ၸွမ်းၼင်ႇ ထုင်းၵႂၢမ်းမီးဝႃႈ ၵိၼ်ဢမ်ႇထုၵ်ႇၼိုင်ႈၵမ်း ၵႂႃႇဢမ်ႇထုၵ်ႇၼိုင်ႈယၢင်ႈ ၼႆၼၼ်ႉ မႅၼ်ႈတႄႉတႄႉ ။ မၢင်ပွၵ်ႈမႃး ဝႄႈၽေးၵေႃႈ တိုၵ်ႉၸၢင်ႈၺႃးၽေးထႅင်ႈယူႇ ယွၼ်ႉဝႃႈ ၽေးၵိုင်ႉၵၢင်ႉၼႆႉၸၢင်ႈပဵၼ်လႆႈၵူႈၶၢဝ်းယၢမ်း။ ဢမ်ႇၸႂ်ႈယွၼ်ႉတူဝ်ၸဝ်ႈၵဝ်ႇၵေႃႈ ၸၢင်ႈပဵၼ်ယွၼ်ႉပိူၼ်ႈတၢင်ႇၵေႃႉ။ ၼင်ႇၵႂၢမ်းမိူဝ်ႈၵွၼ်ႇဝႃႈ ၵွင်ႇၵေႃႈဢမ်ႇႁၼ် ဝၼ်းတၢႆဢမ်ႇႁူႉ ၼႆၼၼ်ႉ မေႃသွၼ်ယိင်းတႆး ၵူၼ်းဝဵင်းလၢႆးၶႃႈ ၵေႃႉဢၼ်မီးၵႃႈၶၼ်တႃႇၵူၼ်းၼုမ်ႇ၊ ၵေႃႉဢၼ်မီးၼမ်ႉၸႂ်သေ သွၼ်ပွၼ်ႈၵမ်ႉထႅမ်ႁႅင်းၵၢၼ်ယၢၼ်မိူင်းၼႂ်းမိူင်းထႆးၵေႃႉၼိုင်ႈ လူႉသဵင်ႈၸွမ်း ၽေးၵိုင်ႉၵၢင်ႉၵႃးၽႃႇၵၼ်တီႈမႄႈသွတ်ႇ ၸိုင်ႈထႆး ။ လႆႈဝႃႈ တႆးလူႉသုမ်းယိင်းတႆးၵတ်ႉၶႅၼ်ႇ မီးၼမ်ႉၸႂ်လီ ၵေႃႉၼိုင်ႈ ။

မေႃသွၼ်ယိင်း ၵေႃႉဢၼ် ထူပ်းၽေးၵိုင်ႉၵၢင်ႉသေ လူႉသဵင်ႈၵႂႃႇၼႆႉ ၸိုဝ်ႈ ၼၢင်းၶမ်းယဵၼ်ႇ ဢႃယု 48 ပီ ပဵၼ်မေႃသွၼ်ဢၼ်ၶဝ်ႈ တူင်ႉၼိုင် ၼႂ်း သုၼ်ၵၢၼ်ႁဵၼ်းႁူႉ တွၼ်ႈတႃႇႁႅင်းၵၢၼ် (BEAM Education Foundation) တီႈၵဵင်းမႂ်ႇ ၸိုင်ႈထႆး။
မိူဝ်ႈဝၼ်းတီႈ 6/4/2026 ဝၢႆးဝၼ်း 2 မူင်းပၢႆ ၼၼ်ႉ မၼ်းၼၢင်း ၵႂႃႇသူႇၸႂ်းပီႈၼွင်ႉ ပွတ်းတၢင်းၸႄႈဝဵင်းမႄႈသွတ်ႇသေ ဢၢၼ်းပွၵ်ႈၶိုၼ်းၵဵင်းမႂ်ႇ ။ ဢမ်ႇထၢင်ႇဢမ်ႇထိူမ်သေ ၵႃးဢၼ်မၼ်းၼၢင်းၶီႇမႃးၼၼ်ႉသမ်ႉ မႃးၽႃႇသႂ်ႇ ၵႃး 10 လေႃႉ ဢၼ်ၵိုတ်းဝႆႉၶၢင်ႈတၢင်း ႁိမ်းဝၢၼ်ႈႁူၺ်ႈၼိုင် ဢိူင်ႇမႄႈထေႃႉ ၸႄႈတွၼ်ႈတၢၵ်ႇၼၼ်ႉလႄႈ ၵူၼ်းၼႂ်းၵႃး လူႉတၢႆထင်တီႈ 5 ၵေႃႉ ပႃးမေႃသွၼ် ၼၢင်းၶမ်းယဵၼ်ႇၼႆႉၵေႃႉၼိုင်ႈ ။ မၢတ်ႇၸဵပ်းထႅင်ႈ 9 ၵေႃႉ ။

မေႃသွၼ် ၼၢင်းၶမ်းယဵၼ်ႇၼႆႉ ၵတ်ႉၶႅၼ်ႇၾၢႆႇသွၼ်လိၵ်ႈလၢႆးၵူၺ်းဢမ်ႇၵႃး ၵတ်ႉလႅၼ်ႇပႃး ၾၢႆႇယဵပ်ႉၽႃႈယဵပ်ႉၽႅၼ်ႇ ။ ၸင်ႇၼၼ် တီႈၼႂ်းၸိုင်ႈထႆးၼႆႉၵေႃႈ ၵမ်ႉၸွႆႈသွၼ်ပၼ် ႁႂ်ႈႁႅင်းၵၢၼ်ယၢၼ်မိူင်းမေႃတိၼ်မေႃမိုဝ်း ယဵပ်ႉၶူဝ်း ၸိူဝ်းၼႆႉ ဝႃႈၼႆ ။
ၽူႈမီးပုၼ်ႈၽွၼ်း ၼႂ်း ႁူင်းႁဵၼ်းပၢႆးပၼ်ႇၺႃႇ ႁႅင်းၵၢၼ် BEAM ၵေႃႉၼိုင်ႈ လၢတ်ႈၼႄဝႃႈ –

လုၵ်ႈႁဵၼ်းမၼ်းတႄႉ မီးၼမ်ဢေႃႈ ။ သွၼ်မႃးလၢႆတီႈ ယဝ်ႉ ။ ဢမ်ႇၸႂ်ႈဝႃႈသွၼ်ၵဵင်းမႂ်ႇ တီႈလဵဝ် ။ လႆႈၵႂႃႇသွၼ်တၢင်းမႄႈသွတ်ႇ ၊ ရၼွင်း ပုၼ်ႉပႃး ။ မိူၼ်ၼင်ႇ ၼႂ်းၵဵင်းမႂ်ႇၼႆၵေႃႈ ဢမ်ႇၸႂ်ႈၼႂ်းတူဝ်မိူင်းၵူၺ်း ၵႂႃႇသွၼ်တၢင်း ႁၢင်လူင်း ၊ မႄႈတႅင်ၸိူဝ်းၼႆႉထႅင်ႈ ။မိူင်းၾၢင်ၸိူဝ်းၼႆႉၵေႃႈၵႂႃႇ။ၵႂႃႇလၢႆတီႈၼၼ်ႉၼႃႇ

မေႃသွၼ်ၼၢင်းၶမ်းယဵၼ်ႇၼႆႉ ၸႃႇတိ တီႈၵိူတ်ႇပဵၼ်ဝဵင်းလၢႆးၶႃႈ။ ပဵၼ်လုၵ်ႈယိင်း လုင်းဝိၸိင်ႇတႃႇ လႄႈ ပႃႈၼၢင်းဢိင်ႇ ပွၵ်ႉ 3 ဝဵင်းလၢႆးၶႃႈ ၸိုင်ႈတႆးပွတ်းၸၢၼ်း ။

မၼ်းၼၢင်းၼႆႉ မီးၼမ်ႉၸႂ် ၶႂ်ႈပူၵ်းပွင်ၵူၼ်းၼႂ်းႁိူၼ်းၼႂ်းယေး ၼႂ်းပွၵ်ႉၼႂ်းယွမ်ႇသေဢမ်ႇၵႃး မီးၼမ်ႉၸႂ်ၶႂ်ႈႁဵတ်းပုၼ်ႈၵူၼ်းၼမ် ။ ၵႂႃႇထိုင်ပွတ်းလႂ် ထုင်ႉလႂ်ၵေႃႈ ၸွမ်းၼင်ႇ ပွင်ပဵၼ်လႆႈၼၼ်ႉ တေၸွႆႈၼင်ႇၵႃႈမႃႇၵႃႈႁႅင်းမီးတႃႇသေႇၼႆ –
မေႃသွၼ်ယိင်းၵွၼ်တႆး ပီႈၼွင်ႉၶႅၼ်ႈတွင်ႉ ၼၢင်းၶမ်းယဵၼ်ႇ လၢတ်ႈၼႄဝႃႈ –

ႁဝ်းၼႆၵေႃႈ ပဵၼ်လုၵ်ႈပီႈလုၵ်ႈၼွင်ႉၵၼ် ၵေႃႉယႂ်ႇမႃးၸွမ်းၵၼ် ။ ပဵၼ်ၼႃႉ ၵူၺ်းဢမ်ႇၵႃး ပဵၼ်တီႈၵိူဝ်းၵုမ်ၵေႃႉၼိုင်ႈၼၼ်ႉၶႃႈၼႃႇၼေႃႈ ။ ပဵၼ်ၵူၼ်းၵမ်ႉၸွႆႈၵမ်ႉထႅမ်ႁဝ်းၶႃႈ လႄႈ ၵူၼ်းၼမ် ၼႂ်းမိူင်းႁဝ်း မီးပၢင်သွၼ် ၸိူင်ႉႁိုဝ်ၼႆၵေႃႈ ၼႂ်းၵၢၼ်ၸိူဝ်ႉၶိူဝ်းႁဝ်းၼႆ ဢမ်ႇဝႃႈ ၾၢႆႇလိၵ်ႈလၢႆးႁႃႉၼႆၸိူဝ်းၼႆႉ တေဢွၼ်လုၵ်ႈဢွၼ်လၢၼ်ၵႂႃႇၶဝ်ႈႁူမ်ႈၸွမ်းၸိူင်ႉၼႆၶႃႈဢေႃႈ ။

ဝၼ်းတီႈ 8/4/2026 ၼႆႉ ၵူၼ်းႁူမ်ႈႁိူၼ်းလႄႈ သၢႆပီႈသၢႆၼွင်ႉ ဢဝ်ၶၢပ်ႈတူဝ်မေႃသွၼ်ၼၢင်းၶမ်းယဵၼ်ႇ ဢၼ်မီးတီႈမႄႈသွတ်ႇၼၼ်ႉ သူင်ႇၸူးၵဵင်းမႂ်ႇသေ ၸတ်းပၢင်ၸႃပၼ တီႈဝတ်ႉၵူႈတဝ်ႈ ဢိူင်ႇသီၽုမ်း ဝဵင်းၵဵင်းမႂ်ႇ။

တေပူၼ်ႉၶၢပ်ႈတူဝ်ၼႂ်းဝၼ်းသဝ် ဝၼ်းတီႈ 11/04/2026 တီႈပႃႇႁဵဝ်ႈသၼ်တိထမ်း ။

မေႃသွၼ်ယိင်းၵွၼ်တႆး ၽိတ်ႈမွၵ်ႇထိုင်လုၵ်ႈႁဵၼ်း- ၸုမ်းတူင်ႇၵူၼ်းၵူႈၸုမ်းၸုမ်းလႄႈ ပီႈၼွင်ႉၸိူဝ်းလႆႈႁူႉလႆႈငိၼ်းၸွမ်း ႁႂ်ႈလႆႈမႃးၸွႆႈမႃးထႅမ် မႃးႁဵတ်းၵၢၼ်လီၵုသူလ်ႇၸွမ်းၵၼ် မႃးပၼ်ႁႅင်းၸႂ်ၵၼ်သေ ႁူမ်ႈၵၼ်သူင်ႇတူဝ် မေႃသွၼ်ၼၢင်းၶမ်းယဵၼ်ႇ သေၵမ်းၼႆ – ၽိတ်ႈမွၵ်ႇလူၺ်ႈတမ်ႇၼွႆႉမွင်ၸႂ်ၼင်ႇၼႆ။

ႁဝ်းၶႃႈၸုမ်းၶၢဝ်ႇၽူႈတွႆႇႁွၵ်ႈ ပဵၼ်ဢၼ်တမ်ႇၼွႆႉမွင်ၸႂ်ၸွမ်း ပီႈၼွင်ႉၸိူဝ်ႈၶိူဝ်းၵူၼ်းႁိူၼ်း တႄႉတႄႉဝႃႈဝႃႈၶႃႈဢေႃႈ။ ယွၼ်းသူးႁႂ်ႈ ဝိၺဵၼ်ႇၶႂၼ်ငဝ်းမေႃသွၼ်ၼၢင်းၶမ်းယဵၼ်ႇ လႆႈႁွတ်ႈသူႇသုၵတိတီႈၵတ်းယဵၼ်သေၵမ်း။