ပွႆးတၢင်ႇထီးၵွင်းမူး တီႈဝၢၼ်ႈၵၢင်တူင်ႈ ဝဵင်းမိူင်းၼၢႆး ၸိုင်ႈတႆးပွတ်းၸၢၼ်း ၸတ်းႁဵတ်းပႃးပၢင်တေႃႇလွင်း ႁိုင်ၶၢဝ်းတၢင်းလိူၼ်ပၢႆ ဢမ်ႇယဝ်ႉဢမ်ႇဝၢႆး ၵူၼ်းပိုၼ်ႉတီႈလၢတ်ႈ ။
ၼႂ်းဝၼ်းတီႈ 14 လိူၼ်မေႊပူၼ်ႉမႃးၼႆႉ ႁွင်ႈၵၢၼ်ၾၢႆႇၽွင်းငမ်းလႄႈ ၵူၼ်းမိူင်းဝဵင်းမိူင်းၼၢႆး ဢွၼ်ၵၼ်ၸတ်းႁဵတ်းပွႆးတၢင်ႇထီး ၵွင်းမူး တီႈဝၢၼ်ႈၵၢင်တူင်ႈ ဝဵင်းမိူင်းၼၢႆး ၊ ၽူႈမီးပုၼ်ႈၽွၼ်းၼႂ်းပိုၼ်ႉတီႈ ပၼ်ၶႂၢင်ႉပိုတ်ႇပၢင်တေႃႇလွင်းပႃး ဝႃႈၼႆ။
ပွႆးတၢင်ႇထီးၵွင်းမူးၼႆႉ ၸတ်းႁဵတ်း4 ဝၼ်းၵူၺ်းၼႆသေတႃႉ ပၢင်တေႃႇလွင်းသိုပ်ႇၸတ်းႁဵတ်း ထိုင်မိူဝ်ႈၼႆႉ ။ ၼႂ်းပၢင်တေႃႇလွင်းၼၼ်ႉ ပျီႇတူႉၸိတ်ႉ SSS ဢဝ်ႁူမ်ႇလူမ်ႈပၼ်ဝႃႈၼႆ ။
ၵူၼ်းၸၢႆးဝဵင်းမိူင်းၼၢႆးလၢတ်ႈၽူႈတွႆႇႁွၵ်ႈဝႃႈ -“ တေပဵၼ်ၸုမ်းပျီႇတူႉၸိတ်ႉSSS လႄႈ ႁွင်ႈၵၢၼ်ၽွင်ႈငမ်းတႂ်ႈသိုၵ်းမၢၼ်ႈႁူမ်ႈၵၼ်သေ ၼႄၶေႃႈဢၢင်ႈပွႆးတၢင်ႇထီးၵွင်းမူးသေ ႁဵတ်းႁႃၵိၼ်ဢေႃႈ ၊ မၼ်းၵႂႃႇတူၵ်းလွၵ်းၽူႈမၢၵ်ႈမီးငိုၼ်းၶမ်းၶဝ်ၵူၺ်း ၊ ပျီႇတူႉၸိတ်ႉSSS ၶဝ်ဢွၵ်ႇၼႃႈၵေႃႈ တေလႆႈဝႃႈ ၶဝ်ဢွၼ်ၼမ်းႁဵတ်း ”- ဝႃႈၼႆ ။
လွင်ႈၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်ၵပ်းတူၺ်း ပျီႇတူႉၸိတ်ႉ SSS ယူႇၵေႃႈ ၵပ်းသိုပ်ႇဢမ်ႇလႆႈ။
တီႈၼႂ်းပၢင်တေႃႇလွင်းၼၼ်ႉ မီးႁၢၼ်ႉတင်းၵိၼ် 3-4 ႁၢၼ်ႉ ၊ မီးပၢင်မူၼ်ႈသိူဝ်းလႄႈ မီးၽိူၼ် တႃႇတေႃႇလွင်း မိူၼ်ၼင်ႇ – လေးၵွင်ႇၵျိၼ်ႇ10 ပၢႆ ၊ မၢၵ်ႇၵိင်ႈလွႆ 2 ၽိူၼ် ၊ ၽၢႆႉၵိဝ်း 3 ၽိူၼ် ၸဵမ်ၸိူဝ်းၼႆႉ ၊ ၵူၼ်းၵႂႃႇဢဝ်ၽိူၼ် ပိုတ်ႇပၢင်တေႃႇလွင်း တေလႆႈပၼ်ၶွၼ်ႇ တီႈၽူႈမီးပုၼ်ႈၽွၼ်းၼႂ်းပိုၼ်ႉတီႈၼပ်ႉႁူဝ်သိပ်းသႅၼ်ပျႃး ဝႃႈၼႆ ။
ၵဵဝ်ၵပ်းလွင်ႈ ပၢင်တေႃႇလွင်းၸတ်းႁဵတ်းႁိုင်ၶၢဝ်းယၢဝ်းၸိူင်ႉၼႆ တေၸၢင်ႈႁဵတ်းႁႂ်ႈၾိင်ႈယၢမ်ႈၵူၼ်းမိူင်းပိုၼ်ႉတီႈလူႉလႄႈ ၽွၼ်းယွၼ်ႈမၼ်းၵေႃႈ ၸၢင်ႈၵိူတ်ႇၶိုၼ်ႈမႃးတင်းၼမ်ၼႆ ၵူၼ်းမိူင်းဝဵင်းမိူင်းၼၢႆးလၢတ်ႈတင်းႁၼ်ထိုင်မၼ်းၼင်ႇၼႆ ။
“ၵူၼ်းမိူင်းပိုၼ်ႉတီႈ ဢမ်ႇႁၼ်လီၸွမ်းၶႃႈ ဢဝ်သႃႇသၼႃႇႁဵတ်းၼႃႈတိူဝ်ႈသေ ႁဵတ်းၵိၼ်ၸိူင်ႉၼႆၼႆႉ ၊ မၼ်းတေႁဵတ်းႁႂ်ႈတၢင်းယၢမ်ႈၵူၼ်းပိုၼ်ႉတီႈလူႉ ၊ ၽွၼ်းယွၼ်ႈမၼ်းၵေႃႈ ၼႂ်းပိုၼ်ႉတီႈ တေမီးမႃးၵူၼ်းလၵ်ႉၵူၼ်းၸူၼ် လိူင်ႇၼမ် ၊ ပေႃးတေႃႇလွင်း ပေႃးတိူၵ်ႈ လူဝ်ႇတႅၼ်းၼီႈၼႆ ၵူၼ်းၼႆႉႁတ်းႁဵတ်းၵူႈမဵဝ်း ၊ ပၼ်ႁႃမၼ်းတေၸၢင်ႈၵိူတ်ႇၶိုၼ်ႈမႃးထႅင်ႈတင်းၼမ်” ၼႆယဝ်ႉ ။
ၽွင်းၵူၼ်းမိူင်း ႁႃၵိၼ်လဵင်ႉတွင်ႉယၢပ်ႇၽိုတ်ႇ ၸိူင်ႉၼႆ ယွၼ်ႉမီးပၢင်တေႃႇလွင်းလႄႈ ၵူၼ်းမိူင်း မိုင်ႉၵၢၼ်တေႃႇလွင်း ဢမ်ႇထၢတ်ႇဢမ်ႇဝၢႆးႁဵတ်းႁႂ်ႈ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇ မုင်ႉႁေႃႁိူၼ်းၽိတ်းမေႃးတႅၵ်ႇယၢႆႈၵၼ်ပႃးၼႆ မၼ်းၸၢႆးသိုပ်ႇလၢတ်ႈထႅင်ႈၼင်ႇၼႆ ။
“ၵူၼ်းပိုၼ်ႉတီႈ ပဵၼ်ၵူၼ်းၽုၵ်ႇသွမ်ႈၵမ်ႈၼမ် ၊ ပေႃးမီးပၢင်တေႃႇလွင်းၸိူင်ႉၼႆ ၶဝ်တေဢဝ်ငိုၼ်းမႃးလဵၼ်ႈ ၊ ပေႃးသုမ်းၵႂႃႇၼႆႉ ဢမ်ႇမီးတႃႇလူင်းတိုၼ်းလၢင်းၶိုၼ်းလႄႈ လႆႈၵႂႃႇၵူႈၵႂႃႇယိမ် ပဵၼ်ၼီႈပဵၼ်ၶွတ်ႇမီးတင်းၼမ် ၊ ပေႃးၽူႈဢွၼ်ႁူဝ်ၼႂ်းပိုၼ်ႉတီႈလူႉၼႆႉ တေၸၢင်ႈ ႁဵတ်းႁႂ်ႈၵူၼ်းၼုမ်ႇလူႉပႃးၶႃႈဢေႃႈ ”- ၼႆယဝ်ႉ ။
ၵဵဝ်ၵပ်းလွင်ႈပၢင်တေႃႇလွင်းၼႆႉ ၵူၼ်းမိူင်းတုၵ်းယွၼ်းတီႈ ၽူႈၵဵဝ်ႇၶွင်ႈ ၊ ၽူႈဢူပ်ႉပိူင်ႇၼႂ်းဝဵင်းဝႃႈ -ၶႂ်ႈႁႂ်ႈသိုဝ်ႈယူဝ်းတေႃႇၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈ ဢုပ်ႉပိူင်ႇၽွင်းငမ်းၵႂႃႇ သေ ႁႂ်ႈယႃႇပေဢွၼ်ၵူၼ်းၼုမ်ႇၼႂ်းပိုၼ်ႉတီႈ ပႆသဵၼ်ႈတၢင်းၽိတ်းၼႆယဝ်ႉ- ၵူၼ်းပိုၼ်ႉတီႈလၢတ်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ