မိူဝ်ႈဝႃးဝၼ်းတီႈ 8 လိူၼ် မေႊ ပီ 2026 ၼႆႉ မေႃသွၼ်ယိင်းတႆး ၸိုဝ်ႈႁွင်ႉၼၢင်းၶမ်းၸင်ႈ(ႁိုဝ်) ယိင်းသီၶမ်းၸႅတ်ႈ ဢွၼ်ၵူၼ်းထဝ်ႈ ၼႂ်းပိုၼ်ႉတီႈ ၵႂႃႇယူတ်းယႃတူဝ် တီႈဝဵင်းတူၼ်ႈတီး ၽွင်းပွၵ်ႈမႃးၶိုၼ်းမိူင်းၼၢႆး ရူတ်ႉၵႃးပဵၼ်​​ၽေးၵိုင်ႉၵၢင်ႉ ပွတ်းတၢင်းလႄႈလူႉသဵင်ႈထင်တီႈ။

ၵဵဝ်ႇလူၺ်ႈလွင်ႈၼႆႉ ၽူႈႁူမ်ႈၽၢၵ်ႈၵၢၼ်ငၢၼ်းတီႈမိူင်းၼၢႆးၵေႃႉၼိုင်ႈတႄႉလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “- မိူဝ်ႈဝႃးယၢမ်းဝၢႆးဝၼ်း မွၵ်ႈ 4 မူင်းၼႆႉ မေႃသွၼ်ၼၢင်းၶမ်းၸင်ႈ ၶဝ် လုၵ်ႉတူၼ်းတီး​​သေ ပွၵ်ႈမႃးၶိုၼ်းမိူင်းၼၢႆး။ မၼ်းသမ်ႉပေႃးၸမ်ထိုင်ႁိူၼ်းယူႇယဝ်ႉ  ၽွင်းပူၼ်ႉမႃးၼမ်ႉၸၢင် တီႈႁိမ်းဝၢၼ်ႈၼွင်ဢိူင်ႇၼႆႉ သဵၼ်ႈတၢင်းၵေႃႈသမ်ႉငွၵ်း ၾူၼ် ၵေႃႈသမ်ႉတူၵ်းလႄႈ ရူတ်ႉၵႃးပဵၼ်ၽေးၵိုင်ႉၵၢင်ႉ။ တူဝ်မၼ်းၼၢင်းသဵၼ်ဢွၵ်ႇရူတ်ႉယဝ်ႉ ရူတ်ႉသမ်ႉပိၼ်ႈတဵင်သႂ်ႇထႅင်ႈလႄႈ လႆႈမၢတ်ႇၸဵပ်းလူႉတၢႆၵႂႃႇၵမ်းသိုဝ်ႈ။ ၶၢပ်ႈတူဝ် ၼႆႉတႄႉ ဢဝ်မႃးတီႈႁူင်းယႃလူင် ဝဵင်းမိူင်းၼၢႆး​​သေလႆႈပူၼ်ႉတူဝ်ၶဝ်ႈႁဵဝ်ႈမိူဝ်ႈၼႆႉယၢမ်းၵၢင်ဝၼ်းယဝ်ႉ”-ဝႃႈၼႆ။

ၼႂ်းရူတ်ႉၵႃးဢၼ် ၶီႇမႃးၸွမ်းၵၼ်ၼၼ်ႉ မီးၵူၼ်း 8 ၵေႃႉ ပႃးၵူၼ်းထဝ်ႈလႄႈလုၵ်ႈဢွၼ်ႇ။ မေႃသွၼ်ၼၢင်းၶမ်းၸင်ႈၼင်ႈႁိမ်းၽၵ်းတူရူတ်ႉ လႄႈ ၽိူဝ်ႇပဵၼ်​​ၽေးၵိုင်ႉၵၢင်ႉ ႁဵတ်း ႁႂ်ႈမၼ်းၼၢင်းသဵၼ်ဢွၵ်ႇရူတ်ႉ ။ ၵူၼ်းထဝ်ႈၼႂ်းရူတ်ႉထႅင်ႈၵေႃႉၼိုင်ႈၵေႃႈ မၢတ်ႇၸဵပ်းတီႈၶႅၼ်။ ၵူၺ်းၵႃႈဢမ်ႇထိုင်​​ၽေးသၢႆၸႂ်။

မေႃသွၼ်ယိင်းၶမ်းၸင်ႈၼႆႉ ပဵၼ်လုၵ်ႈ လုင်းၸၢႆးၸေႃးတ+ပႃႈၼၢင်းၶမ်း ယူႇပွၵ်ႉပေႃႈမိူင်း ဝဵင်းမိူင်းၼၢႆး။ ယဝ်ႉႁဵၼ်းၸၼ်ႉၸွမ်ၾၢႆႇပၢႆး B.A (English) တီႈဝဵင်းတူၼ်ႈတီး မၼ်း ၼၢင်းမီးဢႃယု 29 ပီ။ ပဵၼ်ၵူၼ်းၼုမ်ႇယိင်း ၶဝ်ႈတူင်ႉၼိုင် ၼႂ်းမေႃသွၼ်လိၵ်ႈလၢႆးတႆး၊ မေႃသွၼ်ႁူင်းႁဵၼ်းလူင်ပွင်ၸိုင်ႈ၊ ၼႂ်းၵေႃလိၵ်ႈ/ၾိင်ႈတႆးၵူၺ်းဢမ်ႇၵႃး ၵၢၼ်ပူၵ်းပွင်ၵူၼ်း ၼုမ်ႇ၊ ၵၢၼ်ၶႅၵ်ႇလီပၢင်ၸႃႉ၊ ၵၢၼ်သႃသၼႃ၊ ၵၢၼ်ၾိင်ႈငႄႈၾိင်ႈထုင်း ၼႂ်းပိုၼ်ႉတီႈဝဵင်းမိူင်းၼၢႆးၼႆႉ မၼ်းၼၢင်းပႃးၼႂ်း ၶၵ်ႉတွၼ်ႈဢၼ်လမ်ႇလွင်ႈသေ ၸွႆႈထႅမ်မႃး မီးဢမ်ႇယွမ်း 10 ပီပၢႆ။

ၸွမ်းၼင်ႇတၢင်းယုမ်ႇယမ်၊ တၢင်းသူင်မၼ်းၼၢင်းပႃးၸႂ်ၾၢႆႇၵၢၼ်ၵႃႈလၢႆး ပတ်ႉလၢႆးလႄႈ ယွၼ်ႉတၢင်းၶတ်းၸႂ်မၼ်းၼၢင်းသေ ၽွင်းပီ 2017 ၼၼ်ႉ လႆႈဢဝ်လၢႆးၶႅၼ်ႉ ၊ လၢႆးလႅဝ်း၊ လၢႆးၶွၼ်ႉ  ၶဝ်ၶႅင်ႇတီႈ ပၢင်ၶႄႉၶႅင်ႇၵႃႈလၢႆးၾိင်ႈထုင်း ၸၼ်ႉမိူင်းႁူမ်ႈတုမ် တီႈဝဵင်းၼေႇပျီႇတေႃႇ။ ၽွင်းၼၼ်ႉ လႆႈႁပ်ႉသူးရၢင်းဝၼ်း သူးၶမ်း ၸၼ်ႉတီႈ 1 ၼႂ်းပတ်းပိုၼ်ႉမိူင်းႁူမ်ႈတုမ်။

ၼွၵ်ႈလိူဝ်ၵၢၼ်ၾိင်ႈငႄႈလိၵ်ႈလၢႆးယဝ်ႉ ၽွင်းပီ 2017၊ 2018 ၼႆႉၵူၺ်းၼင်ႇၵဝ်ႇ မၼ်းလႆႈလဵပ်ႈႁဵၼ်း ၵၢၼ်သိုဝ်ႇၶၢဝ်ႇ၊ ၵၢၼ်ငမ်းယဵၼ်လႄႈ လွင်ႈပိူင်ပဵၼ်ၾႅတ်ႊတရႄႊပႃးတၢင်းလွင်ႈၸၢဝ်းၶိူဝ်းလၢႆဢၼ်သေ တူင်ႉၼိုင်ၸွမ်း ၸုမ်းၶူင်းၵၢၼ်ငဝ်ႈတိုၼ်းလွင်ႈငမ်းယဵၼ်ၸၢဝ်းၶိူဝ်း( EPRP)ယဝ်ႉ လႆႈလူင်းပိုၼ်ႉတီႈ ၼႂ်းမိူင်းတႆးလၢႆတီႈလၢႆဝဵင်း ပၼ်တၢင်းႁူႉတႃႇႁႂ်ႈတႆးလႄႈၸၢဝ်းၶိူဝ်းၼႂ်းမိူင်းတႆး မီးလွင်ႈၸမ်ၸႂ်ၵၼ်မႃးၼၼ်ႉတေႉတေႉ။

ယွၼ်ႉၼၼ် ၼႂ်းဝၼ်းတီႈ 9 လိူၼ်မေႊ ပီ2026 မိူဝ်ႈၼႆႉ ၽူႈတူင်ႉၼိုင်ၾၢႆႇၶူၼ်ႉၶႂႃႇလမ်းတိုၼ်းပိုၼ်း၊ ၾၢႆႇၸဝ်ႈႁႆႈၸဝ်ႈၼႃး၊ ၾၢႆႇႁူင်းႁဵၼ်းပရႁိတ၊ ၾၢႆႇၵေႃလိၵ်ႈလၢႆးလႄႈၾိင်ႈငႄႈတႆး ၼႂ်းဝဵင်းမိူင်းၼၢႆး ပႃးတင်း ၵူၼ်းၼႂ်းပွၵ်ႉၼႂ်းယွမ်ႇ ၸွမ်းသူင်ႇၶၢပ်ႈတူဝ်မၼ်းၼၢင်း မီးႁိမ်းၸမ် 400 ၵေႃႉသေ ၼႄလွင်ႈမွင်ၸႂ်ၸွမ်းၵူၺ်းဢမ်ႇၵႃး တေယွၼ်းတၢင်ႇၽိုၼ်ပိုၼ်း လွင်ႈတူင်ႉၼိုင်ၵူၼ်းၼုမ်ႇယိင်းတႆး မေႃသွၼ်ၼၢင်းၶမ်းၸင်ႈဝႆႉယူႇၼႆ ၵူၼ်းမိူင်းၼၢႆးၵေႃႉၼိုင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈၼင်ႇၼႆ။

ယူႇတီႈၸုမ်းၶၢဝ်ႇၽူႈတွႆႇႁွၵ်ႈ​​သေပဵၼ်ဢၼ်​​သေလၢႆမွင်ၸႂ်ၸွမ်းၵူၼ်းမုင်ႉ​​ႁေႃႁိူၼ်းလႄႈ ပီႈၼွင်ႉၵူၼ်းမိူင်းၼၢႆး တႄႉၶႃႈ​​ဢေႃႈ။