ၵူၼ်းဝၢၼ်ႈၵူၼ်းမိူင်းလႄႈ ပေႃႈမႄႈလုၵ်ႈဢွၼ်ႇ ဝဵင်းလၢႆးၶႃႈ မိူင်းတႆးပွတ်းၸၢၼ်း  ႁူမ်ႈၵၼ်ပူၵ်းတင်ႈ ႁူင်းႁဵၼ်းၸိူဝ်ႉၸၢတ်ႈ တွၼ်ႈတႃႇလုၵ်ႈဢွၼ်ႇၸိူဝ်းၶၢတ်ႇတိုဝ်ႉတၢင်းၵၢၼ်ႁဵၼ်း တႃႇႁႂ်ႈလႆႈသွၼ်ႁဵၼ်းပၢႆးပၺ်ႇၺႃႇ။

ႁူင်းႁဵၼ်းၼႆႉတင်ႈဝႆႉၼႂ်းပွၵ်ႉ 4 ဝဵင်းလၢႆးၶႃႈ တႄႇပိုတ်ႇသွၼ်ႁဵၼ်း ဝၼ်းတီႈ 01/09/ 2026 မႃး ၊ တေႃႇထိုင်ယၢမ်းလဵဝ်ၵေႃႈ တိုၵ်ႉပိုတ်ႇႁပ်ႉလုၵ်ႈႁဵၼ်းမႂ်ႇ လႄႈ ၸဝ်ႈတႃႇၼ ဝႆႉယူႇဝႃႈၼႆ။

ၸၢႆးၵျေႃႇၸေႇယ ၽူႈၸွႆႈၵၢၼ်တီႈႁူင်းႁဵၼ်းၸိူဝ်ႉၸၢတ်ႈ ဝဵင်းလၢႆးၶႃႈ လၢတ်ႈၽူႈတွႆႇႁွၵ်ႈဝႃႈ -“ပဵၼ်ႁႅင်းၵူၼ်းမိူင်း ႁဵတ်းသၢင်ႈမႃးၵူၺ်းၶႃႈဢေႃႈ။ လုၵ်ႈဢွၼ်ႇတႆးႁဝ်းၵမ်ႈၽွင်ႈ ဢမ်ႇၵႂႃႇႁူင်းႁဵၼ်းလူင်ပွင်ၸိုင်ႈ။   တူဝ်ယၢင်မၼ်း   ပေႃးဝႃႈၸွမ်းဝၢၼ်ႈၼႆ ႁူင်းႁဵၼ်းလူင်ပွင်ၸိုင်ႈမၢၼ်ႈၼႆႉ  တေမီးၸၼ်ႉငဝ်ႈ တေယူႇထိုင်ၸၼ်ႉ 4  ။ ပေႃးဝႃႈယဝ်ႉၸၼ်ႉ 4 ယဝ်ႉၼႆ ၵမ်ႈၽွင်ႈၼႆႉ ဢမ်ႇၸၢင်ႈမႃးၶိုၼ်ႈၼႂ်းဝဵင်း  တႃႇသိုပ်ႇတေႃႇႁဵၼ်းလိၵ်ႈထႅင်ႈ ။  တေဝႃႈမႃးယူႇႁူင်းသဝ်းၼႆၵေႃႈ ၵမ်ႈၽွင်ႈၼႆႉ ဢမ်ႇပဵၼ်လႆႈ။ ၵွပ်ႈၼႆ တီႈႁဝ်းၶႃႈၼႆႉတႄႉ   လိၵ်ႈတႆးၵေႃႈၼင်ႇလိၵ်ႈတႆး ဢိင်းၵလဵတ်ႈၵေႃႈ ၼင်ႇဢိင်းၵလဵတ်ႈ  တေႁႂ်ႈၶဝ်တွပ်ႇၶဝ်ႈ။ ၸၼ်ႉတၢင်းႁူႉၶဝ် လႅပ်ႈတေထိုင်ၸၼ်ႉလႂ်ၼႆၵေႃႈတေၸတ်းသေပၼ်ၶိုၼ်ႈၵႂႃႇႁဵတ်းၼၼ်ၶႃႈဢေႃႈ။”- ဝႃႈၼႆ။

ႁူင်းႁဵၼ်းၸိူဝ်ႉၸၢတ်ႈ ဝဵင်းလၢႆးၶႃႈၼႆႉ တေဢဝ်လိၵ်ႈတႆးၵႂၢမ်းတႆးပဵၼ်ပိူင်လူင်သေ ပူင်သွၼ်ပၼ်လုၵ်ႈဢွၼ်ႇႁဵၼ်း။  တေမီး လိၵ်ႈတႆး၊ လိၵ်ႈဢဵင်းၵလဵတ်ႈ၊ ပိုၼ်ႉႁူႉလွင်ႈၾိင်ႈငႄႈၾိင်ႈထုင်းလႄႈ ၵၢၼ်ယူႇသၢင်ႈၵိၼ်သဝ်းၸွမ်းတူင်ႇဝူင်းၵူၼ်းၸိူဝ်းၼႆႉ။ လိူဝ်ၼၼ်ႉၵေႃႈ ယင်းၽႅၼ်ၵၢၼ်တေသွၼ်ပႃးထႅင်ႈ လိၵ်ႈထႆး၊ လိၵ်ႈၶႄႇလႄႈ ပၢႆးသၢႆႊ ထႅင်ႈ ဝႃႈၼႆ။  

ၸၢႆးၵျေႃႇၸေႇယ ၽူႈၸွႆႈၵၢၼ်တီႈႁူင်းႁဵၼ်းၸိူဝ်ႉၸၢတ်ႈ ဝဵင်းလၢႆးၶႃႈ လၢတ်ႈထႅင်ႈဝႃႈ “  လၢႆးပူင်သွၼ်လႄႈ မေႃသွၼ်ၸိူဝ်းၼႆႉ  ပဵၼ်လုၵ်ႈႁဵၼ်းဢၼ်ၵႂႃႇႁဵၼ်းလိၵ်ႈတီႈ ၵေႃတႆးမႃးၶႃႈဢေႃႈ။   သွၼ်လုၵ်ႈဢွၼ်ႇ ဢၼ်ဝႃႈၼၼ်ႉၵေႃႈ တေဢမ်ႇၸႂ်ႈဝႃႈသွၼ်လိၵ်ႈဢၼ်လဵဝ်ၼၼ်ႉၼႃႇၼႄ။ ၵၢင်ၶမ်ႈမႃးၵေႃႈ တေမီးၾိင်းငႄႈၾိင်းထုင်း ။   ယဝ်ႉၵေႃႈၵၢၼ်ႁုင်ၵၢၼ်မိုဝ်ႉ လႄႈၵၢၼ်ပဵၼ်မူႇပဵၼ်ၸုမ်း ႁဝ်းၶႃႈတေသွၼ်ပႃးၸိူင်ႉၼၼ်ၶႃႈဢေႃႈ။ ပေႃးတေသွၼ်ၸိူင်ႉ ၼႆတႄႉယူႇႁူင်းႁဵၼ်းၼွၼ်းႁူင်းႁဵၼ်းၼႆႉမၼ်းတိုၼ်းသၢင်ႇထုၵ်ႇၶႃႈဢိူဝ်ႈ ။ မိူဝ်ႈဢွၼ်တၢင်းၼႆႉႁဝ်းတေပိုတ်ႇပဵၼ် Summer School ၶၢဝ်းတၢင်း 2−3 လိူၼ်ၸိူင်ႉၼၼ် ၵူၺ်းၶႃႈဢေႃႈ။  ႁဝ်းၶႃႈပိုတ်ႇမႃးသွင်ပၢင်ယဝ်ႉၶႃႈ။ ၵမ်းၼႆႉႁဝ်းၶႃႈတေသွၼ်ပဵၼ်တၢင်းၵၢၼ်  ၸွမ်းၼင်ႇပိူင်ပၢႆးပၺ်ႇၺႃႇၼၼ်ႉၼႃႇ။ ပေႃးဝႃႈ 5 လိူၼ်ယဝ်ႉၵေႃႈတေလႆႈမိူဝ်းၸႂ်းၶိုၼ်းႁိူၼ်း ၼိုင်ႈလိူၼ်။”

ႁူင်းႁဵၼ်းၸိူဝ်ႉၸၢတ်ႈဝဵင်းလၢႆးၶႃႈဢၼ်တိုၵ်ႉပိုတ်ႇမႂ်ႇၼႆႉ ယွၼ်ႉပဵၼ် ဢဵၼ်ႁႅင်းၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈသေ တႄႇႁဵတ်းမႃးၵူၺ်း။ ပႆႇမီးၾၢႆႇလႂ်ၸုမ်းလႂ်ၸွႆႈထႅမ်ႈမႃးပဵၼ်ၵွၼ်ႈပဵၼ်ၵွင်လႄႈ ႁူင်းၵေႃႇၵၢႆႇၵေႃႈပႆႇမီးတဵမ်ထူၼ်ႈ ။ ပႃးၸဵမ် သဵၼ်ႈတၢင်းၶဝ်ႈႁူင်းႁဵၼ်း ပႃးၸဵမ်ၵႃႈႁႅင်းမေႃသွၼ်ၶူးသွၼ် ၵေႃႈယင်းပႆႇမီး။ ဝူၼ်ႉထိုင်တႃႇလုၵ်ႈဢွၼ်ႇသေလႄႈ မီးမွၵ်ႈလႂ်ၵေႃႈၵႃႈလႆႈဢဝ်ၼၼ်ႉသေႁဵတ်းၵႂႃႇၵွၼ်ႇဝႃႈၼႆ။

“မိူဝ်ႈလဵဝ်ၼႆႉ တိုၵ်ႉမီးသိုင်ႇၾႆးၵူၺ်းဢၼ်ၶႅမ်ႉလႅပ်ႈမၼ်း။  တီႈသွၼ်လိၵ်ႈတႄႉၵေႃႈပဵၼ်မႆႉပူၵ်ႇမႆႉၽၢၵ်ႈ။ မၼ်းလူဝ်ႇထႅင်ႈတင်းၼမ်ၶႃႈဢေႃႈ ။ တၢင်းၵႂႃႇႁူင်းႁဵၼ်းၵေႃႈ ပိူဝ်ႉပိူဝ်ႉဢုင်ဢုင်ဢေႃႈ။ ၾႆးတႃႇၸႂ်ႉၼႂ်းၵၢၼ်သွၼ်ၵၢၼ်ႁဵၼ်း တႃႇမေႃသွၼ်ၶဝ်တေၸႂ်ႉၶွမ်ႊၸိူဝ်းၼႆႉလူဝ်ႇၾႆး သူဝ်ႊလႃႊၶႃႈဢိူဝ်ႈ။ ၼမ်ႉၵိၼ်ၵေႃႈတိုၵ်ႉလူဝ်ႇယူႇ။  တႄႇမႂ်ႇမႂ်ႇၼႆတႄႉသင်ၵေႃႈလူဝ်ႇယဝ်ႉၶႃႈ။ ”  ၸၢႆးၵျေႃႇၸေႇယ ၽူႈၸွႆႈၵၢၼ်တီႈႁူင်းႁဵၼ်းၸိူဝ်ႉၸၢတ်ႈ ဝဵင်းလၢႆးၶႃႈ လၢတ်ႈၼင်ႇၼႆ။

ႁူင်းႁဵၼ်းၸိူဝ်ႉၸၢတ်ႈဝဵင်းလၢႆးၶႃႈဢၼ်ပိုတ်ႇမႂ်ႇၼႆႉ ပဵၼ်ၵိင်ႇၽႄႁူင်းႁဵၼ်းၸိူဝ်ႉၸၢတ်ႈလွႆတႆးလီ ဝဵင်းၵႃလီႉ။ ၸဵမ်ဢဝ်ၵၢၼ်ႁဵၼ်းၵၢၼ်သွၼ်လႄႈ လၵ်းသုတ်ႇၵၢၼ်ႁဵၼ်းၸိူဝ်းၼႆႉၵေႃႈ တေၸႂ်ႉမိူၼ်ၵၼ်။ ယၢမ်းလဵဝ် လုၵ်ႈဢွၼ်ႇဢၼ်မႃးသႂ်ႇသဵၼ်ႈမၢႆတႃႇတေမႃးႁဵၼ်းလိၵ်ႈတီႈႁူင်းႁဵၼ်းၸိူဝ်ႉၸၢတ်ႈဝဵင်းလၢႆးၶႃႈၼႆႉ တိုၵ်ႉမီးဝႆႉမွၵ်ႈ 10 ၵေႃႉ မေႃသွၼ်တႄႉတိုၵ်ႉမီး 3 ၵေႃႉ။ ၵွပ်ႈၼႆလႄႈ ၽႂ်ၵေႃႉလႂ်ၶႂ်ႈဢဝ်လုၵ်ႈလၢင်းၸဝ်ႈၵဝ်ႇမႃးႁဵၼ်းၵေႃႈ ႁႂ်ႈမႃးပၼ်သဵၼ်ႈၸိုဝ်ႈသေၵမ်း။ သင်ၸိူဝ်ႉမီးၸဝ်ႈတႃႇၼ ၽူႈယႂ်ႇၸႂ်လီၵေႃႈ ယိၼ်းလီႁပ်ႉတွၼ်ႈ ႁပ်ႉငိုၼ်းလူႇတၢၼ်းၵမ်ႉၸွႆႈယူႇ ဝႃႈၼႆ။