ဝၼ်းတီႈ 19/05/2026 ၼႆႉ ၸဝ်ႈႁႆႈၸဝ်ႈၼႃးမိူင်းၼၢႆး ၸတ်းပၢင်ႁူပ်ႉထူပ်းဢုပ်ႇဢူဝ်းၵၼ်သေ ႁႃလွၵ်းလၢႆးၵႄႈလိတ်ႈလွင်ႈၶွင်ႈၶမ်ၼႂ်းၵၢၼ်ၽုၵ်ႇသွမ်ႈလၢႆလွင်ႈ ။ ဢုပ်ႇၵၼ်ပႃးဝႃႈ သင်ဢမ်ႇမီးငိုၼ်းလူင်းတိုၼ်းတေယၢပ်ႇ ယွၼ်ႉဝႃႈ ပီဢွၼ်ပီၵၢႆၵေႃႈ ၺႃးၼမ်ႉထူမ်ႈၼမ်ႉၼွင်း ၊ ၵၢၼ်ၵႃႉၵၢၼ်ၶၢႆဢမ်ႇလီယွၼ်ႉမိူင်းသုၵ်ႉမိူင်းယုင်ႈၸိူဝ်းၼႆႉ။ ပီၼႆႉတႄႉၶႂ်ႈႁႂ်ႈၸုမ်းၵဵဝ်ႇၶွင်ႈၽၼ်ႇတႃႇငိုၼ်းတွင်းဝၢၼ်ႈမိူင်း တူၺ်းၸွႆႈပၼ် ၽွင်ႈဝႃႈၼႆ ။

ၵူၼ်းမိူင်းၼၢႆး တူၵ်းလူင်းလႆႈၸႂ်ၵၼ် ၸတ်းပၢင်ၵုမ်ၸဝ်ႈႁႆႈၸဝ်ႈၼႃး 6 လိူၼ်လႂ်ၼိုင်ႈပွၵ်ႈ ၊ ပၢင်ၵုမ်ပွၵ်ႈၼႆႉ ဢၢၼ်းၸတ်းၼႂ်းလိူၼ်ပူၼ်ႉမႃးသေတႃႉ ဢိင်ၼိူဝ်ငဝ်းလၢႆးလၢႆလွင်ႈသေ ၸင်ႇတိုၵ်ႉႁႃလႆႈၸတ်းၼႂ်းလိူၼ်မေႊ ၼႆႉ ဝႃႈၼႆ။
ပၢင်ၵုမ်ပွၵ်ႈၼႆႉ ဢၼ်လၢၵ်ႇလၢႆးသေၵူႈပွၵ်ႈတႄႉ ၵူၼ်းမိူင်းၼၢႆး လႆႈၽိတ်ႈမွၵ်ႇ တႅၼ်းၽွင်း လႄႈ ၶႃႈႁၢပ်ႇၵၢၼ်ၶုၼ် ၶဝ်ႈႁူမ်ႈၸွမ်း ပိူင်လူင် ႁႂ်ႈၶဝ်ႁူႉလွင်ႈယၢပ်ႇၽိုတ်ႇ လွင်ႈၶွင်ႈၶမ် ၸဝ်ႁၢႆႈၸဝ်ႈၼႃး ၼႆ ၽူႈၶဝ်ႈႁူမ်ႈပၢင်ၵုမ်ၵေႃႉၼိုင်ႈလၢတ်ႈ။

ၵႃႈၵိၼ်ၸၢင်ႈလၢႆးဝၼ်းၼႂ်းတူင်ႈၼႂ်းၼႃးၼႆႉ တႅပ်းတတ်းဝႆႉၶၼ်မၼ်း 2 မိုၼ်ႇပျႃး ၊ ၵၢၼ်ၸိူဝ်းဢၼ်လႆႈ တႄႇႁဵတ်း8 မူင်းတေႃႇထိုင် 4 မူင်းႁူဝ်ၶမ်ႈ ။ လိူဝ်ၼၼ်ႉ ဢိင်ၼိူဝ်ၵၢၼ်ဢၼ်လႆႈႁဵတ်း သွမ်ႈၼႃး ပၢတ်ႇၶဝ်ႈ ဢဝ်ထူဝ်ႇၼဝ်ႈၸိူဝ်းၼႆႉ ဢုပ်ႇဢူဝ်းတႅပ်းတတ်းၵႃႈၸၢင်ႈမၼ်းဝႆႉယဝ်ႉ ဝႃႈၼႆ။

ၶေႃႈတႅပ်းတတ်းၼႂ်းပၢင်ၵုမ်ၸိူဝ်းၼႆႉၵေႃႈ လႆႈတၢင်ႇယိုၼ်ထိုင် ၽူႈၵွၼ်းၸႄႈဝဵင်းမိူင်းၼၢႆးပႃး ။ ၼင်ႇႁိုဝ် တေဢမ်ႇမီးလွင်ႈၵိၼ်ၸိၵ်းတွၵ်ႇၸွၵ်းၼိူဝ်ၵၼ် ၼႆ – ၽူႈတူင်ႉၼိုင်ၼႂ်းၸုမ်းပွင်ၵၢၼ်ၸဝ်ႈႁႆႈၸဝ်ႈၼႃး ၸႄႈဝဵင်းမိူင်းၼၢႆး လၢတ်ႈၼႄဝႆႉၼင်ႇၼႆ

ၶေႃႈတႅပ်းတတ်းၸိူဝ်းၼႆႉ ႁဝ်းတၢင်ႇပၼ် ၽူႈၵွၼ်းၸႄႈဝဵင်းၶဝ်ႁေ ႁႂ်ႈၶဝ်ၸွႆႈထိင်းပၼ်ၽွင်ႈ ။ၾၢႆႇၸဝ်ႈၼႃႈတီႈႁဝ်ၸိူဝ်းၼႆႉၵေႃႈ တေယိုၼ်ႈတၢင်ႇ ႁႂ်ႈပေႃးလႆႈႁူႉၸွမ်း
ယိူင်းဢၢၼ်း ဢၼ်လႆႈသူင်ႇယိုၼ်ႈ ပၼ်ၶေႃႈတႅပ်းတတ်း တီႈၽူႈၵဵဝ်ႇၶွင်ႈၸိူဝ်းၼႆႉတႄႉ ပိူင်လူင် ၼိုင်ႈ ႁႂ်ႈၶဝ်ၵႄႈလိတ်ႈပၼ် လွင်ႈၶွင်ႈၶမ်လွၵ်းၵၢၼ်မၢၵ်ႇၶဝ်ႈတဝ်ႈၼမ်ႉ ။
သွင်ၵေႃႈ ၼမ်ႉမၼ်းၸိူဝ်ႉၾႆးလႄႈလိၼ်ပုၺ်ၸိူဝ်းၼႆႉ ႁႂ်ႈယွမ်းၵႃႈမၼ်းပၼ် ။

ဢၼ်လမ်ႇလွင်ႈထႅင်ႈဢၼ်ၼိုင်ႈၵေႃႈ ႁႂ်ႈၸဝ်ႈႁႆႈၸဝ်ႈၼႃး မီးသုၼ်ႇလႆႈၵူႈယိမ်ငိုၼ်းတႃႇလူင်းတိုၼ်းလႆႈ ။ ၵွပ်ႈဝႃႈ ႁွင်ႈၵၢၼ်ၾၢႆႇၽၼ်ႇတႃႇငိုၼ်းတွင်း မိူင်းႁူမ်ႈတုမ်မၢၼ်ႈ ဢွၵ်ႇဝႆႉဝႃႈ ၽႅၼ်ၵၢၼ် 100 ဝၼ်းၼၼ်ႉ ပႆႇပႃးလွင်ႈၼႆႉၵမ်းသိုဝ်ႈ ၼႆ ၽူႈတူင်ႉၼိုင်ၼႂ်းၸုမ်းပွင်ၵၢၼ်ၸဝ်ႈႁႆႈၸဝ်ႈၼႃး ၸႄႈဝဵင်းမိူင်းၼၢႆး လၢတ်ႈၼႄဝႆႉၼင်ႇၼႆ –

သၢမ်ၵေႃႈ လွင်ႈငိုၼ်းၵူႈၸဝ်ႈၼႃး ။ ၶဝ်ဝႃႈတႄႉ ဢေႊၶိူဝ်ႊလႂ် 3 သႅၼ်ပျႃးၼႆဝႃႈ ။ သမ်ႉဢမ်ႇပႃးၼႂ်းၽႅၼ်ၵၢၼ် 100 ဝၼ်းၼႆႉလႄႈ မိူဝ်ႈလဵဝ် ပႂ်ႉႁူပ်ႉဝႆႉ ၾၢႆႇၽၼ်ႇတႃႇငိုၼ်းတွင်းမိူင်းတႆးဝႆႉ လႄႈ ၾၢႆႇႁွင်ႈမိူင် ၸိူဝ်းၼႆႉၼၼ်ႉၼႃႇ

ဢိင်ၼိူဝ် ငဝ်းလၢႆးၾိင်ႈၾႃႉရႃႇသီႇလႄႈသင် ၵၢၼ်သိုၵ်းၵၢၼ်မိူင်း ဢမ်ႇၼိမ်သဝ်းလႄႈသင်သေ ငိုၼ်းၶဝ်ႈၸဝ်ႈႁႆႈၸဝ်ႈၼႃး မိူင်းၼၢႆးဢေႇလူင်းၵူႈပီ ။ ၸင်ႇၼၼ် ထိုင် ၶၢဝ်းယၢမ်းလီၽုၵ်ႇၵေႃႈ ဢမ်ႇလႆႈၽုၵ်ႇႁႂ်ႈၶိုတ်းတၼ်းၶၢဝ်းယၢမ်း ။ မီးလွင်ႈၶွင်ႈၶမ်ၼမ် ၼႃႇ ဝႃႈၼႆ။

ၼႂ်းၽႅၼ်ၵၢၼ် 100 ဝၼ်း လယ်ယာဖွံ့ဖြိုးရေးဘဏ် ၼၼ်ႉ ဢမ်ႇၼပ်ႉပႃး ငိုၼ်းၵူႈတႃႇၽုၵ်ႇသွမ်ႈၼႂ်းမိူင်းၼၢႆး ၊ ပေႃးထိုင်မႃး လိူၼ်ဢေႃႊၵတ်ႉသ် ၸင်ႇၸၢင်ႈဢွၵ်ႇၵူႈပၼ်လႆႈၼႆလႄႈ ၵူၼ်းမိူင်းၼၢႆးတႄႉ တေဢမ်ႇၸၢင်ႈပႂ်ႉထိုင်လိူၼ်ၼၼ်ႉ ။ ယွၼ်ႉဝႃႈ ၵၢၼ်ၽုၵ်ႇသွမ်ႈၼႆႉ မၼ်းလႆႈႁဵတ်းၸွမ်းၶိင်ႇၸွမ်းၶၢဝ်းမၼ်း ၼႆ – ၸဝ်ႈၼႃးၵေႃႉၼိုင်ႈလၢတ်ႈ ။

ယွၼ်ႉၼမ်ႉၼွင်းထူမ်ႈ 2024-2025 သေ တူင်ႈၼႃးမိူင်းၼၢႆး လူႉၵွႆ 7000 ဢေႊၶိူဝ်ႊပၢႆ ။ ထိုင်မႃး ၼႂ်းပီ 2025-2026 ၼႆႉ ၸိူဝ်းၽုၵ်ႇသွမ်ႈၵေႃႈ မၢၵ်ႇဢမ်ႇပူင်း ႁူင်းဢမ်ႇၵွၼ်ႈ ။ ၸဝ်ႈႁႆႈၸဝ်ႈၼႃး သုမ်းတိုၼ်းလၢင်း တႄႉတႄႉဝႃႈဝႃႈ ။
တႃႇမႄးၵုမ်းၵေႃႈဢမ်ႇငၢႆႈ ၊ ၸိူဝ်းတေၽုၵ်ႇသွမ်ႈၵေႃႈ ဢမ်ႇမီးတိုၼ်းလၢင်း ။ တေမွင်းငိုၼ်းၵူႈတီႈ ယေးငိုၼ်းတႃႇၵမ်ႉထႅမ်ၼႃး မြန်မာ့လယ်ယာဖွံ့ဖြိုးရေးဘဏ် ႁႂ်ႈၵူႈပၼ်ငိုၼ်းၵေႃႈ သမ်ႉပဵၼ်ယေးငိုၼ်းဢၼ်ယူႇတႂ်ႈၸႄႈတွၼ်ႈလွႆလႅမ်ၵူၺ်း ဢမ်ႇၸႂ်ႈတႃႇမိူင်းၼၢႆးၵမ်းသိုဝ်ႈ တႃႇထိုင်တီႈထိုင်တၢင်းဢမ်ႇငၢႆႈၼႆ ၵူၼ်းမိူင်းၼၢႆးလၢတ်ႈ။

မိူဝ်ႈဝၼ်းတီႈ 16/05/2026 ၼႆႉ မြန်မာ့လယ်ယာဖွံ့ဖြိုးရေးဘဏ် လႆႈၸတ်းပၢင်မွပ်ႈငိုၼ်းၵူႈပၼ် ၸဝ်ႈႁႆႈၸဝ်ႈၼႃးၼႂ်းၸႄႈတွၼ်ႈလွႆလႅမ်ယူႇ ။ တၢမ်တူဝ် ၸၢႆးထဵင်ႇၸူဝ်း ၽွင်းလူင်မိူင်းတႆး ဢၼ်သၽႃးတႂ်ႈသိုၵ်းမၢၼ်ႈလိူၵ်ႈဝႆႉၼၼ်ႉ ၵႂႃႇမွပ်ႈပၼ်ၵမ်းသိုဝ်ႈ လႆႈႁၼ်သိုဝ်ႇတႂ်ႈသိုၵ်းမၢၼ်ႈဢွၵ်ႇဝႆႉၼင်ႇၼၼ် ။

ၼႂ်းပိူင်ငိုၼ်းၵူႈၼၼ်ႉ မီးဝႆႉဝႃႈ တႃႇၸႂ်ႉၶိူင်ႈၸၢၵ်ႈၼႂ်းၵၢၼ်ၽုၵ်ႈသွမ်ႈၼၼ်ႉ ၵူႈငိုၼ်းလႆႈ 100 သႅၼ်ပျႃး ထိုင် 5000 သႅၼ်ပျႃးသေတႃႉ ၽွင်းမိူဝ်ႈၸဝ်ႈႁႆႈၸဝ်ႈၼႃး ယွၼ်းၵူႈတႄႉတႄႉၼၼ်ႉသမ်ႉ လႆႈယၢပ်ႇလႆႈယဵၼ်း။ ၸင်ႇၼၼ် လႄႈ ႁႂ်ႈ လူတ်းယွၼ်ႇပၼ် လွင်ႈၶွင်ႈၶမ်ၸိူဝ်းၼႆႉၽွင်ႈၼႆ – ၽူႈမီးတူဝ်ထူပ်းၶဝ်လၢတ်ႈၼင်ႇၼႆ။

သင်ဝၢၼ်ႈမိူင်းၵေႃႈၼိမ်သဝ်း ၊ ၶုၼ်မိူင်းၵေႃႈလီ ၵူၼ်းမိူင်းထၢင်ႇႁၢင်ႈလႆႈၸတ်းပွင်ၼႆတႄႉ ၸိူဝ်းပဵၼ်ၸဝ်ႈႁႆႈၸဝ်ႈၼႃး ပႃးၸဵမ် ၵူၼ်းၵိၼ်ၸၢင်ႈလၢႆးဝၼ်း ၊ ၵူၼ်းၵႃႉၶၢႆၶဝ်ႈ ၸိူဝ်းၼႆႉ ၽူႈၵဵဝ်ႇၶွင်ႈၶဝ် တေၸၢင်ႈတူၺ်းထိုင်ပၼ်လႆႈလီယူႇ ။ ၵူၺ်းၵႃႈ မိူဝ်ႈလဵဝ် ၵူၼ်းမိူင်း လႆႈဢဝ်တူဝ်လွတ်ႈႁင်းၵူၺ်းၼႆ ၵူၼ်းၼုမ်ႇမိူင်းၼၢႆးၵေႃႉၼိုင်ႈလၢတ်ႈ ။