ႁူင်းၵဵပ်းယၢမ်း ၶွင်ၸုမ်းသိုၵ်းတဢၢင်း တႅၵ်ႇၵႂႃႇတီႈဝဵင်းၼမ်ႉၶမ်းၸိုင်ႈတႆးပွတ်းႁွင်ႇၼၼ်ႉ ႁဵတ်းႁႂ်ႈတုမ်ႉတိူဝ်ႉသိင်ႇဝႅတ်ႉလွမ်ႉၼႂ်းဝၢၼ်ႈၼႂ်းသူၼ် ပႅၵ်ႇပိူင်လႅၵ်ႈလၢႆႈၼမ်၊ ၵူၼ်းပိုၼ်ႉတီႈမႆႈၸႂ်ပႃး ၵူဝ်ၵွင်ႉငူၼ်ႉၸိုမ်းၶဝ်ႈထိုင်ၼႂ်းၼမ်ႉၵိၼ်ၼမ်ႉၸႂ်ႉ ၼႂ်းပိုၼ်ႉတီႈဝႃႈၼႆ။
ဝၼ်းတီႈ 31/05/2026 ႁူင်းၵဵပ်းယၢမ်းၶွင် TNLA တီႈဝၢၼ်ႈၵွင်းတပ်ႉဝဵင်းၼမ်ႉၶမ်းၼၼ်ႉ တႅၵ်ႇ လႄႈ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ တၢႆၵႂႃႇမွၵ်ႈ 100 မၢတ်ႇၸဵပ်းၵႂႃႇ 100 ပၢႆ။ ၽွင်ယၢမ်းလႄႈၽဝ်ႇၾႆးမႆႈ ၽူင်ႉပိဝ်ၵႂႃႇၸပ်းၸွမ်း တူၼ်ႈၽၵ်းယိူဝ်ႈၼၢင်းၶဵဝ် ၼႂ်းဝၢၼ်ႈၼႂ်းသူၼ်၊ ၼႂ်းၼမ်ႉမေႃႇ လႄႈမႄႈၼမ်ႉၵေးၼမ်ႉၵေႃႈ ၽွင်ယၢမ်းၸိုမ်းၶဝ်ႈ သေတႃႉဢမ်ႇၸၢင်ႈႁဵတ်းႁိုဝ် ၵႃႈလႆႈဢဝ်ၸႂ်ႉ ဢဝ်ၵိၼ်ယူႇၵူႈဝၼ်း ။ ၵူၼ်းမိူင်းၼမ်ႉၶမ်း ဢွၼ်ၵၼ်မႆႈၸႂ် ၵူဝ်ပဵၼ်ၽေးတုမ်ႉတိူဝ်ႉတေႃႇပၢႆးယူႇလီၵူၺ်းယဝ်ႉဝႃႈၼႆ။
ၵူၼ်းမိူင်းၵေႃႉယူႇဝႆႉၼႂ်းၸႄႈဝဵင်းၼမ်ႉၶမ်းၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ “မိူဝ်ႈႁူင်းယၢမ်းတႅၵ်ႇၼၼ်ႉတႄႉ ႁဝ်းၵေႃႈ ၵိုင်ႉၵၢင်ႉဢမ်ႇၾၢင်ႉတူၺ်းမႅၼ်ႈ သူၼ်ၽၵ်းႁဝ်းၵမ်းသိုဝ်ႈ။ ဝၢႆးမႃးႁဝ်းၸင်ႇၾၢင်ႉတူၺ်းမႅၼ်ႈဝႃႈ ၸွမ်းတူၼ်ႈၽၵ်းယိူဝ်ႈၼၢင်းၶဵဝ် ဢၼ်ႁဝ်းၽုၵ်ႇဝႆႉၼၼ်ႉ မီးၽွင်ၽိူၵ်ႇၽိူၵ်ႇမႃးၸပ်းဝႆႉ ပေႃးတဵမ်ၵႂႃႇသဵင်ႈ။ ၵွပ်ႈၼၼ် ႁဝ်းၵေႃႈဢမ်ႇႁတ်းၵႂႃႇ ဢဝ်ၵိၼ်ၽၵ်းၸိူဝ်းၼၼ်ႉ။ မိူဝ်ႈလဵဝ် ပေႃးတေႁဵတ်းၽၵ်းၼႆ လႆႈဢဝ်ၽၵ်း ၸေႈၼမ်ႉၵိူဝ်ဝႆႉၵမ်ႉၼိုင်ႈႁႄ သုၵ်ႈလၢင်ႉၶႅမ်ႉၶႅမ်ႉယဝ်ႉၸင်ႇႁုင်ၵိၼ်ဢေႃႈ” ဝႃႈၼႆ။
ယွၼ်ႉႁူင်းၵဵပ်းယၢမ်းတႅၵ်ႇသေ ယၢမ်းလဵဝ် ၵူၼ်းမိူင်းၸိူဝ်းယူႇၼႂ်းၸႄႈဝဵင်းၼမ်ႉၶမ်း မွၵ်ႈ 15 ဝၢၼ်ႈၼႆႉႁူပ်ႉ လွင်ႈယၢပ်ႇၵိၼ်း လူဝ်ႇတၢင်းၵမ်ႉၸွႆႈ ၼႂ်းၵၢၼ်ၵေႃႇသၢင်ႈ မူၼ်ႉမႄးၶိုၼ်း ႁိူၼ်းယေး ။ မၢင်ၸိူဝ်းလႆႈၵႂႃႇသွၼ်ႉယူႇၸွမ်း ႁိူၼ်းယေးပီႈၼွင်ႉၽႂ်မၼ်း၊ မၢင်ၸိူဝ်းၵေႃႈ ႁဵတ်းသုမ်ႉသွင်းဢွၼ်ႇယူႇ ၼႂ်းဝၢင်းႁိူၼ်းဢၼ်လူႉၵွႆၵႂႃႇၸိူဝ်းၼၼ်ႉဝႆႉၵူၺ်း။ လႆႈမႆႈၸႂ်ပႃး လွင်ႈၼမ်ႉၵိၼ်ၼမ်ႉၸႂ်ႉ ၵူႈဝၼ်းဝၼ်းၼႆႉ ယွၼ်ႉဝႃႈၽဝ်ႇယၢမ်းၽူင်ႉၶဝ်ႈဝႆႉဝႃႈၼႆ ။
ၽူႈမီးပုၼ်ႈၽွၼ်းၵေႃႉၼိုင်ႈ ဢၼ်လူင်း ပိုၼ်ႉတီႈသေ ၸွႆႈထႅမ်ပီႈၼွင်ႉၵူၼ်းမိူင်းဝဵင်းၼမ်ႉၶမ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈလဵဝ် ၵူၼ်းမိူင်းၸိူဝ်းယူႇၼႂ်းပိုၼ်ႉ တီႈ ႁိမ်းႁွမ်း ႁူင်းယၢမ်းတႅၵ်ႇၼၼ်ႉ လႆႈၸႂ်ႉဝႆႉၼမ်ႉမေႃႇၽႂ်မၼ်း လႄႈ ၼမ်ႉလွတ်ႇ ဢၼ်ဢဝ်မႃးတၢင်း ၼမ်ႉသီးရီး ၼၼ်ႉယူႇသေတႃႉ ၽွင်ယၢမ်းဢၼ်သဵၼ်ဢွၵ်ႇမႃးၸွမ်းၵၢၼ်တႅၵ်ႇၾူင်ႉ ၼၼ်ႉ ပေႃးၵႂႃႇတူၵ်းဝႆႉ ၼႂ်း ၼမ်ႉ ဢမ်ႇၼၼ် ၸပ်းဝႆႉတီႈ တူၼ်ႈမႂ် ၽၵ်းယိူဝ်ႈၼၢင်းၶဵဝ်ၼႆႉ မၼ်းတေမီးၽေးၶဵၼ်တေႃႇၵူၼ်းၸႂ်ႉတိုဝ်း မွၵ်ႈၵႃႈႁိုဝ်ၼႆ ဢမ်ႇလၢမ်းၶၢတ်ႈလႆႈလႄႈ လွမ်မႆႈၸႂ်ဝႆႉယူႇ။ ယွၼ်ႉၼၼ် မိူဝ်ႈလဵဝ် လႆႈပၼ်ၾၢင်ႉၵူၼ်းပိုၼ်ႉ တီႈဝႆႉ ပေႃးတေၸႂ်ႉတိုဝ်းၼမ်ႉၸိုင် ႁႂ်ႈတူမ်ႈသုၵ်းသုၵ်းဢွၼ်တၢင်းၵွၼ်ႇ။ ၽၵ်းၵေႃႈ ဢဝ်ၵိူဝ်ၸေႈဢွၼ် တၢင်း ယဝ်ႉ ၸင်ႇၸႂ်ႉတိုဝ်းၼႆယူႇဢေႃႈ” ဝႃႈၼႆ။
ၼင်ႇႁိုဝ်တေႁူႉလႆႈဝႃႈ ၼမ်ႉၵိၼ်ၼမ်ႉၸႂ်ႉ ပိုၼ်ႉတီႈႁိမ်းႁွမ်းႁူင်းယၢမ်းတႅၵ်ႇၼၼ်ႉ မီးငူၼ်ႉၵွင်ႉႁိုဝ် ဢမ်ႇမီးၼႆၼၼ်ႉ ၸဝ်ႈၼႃႈတီႈၽူႈမီးပုၼ်ႈၽွၼ်း ၸိူဝ်းၵႂႃႇၸွႆႈထႅမ်ၵူၼ်းမိူင်း ၼမ်ႉၶမ်း ၸုမ်းၼိုင်ႈလႆႈၵဵပ်းဝႆႉတူဝ်ယၢင်ႇၼမ်ႉသေ ႁၢင်ႈႁႅၼ်းတႃႇသူင်ႇၵူတ်ႇထတ်းတူၺ်း ႁႂ်ႈႁူႉၶေႃႈတွပ်ႇယူႇ ဝႃႈၼႆ။
မိူဝ်ႈပူၼ်ႉမႃးဝၼ်းတီႈ 31/5/2026 ယၢမ်းၵၢင်ဝၼ်း 12 မူင်းၶိုင်ႈ ႁူင်းၵဵပ်းယၢမ်းၵိုင်ႉၵၢင်ႉတႅၵ်ႇ ႁိူၼ်းယေးၵူၼ်းမိူင်းၼႂ်းဝၢၼ်ႈၵွင်းတပ်ႉ တႆး၊ ဝၢၼ်ႈၵွင်းတပ်ႉလွႆ၊ ဝၢၼ်ႈပၢင်ႇတလူဝ်း၊ မၢၼ်ႈၶမ်း၊ ဝၢၼ်ႈပၢင်လူင်၊ ဝၢၼ်ႈၵွင်းၼွင်ၸၢင်ႉ၊ ဝၢၼ်ႈပၢင်ႇထူဝ်ႇလိၼ်၊ ဝၢၼ်ႈၼွင်၊ ဝၢၼ်ႈၵုင်းသႃႇ၊ ပွၵ်ႉဝဵင်းသႃႇ၊ ပွၵ်ႉၸရေးတၢၼ်း၊ ဝၢၼ်ႈႁူဝ်ၼႃး၊ ပွၵ်ႉလူင်၊ ပွၵ်ႉမူဝ်ၶမ်း လႄႈ ၵျွင်းတေႃႇၵၢင်မိူင်း ၸဵမ်ၸိူဝ်းၼႆႉ လူႉၵွႆၵႂႃႇၸွမ်းဝႆႉ တင်းၼမ်။
ၵူၼ်းမိူင်းၸိူဝ်းလႆႈႁူပ်ႉ ၽေးႁူင်းၵဵပ်းယၢမ်းတႅၵ်ႇ ၼႂ်းဝဵင်းၼမ်ႉၶမ်းၼႆႉ မီးၸၢဝ်းၶိူဝ်းတႆး၊ ၸၢဝ်းၶိူဝ်းၶၢင်၊ ၸၢဝ်းၶိူဝ်းလႃးႁူႇ၊ ၸၢဝ်းၶိူဝ်းၶႄႇ လႄႈ ၸၢဝ်းၶိူဝ်းလွႆ (တဢၢင်း) ၸဵမ်ၸိူဝ်းၼႆႉသေတႃႉ ၵိူတ်ႇပဵၼ်ပၼ်ႁႃ ႁူင်းယၢမ်းတႅၵ်ႇၵႂႃႇ ႁိုင်ၼိုင်ႈဝူင်ႈယဝ်ႉ ၾၢႆႇၵူၼ်းမိူင်းၸိူဝ်းလႆႈႁူပ်ႉ ၽေးသေ တူၵ်းတၢင်းယၢပ်ႇၽိုတ်ႇယူႇၼႆႉ ဢမ်ႇပႆႇလႆႈႁပ်ႉတၢင်းၵမ်ႉၸွႆႈ ႁႂ်ႈၽဵင်ႇပဵင်း ၵၼ်ၵူႈဝၢၼ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ