ၼႂ်းဝၼ်းတီႈ 20 လိူၼ်ၵျုၼ်ႊၼႆႉ ၸၼ်ႉၸွမ်တူင်ႇၵူၼ်းတႆး ၵေႃတႆး ဝဵင်းၵႃလီႉ တေၸတ်း ပၢင်ယိုၼ်ႈမွပ်ႈဝႂ် ၸုမ်ႈၶူးလႄႈ ဝႂ်ပူၼ်ႉၸၼ်ႉသုင် ပွၵ်ႈၵမ်း 5  ပီၼႆႉ မီးလုၵ်ႈႁဵၼ်းလႆႈၶိုၼ်ႈႁပ်ႉ ၼမ်လိူဝ်ၵူႈပီဝႃႈၼႆ။

ၼၢင်းႁဵဝ်းသႅင် ၽူႈၵွၼ်းၸၼ်ႉၸွမ်တူင်ႇၵူၼ်းတႆးလၢတ်ႈတီႈၽူႈတွႆႇႁွၵ်ႈဝႃႈ ပီၼႆႉ ပေႃႈမႄႈလႄႈ ပီႈၼွင်ႉလုၵ်ႈႁဵၼ်း ပႃးၸဵမ်ၽူႈမီးပုၼ်ႈၽွၼ်း  ၸိူဝ်းတေၶဝ်ႈႁူမ်ႈပၢင်ၼႆႉဢမ်ႇယွမ်း  ႁဵင်ၵေႃႉဝႃႈၼႆ။

“ၸႂ်ႈဢေႃႈ ပီၼႆႉတေလႆႈဝႃႈၼမ်ၶိုၼ်ႈမႃးဢိတ်းၼိုင်ႈ။  ဢၼ်ယဝ်ႉၸၼ်ႉသုင် ဢၼ်တွပ်ႇယဝ်ႉ GED လႄႈ ဢၼ်တေႁပ်ႉၸုမ်ႈၶူးၼႆႉ တင်းမူတ်း တေမီးယူႇ 110 ၵေႃႉ ။ ဢၼ်ၼႆႉ တေလႆႈဝႃႈ ၼမ်သေ ၵူႈပီပီ တီႈဢၼ်ယၢမ်ႈလႆႈၸတ်းပၢင်ႁပ်ႉ ၸုမ်ႈၶူးမႃးၼၼ်ႉဢေႃႈ။ လုၵ်ႈႁဵၼ်းၸိူဝ်းတေႁပ်ႉၶူး တီႈၸၼ်ႉၸွမ်တူင်ႇၵူၼ်းတႆးၼၼ်ႉ မီးယူႇ 55 ၵေႃႉသေ ၸိူဝ်းၼၼ်ႉသမ်ႉ ဢၼ်တေသိုပ်ႇႁဵၼ်းတေႃႇၼွၵ်ႈမိူင်းၵေႃႈ မီးယူႇမွၵ်ႈ 30 ပၢႆပၢႆၸိူဝ်းၼႆႉၶႃႈဢေႃႈ ။  ၶႅၵ်ႇႁဝ်းၶႃႈၵေႃႈ ပိူင်လူင်မၼ်း ဝႆႉပဵၼ် ဢူႈမႄႈလႄႈပီႈၼွင်ႉၸိူဝ်ႉၶိူဝ်း ၼႂ်းၼၵ်ႉမေႃၸၼ်ႉၸွမ်လႄႈလုၵ်ႈႁဵၼ်းၸိူဝ်းပူၼ်ႉၸၼ်ႉၸိူဝ်းၼႆႉ သမ်ႉထႅင်ႈ မေႃသွၼ်လႄႈ လုၵ်ႈႁဵၼ်း ၸိူဝ်းမီးပုၼ်ႈၽွၼ်းၸွမ်းၼၼ်ႉ တင်းမူတ်းတေမီး ႁဵင်ပၢႆၸိူဝ်းၼႆႉၶႃႈ။”

 လုၵ်ႈႁဵၼ်းၸိူဝ်းႁဵတ်းယဝ်ႉၸိူဝ်းၼၼ်ႉ ၵမ်ႈၽွင်ႈ တေမိူဝ်းပူၵ်းပွင်ၽဝၸူဝ်ႈပၢၼ်တူဝ်ၵဝ်ႇ  တၢင်းဝၢၼ်ႈတၢင်းသူၼ်၊ ၵမ်ႈၽွင်ႈၵေႃႈတေသိုပ်ႇၵႂႃႇႁဵၼ်းလိၵ်ႈ ၼွၵ်ႈမိူင်း။ ၵမ်ႈၼမ်တႄႉ သိုပ်ႇၵႂႃႇႁဵၼ်းလိၵ်ႈတီႈၸၼ်ႉၸွမ်ရတ်ႉၶျၽတ်း ၵဵင်းမႂ်ႇ။  

ၼၢင်းႁဵဝ်းသႅင်  လၢတ်ႈဝႃႈ-“ မိူဝ်ႈလဵဝ် ဢၼ်လုၵ်ႈႁဵၼ်းၶဝ်ႁႅၼ်းဝႆႉသေ ဢၼ်ၶဝ်ၶႂ်ႈၵႂႃႇၶိုၼ်ႈ ၼမ်သေပိူၼ်ႈ ၼၼ်ႉ ပဵၼ်တီႈ CMRU ၵဵင်းမႂ်ႇၼၼ်ႉၶႃႈဢေႃႈ။ ပၢႆးႁဵၼ်းဢၼ်ၶဝ်လိူၵ်ႈၼႆႉတေမီး HIM ဢၼ်ၼႆႉမၼ်းတေမီး Hospitality  တင်း Tourism ၼၼ်ႉၼႃႇ။ ပေႃးယဝ်ႉတေမီးIBM ( International Business Management) ထႅင်ႈဢၼ်ၼိုင်ႈသမ်ႉ တေပဵၼ် English for Communication ၼႆၼၼ်ႉဢေႃႈ။ လုၵ်ႈႁဵၼ်းၶဝ်လႆႈလိူၵ်ႈဝႆႉ သၢမ်ပၢႆးၼႆႉလႄႈ ပွင်ႇဝႃႈ လုၵ်ႈႁဵၼ်းႁဝ်းၶႃႈ တေၵႂႃႇသၢမ်သႅၼ်းၼၼ်ႉၼႃႇၼေႃႈ။” – ဝႃႈၼႆ။

ၸၼ်ႉၸွမ်တူင်ႇၵူၼ်းတႆးၼႆႉ တႄႇပိုတ်ႇသွၼ်ႁဵၼ်းမႃး မိူဝ်ႈပီ 2017 ဝၢႆးၼၼ်ႉ မႃးၵပ်းသိုပ်ႇၵွင်ႉသၢၼ် ၵၼ်တင်း ၸၼ်ႉၸွမ်ၼႂ်းမိူင်းထႆး မိူၼ်ၼင်ႇ ၸၼ်ႉၸွမ်ရတ်ႉၶျၽတ်းၵဵင်းႁၢႆး Chiang Rai Rajaphat University မိူဝ်ႈပီ 2019 ထိုင်မႃး ပီ2024 သမ်ႉပဵၼ် ၸၼ်ႉၸွမ် ၽႃယပ်း ၵဵင်းမႂ်ႇ   Payap University လႄႈ ရတ်ႉၶျၽတ်း ၵဵင်းမႂ်ႇ Chiang Mai Rajaphat University ၸိူဝ်းၼႆႉသေ လူင်းလၢႆးမိုဝ်း (MOU) ၵၼ်ဝႆႉၼႆၶႃႈ။

ၼႂ်းၶၢဝ်းတၢင်း 10 ပီ ဢၼ်ၸၼ်ႉၸွမ်တူင်ႇၵူၼ်းတႆး ပိုတ်ႇသွၼ်ၵၢၼ်ႁဵၼ်းမႃးၼႆႉ မီးၵူၼ်းၼုမ်ႇ ဢၼ်ယူႇ ၼႂ်းမိူင်းတႆး၊ မိူင်းၶၢင်၊ တိူင်းပႃႇၵိူဝ်လႄႈ ၼႂ်းမိူင်းမၢၼ်ႈတူင်ႈပဵင်းလၢႆပိုၼ်ႉတီႈ ပႃးၸဵမ်ၵူၼ်းၼုမ်ႇ ဢၼ်ၶၢတ်ႇ ၵၢၼ်ႁဵၼ်း ၽွင်းလႆႈပၢႆႈၽေးသိုၵ်းၸိူဝ်းၼၼ်ႉၵေႃႈ မႃးၶိုၼ်ႈႁဵၼ်းတင်းၼမ်။ တႄႇတီႈၼႆႈသေ ၶိုၼ်းသိုပ်ႇၵႂႃႇ ၶိုၼ်ႈႁဵၼ်းတီႈၸၼ်ႉၸွမ်ၼႂ်းမိူင်းထႆး လိူဝ်ၼၼ်ႉ ဢၼ်ၵႂႃႇၶိုၼ်ႈတီႈ မိူင်း Singapore ၊ မိူင်းၶႄႇ၊  မိူင်းSpain ၊ မိူင်း Malaysia လႄႈမိူင်း Canada ၸိူဝ်းၼႆႉၵေႃႈ ယင်းလႆႈသူင်ႇၵူၼ်းၼုမ်ႇ ၶိုၼ်ႈၸၼ်ႉၸွမ်တင်းမူတ်း  မီးဢမ်ႇယွမ်း 150 ၵေႃႉယဝ်ႉ လႆႈႁူႉၼင်ႇၼႆ ။