ်ႈၵမ်းသိုဝ်ႈလူး ။ ၶဝ်ပဵၼ်သိုၵ်းၵူၺ်း

ၵွၼ်ႇၼႃႈၼႆႉ သိုၵ်းတဢၢင်း ယၢမ်ႈယွၼ်းမႃးပၵ်းသဝ်း ၵဵတ်ႉလၢၼ်ႇ ယူႇ ၊ ၵူၼ်းဝၢၼ်ႈဢမ်ႇၶႂ်ႈၽွမ်ႉ ။ ၵၢင်ႉၵႄႇၵေႃႈ လၢတ်ႈႁႄႉပၼ်ၵူၼ်းဝၢၼ်ႈၵူၼ်းသူၼ်ယူႇသေတႃႉ ၾၢႆႇသိုၵ်းတဢၢင်းဢမ်ႇၸူး ။ ဢမ်ႇလႆႈဢွင်ႈတီႈလႂ်ၵေႃႈ တေဢၢၼ်းပၵ်းၸွမ်းယုမ်းၸွမ်းယွမ်ႇ ၸွမ်းတႃႈၸွမ်းတၢင်းသေ ပႂ်ႉ ၼႆ လၢတ်ႈၼင်ႇၼႆထႅင်ႈ ။ ၵမ်းလိုၼ်းၵေႃႈ မႃးပၵ်းၵဵတ်ႉၼႂ်းဝၢၼ်ႈ ၼႆ ၵူၼ်းပိုၼ်ႉတီႈသိုပ်ႇလၢတ်ႈ ။

သိုၵ်းလႄႈၵူၼ်းမိူင်း ယူႇလေႃးၵၼ်ၼႆႉ ၵူၼ်းမိူင်းၵူၺ်း ဢၼ်သုမ်းသုၼ်ႇ ။ ပေႃးမီးတၢင်ႇမူႇတၢင်ႇၸုမ်း မႃးတိုၵ်းတေႃးသိုၵ်းၵေႃႈ ၵူၼ်းမိူင်းၵူၺ်းဢၼ်ၺႃးၵိၼ်ၼႂ်းၵႄႈမၼ်း။ လိူဝ်ၼၼ်ႉ သိုၵ်းၸိူဝ်းၼႆႉ ၸၢင်ႈဢဝ်ၶေႃႈဢၢင်ႈလၢႆဢၼ်သေ ၶဝ်ႈၼႂ်းႁိူၼ်းၼႂ်းယေးၵူၼ်းမိူင်းထႅင်ႈ ၼႆ ၵူၼ်းပိုၼ်ႉတီႈ လၢတ်ႈၼင်ႇၼႆ –

ပေႃးဝႃႈ သိုၵ်းမၢၼ်ႈဢဝ်ႁိူဝ်းမိၼ်မႃးဝႃႇၼႆၵေႃႈ သိုၵ်းတဢၢင်း မီးတီႈလႂ်ၵေႃႈ ၶဝ်တေမႃးတီႈၼၼ်ႈၵူၺ်းၼႃႇ ။ ယဝ်ႉၵေႃႈ တေၸၢင်ႈမီးမႃးထႅင်ႈဝႃႈ မႃးယွၼ်းၵၼ်ဢၼ်ၼၼ်ႉဢၼ်ၼႃႈ တီႈႁိူၼ်းၵူၼ်းမိူင်းထႅင်ႈ။ပေႃးမိူၼ် ၼမ်ႉၵိၼ်ၼမ်ႉဢၢပ်ႇၸိူဝ်းၼႆႉ ၶဝ်ဢမ်ႇမီးဝႆႉတူဝ်ႈတၼ်းၼႆ ၸၢင်ႈၶဝ်ႈႁိူၼ်းၵူၼ်းမိူင်း ။ ပေႃးႁဝ်း တေဢွၵ်ႇၵၢင်ၶမ်ႈၵၢင်ၶိုၼ်းၼႆၵေႃႈ တေဢမ်ႇလွတ်ႈလႅဝ်း

မိူဝ်ႈလဵဝ်ၼႆႉ ဢၼ်ၶဝ်မႃးတင်ႈၵဵတ်ႉၸွမ်းၼႂ်းဝၢၼ်ႈၼႆႉ မီးမွၵ်ႈ 6 တီႈ ၼိုင်ႈတီႈၼႆႉ မီးသိုၵ်းတဢၢင်း တူင်ႉၼိုင်ႈဝႆႉ 10 ၵေႃႉလူင်းတႂ်ႈ ။ ပေႃးဢဝ် ၸွမ်းၶေႃႈတူၵ်းလူင်း တီႈၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ ဝႃႈတႄႉ သိုၵ်းၼႆႉ တိုၼ်းဝႃႈ တေဢမ်ႇလႆႈတူင်ႉၼိုင် ယူႇလေႃးၵူၼ်းဝၢၼ်ႈၵူၼ်းသူၼ် ။ သင်ဝႃႈ ပဵၼ်သင်မႃးၵေႃႈ တေလႆႈဢဝ်လွင်ႈႁူမ်ႇလူမ်ႈၵူၼ်းမိူင်းပဵၼ်ယႂ်ႇ ၼႆၵူၺ်း ။

မိူၼ်ၼင်ႇ တီႈၵဵတ်ႉပွၵ်ႉမၢၼ်ႈၶမ်းၼၼ်ႉ ၵွၼ်ႇၼႃႈၼႆႉ ဢမ်ႇပေႃးၶဵင်ႈၶႅင်ၵၢၼ်ၵူတ်ႇထတ်းၵႃႈႁိုဝ်သေတႃႉ မိူဝ်ႈလဵဝ် ၵူၼ်းမိူင်းၺႃးထတ်းႁႅင်း။
ၼႂ်းလိူၼ်ဢေႃႊၵတ်ႉသ်ၼႆႉ လိူဝ်သေ သိုၵ်းတဢၢင်း TNLA လူင်းဢဝ်တီႈယူႇ တင်ႈၵဵတ်ႉတင်ႈလၢၼ်ႇယူႇၸွမ်းဝၢၼ်ႈယဝ်ႉၼႂ်းၼမ်ႉၶမ်းယဝ်ႉ ၊ သိုၵ်းၶၢင် KIA ၵေႃႈ ပႂ်ႉၼႂ်းၵႄႈ မူႇၸေႊ – ၼမ်ႉၶမ်း တီႈဝၢၼ်ႈၼမ်ႉလႅင်ၼၼ်ႉသေ ယွၼ်းၵဵပ်းၶွၼ်ႇရူတ်ႉၵႃးၵူၼ်းမိူင်း ။ မၢင်လမ်းၵေႃႈ ၵူၼ်းမိူင်းလႆႈသဵင်ႈငိုၼ်း 1သႅၼ်ပျႃး မၢင်လမ်းၵေႃႈ 5 မိုၼ်ႇ ။ သိုၵ်းၶၢင်ၼႆႉ ပႂ်ႉၵဵပ်းမိူဝ်ႈႁူဝ်လိူၼ်ၵျုႊလၢႆႊၼၼ်ႉယဝ်ႉၵမ်းၼိုင်ႈ ဝၢႆးသေ ၵူၼ်းမိူင်းဢွၵ်ႇၶၢဝ်ႇသၢၼ်ၶတ်းယဝ်ႉ ၵိုတ်းၵႂႃႇၵမ်းၼိုင်ႈသေ ဝၼ်းတီႈ 15/08/2026 ၼႆႉ ၶိုၼ်းတႄႇၵဵပ်းၶိုၼ်းၼႆ ၵူၼ်းၼမ်ႉၶမ်းသိုပ်ႇလၢတ်ႈၼႄၼင်ႇၼႆၶႃႈဢေႃႈ။