သိုၵ်းယိုတ်းမိူင်းၼႆသေ ၵူၼ်းမိူင်းလႆႈၵပ်ႉၵိၼ်း ၊ မီးပၢင်တိုၵ်းၼႆသေ ၵူၼ်းမိူင်းလႆႈထူပ်းၽေး ၊ သိုၵ်းၼင်ႇၵၼ် ဢမ်ႇမႅၼ်ႈၵၼ်ၼႆသေ ၵူၼ်းမိူင်းလႆႈၼၵ်းၸႂ်သုၵ်ႉၸႂ်ၸွမ်း ။ ပၼ်ႁႃသင်ပဵၼ်မႃးၵေႃႈ ဢမ်ႇလွတ်ႈႁူဝ်ၵူၼ်းမိူင်း ။ ၵူၼ်းမိူင်း ယူႇဢမ်ႇသႃႇ ၵိၼ်ဢမ်ႇသိူဝ်း ပၢႆႈဢမ်ႇလွတ်ႈ ။ ပွတ်းတၢင်းပုင်ႇပႃႇၶႅမ် ၵိင်ႇၽႄၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇၼႆႉၵေႃႈ သိုၵ်းဝႃႉ UWSA တင်း ပျီႇတူႉၸိတ်ႉ တပ်ႉပႂ်ႉလႅၼ်လိၼ် မီးပၼ်ႁႃၵၼ်သေ ၶဵင်ႈၶႅင်ၵၢၼ်သိုၵ်းၵၼ်ဝႆႉ ။ ၵူၼ်းမိူင်းတႄႉ လႆႈယူႇၼႂ်းၵႄႈၼႆႉသေ မႆႈဢူၵ်းမႆႈၸႂ် ၵူဝ်ပဵၼ်ပၢင်တိုၵ်းယႂ်ႇ ။ ၽွင်းတိုၵ်ႉလႆႈ ယူႇၼႂ်းၵႄႈၽေးၶဵၼ်ၸိူင်ႉၼႆ ၵူၼ်းမိူင်းဢမ်ႇၸၢင်ႈႁွင်ႉႁႃတီႈပိုင်ႈ ဢမ်ႇၸၢင်ႈၸႂ်ယႂ်ႇၸုမ်းလႂ် ဝႃႈၼႆ။

“ ပွတ်းတၢင်းပုင်ႇပႃႇၶႅမ်ၼႆႉ တေၵႂႃႇႁွင်ႉၵေႃႉလႂ် ပဵၼ်ပေႃႈႁဝ်းၵေႃႈ ဢမ်ႇႁူႉယဝ်ႉ ၊ ပေႃးထူပ်းပၼ်ႁႃမႃး ဢမ်ႇၸၢင်ႈႁွင်ႉႁႃၽႂ် ။ ပေႃးႁဝ်းၼင်ႇၵၼ် ဢမ်ႇၽွမ်ႉၵၼ်တႄႉ ဢမ်ႇၸၢင်ႈယူႇသဝ်းသေဢိတ်းယဝ်ႉ ” ၼႆ ၵူၼ်းပုင်ႇပႃႇၶႅမ် ၵေႃႉၼိုင်ႈ လၢတ်ႈလွင်ႈၶမ်ၸႂ် ၼင်ႇၼႆ။

ဝဵင်းပုင်ႇပႃႇၶႅမ် ၵိင်ႇၽႄ ၸႄႈဝဵင်းမိူင်းတူၼ် ၸိုင်ႈတႆး ပွတ်းဢွၵ်ႇၼႆႉ ၸဵမ်လႂ်မႃးလႂ်ၵေႃႈ ၵူၼ်းမိူင်း လႆႈၵူမ်ႈႁူဝ်ၼွမ်းတူဝ် တေႃႇသိုၵ်းၸိူဝ်းမီးဢႃႇၼႃႇ သုမ်ႇငုမ်းယူႇၼႂ်းပိုၼ်ႉတီႈမႃးတႃႇသေႇ ။ ၼင်ႇႁိုဝ် တေယူႇလႆႈလွတ်ႈလႅဝ်း ၼင်ႇႁိုဝ် သိုၵ်းၸိူဝ်းတူင်ႉၼိုင်ၼႂ်းပိုၼ်ႉတီႈ ပေႃးတေဢမ်ႇမႃးၸီးမႃးၸွႆးၼၼ်ႉ လႆႈယူႇႁႂ်ႈမႅၼ်ႈၸွမ်းငဝ်းလၢႆး ။

ၵူၼ်းမိူင်းတေႁဵတ်းတေႁႃ သင်ၵေႃႈ လႆႈဢဝ်ဢူၵ်းဢဝ်ၸႂ် သိုၵ်းၸိူဝ်းယူႇၼႂ်းပိုၼ်ႉတီႈ (ပႃးၸဵမ်သိုၵ်းဝႃႉ ၊ သိုၵ်းမၢၼ်ႈ ၊ ပျီႇတူႉၸိတ်ႉ လႃးႁူႇ ( တပ်ႉပႂ်ႉလႅၼ်လိၼ် 1007) ၊ RCSS/SSA ၸိူဝ်းၼႆႉ) ။ ႁဵတ်းသင်ၵေႃႈ ၼင်ႇႁိုဝ် တေဢမ်ႇတုမ်ႉတိူဝ်ႉၺႃးသိုၵ်းၸိူဝ်းၼၼ်ႉ ၵူၼ်းမိူင်းတႄႉ လႆႈၾၢင်ႉယူႇၾၢင်ႉၵိၼ် ။

ၼင်ႇႁိုဝ်တေဢမ်ႇမီးပၼ်ႁႃၼၼ်ႉ ၵူၼ်းမိူင်း ၶတ်းၸႂ်ယူႇယဵၼ်ယဵၼ်သေတႃႉ သိုၵ်းၼႂ်းပိုၼ်ႉတီႈတႄႉ ဢမ်ႇတွၼ်ႉ ဝူၼ်ႉတေႃႇၵူၼ်းမိူင်း ၊ ပေႃးဝႃႈ သိုၵ်းၼင်ႇၵၼ်မီးပၼ်ႁႃၵၼ်မႃးၵေႃႈ ၵူၼ်းမိူင်းသမ်ႉပၢႆ လႆႈတုၵ်ႉၸႂ်ယၢပ်ႇၽိုတ်ႇၸွမ်းၼႂ်းၵႄႈမၼ်း ၼႆ ၵူၼ်းပိုၼ်ႉတီႈၵေႃႉၼိုင်ႈလၢတ်ႈၼႄၼင်ႇၼႆ။

ပေႃးမႃးတူၺ်း ပိူင်ပဵၼ် ဝၼ်းတီႈ 14/02/2026 ၼၼ်ႉ လုၵ်ႈၸုမ်း ပျီႇတူႉၸိတ်ႉလႃးႁူႇလႄႈတင်းသိုၵ်းဝႃႉ UWSA မီးလွင်ႈထဵင်မေႃးၵၼ် ၼႂ်းပၢင်တေႃႇလွင်း တီႈၼႃးၵွင်းမူး ၸႄႈဝဵင်းမိူင်းတူၼ်ၼၼ်ႉသေ ထိုင်တီႈလၼ်ႇၵွင်ႈယိုဝ်းၵၼ် ။ ၽူႈမီးၸၼ်ႉ ၼႂ်းသိုၵ်းဝႃႉၵေႃႉၼိုင်ႈ လူႉတၢႆ ။ ၵူၼ်းပိုၼ်ႉတီႈမၢင်ၵေႃႉၵေႃႈ လၢတ်ႈထႅင်ႈဝႃႈ ၾၢႆႇသိုၵ်းဝႃႉ တၢႆ 2 ၵေႃႉ ဝႃႈၼႆ ။

ပၼ်ႁႃၸိူဝ်းၼႆႉ ၵူၼ်းမိူင်းတႄႉ ဢမ်ႇၵဵဝ်ႇသင်ၸွမ်းသေတႃႉ တေၵႂႃႇလႂ်မႃးလႂ်ၵေႃႈ ၵုမ်ႇလႆႈၵူဝ်လႆႈႁႄ ။ ယွၼ်ႉ သိုၵ်းဝႃႉ ထႅမ်ႁႅင်းသိုၵ်းဢဝ်တီႈယူႇဝႆႉၸွမ်းတႃႈၸွမ်းတၢင်း တၢင်းၶဝ်ႈဢွၵ်ႇဝဵင်းလႄႈ ၶႅပ်ႇဝဵင်းၸိူဝ်းၼႆႉ ။

ပၢင်တေႃႇပၢင်လွင်း ဢၼ်ၸတ်းၼႂ်းထုင်ႉၼႃးၵွင်းမူးၼၼ်ႉၵေႃႈ ၼိုင်ႈပီလႂ် မီးပဵၼ်လၢႆသိပ်းပွၵ်ႈ ၊ ပၢင်ၼိုင်ႈယဝ်ႉတူဝ်ႈၵႂႃႇၵေႃႈ မီးမႃးထႅင်ႈပၢင်ၼိုင်ႈ ။ ပၢင်ၵမ်းလိုၼ်းၼႆႉၵေႃႈ သင်သိုၵ်းဢမ်ႇမီးပၼ်ႁႃၵၼ် လႅပ်ႈတေပိုတ်ႇၵႂႃႇၶၢဝ်းႁိုင်ထႅင်ႈ။ ယၢမ်းလဵဝ်တႄႉ ၵိုတ်းဝႆႉ ။ ၸုမ်းၸိူဝ်းမီးဢႃႇၼႃႇ ၼႂ်းပိုၼ်ႉတီႈၼႆႉ ၵႆႉဢဝ်ၶေႃႈဢၢင်ႈဢၼ်ၼိုင်ႈယဝ်ႉ ဢၼ်ၼိုင်ႈသေ ၼမ်းပိုတ်ႇပၢင်တေႃႇပၢင်လွင်း ။ ပေႃးမီးပၼ်ႁႃမႃးသမ်ႉ ဢမ်ႇႁၼ်ၵႄႈလိတ်ႈသင်ပၼ်။ ၽူႈလၵ်ႉၸၵ်ႉၶုတ်ႈလိူင်ႇၼမ်ၵေႃႈ ဢမ်ႇႁၼ်ၽႂ်ဢဝ်ပုၼ်ႈၽွၼ်းၵႄႈလိတ်ႈ ၼႆ ၵူၼ်းပိုၼ်ႉတီႈၵေႃႉၼိုင်ႈလၢတ်ႈ။

ၵူၼ်းမိူင်းသိုပ်ႇလၢတ်ႈဝႃႈ – “ ပေႃးပဵၼ်ၼႆမႃး ဢမ်ႇႁၼ် ၸုမ်းလႂ် လၢတ်ႈဝႃႈ တေၵႅတ်ႇၵင်ႈပၼ်ၵူၼ်းမိူင်း ဢမ်ႇတူၺ်းပၼ်လွင်ႈႁူမ်ႇလူမ်ႈၵူၼ်းမိူင်း ။ ၽိူဝ်သေၵူၼ်းမိူင်းယူႇယၢပ်ႇ ႁႃၵိၼ်လဵင်ႉတွင်းယၢပ်ႇ ။ သိုၵ်းၼႂ်းပိုၼ်ႉတီႈသမ်ႉ ဢမ်ႇမႅၼ်ႈၵၼ် ” – ဝႃႈၼႆ။

ၽွင်းသိုၵ်းဝႃႉ UWSA လႄႈ ပျီႇတူႉၸိတ်ႉလႃးႁူႇ မီးပၼ်ႁႃၵၼ်ၼႆႉ သိုၵ်းမၢၼ်ႈၵေႃႈ ယဵၼ်ႁၢႆဝႆႉ ဢမ်ႇႁၼ်လူင်းပိုၼ်ႉတီႈ ႁႄႉႁၢမ်ႈသင် ၊ ႁၼ်သိုၵ်းဝႃႉ ၵူၺ်း ဢၼ်ထႅမ်ႁႅင်းသိုၵ်း ဢဝ်တီႈယူႇဝႆႉ ၵူႈပွၵ်ႉၵူႈငွၼ်ႈ တေၶဝ်ႈတေဢွၵ်ႇပေႃးယၢပ်ႇ ၊ ပေႃးမိူၼ်ၼင်ႇ မိူင်းဝႃႉ တၢင်းပိုၵ်း ယဝ်ႉ ၼႆ ၵူၼ်းပိုၼ်ႉတီႈလၢတ်ႈၼင်ႇၼႆ ။

ၵူၼ်းၸိူဝ်းႁူႉႁၼ်ၸွမ်းတႄႉ လၢတ်ႈဝႃႈ တပ်ႉပိဝ်ႇႁႃႇမၢၼ်ႈ မိူင်းတူၼ် ပူင်ၵႂၢမ်းၼၵ်းဝႆႉ တီႈ သိုၵ်းဝႃႉ UWSA ႁႂ်ႈထွႆဢွၵ်ႇ ၼႂ်းပိုၼ်ႉတီႈ ဢၼ်ထႅမ်ႁႅင်းသိုၵ်း ပၵ်းပႂ်ႉ တီႈမႂ်ႇၸိူဝ်းၼႆႉ သဵင်ႈသဵင်ႈ ပေႃးဢမ်ႇထွၼ် တေသူင်ႇႁႅင်းၵႂၢတ်ႇလၢင်ႉၵႂႃႇဝႃႈၼႆဝႆႉ ။

တီႈၶဝ်တင်ႈတပ်ႉၵူတ်ႇထတ်း ၸွမ်းတၢင်းတႄႉ တီႈ ၼမ်ႉႁူးၶုၼ်ႇ ၶွၵ်ႈဝူဝ်း ဝၢၼ်ႈမႂ်ႇလီသေႃး တၢင်းၽႄတႃႈၵႂၢင်ႈ တၢင်းၶိုၼ်ႈၵႂႃႇလွႆပႃၶီး တၢင်းၶဝ်ႈဢွၵ်ႇ ဝဵင်းပုင်ႇပႃႇၶႅမ် ၸိူဝ်းၼႆႉ ။
ၵူၼ်းယူႇၼႃးၵွင်းမူး ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ လၢတ်ႈဝႃႈ – “သိုၵ်းဝႃႉၼႆႉ ၶဝ်ဝႅတ်ႉ ဝၢၼ်ႈပႃၶီးလီးသေႃး ဝႆႉတေႃႇထိုင်ဝၼ်းမိူဝ်ႈၼႆႉ။ တပ်ႉလႃးႁူႇ မီးတီႈၼၼ်ႈတီႈ ၼိုင်ႈ တီႈမိူင်းႁၢင်တီႈၼိုင်ႈ ။ ငိၼ်းၶၢဝ်ႇဝႃႈ သိုၵ်းမၢၼ်ႈ ဢမ်ႇပၼ်ဝႃႉ ယိုဝ်းလႃးႁူႇ ဢၼ်ဢဝ်ႁႅင်းသိုၵ်း ဢွၵ်ႇမႃးပိၵ်ႉတၢင်းၵေႃႈ ၼႂ်းၶၢဝ်းတၢင်း 7 ဝၼ်းၼႆႉ ႁႂ်ႈထွၼ်ပၼ်” – ဝႃႈၼႆ။

မိူဝ်ႈႁူဝ်လိူၼ်ၼႆႉ သိုၵ်းလႃးႁူႇ ဢွၵ်ႇတၢင်းၵႂႃႇ ၸွမ်းလႅၼ်လိၼ် ဢၼ်မုင်ႈၸူးတၢင်းမိူင်းထႆး ၺႃးသိုၵ်းဝႃႉ ပႂ်ႉၵူတ်ႇထတ်း လႄႈ သွင်ၾၢႆႇလႆႈတွၵ်ႉတႅၵ်ႉၵၼ်မႃး ။ ၶၢဝ်ႇဢမ်ႇယိုၼ်ယၼ်တေႉဝႃႈ ၾၢႆႇသိုၵ်းဝႃႉ မီးလွင်ႈ တိူဝ်ႉမၢတ်ႇလူႉတၢႆလႄႈ လမ်းၵူတ်ႇထတ်း သွၵ်ႈႁႃ ၽူႈပူၼ်ႉပႅၼ် လႄႈ မိူဝ်ႈဝၼ်းတီႈ 14 ပူၼ်ႉမႃးၼႆႉ ၸင်ႇဝၢင်းၽႅၼ် ၶိုင်တီႉၼႂ်းပၢင်လွင်းထႅင်ႈၵမ်းၼႆႉ။

ပိုၼ်ႉတီႈ ဢၼ်သိုၵ်းဝႃႉ တင်း ပျီႇတူႉၸိတ်ႉလႃးႁူႇ မီးပၼ်ႁႃၵၼ်ၼႆႉ မိူဝ်ႈလိူၼ် တီႊသႅမ်ႊပိူဝ်ႊ ပီ 2025 ပူၼ်ႉမႃးၼႆႉၵေႃႈ သိုၵ်းဝႃႉ ယိုဝ်းၵူၼ်းမိူင်းပုင်ႇပႃႇၶႅမ် တၢႆၼိုင်ႈၵေႃႉ မၢတ်ႇၸဵပ်း 1 ၵေႃႉ။

ယၢမ်းလဵဝ်ၵူၼ်းၵေႃႉဢၼ်ထၢင်ႇထိူမ်ဝႃႈ ယိုဝ်းသိုၵ်းဝႃႉ ၼႂ်းပၢင်တေႃႇလွင်း ၼႃးၵွင်းမူးၼၼ်ႉ ၸိုဝ်ႈဢႃးတီ ။ ၾၢႆႇသိုၵ်းဝႃႉ တီႉဝႆႉ တူဝ်မၼ်းၸၢႆး လႄႈ မေးမၼ်းၸၢႆး ဢဝ်ၵႂႃႇၵုမ်းၶင်ဝႆႉ ၼႂ်းတပ်ႉဝႃႉႁူၺ်ႈဢေႃႈ။

လိူဝ်ၼၼ်ႉ မိူဝ်ႈႁူဝ်လိူၼ်ၼႆႉၵူၺ်းၼင်ႇၵဝ်ႇ သိုၵ်းဝႃႉ UWSA ၼႄး ၵူၼ်းပုင်ႇပႃႇၶႅမ်ၵေႃႉၼိုင်ႈ ၸူဝ်းၼၢင်းယိင်းဝႃႉ ၵေႃႉၼိုင်ႈၵႂႃႇမိူင်းထႆး ၼႆ တီႉၺွပ်းဝႆႉၵူၼ်းတင်းလူတ်ႉၶိူင်ႈ ယင်း ပႆႇပွႆႇပၼ်ၶိုၼ်း တေႃႇထိုင်ဝၼ်းမိူဝ်ႈၼႆႉ။

ပေႃးမီးပၼ်ႁႃ ၼမ်ၶိုၼ်ႈမႃးၸိုင် ဢမ်ႇၵွမ်ႉ ပုင်ႇပႃႇၶႅမ်ၵူၺ်း ၸဵမ်ၵူၼ်းမိူင်းၼႂ်း ပိုၼ်ႉတီႈ ၼႃးၵွင်းမူး မိူင်းႁၢင် မႄႈၵႅၼ်း ႁူၺ်ႈဢေႃႈ ႁူဝ်ပၢင်ႇ ႁူဝ်ယွတ်ႈ မိူင်းၵျွတ်ႈ မိူင်းတူၼ် မိူင်းသၢတ်ႇ ၸိူဝ်းၼႆႉ တေတိူဝ်းယူႇယၢပ်ႇလႄႈ ၵူၼ်းမိူင်းတႄႉ ဢမ်ႇၶႂ်ႈႁႂ်ႈယုင်ႈလိူဝ်ၵဝ်ႇ ၶႂ်ႈႁႂ်ႈပၼ်ႁႃၸဵဝ်းယဝ်ႉတူဝ်ႈၵူၺ်းယဝ်ႉ ဝႃႈၼႆ။