တႄႇႁၢင်လိူၼ်ၵျႃႊလၢႆႊၼႆႉမႃး ၵၢင်ႉၵႄႇ ဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း သူင်ႇလိၵ်ႈၸူးၵူၼ်းမိူင်း ပွၵ်ႈၵမ်း 2  ၸိူဝ်းပႃးၼႂ်းသဵၼ်ႈမၢႆ တႃႇၵႂႃႇႁၢပ်ႇၵၢၼ်သိုၵ်း ၸုပ်ႈ 26 ၼႆယဝ်ႉ ။

ၽွင်းသိုၵ်းမၢၼ်ႈၵဵပ်းၵူၼ်းႁၢပ်ႇၵၢၼ်သိုၵ်းယူႇၼၼ်ႉ ယၢမ်းလဵဝ် တီႈဝဵင်းၼမ်ႉၸၢင် ၵၢင်ႉၵႄႇႁႃတီႉၺွပ်းၵူၼ်းၵိၼ်လဝ်ႈၵိၼ်ယႃႈ ၼႂ်းပွၵ်ႉၼႂ်းယွမ်ႇၽွင်းၵၢင်ၶမ်ႈၵၢင်ၶိုၼ်း တႃႇ   တႅၼ်းတၢင်ႇၵူၼ်းၵႂႃႇႁၢပ်ႇၵၢၼ်သိုၵ်း ဝႃႈၼႆ ။ 

ၼၢင်းယိင်းၵူၼ်းပိုၼ်ႈတီႈလၢတ်ႈၽူႈတွႆႇႁွၵ်ႈဝႃႈ -“ တလဵဝ်ၼႆႉၵၢင်ႉၵႄႇသူင်ႇလိၵ်ႈၸူး ၵူၼ်းပႃးၼႂ်းသဵၼ်ႈၸိုဝ်ႈတႃႇၵႂႃႇႁၢပ်ႇၵၢၼ်သိုၵ်းထႅင်ႈယဝ်ႉ ၊ ယွၼ်ႉၼၼ် ပေႃးၵၢင်ၶမ်ႈမွၵ်ႈ 7 မူင်းၼႆႉၼႆ ၵၢင်ႉၵႄႇၶဝ်တေလမ်းတီႉၵူၼ်းၵိၼ်လဝ်ႈၵိၼ်ယႃႈၼႂ်းပွၵ်ႉၼႂ်းယွမ်ႇ ၊ ပေႃးဢမ်ႇလူဝ်ႇသူင်ႇၾိုၵ်းၵၢၼ်သိုၵ်းတႄႉ ၶဝ်ၵေႃႈဢမ်ႇတီႉ ၊ ပေႃးလူဝ်ႇၵူၼ်းၼႆႉ ယူႇယူႇလမ်းတီႉ”- ဝႃႈၼႆ ။ 

ၼႂ်းဝဵင်းၼမ်ႉၸၢင်ၼႆႉ တႃႇႁၢပ်ႇ ၵၢၼ်သိုၵ်းမၢၼ်ႈၼႆ သွင်လိူၼ် ၼိုင်ႈပွၵ်ႈ လႆႈသူင်ႇပၼ်  ၼိုင်ႈပွၵ်ႉၼႆႉ 2-3 ၵေႃႉ ။ သင်ဝႃႈ တူၵ်းမႅၼ်ႈၵမ်းတေလႆႈၵႂႃႇဢမ်ႇၶႂ်ႈၵႂႃႇၼႆၸိုင်  လႆႈၵႂႃႇငူပ်ႉငီႉ ၵၼ်တင်း ၵၢင်ႉၵႄႇၼႂ်းပွၵ်ႉၼႂ်းဢိူင်ႇ ၸၢင်ႈၵူၼ်းၵႂႃႇႁၢပ်ႇၵၢၼ်သိုၵ်းၼိုင်ႈၵေႃႉလႆႈပၼ်  50 သႅၼ်ထိုင် 100  သႅၼ်ပျႃးဝႃႈၼႆ ။

တီႈဝဵင်းၼမ်ႉၸၢင်ၼႆႉ ဢၼ်ထုၵ်ႇၶၢၼ်းၵႂႃႇႁဵတ်းသိုၵ်းမၢၼ်ႈၼႆႉ ပွၵ်ႉၼိုင်ႈလႄႈ ပွၵ်ႉၼိုင်ႈဢမ်ႇမိူၼ်ၵၼ်။ မိူၼ်ၼင်ႇ ပွၵ်ႉ 5 ပွၵ်ႉ 3 သမ်ႉ ၾၢႆႇသိုၵ်းမၢၼ်ႈ သူင်ႇလိၵ်ႈၸူးသေ ၶၢၼ်းၵူၼ်းၵႂႃႇႁၢပ်ႇၵၢၼ်သိုၵ်း။ မၢင်ပွၵ်ႉသမ်ႉ သိုၵ်းမၢၼ်ႈ သင်ႇႁႂ်ႈၵဵပ်းငိုၼ်းၼႂ်းပွၵ်ႉသေ ႁႃၸၢင်ႈၵူၼ်းသူင်ႇပၼ် တႃႇၾိုၵ်းၵၢၼ်သိုၵ်း  – ၵူၼ်းပိုၼ်ႉတီႈလၢတ်ႈၼင်ႇၼႆ။ 

တီႈဝဵင်းၼမ်ႉၸၢင်ၼႆႉ ၵွၼ်ႇၼႃႈၼၼ်ႉ လွင်ႈသူင်ႇလိၵ်ႈၸူးၵူၼ်းမိူင်းသေ ၶၢၼ်းႁႂ်ႈမႃးၸူၵ်းၶႅပ်းမႄး တႃႇ ၵႂႃႇၾိုၵ်းၵၢၼ်သိုၵ်းၸိူင်ႉၼႆ တိုၵ်ႉမီး ၼိုင်ႈပွၵ်ႈၵူၺ်း ၵမ်းၼႆႉ ပဵၼ်ပွၵ်ႈၵမ်းသွင် ။ ၵွပ်ႈၼႆ ၵူၼ်းပိုၼ်ႉတီႈ ဢွၼ်ၵၼ်ပၢႆႈ ယၢၼ်ႁိူၼ်းယေးတီႈယူႇ။ တႃႇတေလွတ်ႈၼၼ်ႉ ၵမ်ႈၼမ်ၵႂႃႇႁဵတ်းပျီႇတူႉၸိတ်ႉ – ၵူၼ်းပိုၼ်ႉတီႈ လၢတ်ႈၼင်ႇၼႆ။

ၵူၼ်းၸမ်ၸႂ်ၵူၼ်းၶဝ်ႈၼႂ်းပျီႇတူႉၸိတ်ႉSSS လၢတ်ႈၽူႈတွႆႇႁွၵ်ႈဝႃႈ -“ ၵူၼ်းၼုမ်ႇဢၼ်ၶဝ်ႈ ၼႂ်းပျီႇတူႉၸိတ်ႉ SSS ၸိူဝ်းၼၼ်ႉ လႆႈၶဝ်ႈၾိုၵ်းၵၢၼ်သိုၵ်း ၼိုင်ႈလိူၼ် ၊ သွၼ်ၾိုၵ်းလၢႆး ယိပ်းၵွင်ႈ လႄႈ လၢႆးတိုၵ်းၼႃႈသိုၵ်းၸိူဝ်းၼႆႉပႃး ၊ ဢမ်ႇလႆႈၸႂ်ႉမိုဝ်းထိုဝ် ၊  ပေႃးၾိုၵ်းၵၢၼ်သိုၵ်း ၼိုင်ႈလိူၼ်ယဝ်ႉ ၶႂ်ႈယူႇၸွမ်းၶဝ်ၵေႃႈလႆႈ ပေႃးတေယူႇၸွမ်းၶဝ်ၼႆ  ၶဝ်ထုၵ်ႈပၼ် ၶူဝ်းလႄႈ ၵွင်ႈယဝ်ႉၵေႃႈပၼ်ငိုၼ်းလိူၼ်ပႃး  ၊ သင်ဝႃႈတေဢဝ်ဝႂ်ၸုမ်းၵူၺ်းၼႆၸိုင် တေလႆႈသၢင်းငိုၼ်း ၼိုင်ႈလိူၼ်ၼႆႉ 3 သႅၼ်ပျႃးၵူႈလိူၼ်”- ဝႃႈၼႆ ။

သိုၵ်းမၢၼ်ႈယိုတ်းမိူင်းၼႆႉ ပိုၼ်ၽၢဝ်ႇပၵ်းပိူင်ၵူၼ်းမိူင်းႁၢပ်ႇၵၢၼ်သိုၵ်းသေ   တႄႇၸႂ်ႉမႃး ပဵၼ်တၢင်းၵၢၼ်မိူဝ်ႈလိူၼ် ၾႅပ်ႉပိဝ်ႊရီႊ ပီ 2024 ။  ၵဵပ်းၵူၼ်းၼုမ်ႇ ဢဝ်ၵႂႃႇၾိုၵ်းၵၢၼ်သိုၵ်း ဢမ်ႇၵိုတ်းဢမ်ႇလိုဝ်ႈ။ သိုၵ်းမၢၼ်ႈယၢမ်ႈပိုၼ်ၽၢဝ်ႇလၢတ်ႈဝႆႉဝႃႈ ၼိုင်ႈၸုပ်ႈၼႆႉ တေႁွင်ႉၵူၼ်း ၵႂႃႇ ႁၢပ်ႇၵၢၼ်သိုၵ်း 5 ႁဵင်ၵေႃႉ ။ ႁွတ်ႈထိုင်မႃး  ၸုပ်ႈတီႈ 26 ယဝ်ႉ။ ၵူၼ်းၸိူဝ်းၵႂႃႇ ၸုပ်ႈႁႅၵ်ႈ ၸုပ်ႈဢွၼ်တၢင်းသုတ်းၸိူဝ်းၼၼ်ႉ ၸင်ႇႁႃလႆႈ ပွၵ်ႈႁိူၼ်းၶိုၼ်း။  ၵမ်ႈၼမ် ၵႂႃႇတၢႆပႅတ်ႈ ၼႃႈသိုၵ်းသေ ဢမ်ႇၸၢင်ႈပွၵ်ႈႁိူၼ်းၶိုၼ်းၵေႃႈမီး။

မိူၼ်ၼင်ႇၼႆ တီႈဝၢၼ်ႈၼမ်ႉမူဝ် ၼႂ်းၸႄႈဝဵင်းၼမ်ႉၸၢင် ၵေႃႈတွၼ်ႈတႃႇႁၢပ်ႇၵၢၼ်သိုၵ်းၼႆသေ ၵၢင်ႉၵႄႇလူင်းၵဵပ်းငိုၼ်းၵူၼ်းဝၢၼ်ႈၵူၼ်းမိူင်း ၼိုင်ႈလိူၼ်ၼႆႉ ၼိုင်ႈမိုၼ်ႇ ထိုင် သၢမ်မိုၼ်ႇပျႃး ၵူႈလိူၼ်။