မိူဝ်ႈၼႆႉ ဝၼ်းတီႈ 27/02/2026 ၵူၼ်းမိူင်းပိုၼ်ႉတီႈ လႄႈ သြႃႇတၵ်ႉၵႃႇ ၼႂ်းဝဵင်းသႅၼ်ဝီ ႁူမ်ႈၵၼ် ပၢင်းဢဝ်ၽြႃးတိဢိင်ႇတ ၸဝ်ႈမိူင်းၶၢဝ်ႉ တီႈဝၢၼ်ႈႁူဝ်တူင်ႈ ၶဝ်ႈၼႂ်းဝဵင်းသေ တႄႇပၢင်ပွႆးလိူၼ်သီႇၵႂႃႇ ႁိုင်ၶၢဝ်း 6 ဝၼ်း ၼႆယဝ်ႉ။

ပွႆးလိူၼ်သီႇၼႆႉ မီးသိုၵ်းၵဝ်ႈၵၢင်ႉ ဢဝ်ႁူမ်ႇလူမ်ႈပၢင်ပွႆးဝႆႉၵူၺ်းဢမ်ႇၵႃး ၽွင်းပၢင်းၽြႃးၸဝ်ႈမိူင်းၶၢဝ်ႉ လုၵ်ႉတီႈၵျွင်းၼွင်ဢူၼ် ၵျွႃႉၶဝ်ႈၵႂႃႇလိုဝ်ႈသဝ်းၵိင်းတီႈၼႂ်းၵျွင်းၵၢင်ဝဵင်း ၼၼ်ႉၵေႃႈ သိုၵ်းၵဝ်ႈၵၢင်ႉ ပႃးၵွင်ႈၵၢင်ႇတဵမ်ထူၼ်ႈသေ ၶီႇရူတ်ႉၵႃး ၼမ်းၼႃႈၵႂႃႇ ၼႆယဝ်ႉ။

ၵူၼ်းမိူင်းပိုၼ်ႉတီႈ ၵေႃႉယူႇဝႆႉၼႂ်းဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ပီၼႆႉ ၸွမ်းပၢင်တေႃႇလွင်း ၼႂ်းပွႆးလိူၼ်သီႇ ၶဝ်သႂ်ႇဝႆႉပႃး CCTV ။ ၶူင်ႇမၢၵ်ႇၵိင်ႈလွႆၼႆႉမီး 20 တီႈပၢႆ၊ ၽၢႆႉ ၸေႈ (ရှမ်းကိုးမီး) မီးမွၵ်ႈ 20 တီႈ၊ ၽၢႆႉၵိဝ်း (ၽၢႆႉၶဝ်ၵႂၢႆး) ၼႆႉ မီး 15 တီႈ၊ ၽၢႆႉမၢၵ်ႇတႅဝ်ႇ (လေးကောင်ဂျင်) ၼႆႉမီး 6 တီႈ ။ ပၢင်တေႃႇလွင်းတႄႉ ပွႆးတမ်ႉပႆႇတႄႇ ၽြႃးတမ်ႉပႆႇၶဝ်ႈ ဝဵင်း ၶဝ်ပေႃးတႄႇဢွၼ်ႇတၢင်းယဝ်ႉ။ ၸွမ်းႁိမ်းႁွမ်း ပၢင်တေႃႇလွင်းၸိူဝ်းၼႆႉၵေႃႈ မီးသိုၵ်းၶဝ် ပႃးၵွင်ႈၵၢင်ႇပႂ်ႉဢဝ်ႁူမ်ႇလူမ်ႈဝႆႉ” ဝႃႈၼႆ။

လႆႈႁူႉဝႃႈ ၽွင်းပၢင်းၽြႃးၸဝ်ႈမိူင်းၶၢဝ်ႉ ၶဝ်ႈဝဵင်းၼၼ်ႉ ၵူၼ်းမိူင်းၸိူဝ်းၵႂႃႇၸွမ်းသူင်ႇ မီးဢေႇလိူဝ်ၵူႈပီတေႉ တေႉဝႃႈဝႃႈ ၼႆယဝ်ႉ။

ပၢင်ပွႆးလိူၼ်သီႇ ဝဵင်းသႅၼ်ဝီပီၼႆႉ တႄႇၸတ်းႁဵတ်း 27/2-2026- 3/3/2026 ႁိုင်ၶၢဝ်းတၢင်း 5 ဝၼ်းသေ တေမီးပႃးၸၢတ်ႈသႅင်း “မွၵ်ႇၵွၼ်တႆး” မႃးလဝ်ႇမူၼ်ႈတူၼ်ႈၸႂ်ပၼ်ထႅင်ႈ ၼႆယဝ်ႉ။

ပေႃးထိုင်မႃးၶၢဝ်းလိူၼ်သီႇၼႆ ပီႈၼွင်ႉတႆးၸိူဝ်းယူႇၼႂ်းဝဵင်းဢၼ်မီးမူၺ်ႇတေႃႇထၢတ်ႈၸႅတ်ႈၽြႃး ပဵၼ်ၸဝ်ႈၼၼ်ႉ ၸတ်းႁဵတ်းပွႆးတဵၵ်းၶမ်းၽြႃးႁင်းၽႂ်မၼ်း။ ပွႆးလိူၼ်သီႇၼႆႉ တၢင်းမိူင်းတႆးပွတ်းႁွင်ႇ ၸတ်းတီႈဝဵင်းသႅၼ်ဝီ၊ ဝဵင်းသီႇပေႃႉ၊ မိူင်းတႆးပွတ်းၸၢၼ်း ၸတ်းတီႈမူၺ်ႇတေႃႇႁူဝ်လိုင်း လႄႈ မူၺ်ႇတေႃႇ မိူင်းၵိုင်၊ မိူင်းတႆးပွတ်းဢွၵ်ႇ ၸတ်းႁဵတ်းတီႈ ဝဵင်းမွၵ်ႇမႂ်ႇ ၸိူဝ်းၼႆႉ။