ဝၼ်းတီႈ 29/03/2026 ဝၢႆးဝၼ်း 2 မူင်း (ယၢမ်းထႆး) ၼုမ်ႇၸၢႆး ႁႅင်းၵၢၼ်ယၢၼ်မိူင်း ၵေႃႉၼိုင်ႈ ၵႂႃႇလဵၼ်ႈၼမ်ႉ တီႈ ၾၢႆလူင်မႄႈၵူင်း ( ၶိူၼ်ႇမႄးၵူင်း) ၸႄႈဝဵင်းလွႆသၵဵတ်း ၸႄႈတွၼ်ႈၵဵင်းမႂ်ႇ သေ ၸူမ်ၼမ်ႉလူႉသဵင်ႈသၢႆၸႂ် ။

ၵေႃႉဢၼ် လူႉသဵင်ႈၵႂႃႇၼႆႉ ၸိုဝ်ႈ ၸၢႆးၸၢမ်ႇလူႇ  ဢႃယု 24 ပီ ပဵၼ်ၵူၼ်းမိူင်း ၸႄႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း ၸိုဝ်ႈပေႃႈ လုင်းသေႃး ၸိုဝ်ႈမႄႈၼၢင်းၽီႇ ဝႃႈၼႆ  ။

ၾၢႆလူင်မႄႈၵူင်းၼႆႉ ပေႃးထိုင်ၶၢဝ်းမႆႈမႃး ၵူၼ်းၸိူဝ်းယူႇၸႄႈတွၼ်ႈၵဵင်းမႂ်ႇ တီႈၸမ်တီႈၵႆ တေဢွၼ်ၵၼ်မႃးလဵၼ်ႈၼမ်ႉ ယႃႁိူဝ်ႉယႃၸႂ်ၵၼ်ၵိုၼ်းၶွၼ်ႈ ။ ၽွင်းမိူဝ်ႈ ၸၢႆးၸၢမ်ႇလူႇ ၸူမ်ၼမ်ႉလူႉသဵင်ႈၼႆႉ ၵူၼ်းတိုၵ်ႉမႃးလဵၼ်ႈၼမ်ႉမီးတင်းၼမ် ၼႆ – ၵူၼ်းၸိူဝ်းၵႂႃႇလဵၼ်ႈၼမ်ႉ ၶိူၼ်ႇမႄႈၵူင်း လၢတ်ႈၼင်ႇၼႆ။

ၾၢႆလူင်မႄႈၵူင်း ၼႆႉ ၸႅၵ်ႇဝႆႉပဵၼ် သၢမ်တွၼ်ႈ မီးဝႆႉ ၾၢႆ ၾၢႆႇသၢႆႉ ၾၢႆႇၶႂႃ လႄႈ ၾၢႆႇလၵ်းလူင် ႁူမ်ႈၵၼ် မီးဝႆႉသၢမ်တွၼ်ႈ ။ ၾၢႆၼႆႉ သုင်လိူဝ် ၼႃႈၼမ်ႉ ပၢင်ႇလၢႆႇ 390 မီႊတိူဝ်ႊ ။ တၢင်းၵႂၢင်ႈ ဢၼ်ၵဵပ်းၼမ်ႉဝႆႉလႆႈ မီး 15 ၵီႊလူဝ်ႊမီႊတိူဝ်ႊပၼ်ႇမူၼ်း ။ ၼိုင်ႈပီ ၼႆႉ ၼမ်ႉလႆၶဝ်ႈ 204 လၢၼ်ႉ ၵုၿမီႊတိူဝ်ႊ ลูกบาศก์เมตร ကုဗမီတာ ။

ၼမ်ႉၼႆႉ လေႃႇလဵင်ႉ ဢွင်ႈတီႈၽုၵ်ႇသွမ်ႈ တႃႇ 148,400 ႁႆႈ ၼႂ်းၸိုင်ႈထႆး မိူၼ်ၼင်ႇ ၼႂ်းၸႄႈဝဵင်းလွႆသၵဵတ်း ၊ သၼ်သၢႆး ၊ သၼ်ၵမ်ႇပႅင်း  ၊ လမ်းပုၼ်း ၸိူဝ်းၼႆႉ။

ၵွပ်ႈပဵၼ်ဢၢင်ႇၵဵပ်းၼမ်ႉ ဢၼ်ယႂ်ႇလူင်သႅၼ်းၼိုင်ႈ မီးၽေးၼမ်  ၸဝ်ႈၼႃႈတီႈထႆး တေၸႅၵ်ႇဝႆႉ ဢွင်ႈတီႈလူင်းလဵၼ်ႈလႆႈလႄႈ ဢမ်ႇလူင်းလဵၼ်ႈလႆႈ ။

သင်ၵႂႃႇလဵၼ်ႈၼမ်ႉ ႁႂ်ႈဝႄႈဢွင်ႈတီႈၼမ်ႉလိုၵ်ႉ ဢွင်ႈတီႈဢၼ် ၸဝ်ႈၼႃႈတီႈထႆး ႁႄႉႁၢမ်ႈဝႆႉၸိူဝ်းၼၼ်ႉ ။ သင်ဢမ်ႇၸွမ်းပိူင်ၸွမ်းၼင်ႇ ၸဝ်ႈၼႃႈတီႈတမ်းဝၢင်းဝႆႉသေ ၵႂႃႇလဵၼ်ႈ လုၺ်း လမ်ၼမ်ႉ တီႈဢၼ်ႁႄႉႁၢမ်ႈဝႆႉၸိူဝ်းၼၼ်ႉ ၸၢင်ႈၸူမ်ၼမ်ႉ လူႉသဵင်ႈသၢႆၸႂ် ။ မိူၼ်ၼင်ႇ ၸၢႆးၸၢမ်ႇလူႇ ဢၼ်လူႉတၢႆၵႂႃႇၼႆႉ ယွၼ်ႉၵျွၵ်းလူင်း တီႈၼမ်ႉၸႅဝ်ႈ ၼမ်ႉလိုၵ်ႉလႄႈ ႁဵတ်းႁႂ်ႈၵွၵ်းႁူဝ်ၸိူဝ်းၼႆႉ ၽတ်ႉၺႃး ၽႃႁိၼ်ၾၢႆၼမ်ႉသေ ၸင်ႇလူႉသဵင်ႈလႆႈငၢႆႈငၢႆႈ