မိူဝ်ႈဝၼ်းတီႈ 21 လိူၼ်ၵျူႊလၢႆႊယၢမ်းၵၢင်ၶိုၼ်းလိုၵ်း ႁွင်ႈၵၢၼ်ၾၢႆႇလိူမ်ႈလႆႇယႃႉပႅတ်ႈ ႁေႃသဝ်ယၢမ်းမူင်း (နာရီစင်) ဢၼ်မီးႁိမ်းၵၢတ်ႇလူင် ၼႂ်းၵၢင်ဝဵင်းဝဵင်းတူၼ်ႈတီးၼၼ်ႉသေ ႁၢင်ႈႁႅၼ်းၵေႃႇသၢင်ႈဢွင်ႈဝႆႉရူတ်ႉၵႃး တိူၵ်းလူင် 7 ၸၼ်ႉ ။

ၵူၼ်းမိူင်းၵေႃႉယူႇၼႂ်းဝဵင်းတူၼ်ႈတီးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ၶဝ်ဢဝ်ၸၢၵ်ႈႁႄ မႃးၵူၼ်ႇယႃႉပႅတ်ႈ ၶၢဝ်းၵၢင်ၶိုၼ်းဢဝ်။ ႁေႃသဝ်မၼ်းသမ်ႉသုင်ႇတၢၼ်ႇတၢၼ်ႇမၼ်းလႄႈ ပေႃးႁဵတ်းၵၢင်ဝၼ်းၼႆ ၵူဝ်တိူဝ်ႉၺႃးၵူၼ်း” ဝႃႈၼႆ။

ႁေႃသဝ်ယၢမ်းမူင်းၼႆႉ ၵေႃႇသၢင်ႈမႃးမိူဝ်ႈပီ 1990 သၢင်ႈၶိုၼ်ႈမႃးၽွမ်ႉၽွမ်ႉၵၼ်တင်း ၵၢတ်ႇလူင်ဝဵင်းတူၼ်ႈတီးလႄႈ ပဵၼ်တီႈၵူၼ်းတင်းၼမ် ႁူႉၸၵ်းၵၼ်လီငၢမ်းသေ ပဵၼ်ၶိူင်ႈမၢႆဢၼ်ၵိုၵ်းပိုၼ်း ၸိုဝ်ႈသဵင်လိုဝ်းလင် ၼႂ်းမိူင်းတႆးပွတ်းၸၢၼ်း တီႈၼိုင်ႈ။

တႃႇသၢင်ႈႁိူၼ်းတိုၵ်းၵိုတ်းရူတ်ႉၵႃး 7 ၸၼ်ႉ ၼႂ်းၵၢင်ဝဵင်းၼၼ်ႉ ၸဝ်ႈႁၢၼ်ႉၸိူဝ်းၶၢႆတၢင်းၵိၼ် ၵၢတ်ႇၵၢင်ၶမ်ႈ ၼႂ်းပွၵ်ႉတပိၼ်ႇသူၺ်ႇထီး တၢင်းၼႃႈဢူဝ်းသျိၼ်းၼၼ်ႉ လႆႈၶၢႆႉၵႂႃႇယူႇဝႆႉတၢင်း ၸဵင်ႇႁွင်ႇၵၢတ်ႇလူင် တီႈသဵၼ်ႈတၢင်းၵူင်ႇတႄႇၼၼ်ႉဝႆႉၸူဝ်ႈၶၢဝ်း ဝႃႈၼႆ။

လႆႈႁူႉဝႃႈ ၶွမ်ႊပၼီႊဢၼ်ႁပ်ႉပုၼ်ႈၽွၼ်း ၵေႃႇသၢင်ႈႁိူၼ်းတိုၵ်းလူင်ၼၼ်ႉ ပဵၼ် (သီဟဖွံ့ဖြိုးတိုး တက်ရေးကုမ္ပဏီ ) လႄႈ ႁွင်ႈၵၢၼ်ၾၢႆႇလိူမ်ႈလႆႇ ၽူႈမီးပုၼ်ႈၽွၼ်း တႂ်ႈဢႃႇၼႃႇလူင်ပွင်ၸိုင်ႈသိုၵ်းမၢၼ်ႈ ပၢၼ်မိၼ်းဢွင်ႇလၢႆႇ ပဵၼ်ၸွမ်ၸိုင်ႈ ၼႆယဝ်ႉ။