တီႈၼႂ်းပွႆးသၢင်ႇလွင်း ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း သိုၵ်းမၢၼ်ႈ ပၼ် တိုဝ်ႉတၢင်း သေ ဢွၼ်ၼမ်းၸဝ်ႈပၢင်လွင်းၶဝ် ပိုတ်ႇပၢင်တေႃႇလွင်းပႃးလႄႈ ၵူၼ်းမိူင်းမႆႈၸႂ် ၵူဝ်ႁဵတ်းႁႂ်ႈၾိင်ႈထုင်းတႆးလူႉ။

ပွႆးသၢင်ႇလွင်းတီႈဝၢၼ်ႈ ၵဵင်းၶမ်းလူင် ၸႄႈဝဵင်းလွၵ်ႉၸွၵ်ႇ ဢၼ်ၸတ်းႁဵတ်းၼႂ်းဝူင်ႈထိသွင် လိူၼ်မၢတ်ႉၶျ်ၼႆႉ  တူဝ်သိုၵ်းမၢၼ်ႈဢွၼ်ပိုတ်ႇပၢင်တေႃႇလွင်းပႃး။

ၽူႈၸၢႆးၵူၼ်းပိုၼ်ႉတီႈၵေႃႉၼိုင်ႈ ဢႃယု 40 ပီ ၵူၼ်းဝဵင်းလွၵ်ႉၸွၵ်ႇလၢတ်ႈၽူႈတွႆႇႁွၵ်ႈဝႃႈ -“ ၽွင်းၵူၼ်းမိူင်းၸတ်းပၢင်ပွႆးသၢင်ႇလွင်းၼၼ်ႉသိုၵ်းမၢၼ်ႈ ၸတ်းပႃးပၢင်တေႃႇလွင်း ၼႂ်းပွႆး  ၊ ဢဝ်တိုဝ်ႉတၢင်းပွႆးၾိင်ႈထုင်းႁဝ်းသေ ၶဝ်ပိုတ်ႇပၢင်တေႃႇလွင်းႁႃၵိၼ်  ”- ဝႃႈၼႆ ။

ၵေႃႉပၼ်ၶႂၢင်ႉပိုတ်ႇပၢင်တေႃႇလွင်း တီႈၼႂ်းပွႆးသၢင်ႇလွင်း ဝၢၼ်ႈၵဵင်းၶမ်းလူင်ၼၼ်ႉ ပဵၼ်ၸဝ်ႈ ႁၢၼ်ၵူဝ်ႇပၺႃး ၼႂ်းတပ်ႉ 505 ဢၼ်တပ်ႉပၵ်းသဝ်းဝႆႉတီႈဝၢၼ်ႈ ၵဵင်းၶမ်း ၊ ၼွင်ဝူဝ်း လႄႈ ၽႃလၢႆး မိူင်းပဵင်းၸိူဝ်းၼႆႉ- ၵူၼ်းပိုၼ်ႉတီႈလၢတ်ႈ ။  

လႆႈႁူႉဝႃႈ သိုၵ်းမၢၼ်ႈဢွၼ် ႁဵတ်းပၢင်တေႃႇလွင်း ၽွင်းပွႆးသၢင်ႇလွင်း တီႈၼႂ်းၸႄႈဝဵင်း လွၵ်ႉၸွၵ်ႇ ၼႆႉ ဢမ်ႇၸႂ်ႈပွၵ်ႈဢွၼ်တၢင်းသုတ်း ။  မိူဝ်ႈပၢင်တွပ်ႇလိၵ်ႈတီႈဝၢၼ်ႈ ၽႃလၢႆး မိူင်းပဵင်းၼၼ်ႉၵေႃႈ သိုၵ်းမၢၼ်ႈယၢမ်ႈပိုတ်ႇပၢင်တေႃႇလွင်းၸွမ်းပွႆးမႃးယဝ်ႉၵမ်းၼိုင်ႈ။  

ၽွင်းၵူၼ်းမိူင်း ႁႃၵိၼ်လဵင်ႉတွင်ႉယၢပ်ႇၽိုတ်ႇ ၸိူင်ႉၼႆ ယွၼ်ႉမီးပၢင်တေႃႇလွင်းလႄႈ ၵူၼ်းမိူင်း မိုင်ႉၵၢၼ်တေႃႇလွင်း ဢမ်ႇထၢတ်ႇဢမ်ႇဝၢႆးႁဵတ်းႁႂ်ႈ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇ မုင်ႉႁေႃႁိူၼ်းၽိတ်းမေႃးတႅၵ်ႇယၢႆႈၵၼ်   ။

ၵူၼ်းပိုၼ်ႉတီႈဢၼ်ၵႂႃႇၶဝ်ႈပွႆးသၢင်လွင်းလၢတ်ႈၽူႈတွႆႇႁွၵ်ႈဝႃႈ -“ပေႃးမႃးႁဵတ်းပၢင်တေႃႇလွင်း တီႈပွႆးသၢင်ႇလွင်းၵေႃႈ ပဵၼ်ဢၼ်ယႃႉၾၢင်ႁၢင်ႈၾိင်ႈထုင်းႁဝ်းဢေႃႈ ၊ ပွႆးသၢင်ႇလွင်းၼႆႉ ဢမ်ႇလီပႃးပၢင်တေႃႇလွင်း  ၊ ၵူႈပွၵ်ႈပၢင်တေႃႇလွင်းၼႆႉ ပေႃးဢမ်ႇၸႂ်ႈ မႃႇသႃႇ ၊ ပွႆးမုၼ်ၸဝ်ႈလွၼ်ႇၼႆႉ ဢမ်ႇသူႈမီး ။ တလဵဝ် ပွႆးၽြႃး ၊ ပွႆးတၢင်ႇထီးၵွင်းမူးၸိူဝ်းၼႆႉၶဝ်ၵေႃႈႁဵတ်းမႃးတိၵ်းတိၵ်းယဝ်ႉ။ ၵမ်းၼႆႉသမ်ႉမႃးႁဵတ်းၼႂ်း  ပွႆးသၢင်ႇလွင်း  ၊ ယွၼ်ႉပၢင်တေႃႇလွင်းၼႆႉ ၼမ်မႃးလႄႈ ၸၢင်ႈတုမ်ႉတိုဝ်ႉပၢႆးမၢၵ်ႈမီးၵူၼ်းပိုၼ်ႉတီႈ  ၊ ၾိင်ႈယၢမ်ႈလုၵ်ႈဢွၼ်ၸိူဝ်းၼႆႉၵေႃႈ တေလူႉ ၊ ပေႃးပဵၼ်ပွႆး မီးပၢင်တေႃႇလွင်းၼႆႉ လဵၵ်ႉယႂ်ႇၼုမ်ႇထဝ်ႈတိုၼ်းၵႂႃႇလဵၼ်ႈၵၼ် ၊ လွင်ႈၼႆႉ ၽူႈမီးပုၼ်ႈၽွၼ်းပိုၼ်ႉတီႈၵေႃႈယႃႇဝႃႈ တေဢဝ်လိူင်ႈပၼ်လႃႈ ၊ ပၢႆဢဝ်လွင်ႈႁူမ်ႇလူမ်ႈပၼ်လူးၵွၼ်ႇ”- ဝႃႈၼႆ ။

ၼႂ်းပၢင်တေႃႇလွင်းၼၼ်ႉ ဢၼ်တေႃႇလဵၼ်ႈၵၼ်သမ်ႉ မိူၼ်ၼင်ႇ – ထီႇ 36 တူဝ် (36 မိူင်းလူင်)၊ လေးၵွင်ႇၵျိၼ်ႇ၊ မၢၵ်ႇၵိင်ႈလွႆ ၊ ၽၢႆႉၵိဝ်းလႄႈ တႅမ်ႇသီႇတႅမ်ႇႁႃႈ ၸဵမ်ၸိူဝ်းၼႆႉ လႆႈႁူႉၼင်ႇၼႆ ။