ၶၼ်မၢၵ်ႇၶဝ်ႈတဝ်ႈၼမ်ႉ ဢၼ်ဢွၵ်ႇတီႈၸိုင်ႈတႆးပွတ်းၸၢၼ်းလၢႆလၢႆပိုၼ်ႉတီႈၼၼ်ႉ ဢမ်ႇလႆႈ ၶၼ်လီ ၵႃႈၶၼ်တူၵ်းႁႅင်း၊ ႁဵတ်းႁႂ်ႈၸဝ်ႈသူၼ်ၽုၵ်ႇသွမ်ႈ ဢမ်ႇလႆႈ ၼမ်ႉတွၼ်းသင် သုမ်းပႃး တိုၼ်းလၢင်းထႅင်ႈ ဝႃႈၼႆ။

တႄႇႁူဝ်လိူၼ် ၵျႃၼ်ႊၼႆႉမႃး ၶၼ်မၢၵ်ႇၶဝ်ႈတဝ်ႈၼမ်ႉ ဢႃႇလူး ၊ မၢၵ်ႇၶိူဝ်သူမ်ႈ ၊ ၽၵ်းၵၢတ်ႇ လူင်းယွမ်းတူၵ်းႁႅင်း ၊ ၼႂ်းဝၼ်းတီႈ 16 လိူၼ်ၵျႃၼ်ႊၼႆႉ ၶၼ်မၢၵ်ႇၶိူဝ်သူမ်ႈ တၢင်းဝဵင်းပၢင်လွင်း ၸိုင်ႈတႆးပွတ်းၸၢၼ်း ၼိုင်ႈၸွႆႉလႆႈ 200-100 ပျႃး ၊ ဢႃႇလူး ၼိုင်ႈၸွႆႉ 3000-2000 ပျႃး ၊ ၽၵ်း ၵၢတ်ႇပီ ၼိုင်ႈႁူဝ် 1500- 1000  ပျႃး ။  ဢမ်ႇမီးၵႃႈမီးၶၼ် ၽိူဝ်ႇတေဢဝ်ၶၢႆ လႆႈသဵင်ၵႃႈႁႅင်းထႅင်ႈၼၼ်ႉ ၸဝ်ႈသူၼ်    လႆႈဢဝ်ၵႂႃႇထွၵ်ႇပႅတ်ႈ ၶၢင်ႈတၢင်း တင်းၼမ်ဝႃႈၼႆ ။   

ၸဝ်ႈသူၼ်မၢၵ်ႇၶိူဝ်သူမ်ႈ ၼႂ်းၸႄႈဝဵင်းပၢင်လွင်းၵေႃႉၼိုင်ႈလၢတ်ႈဝႃႈ – “သင်ဝႃႈတေဢဝ်ၵႂႃႇၶၢႆတီႈ ဝဵင်းဢွင်ႇပၢၼ်းသမ်ႉ တေလႆႈသဵင်ႈၵႃႈၵႃး ၵႃႈၸၢင်ႈၵူၼ်းထႅင်ႈ ။ ပေႃးၵႂႃႇၶၢႆသမ်ႉလႆႈၼိုင်ႈၸွႆႉ 100-200 ၼမ်သုတ်းလႆႈထိုင် 500 ပျႃး။ ပႆႇဝႃႈၼမ်ႉတွၼ်းလႃႈ ငိုၼ်းတိုၼ်းၵူၺ်းဢမ်ႇၶိုၼ်းလႆႈ   မၢင်ၵေႃႉတႄႉဝႃႈ ၶၢႆဢိၼ်ႉၵေႃႈလႆႈငိုၼ်းၶိုၼ်းဢိၼ်ႉၼႆသေဢဝ်ၵႂႃႇၶၢႆ။ ၵမ်ႈၽွင်ႈတႄႉၵေႃႈပွႆႇ ၼဝ်ႈပွႆႇတၢႆပႅတ်ႈၼႂ်းသူၼ်ၼၼ်ႉလၢႆလၢႆ” –   ဝႃႈၼႆ။

တႃႇတေၽုၵ်ႇမၢၵ်ႇၶိူဝ်သူမ်ႈ  ၊ ဢႃႇလူး ၊ ၽၵ်းၵၢတ်ႇပီ ၼိုင်ႈဢေႊၶိူဝ်ႊ ၼႆႉ ၵႃႈၾုၼ်ႇလိၼ်၊ ၵႃႈၸၢင်ႈၵူၼ်းႁဵတ်းၵၢၼ်၊ ၵႃႈၼမ်ႉ၊ ၵႃႈသိတ်းယႃႈယႃၶႃႈမူင်ႈမႅင်း ၸိူဝ်းၼႆႉ ႁူမ်ႈၵၼ် လႆႈလူင်းတိုၼ်းလၢင်းယူႇ မွၵ်ႈ 40 – 100 သႅၼ်ပျႃး။ ယၢမ်းလဵဝ် ပဵၼ်ၶၢဝ်းဢဝ်ၶၢႆသေတႃႉ ယွၼ်ႉဢမ်ႇလႆႈၶၼ်လီလႄႈ ၸဝ်ႈသူၼ်ၵမ်ႈၼမ် လူႉယႂ်ႇသုမ်းၼမ်။

ၸဝ်ႈသူၼ်ဢႃႇလူးတီႈဝၢၼ်ႈၼွင်တရႃးလၢတ်ႈၽူႈတွႆႇႁွၵ်ႈဝႃႈ -“ပီၵၢႆၽုၵ်ႇၽၵ်းၵၢတ်ႇပီၵေႃႈသုမ်း ၊ ၵမ်းၼႆႉ လႅၵ်ႈၽုၵ်ႇဢႃႇလူး မိူဝ်ႈတႄႇၽုၵ်ႇတႄႉ ၶၼ်ဢႃႇလူးၶၢႆလႆႈၼိုင်ႈၸွႆႉ 7000-8000 ပျႃး။ ၽိူဝ်ႇထိုင်ၶၢဝ်းဢဝ်ဢႃႇလူးၶၢႆမႃး လႆႈၼိုင်ႈၸွႆႉ 2000 -3000 ၵူၺ်း။ သုမ်းယဝ်ႉသုမ်းထႅင်ႈ။    ၼၢႆးၼႃႈ ပွႆးသႃးၶဝ်ၼႆႉ ပေႃးၶဝ်မႃးသိုဝ်ႉထိုင် ၼႂ်းသူၼ်ၼႆ ၶဝ်ၶႅၼ်းတဵၵ်းၵႃႈတဵၵ်းၶၼ်မၼ်း ။ ၽုၵ်ႇသင်ၵေႃႈဢမ်ႇလႆႈၼမ်ႉမျၢတ်ႈၼမ်ႉတွၼ်းသေဢမ်ႇၵႃး သုမ်းပႃးတိုၼ်းလၢၼ်း ဢမ်ႇႁူႉဝႃႈ တေလႆႈၽုၵ်ႇသင်ယဝ်ႉၶႃႈ ပဵၼ်ၼီႈပဵၼ်ၶွတ်ႇ”- ဝႃႈၼႆ ။ 

ဢိင်ၼိူဝ်လွင်ႈၼႆႉ ၸဝ်ႈသူၼ်ၼႂ်းပိုၼ်ႉတီႈ လၢတ်ႈဝႃႈ ပဵၼ်ယွၼ်ႉ ၼႂ်းပိုၼ်ႉတီႈဢမ်ႇမီးလွၵ်းၵၢတ်ႇလီ  တုၵ်းယွၼ်းလၢတ်ႈဝႆႉ ႁႂ်ႈၽူႈမီးပုၼ်ႈၽွၼ်းၶဝ် ၸတ်းၵၢၼ်ပၼ် ႁႂ်ႈမီးလွၵ်းၵၢတ်ႇလီ၊ ႁႂ်ႈၸၢင်ႈတေႃႉသူင်ႇၵႃႉၶၢႆလႆႈလွတ်ႈလႅဝ်း ၸဵမ်ၸိူဝ်းၼႆႉ။

ၼႂ်းၸိုင်ႈမိူင်းႁူမ်ႈတုမ် ဢိၵ်ႇပႃးမိူင်းတႆး ၶၼ်ၶူဝ်းၵုၼ်ႇၵိၼ်ယႅမ်ႉ ပုင်ႈၶိုၼ်ႈဝႆႉ ။ ၵႃးၶၼ်မၢၵ်ႇၶဝ်ႈတဝ်ႈၼမ်ႉ ဢၼ်ၵူၼ်းမိူင်းၽုၵ်ႇသမ်ႉ ယွမ်းလူင်းၵူႈဝၼ်းလႄႈ ႁဵတ်းႁႂ်ႈၸဝ်ႈသူၼ်ၸဝ်ႈၼႃး ယၢပ်ႇၽိုတ်ႇၵိၼ်းၸႂ် ဢမ်ႇလႆႈၼမ်ႉမျၢတ်ႈၼမ်ႉတွၼ်း ထုၵ်ႇၼီႈဝႆႉတင်းၼမ် – ၵူၼ်းပိုၼ်တီႈလၢတ်ႈ ။