ၵူၼ်းၶီႇရူတ်ႉၶိူင်ႈၵေႃႉၼိုင်ႈ မႃးတူၵ်းလုၵ်းဢၼ်ၾၢႆႇလိူမ်ႈလႆႇၶုတ်းဝႆႉ ႁိမ်းၵၢတ်ႇလူင် (မဵဝ်ႉမၸေး) ဝဵင်းတူၼ်ႈတီး တူၵ်းသဵပ်ႇၺႃးလဵၵ်းၼႂ်းလုၵ်းၼၼ်ႉသေထိုင်တီႈလူႉတၢႆ။

ဝၼ်းတီႈ 24/4/2026  ယၢမ်းၵၢင်ၶမ်ႈ 8 မူင်း  ၵူၼ်းၸၢႆးၵေႃႉၼိုင်ႈ ၶပ်းရူတ်ႉၶိူင်ႈ လုၵ်ႉတၢင်း  ၸၢၼ်းၵၢတ်ႇသေ ႁေႃႈရူတ်ႉမႃးတၢင်းႁွင်ႇ၊ မႃးတူၵ်းလုၵ်း ဢၼ်ၶဝ်ၶုတ်းဝႆႉ (တႃႇႁဵတ်း သေဢၼ်ဢၼ်) ဢၼ်မီးၾၢႆႇႁွင်ႇၵၢတ်ႇလူင်  ။

လုၵ်းၼၼ်ႉ လိုၵ်ႉမွၵ်ႈ 10 ထတ်း(ပေႇ)  ။  ၾၢႆႇလိူမ်ႈလႆႇလၢတ်ႈဝႃႈ ပဵၼ်တႃႇႁဵတ်းထၢင်ၶီႈ ဝႃႈၼႆ သေတႃႉ ပဵၼ်ၾၢင်ႁၢင်ႈတေၾင်သဝ် (မီးဝႆႉပႃးလဵၵ်းၶဵမ်ၾင်ဝႆႉ)   – ပဵၼ်လုၵ်းတႃႇႁဵတ်းသင်ၼႆ ၽႂ်ၵေႃႈဢမ်ႇႁူႉၸွမ်း။ ပိုၼ်ႉတီႈၼၼ်ႈသမ်ႉဢမ်ႇမီးၾႆးၾႃႉ လိပ်းသိင်ႇမိုတ်းတၼ် ဢမ်ႇၸၢင်ႈ ႁၼ်သင်။ သမ်ႉဢမ်ႇမီးဢၼ်ႁႄႉဢၼ်တႃႈ တႃႇပၼ်ၾၢင်ႉဝႃႈမီးလုၵ်း ၸင်ႇဝႃႈႁဵတ်းႁႂ်ႈ ၵူၼ်းၶီႇရူတ်ႉၶိူင်ႈ တူၵ်းလူင်းၵႂႃႇ။

ၼၢင်းယိင်းၵေႃႉဢၼ်ၵႂႃႇႁၼ်သိုဝ်ႈၼႃႈတၼ်းတႃၼၼ်ႉ လၢတ်ႈၽူႈတွႆႇႁွၵ်ႈဝႃႈ – “ တီႈၼၼ်ႈ လပ်းၵေႃႈလပ်းသိင်ႇ သမ်ႉဢမ်ႇမီးဢၼ်ႁႄႉဢၼ်တႃႈဝႆႉ ၊ ၵူၼ်းၶပ်းရူတ်ႉၼၼ်ႉ လႅပ်ႈဢမ်ႇႁူႉ ဝႃႈ တီႈၼၼ်ႈမီးလုၵ်း၊  ဢမ်ႇႁၼ်ႁူႁၼ်တႃ သေ တူၵ်းလူင်းၵႂႃႇ၊  ၶမ်ႈၼၼ်ႉ ဢွၼ်ၵၼ်ႁွင်ႉၵႃး ႁၢပ်ႉၸၢင်ႈ ဢဝ်တူဝ်မၼ်းၸၢႆး သူင်ႇႁူင်းယႃ ။ လဵၵ်းဢၼ်ပၵ်းဝႆႉၼႂ်းလုၵ်းၼၼ်ႉ သဵပ်ႇၺႃးတွင်ႉ မၼ်းပဵၼ် 6 တီႈ။ ၵွၵ်းႁူဝ်မၼ်းၵေႃႈ ၽတ်ႉၺႃးသေလိူတ်ႈဢွၵ်ႇၼမ်   ”- ဝႃႈၼႆ ။  

ၵေႃႉဢၼ်မႃးပဵၼ်ၽေးၵိုင်ႉၵၢင်ႉ တူၵ်းလုၵ်းတၢႆၼၼ်ႉ ပဵၼ်ၽႂ် လုၵ်ႉလႂ်မႃးၼႆ  ပႆႇမီးၽႂ်ပိုၼ်ၽၢဝ်ႇ၊ ဢမ်ႇမီးၽႂ်ယိုၼ်ယၼ်ပၼ်။

ဢွင်ႈတီႈဢၼ်မၼ်းၸၢႆးတူၵ်းလုၵ်းၼၼ်ႉ ပဵၼ်ၼႃႈၾၢႆႇႁွင်ႇၵၢတ်ႇ- ၼိူဝ်သဵၼ်ႈတၢင်းလူင် ၵူၼ်းၵႃႉ(ၵူင်ႇတႄႇလၢၼ်း) ၊ တေပဵၼ်ႁိမ်း တႃႈရူတ်ႉႁပ်ႉၸၢင်ႈ ၼႂ်းဝဵင်းၼွၵ်ႈဝဵင်းၸိူဝ်းၼၼ်ႉ။

ယၢမ်းလဵဝ်သမ်ႉ ပိူဝ်ႈတႃႇၵေႃႇသၢင်ႈတိုၵ်းယႂ်ႇၼႆသေ ၵၢတ်ႇၵၢင်ၶမ်ႈ ၼႃႈႁေႃၼႃႇလီႇ ၾၢႆႇၸၢၼ်းၵၢတ်ႇၼၼ်ႉ ၶဝ်ၸႂ်ႉၶၢႆႉၵႂႃႇၾၢႆႇႁွင်ႇၵၢတ်ႇ (ၼိူဝ်သဵၼ်ႈတၢင်းၵူင်ႇတႄႇ) ၼၼ်ႉမူတ်းမူတ်း။

မိူဝ်ႈဝၼ်းတီႈ 31/3/2026 ၼႆႉ ယူႇတီႈႁွင်ႈၵၢၼ်ၾၢႆႇလိူမ်ႈလႆႇလႄႈ ၶွမ်ႊပၼီႊ (သီဟဖွံ့ဖြိုးတိုးတက်ရေးကုမ္ပဏီ )ၸတ်းႁဵတ်းပၢင်လူင်းလၢႆးမိုဝ်း တႃႇၵေႃႇသၢင်ႈတိုၵ်း ယဝ်ႉလီငၢမ်း။ တေၵေႃႇသၢင်ႈတိုၵ်းတၢင်းသုင် 7 ၸၼ်ႉ  ဢၼ်တေမီးပႃးဢွင်ႈတီႈၵိုတ်းရူတ်ႉၵႃး    ဝႃႈၼႆ။

ၵူၼ်းၶၢႆၵၢတ်ႇၵၢင်ၶမ်ႈတႄႉဢွၼ်ၵၼ်ၶၢင်းပွင်ႉဝႃႈ – ၾၢႆႇလိူမ်ႈလႆႇ ၸႂ်ႉၶၢႆႉၵႂႃႇၶၢႆႉၶိုၼ်းလႄႈဢမ်ႇလႆႈၶၢႆၶူဝ်းတၢင်းလီ။ ပဵၼ်ဢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇဝႆႉဝႃႈၼႆ။