မိူဝ်ႈၼႆႉဝၼ်းတီႈ 16 /3/2026 ယၢမ်းၵၢင်ၼႂ် 7 မူင်းၶိုင်ႈၼၼ်ႉ မၢၵ်ႇတရူၼ်ႊ သိုၵ်းၵဝ်ႈၵၢင်ႉ MNDAA တူၵ်းၸမ် ဝဵင်းၼမ်ႉၶမ်းလႄႈ  သိုၵ်းတဢၢင်းTNLA ႁႂ်ႈၸုမ်းတူင်ႉၼိုင်တူင်ႇဝူင်းၵူၼ်း ဢၼ်မီးဝႆႉ တီႈၼႂ်းပိုၼ်ႉတီႈ ဝဵင်းၼမ်ႉၶမ်း တင်းသဵင်ႈဢွၵ်ႇယူႇတၢင်းၼွၵ်ႈဝဵင်း ယွၼ်ႉဝႃႈ ပၢင်တိုၵ်းၸၢင်ႈလၢမ်း ထိုင်ၼႂ်းဝဵင်း ၼႆယဝ်ႉ ။

ဝၢႆးသိုၵ်းၵဝ်ႈၵၢင်ႉ ယိုတ်းသိမ်းလႆႈ ဝဵင်းၵူတ်ႉၶၢႆယဝ်ႉ မိူဝ်ႈၼႆႉဝၼ်းတီႈ 16/3/2026 ယၢမ်းၵၢင်ၼႂ်  6 မူင်း 40 သိုၵ်းၵဝ်ႈၵၢင်ႉ (MNDAA) တင်း သိုၵ်းတဢၢင်း (TNLA) ယိုဝ်းၵၼ် တီႈ 12လၵ်း ၼႂ်းၸႄႈဝဵင်းၼမ်ႉၶမ်း ။ ၾၢႆႇသိုၵ်းၵဝ်ႈၵၢင်ႉ ဢဝ်မၢၵ်ႇတရူၼ်ႊပိုတ်းယိုဝ်းႁၢဝ်ႈႁႅင်းသေ ထူဝ်းသိုၵ်းထႅမ်ႁႅင်းသိုၵ်းၶိုၼ်ႈမႃးတင်း ၼမ်ႉၽၵ်းၵႃ ။

ၵူၼ်းၸၢႆးဢႃယု 40 ပီၵူၼ်းပိုၼ်ႉတီႈဝဵင်းၼမ်ႉၶမ်းလၢတ်ႈၽူႈတွႆႇႁွၵ်ႈဝႃႈ -“ သဵင်မၢၵ်ႇတရူၼ်ႊၼႆႉ ၸမ်မႃး တင်း တႃႇယႃႇၵုင်းယဝ်ႉ ၊ တလဵဝ် တီႈဝဵင်းၼမ်ႉၶမ်းၼႆႉ ႁဵတ်းပွႆးသၢင်ႇလွင်းဝႆႉ သဵင်ၵွင်ႈသဵင်မၢၵ်ႇ ၵေႃႈၸမ်မႃး တိၵ်းတိၵ်းယဝ်ႉၶႃႈ  ၊ ယၢမ်းလဵဝ်သိုၵ်းၵဝ်ႈၵၢင်ႉၶဝ် ၽႅဝ်ဝႆႉတီႈပႃလႅၼ်ႇ ၊ မၢၼ်ႈဢွမ်ႈ ၊ သႃႇလိုဝ်ႉ ။ ပေႃးမႃးၽႅဝ်တီႈ သႃႇလိုဝ်ႉၼႆႉ တေထိုင်ဝဵင်းၼမ်ႉၶမ်းယဝ်ႉ ၶဝ်ၶိုၼ်ႈမႃးတင်း ၼမ်ႉၽၵ်းၵႃၼႆႉ”- ဝႃႈၼႆ ။ 

ယွၼ်ႉလႆႈယိၼ်းသဵင်ၵွင်ႈသဵင်မၢၵ်ႇတႅၵ်ႇႁၢဝ်ႈႁႅင်း ပၢင်တိုၵ်းၸၢင်ႈသိုပ်ႇၽႄႈလၢမ်းထိုင် ဝဵင်းၼမ်ႉၶမ်း လႄႈယူႇတီႈသိုၵ်းတဢၢင်း TNLA ႁႂ်ႈၸုမ်းတူင်ႉၼိုင်ႇတူင်ႇဝူင်း ၼႂ်းပိုၼ်ႉတီႈ ၶၢႆႉဢွၵ်ႇၼွၵ်ႈ ဝဵင်းၼမ်ႉၶမ်း ၼႆယဝ်ႉ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ သဵင်ၵွင်ႈသဵင်မၢၵ်ႇယိၼ်းလင်ႁႅင်းၼႃႇၶႃႈ ႁိူၼ်းပေႃးသၼ်ႇ ၊ ငဝ်းလၢႆးတလဵဝ်  ပၢင်တိုၵ်းၼႆႉ ၸၢင်ႈလၢမ်းထိုင် ဝဵင်းၼမ်ႉၶမ်းလႄႈ ၶဝ်( သိုၵ်းတဢၢင်း ) မီးလွင်ႈႁၢင်ႈႁႅၼ်းၸိူင်ႉၼၼ်ဢေႃႈ ၊ တွၼ်ႈတႃႇၵူၼ်းမိူင်းတႄႉ ပႂ်ႇယိၼ်းလွင်ႈပၼ်ၾၢင်ႉသင် ၊ ၵူၺ်းၵႃႈၸုမ်း  NGO ၸိူဝ်းၼႆႉတႄႉ ၶဝ်ၸႂ်ႉ ဢွၵ်ႇဝႆႉၼွၵ်ႈဝဵင်းမူတ်းယဝ်ႉ”- ဝႃႈၼႆ ။

လႆႈႁူႉဝႃႈ ၼႂ်းဝၼ်းထီႉ 16.3.2026 တႄႇယၢမ်း 12:00 ၵၢင်ဝၼ်း သိုၵ်းတဢၢင်းၼႂ်းဝဵင်းၼမ်ႉၶမ်း ႁၢင်ႈႁႅၼ်းသိမ်းၶူဝ်းၶဝ်ၵူႈႁွင်ႈၵၢၼ်တူဝ်ႈတၼ်းဝႆႉတင်းသဵင်ႈသေ ။  ၵမ်ႈၽွင်ႈၵေႃႈၶၢႆႉဢွၵ်ႇဝႆႉယဝ်ႉ – ၵူၼ်းပိုၼ်ႉတီႈလၢတ်ႈ ။  

ၾၢႆႇလုမ်းၽွင်းငမ်းတႂ်ႈသိုၵ်းတဢၢင်း ဢၼ်မီးဝႆႉၼမ်ႉၶမ်းၼႆႉပဵၼ် ႁွင်ႈၵၢၼ်ၾၢႆႇပၢႆးပၺ်ႇၺႃႇ  ၊ ႁွင်ႈၵၢၼ်ၾၢႆႇၽွင်းငမ်း  ၊ ႁွင်ႈၵၢၼ်ၾႆးၾႃႉ ၊ ႁွင်ႈၵၢၼ်ၾၢႆႇႁၵ်ႉသႃသိင်ႇဝႅတ်ႉလွမ်ႉ ၊ လုမ်းတြႃး ၊ ယေးငိုၼ်း၊ ႁူင်းယႃလူင် ၸိူဝ်းၼႆႉ ဝႃႈၼႆ ။

ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈမႃး ၼႂ်းၶၢဝ်းတၢင်း  1 ပီပၢႆၼႆႉ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ၶဝ်ႈယိုတ်းၵုမ်းၵမ် ဝဵင်းၼမ်ႉၶမ်း တီႈလႅၼ်လိၼ် မိူင်းတႆး- မိူင်းၶႄႇ တိတ်းၸပ်းၵၼ် ၼႂ်းမိူင်းတႆးပွတ်းႁွင်ႇသေ ပၼ်ႇၵၢၼ်ၽွင်းငမ်းဝႆႉ ႁၢၼ်ႉတေႃႇထိုင်ယၢမ်းလဵဝ်။

ၵဵဝ်ႇၵပ်းလွင်ႈ တီႈလိၼ် ဢၼ်မီးၼႂ်းၸႄႈဝဵင်းၵူတ်ႉၶၢႆလႄႈ ၼႂ်းၸႄႈဝဵင်းသႅၼ်ဝီ ၼၼ်ႉ သိုၵ်း တဢၢင်းTNLA လႄႈ သိုၵ်းၵဝ်ႈၵၢင်ႉ MNDAA ပဵၼ်ပၢင်တိုၵ်းႁိုင်ၶၢဝ်းတၢင်း လိူၼ်ပၢႆယဝ်ႉ ။  ၵဵဝ်ႇၵပ်းလွင်ႈၼႆႉ သွင်ၾၢႆႇ ဢမ်ႇမီးလွင်ႈၵႄႈလိတ်ႈသင်သေဢမ်ႇၵႃး လွင်ႈၶဵင်ႈၶႅင်ၵၢၼ်သိုၵ်း ႁၢဝ်ႈႁႅင်းမႃးလႄႈ ႁဵတ်းႁႂ်ႈ ၸုမ်းဢူၺ်းလီၶဝ် လႆႈပဵၼ်ပၢင်တိုၵ်းၵၼ်မႃး ။