ၵၢၼ်သုၵ်ႉယုင်ႈဢူၼ်မေႃးႁၢဝ်ႈႁႅင်းၼႂ်းမိူင်းမၢၼ်ႈဢမ်ႇၼိမ်သဝ်း ၼပ်ႉၶၢဝ်းတၢင်းယိုတ်ႈယၢဝ်းမႃးၸမ် 80 ပီ ။

မူႇၸုမ်းၸိူဝ်းၸဝ်ႈငိုၼ်းသႃး ဢၼ်ႁူမ်ႈၵၼ်တင်းလူင်ပွင်ၸိုင်ႈ /ၽူႈၼမ်းၸိုင်ႈမိူင်းၸိူဝ်းဢမ်ႇဝူၼ်ႉၶွပ်ႈထိုင် ၵူၼ်းမိူင်းမိူဝ်းၼႃႈၼၼ်ႉ ဢွၼ်ၵၼ်ပၵ်းတႃႁႃတူၺ်းၶူဝ်းၶွင်သၽႃႇဝဢၼ်ဢွၵ်ႇၼိူဝ်လိၼ်တႂ်ႈလိၼ် ၼႂ်းၼႃႈလိၼ်ၸၢဝ်းၶိူဝ်းလႄႈမိူင်းႁူမ်ႈတုမ်။ တႃႇႁႃၼမ်ႉတွၼ်းၽွၼ်းလႆႈ ၽွင်းငုမ်းပႃမိူဝ်ႈၼမ်ႉၶုၼ်ႇ ။   မိူၼ်ၼင်ႇ ၸုမ်းယိပ်းၵွင်ႈၵၢင်ႇလၢႆမူႇလၢႆၸုမ်းဢၼ်ဝႃႈႁဵတ်းတႃႇသုၼ်ႇလႆႈၸိူဝ်ႉၸၢတ်ႈၸၢဝ်းၶိူဝ်းၼႆၼၼ်ႉၵေႃႉ ပဵၵ်ႉသမ်ႉမီးမၵ်းမၢႆဢဵၼ်းဢၢၼ်းပူတ်းပွႆႇၸိူဝ်ႉၸၢတ်ႈလႄႈၵွပ်ႈၵူႈၽႅၼ်ႇလိၼ်တူဝ်ၵဝ်ႇ တႃႇ ၵၢၼ်လွတ်ႈလႅဝ်း ထၢင်ႇႁၢင်ႈ ႁိုဝ် မိူင်းၵွၼ်းၶေႃၼႆသေတႃႉ ၾၢႆႇၼိုင်ႈၵေႃႈ တိုၼ်းႁဵတ်းတႃႇသၢင်ႈဢဵၼ်ႁႅင်းဢူငဝ်းၼႃႈတႃတူဝ်ၵဝ်ႇ- ၼႆၽႂ်တေထဵင်လႆႈ။

ၼႂ်းၵႄႈငဝ်းလၢႆးသုၵ်ႉယုင်ႈလူင်ၵၢၼ်မိူင်းဝၼ်းမိူဝ်ႈၼႆႉ  ဢၼ်လႆႈၼမ်ႉတွၼ်းၼမ်သုတ်းၼႂ်းၵၢၼ်မၢၵ်ႈမီးတႄႉ ပဵၼ်သိုၵ်းမၢၼ်ႈၼေႇပျီႇတေႃႇ  ဢၼ်ႁပ်ႉမဝ်ပၼ်ၸဝ်ႈငိုၼ်းသႃးမိူင်းဝၼ်းတူၵ်း မိူင်းဝၼ်းဢွၵ်ႇ မႃးလူင်းတိုၼ်း ယႃႉၼမ်ႉလိၼ်ႁိၼ်ၽႃယူႇၼႂ်းမိူင်းမၢၼ်ႈ  ။  တူၺ်းဢၼ်ၸမ်သုတ်းၵူၺ်းၵေႃႈတေလႆႈႁၼ် ဢၼ်ထႆး မႃးလူင်း တိုၼ်းလၢင်း ၼႂ်းမိူင်းမၢၼ်ႈသေ ႁဵတ်းၵၢၼ်မၢၵ်ႈမီးဝႆႉယူႇ။ ဢၼ်ဢဝ် ၵႂၼ်းထၢတ်ႈၵႅတ်ႉသ် တီႈမိူင်းမၢၼ်ႈ ၶဝ်ႈမိူင်းထႆး ပဵၼ်ၵေႃႉထိ 1။

   ၸွမ်းၼင်ႇၶေႃႈမုလ်း သုၼ်ၵၢင် ၵၢၼ်မၢၵ်ႈမီးမိူင်းထႆးတႄႉ မိူဝ်ႈပီ 2024  ထႆး-မၢၼ်ႈ ၵႃႉၶၢႆတေႃႇၵၼ် မီးၵႃႈၶၼ်ထိုင် 2.5 သႅၼ်လၢၼ်ႉဝၢတ်ႇ။   ဢၼ်ထႆးသူင်ႇ ၶူဝ်းၶွင်ၶဝ်ႈမိူင်းမၢၼ်ႈပဵၼ်တၢင်းၵၢၼ်တႄႉမီး  146,261.96 လၢၼ်ႉဝၢတ်ႇ လႄႈ ဢၼ်ဢဝ်ၶူဝ်းမိူင်းမၢၼ်ႈၶဝ်ႈမိူင်းထႆးသမ်ႉမီးၵႃႈၶၼ် 106,967.31 လၢၼ်ႉဝၢတ်ႇ။  လႆႈဝႃႈ   ထႆးလႆႈပုၼ်ႈသုၼ်ႇ တွၼ်းလိူဝ်ၼႂ်းၵၢၼ်ၵႃႉၶၢႆတေႃႇၵၼ် 39,294.65 လၢၼ်ႉဝၢတ်ႇ။

ဝၢႆးသေသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးမိူဝ်ႈပီ 2021  မိူင်းဝၼ်းတူၵ်းလႄႈလၢႆလၢႆမိူင်းၼႂ်းလုမ်ႈၾႃႉ ဢွၼ်ၵၼ်သၢၼ်ၶတ်းလွင်ႈၵႃႉၶၢႆတေႃႇသိုၵ်းမၢၼ်ႈသေ ဢိုတ်းႁႅတ်ႉပၢႆးမၢၵ်ႈမီးတေႃႇသိုၵ်းမၢၼ်ႈမႃး။ ၵူၺ်းၵႃႈ ၸဝ်ႈငိုၼ်းသႃး ၸိူဝ်းလဵၼ်ႈၵေႃႉၵိူဝ်းလီၸမ်ၸႂ်တင်းသိုၵ်းမၢၼ်ႈတႄႉ ဢမ်ႇၶဝ်ႈႁူမ်ႈၼႂ်းလွင်ႈဢိုတ်းႁႅတ်ႉပၢႆးမၢၵ်ႈမီးသေလႄႈ သိုပ်ႇႁဵတ်းၵၢၼ်ၵႃႉၶၢႆတေႃႇသိုၵ်းမၢၼ်ႈမႃးၼၼ်ႉၵေႃႈ ပဵၼ်ဢၼ်ႁဵတ်းႁႂ်ႈသိုၵ်းမၢၼ်ႈ ယူႇငၢႆႈထူၺ်ႈၸႂ်လူမ်မႃးတေႃႇထိုင်ဝၼ်းမိူဝ်ႈၼႆႉ။

 ပွင်ႇဝႃႈၸိူဝ်းၶဝ်ႈႁႃသိုၵ်းမၢၼ်ႈ ႁႃၼမ်ႉတွၼ်းၽွၼ်းလီၼႂ်းမိူင်းမၢၼ်ႈၼႆႉ   မီးၼမ်လိူဝ်  ၸိူဝ်းၶႂ်ႈ ၶႂမ်ႈပိၼ်ႈ ၵၢၼ်ၵႃႉၶၢႆၸွမ်းသိုၵ်းမၢၼ်ႈ ။  ၽူႈသူၼ်ၸႂ် ၶူဝ်းၶွင်သၽႃႇဝ ၼိူဝ်လိၼ်တႂ်ႈလိၼ် မိူင်းမၢၼ်ႈသမ်ႉမီးၼမ်လိူဝ်မႃး။   ပိူင်လူင်မၼ်း  ဢွၼ်ၵၼ်ပၵ်းတႃ ႁႄႈလိၼ်  Rare Earth     ဢၼ်ပဵၼ်ႁႄႈႁႃယၢပ်ႇ ၼႂ်းလုမ်ႈၾႃႉ။

 Rare Earth  ႁႄႈလိၼ်ၼႆႉ ပဵၼ်ႁႄႈဢၼ်လမ်ႇလွင်ႈ တွၼ်ႈတႃႇ ၵၢၼ်သၢင်ႈ ထဵၵ်ႊၼူဝ်ႊလူဝ်ႊၵျီႊ Technology ပၢၼ်မႂ်ႇလႄႈ ပဵၼ်ၶူဝ်းၶွင်လၵ်းငဝ်ႈလူင် Semiconductor chip တႃႇႁဵတ်း ပႅတ်ႊထရီႊရူတ်ႉၾႆးၾႃႉ ၊ ၼႃႈထီႊဝီႊ  ၼႃႈၾႆး LED ၊  ၾူၼ်းမိုဝ်းထိုဝ် လႄႈၶိူင်ႈၼႂ်းတူဝ်ဢႆႊထီႊ IT ထႅင်ႈ တင်းၼမ်။

မိူၼ်ၼင်ႇၸိုင်ႈမိူင်းမိူင်းၶႄႇ  ပရႃႊသီးလ် လႄႈဢိၼ်ႊၻီႊယႃႊ  ၶဝ်ၵေႃႈ မီးႁႄႈလိၼ် ယူႇၽွင်ႈ။ 

ဝၼ်းမိူဝ်းၼႃႈမႃးၼႆႉ ၼႂ်းလွၵ်းလၢႆးပၢႆးၸၢၵ်ႈ ထဵၵ်ႊၼူဝ်ႊလူဝ်ႊၵျီႊ တၵ်းတေလႆႈၸႂ်ႉႁႄႈလိၼ်ၼမ်မႃးလႄႈ ၸိုင်ႈမိူင်းယႂ်ႇမိူၼ်ၼင်ႇ    ၶႄႇ ယူႊရူပ်ႉ လႄႈဢမေႊရိၵႃႊၶဝ် ၸင်ႇလႄႇႁႃသွၵ်ႈသေႃႉ ႁႄႈလိၼ်ယၢမ်းလဵဝ်။

 မိူဝ်ႈၸိုင်ႈမိူင်းယႂ်ႇ ႁိမ်ၵၼ်ႁႃႁႄႈလိၼ်မႃးတိၵ်းတိၵ်း ၸိုင်ႈမိူင်းဢၼ်မီးႁႄႈလိၼ်ၵေႃႈ ယွၵ်းယွႆၵွတ်းၽၢၼ် မႃးတိၵ်းတိၵ်း။ ၸိုင်ႈမိူင်းဢၼ်ၶုၼ်လူႉမိူင်းႁၢမ်း  မိူင်းသုၵ်ႉယုင်ႈဢူၼ်မေႃး မိူင်းဢၼ်ၸဝ်ႈဢႃႇၼႃႇ ၶိုၼ်ႈယူႇ ၼိူဝ်ပၵ်းပိူင် ၸိူဝ်းၼႆႉပဵၼ်ပဝ်ႉမၢႆတွၼ်ႈတႃႇၸိုင်ႈမိူင်းယႂ်ႇၶဝ်ၶဝ်ႈႁႃႁႄႈလိၼ်။ ၸဝ်ႈၵၢၼ်ပၢႆးမၢၵ်ႈမီးၶဝ် ဢမ်ႇဝူၼ်ႉ ထိုင်ၸၢတ်ႈပၢၼ်ၵူၼ်းမိူင်းပိုၼ်ႉတီႈလႄႈသိင်ႇဝႅတ်ႉလွမ်ႉ။

ၽွၼ်းၵၢၼ်ၶုတ်းမိူင်ႁႄႈၼႆႉ တုမ်ႉတိူဝ်ႉၸိုင်ႈမိူင်းဢၼ်ထုၵ်ႇၶုတ်းၵူၺ်းဢမ်ႇၵႃး တုမ်ႉတိူဝ်ႉပႃးသၢပ်ႇၼမ်ႉလႅၼ်လိၼ်လႄႈၸိုင်ႈမိူင်းႁိမ်းႁွမ်း။   

တူဝ်ယၢင်ႇၸိူင်ႉၼင်ႇမႄႈၼမ်ႉၵူၵ်း ဢၼ်လုၵ်ႉတီႈဝၢၼ်ႈၼွင်တဝ်း ဢိူင်ႇပၢင်ၼိမ် ဝဵင်းမိူင်းပၵ်ႉမိူင်းၶွၼ် ၸႄႈတွၼ်ႈၵဵင်းတုင်မိူင်းတႆး ပွတ်းဢွၵ်ႇၶူင်း လႆၽၢၼ်ႇၶဝ်ႈ ၸူးမိူင်းထႆး တၢင်းဢိူင်ႇတႃႈတွၼ်း ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႂ်ႇ ။ လတ်းၽၢၼ်ႇၵႂႃႇတၢင်းၼႃႈ ဝၼ်းဢွၵ်ႇ ၸႄႈတွၼ်ႈၵဵင်းႁၢႆးလႆလူင်းသူႇမႄႈၼမ်ႉၶွင်။

 ယွၼ်ႉၾၢႆႇၼႂ်းမိူင်းတႆး (မိူင်းမၢၼ်ႈ) မီးၵၢၼ်ၶုတ်းႁႄႈလႄႈႁဵတ်းႁႂ်ႈ မႄႈၼမ်ႉမီးသၢၼ်ၵွင်ႉငူၼ်ႉ ၊ ပဵၼ်ၽေးတေႃႇ သတ်းၼမ်ႉပူပႃလႄႈ ၵူၼ်းပိုၼ်ႉတီႈ။

 ဢမ်ႇၵွမ်ႉၵႃႈမႄႈၼမ်ႉၵူၵ်းၵူၺ်း  ၼမ်ႉသၢႆ ၼမ်ႉႁူၵ်ႈဢၼ်လုၵ်ႈတၢင်းၼႂ်းမိူင်းတႆး(မိူင်းမၢၼ်ႈ) လႆၶဝ်ႈၼႂ်းမိူင်းထႆးၸိူဝ်းၼႆႉ ၵေႃႈ မီးၵွင်ႉငူၼ်ႉ သၢၼ်ၼူ သၢၼ်ႁဵၵ်ႇ လၢႆဢၼ်လၢႆမဵဝ်း  မိူၼ်ၼင်ႇပၼ်ႁႃတၢင်းမိူင်းၶၢင်လႆႈႁူပ်ႉထူပ်း။

ႁႄႈလိၼ်ၼႆႉ ပေႃးမႃးလဵပ်ႈႁဵၼ်းတူၺ်းၼႆ တေလႆႈႁၼ်ယူႇ 17 သႅၼ်း။ ဢၼ်ဢွၵ်ႇၼႂ်းမိူင်းၶၢင်လႄႈ မိူင်းတႆးၼမ်ၼႆႉ လႆႈႁၼ် 2 သႅၼ်း။ ပဵၼ်သႅၼ်းဢၼ်မီးၸိုဝ်ႈဝႃႈ ၻိတ်ႉသ်ပရူဝ်ႊသီႊယမ်ႊ (dysprosium) လႄႈ ထိူဝ်ႊပီႊယမ်ႊ (terbium)။  မိူဝ်ႈပီ 2023 မိူင်းၶႄႇ မႃးဢဝ် ႁႄႈလိၼ် 2 သႅၼ်းၼႆႉ တီႈမိူင်းၶၢင်လႄႈ မိူင်းတႆး သေဢဝ်မိူဝ်းမိူင်းၶႄႇ  ပဵၼ် 41,700  တၼ်ႊ လႆႈႁူႉၼင်ႇၼႆ။

ၾၢႆႇၼိုင်ႈ ၽူႈလူင်ႉလႅၼ်ႇလွင်ႈၶူဝ်းႁႄႈတႂ်ႈလိၼ်ၶဝ်လၢတ်ႈတႄႉဝႃႈ -တႃႇတေလႆႈ ႁႄႈလိၼ်ၼႆႉ လႆႈၸႂ်ႉသၢၼ်ထၢတ်ႈ ၶႅမ်ႊမီႊၶိူဝ်ႊ ၼမ်ႁႅင်းသေ ထတ်းထွင်ဢဝ်ၼႂ်းၶီႈလိၼ်ၶီႈသၢႆးဢၼ်ၶုတ်းလႆႈမႃးၼၼ်ႉလႄႈ ၸင်ႇဝႃႈ ၵၢၼ်ၶုတ်းႁႄႈလိၼ်ၼႆႉတုမ်ႉတိူဝ်ႉသိင်ႇဝႅတ်ႉလွမ်ႉၼမ်လိူဝ်ႁႄႈတၢင်ႇသႅၼ်း- ဝႃႈၼႆဝႆႉ။

ၵွပ်ႈၼႆလႄႈ ၼႂ်းၶၢဝ်းတၢင်းပီလဵဝ်ၵူၺ်း ၶႄႇမႃးဢဝ်ႁႄႈလိၼ်မိူင်းမၢၼ်ႈမိူဝ်းပဵၼ် 4 မိုၼ်တၼ်ႊ ၼႆတႄႉ တေမီးလွင်ႈတုမ်ႉတိူဝ်ႉထိုင်လႂ် – ဢမ်ႇလၢတ်ႈၵေႃႈ တေၸၢင်ႈလၢမ်းႁူႉၵၼ်ယူႇ။

ၵွပ်ႈပိူဝ်ႈၸိူဝ်းၼႆႉယဝ်ႉ ဢၼ်မိူင်းၶႄႇဢမ်ႇၶႂ်ႈပွႆႇမိူင်းမၢၼ်ႈ ။ ႁူမ်ႈဝႃႈမိူင်းမၢၼ်ႈ မီးပၼ်ႁႃ ၵၢၼ်မိူင်း သုၵ်ႉလူင် ၵႃႈႁိုဝ်ၵေႃႈ ၶႄႇမေႃဢဝ်တိုဝ်ႉတၢင်း ယိုၼ်ႈမိုဝ်းၸွႆႈတၢင်းၵၢၼ်မိူင်းလႄႈၵၢၼ်သိုၵ်း လႅၵ်ႈဢဝ်ႁႄႈလိၼ်တီႈသိုၵ်းမၢၼ်ႈ ။ လၢႆးလႂ်ၵေႃႈ ပဵၼ်ၶႄႇလႆႈၼမ်ႉတွၼ်းတင်းမူတ်း။

ပေႃးတူၺ်းႁူင်းၸၢၵ်ႈၼႂ်းယူႊရူပ်ႊၵေႃႈ တႃႇသၢင်ႈရူတ်ႉၾႆးၾႃႉၼႆႉ သမ်ႉလႆႈပိုင်ႈ ႁႄႈလိၼ်တီႈမိူင်းၶႄႇသူင်ႇၶၢႆတေႃႇ။ ႁူမ်ႈဝႃႈ မိူင်းယူႊရူပ်ႊ သၢၼ်ၶတ်းလွင်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းသေ ႁၢမ်ႈႁႅတ်ႉပၢႆးမၢၵ်ႈမီးတေႃႇသိုၵ်းမၢၼ်ႈ- ၼႆသေတႃႉၵေႃႈ  ၶဝ်သမ်ႉၶႂ်ႈလႆႈႁႄႈလိၼ်တီႈမိူင်းမၢၼ်ႈယူႇလႄႈ ပီၵၢႆ 2024 ၼႆႉ ယူႊရူပ်ႊ  လၢႆႈသဵၼ်ႈတၢင်းသိုဝ်ႉႁႄႈလိၼ်မိူင်းမၢၼ်ႈ တီႈမိူင်းၶႄႇၶိုၼ်းၵူၺ်းၼင်ႇၵဝ်ႇ။ ၸင်ႇဝႃႈယိင်ႈၶႅၼ်းႁဵတ်းႁႂ်ႈမိူင်းၶႄႇ  ၶဝ်ႈၵႅဝ်ယုင်ႈၸွမ်းၵၢၼ်မိူင်းမိူင်းမၢၼ်ႈ မႃးထႅင်ႈႁၢဝ်ႈႁၢဝ်ႈႁႅင်းႁႅင်း။ၼႂ်းၶၢဝ်းတၢင်း ပီ 2 ပီၼႆႉ သိင်ႇဝႅတ်ႉလွမ်ႉၼႂ်းမိူင်းမၢၼ်ႈၵေႃႈ ႁၢႆႉၸႃႉလိူဝ်တိူဝ်းၶိုၼ်ႈမႃးႁႅင်း။

တီႈတႄႉမၼ်း ပိုၼ်ႉတီႈၶုတ်းႁႄႈလိၼ်ၼႆႉ ၵမ်ႈၼမ်ပဵၼ်ၼႂ်းပိုၼ်ႉတီႈၸုမ်းယိပ်းၵွင်ႈၵၢင်ႇၵုမ်းၵမ်။ ၵူၺ်းၵႃႈ တွၼ်ႈတႃႇတေသိုဝ်ႉလႆႈမၢၵ်ႇၵွင်ႈၸိုၼ်းယၢမ်းၼၼ်ႉ ၸုမ်းယိပ်းၵွင်ႈၵၢင်ႇဢမ်ႇဝူၼ်ႉထိုင်သိင်ႇဝႅတ်ႉလွမ်ႉလႄႈ သၢႆၸႂ်ၵူၼ်းမိူင်း။ ႁႄႈလိၼ်ၼႆႉယဵၼ်းပဵၼ်ၶိူင်ႈမိုဝ်းတႃႇတေႃႇလွင်းၵၢၼ်မိူင်းပႅတ်ႈ။ ပူၼ်ႉမႃးဢမ်ႇႁိုင်ၼႆႉၸုမ်းသိုၵ်းၶၢင် KIA ၶဝ်ႈယိုတ်းမိူင်ႁႄႈလိၼ် ၵုမ်းပႃးသဵၼ်ႈတၢင်းၵၢၼ်ၵႃႉၶၢႆၸူးမိူင်းၶႄႇ။ ႁဵတ်းႁႂ်ႈၸုမ်းသိုၵ်းၶၢင် ၸၢင်ႈၵဵပ်းၶွၼ်ႇ ႁႄႈလိၼ်လႆႈလီလီ။

ၾၢႆႇတၢင်းသၽႃးႁူမ်ႈတုမ်ယူႊရူပ်ႊ တႄႉ ၶႂ်ႈၶတ်းၸႂ်လူတ်းယွမ်းလွင်ႈသိုဝ်ႉႁႄႈလိၼ်တီႈမိူင်းၶႄႇယူႇသေတႃႉ ႁူင်းၸၢၵ်ႈၼႂ်းၸိုင်ႈမိူင်းယူႊရူပ်ႊ သမ်ႉတၵ်းလူဝ်ႇၸႂ်ႉႁႄႈလိၼ်။ ၵူၺ်းၵႃႈ ဢၼ်ဢဝ်ႁႄႈလိၼ်သူင်ႇၶၢႆၼွၵ်ႈမိူင်းၼမ်သုတ်းၼႂ်းလုမ်ႈၾႃႉ သမ်ႉပဵၼ်မိူင်းၶႄႇ။ ၵွပ်ႈၼႆလႄႈတႃႇ သၽႃးႁူမ်ႈတုမ်ယူႊရူပ်ႊ တေႁႃလၢႆးတၢင်းတတ်းလွင်ႈသိုဝ်ႉႁႄႈလိၼ်တီႈမိူင်းၶႄႇသေ ႁႃသိုဝ်ႉတီႈတၢင်ႇၸိုင်ႈမိူင်းသူင်ႇၶၢႆၸူးၼႆႉတႄႉ တၵ်းတေလႆႈၸႂ်ႉၶၢဝ်းယၢမ်းထႅင်ႈတင်းႁိုင်ယူႇ။

 မိူၼ်ၼင်ႇၸိုင်ႈမိူင်း ၵျိူဝ်ႊမၼီႊတႄႉ ႁဵတ်းမၢႆမီႈၸိုင်ႈမိူင်းဝႆႉ ႁႂ်ႈၵူတ်ႇထတ်းတီႈဢဝ်ႁႄႈလိၼ်မႃး (Supply Chain Due Diligence Act)  ။  ၵွပ်ႈၼႆလႄႈ တင်ႈတႄႇပီ 2023 မႃး ၶွမ်ႊမၼီႊယႂ်ႇ ၼႂ်းၸိုင်ႈမိူင်းၵျိူဝ်ႊမၼီႊ ၸိူဝ်းတေသိုဝ်ႉႁႄႈလိၼ်ၼၼ်ႉ လႆႈထတ်းထွင်တူၺ်းပိုၼ်းတီႈမႃးၶွင်ႁႄႈလိၼ်ၼၼ်ႉလီလီ။ ၸွင်ႇပဵၼ်ႁႄႈလိၼ် ဢၼ်လုၵ်ႉတီႈ ပူၼ်ႉပႅၼ်သုၼ်ႇလႆႈၵူၼ်းပိုၼ်ႉတီႈသေ လႆႈမႃးႁႃႉ  ၼႆၸိူဝ်းၼႆႉ။

တွၼ်ႈတႃႇပၼ်ႇႁူဝ်လူမ်းရူတ်ႉၾႆးၾႃႉလႄႈ ၶိူင်ႈၸႂ်ႉၾႆးၾႃႉၼၼ်ႉ တၵ်းလႆႈမီးႁႄႈလိၼ်သႅၼ်းဢၼ်မူတ်းသႂ်။ ၵူၺ်းၵႃႈတႃႇတေလႆႈ ႁႄႈလိၼ်မူတ်းသႂ်သမ်ႉ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈမိူင်ႁႄႈလိၼ် လႆႈၵၢင်းယၢၼ်တင်းလွင်ႈမူတ်းသႂ် ၼႆ ၽႂ်တေထဵင်လႆႈ။ 

 ပွင်ႈၵႂၢမ်းႁူဝ်ၼႆႉ – မွၼ်းၶိူဝ်းပိၼ်ႇၽႃႇသႃႇ ဢဝ်မႃးတီႈ ပွင်ႈၵႂၢမ်းဢၼ်ၸဝ်ႈပၢႆၵမ်-  လလိတႃႊ ႁၢၼ်ဝူင်း တႅမ်ႈဝႆႉၾၢႆႇထႆးၼၼ်ႉၶႃႈဢေႃႈ။