ၼႂ်းပီ 2025 ၼၼ်ႉ ၵိုင်ႉၵၢင်ႉဢမ်ႇၵပ်းသိုပ်ႇလႆႈၼၢင်းသႃႇလူႇလႄႈ ၵူၼ်းဝၢၼ်ႈၵူၼ်းသူၼ်ၼႂ်းလၢႆးၶႃႈ ၸိူဝ်းၵႃႉၶၢႆၸွမ်းမၼ်းၼၢင်း ဢၼ်လူဝ်ႇလႆႈငိုၼ်းတီႈမၼ်းၼၢင်း ဢွၼ်ၵၼ်မႆႈၸႂ်ၵူဝ်လူႉသုမ်း ။ ၽွင်းၼၼ်ႉ ၵူၼ်းဝၢၼ်ႈၵူၼ်းသူၼ် ႁူမ်ႈၵၼ်ဢွၵ်ႇသဵင်လဵဝ်ၵၼ်ဝႃႈ ႁႂ်ႈၼၢင်းသႃႇလူႇ ပွၵ်ႈၶိုၼ်းၵႄႈလိတ်ႈငိုၼ်းတွင်းသေတႃႉ ဢမ်ႇႁၼ်လၢၵ်ႇလၢႆးသင်မႃး။ ႁိုင်ထိုင် ပီပၢႆ ၼႂ်းႁၢင်ႈလိူၼ်ၵျူၼ်ႊ 2026 ၼႆႉ ၼၢင်းသႃႇလူႇ ၸင်ႇမီးၽိုၼ်လိၵ်ႈ ယိုၼ်ႈထိုင်ၽူႈၵဵဝ်ႇၶွင်ႈဝႃႈ တေပွၵ်ႈၵႄႈလိတ်ႈပၼ်ႁႃၸိူဝ်းၼႆႉဝႃႈၼႆ။

ၵူၼ်းလၢႆးၶႃႈလၢတ်ႈဝႃႈ ၼၢင်းသႃႇလူႇၼႆႉ ႁဵတ်းၼၢႆးၼႃႈ ပွႆးၸႃး သိုဝ်ႉၶၢႆၶဵဝ် ၶူဝ်းသူၼ်ႁႆႈၼႃးမႃး ၶၢဝ်းတၢင်း 3 ပီ ။ မၼ်းၼၢင်း ဢဝ် ငိုၼ်းဝႆႉလူင်ႈၼႃႈသေ ၸင်ႇဢဝ်ၵုၼ်ႇၵႃႉတၢင်းၶၢႆမႃးသူင်ႇမွပ်ႈပၼ်ဝၢႆးလင် ၼႆယူႇ။
မၼ်းၼၢင်း ႁဵတ်း ၵၢၼ် ၼၢႆးၼႃႈ (ပွဲစား) ပဵၼ်လၵ်း ၸိုဝ်ႈၽူဝ်ႁွင်ႉၸၢႆးသူႉ မီးလုၵ်ႈ 2 ၵေႃႉ ယူႇ ဝၢၼ်ႈႁူဝ်ၾၢႆ ပွၵ်ႉ6 ၸႄႈဝဵင်းလၢႆးၶႃႈ။

ဝၢႆးသေ မၼ်းၼၢင်း ၶၢတ်ႇလွင်ႈၵပ်းသိုပ်ႇၵႂႃႇမိူဝ်ႈ ဝၼ်းတီႈ 29/04/2025 ၼၼ်ႉသေ ၵူၼ်းဝၢၼ်ႈၵူၼ်းသူၼ် ၸိူဝ်းလူဝ်ႇလႆႈငိုၼ်းတီႈမၼ်းၼၢင်း တူၵ်းၸႂ်လႆတိုၼ်ႇသေ ဢွၼ်ၵၼ်ဝႃႈ မၼ်းၼၢင်း လႅၼ်ဢဝ်ငိုၼ်းသေ ပၢႆပႅတ်ႈ။
ဢၼ်ႁဵတ်းႁႂ်ႈ ၵူၼ်းၼမ်ထၢင်ႇထိူမ်ဝႃႈ မၼ်းၼၢင်းပၢႆႈၼၼ်ႉတႄႉ ၼႂ်းဝၼ်းတီႈ 29 ၼၼ်ႉၵူၺ်းၼင်ႇၵဝ်ႇ မၼ်းၼၢင်းသမ်ႉ ႁွင်ႉဢဝ်လုၵ်ႈၸၢႆးမၼ်းၼၢင်း ဢၼ်ႁဵၼ်းယူႇတီႈလွႆလႅမ်ၼၼ်ႉ ပၢႆႈၸွမ်းထႅင်ႈ ၼႆ ၵူၼ်းပိုၼ်ႉတိႈလၢတ်ႈ။

ဢိင်ၼိူဝ်လွင်ႈၼႆႉ ၼၢင်းသႃႇလူႇတႄႉ ၶိုၼ်းတုမ်ႉတွပ်ႇလၢတ်ႈဝႃႈ လုၵ်ႈမၼ်းၼၢင်း ဢမ်ႇမိုတ်ႈတီႈလွႆလႅမ်လႄႈ လႆႈၶၢႆႉၵႂႃႇယူႇတူၼ်ႈတီး ။ ဝၢႆးၼၼ်ႉ သိုပ်ႇၶၢဝ်းတၢင်းၵႂႃႇၵႃႉၼမ်ႉမၼ်း တၢင်းမိူင်းတႆးပွတ်းႁွင်ႇလႄႈ လႅင်းၾူၼ်းလႅင်းဢိၼ်ႊထိူဝ်ႊၼႅတ်ႉ ဢမ်ႇလီလႄႈ ဢမ်ႇၸၢင်ႈၵပ်းသိုပ်ႇ ၼႆ လၢတ်ႈတီႈၽူႈတွႆႇႁွၵ်ႈ ဝၼ်းတီႈ 02/07/2026 ၼႆႉ ဝႃႈၼႆ။

ၵပ်းသိုပ်ႇၸူးၼၢင်းသႃႇလူႇဢမ်ႇလႆႈလႄႈ ၵူၼ်းဝၢၼ်ႈၵူၼ်းသူၼ်ၼႂ်းၸႄႈဝဵင်းလၢႆးၶႃႈၵေႃႈ ၼိုင်ႈၵေႃႉ ထၢင်ႇၼိုင်ႈဢၼ်သေ ထိုင်တီႈ ပေႃးလႆႈ ပိုၼ်ၽၢဝ်ႇႁွင်ႉႁႃၼၢင်းသႃႇလူႇ ။ လွင်ႈၼႆႉ ၼႆႉ ၼၢင်းသႃႇလူႇ ၶိုၼ်းတုမ်ႉတွပ်ႇလၢတ်ႈ မိူဝ်ႈၼႆႉ(02/07/2026 ) ၼင်ႇၼႆ –

ပဵၼ်ယွၼ်ႉ ဢွၵ်ႇႁိူၼ်းမႃး မႃးတၢင်ႇၼမ်ႉမၼ်း ။ တၢင်ႇၼမ်ႉမၼ်းၼႆႉ ဢမ်ႇတၼ်းထိုင်ၶၢဝ်းယၢမ်း 2-3 ဝၼ်းသေ ပိူၼ်ႈသမ်ႉမိူဝ်းၽဵဝ်ႈ ၶူဝ်းႁိူၼ်းၶူဝ်းယေး ။ ၽိူဝ်ႇလႆႈၶၢဝ်းတၢင်း 2-3 ဝၼ်းယဝ်ႉ ပိူၼ်ႈသမ်ႉတၢင်ႇၶၢဝ်ႇလူင်းသေ ၶႃႈၵေႃႈ သမ်ႉဢမ်ႇႁတ်းၶဝ်ႈမိူဝ်း ၵူဝ်ပဵၼ်ပႅတ်ႉသၼႃႇ(ပၼ်ႁႃ) ဢၼ်ႁၢႆႉလူင်လူင်ၸိူင်ႉၼႆၶႃႈဢေႃႈ

မၼ်းၼၢင်းသိုပ်ႇလၢတ်ႈဝႃႈ ၽွင်းၼၼ်ႉ လႆႈပွင်ႇၽူႈယႂ်ႇၵူၼ်းလူင်ၶဝ်သေ ဢွၵ်ႇႁိူၼ်းယူႇလႄႈ ဢမ်ႇသူႈတူၺ်းၾူၼ်းသင်။ ၾူၼ်းမီးသွင်ၶိူင်ႈ ၊ ၶိူင်ႈၼိုင်ႈတႄႉ ၽွင်းဢွၵ်ႇတၢင်း ဢမ်ႇထၢင်ႇဝႃႈ တေမီးၵူၼ်းၵပ်းသိုပ်ႇယဝ်ႉလႄႈ ဢဝ်ဝႆႉၼႂ်းရူတ်ႉသေ သမ်ႉလိုမ်းပႅတ်ႈ ၊ ယိပ်းၶိူင်ႈဢၼ်သုၼ်ႇတူဝ် ဢၼ်ၵမ်ႈၼမ်ဢမ်ႇႁူႉၸၵ်းၵူၺ်း။ လႅင်းမၼ်းၵေႃႈ လႆႈပဵၼ်တီႈပဵၼ်တၢင်းၵူၺ်း ၊ ၽိူဝ်ႇႁွတ်ႈတီႈလႅင်းၾူၼ်းလီၵေႃႈ ၵူၼ်းတီႈႁိမ်းႁိူၼ်းပေႃးလၢတ်ႈမႃးဝႃႈ ပိူၼ်ႈမႃးဢဝ်ၶူဝ်းႁိူၼ်းၶူဝ်းယေးယဝ်ႉၼႆသေ တူၵ်းၸႂ်သမ်ႉပေႃးလိုမ်းတူဝ်လိုမ်းၶိင်း ဝႃႈၼႆ။

ဝႃႈၼၼ်သေတႃႉ ၼႂ်းၵႄႈၼႆႉ ၽႂ်ၵပ်းသိုပ်ႇႁႃ ၼၢင်းသႃႇလူႇၵေႃႈ ဢမ်ႇလႆႈလႄႈ ပၢႆႈၼီႈႁႃႉဢမ်ႇပၢႆႈၼီႈ ၽႂ်ၵေႃႈ ဢမ်ႇႁူႉတႅတ်ႈတေႃး ဢၼ်ႁူႉတႄႉ ၽႂ်ၵေႃႈ ၵူဝ်ဢမ်ႇလႆႈၶိုၼ်းငိုၼ်း ။ ယွၼ်ႉဝႃႈ ၵူၼ်းဢၼ်လူဝ်ႇလႆႈတီႈၼၢင်းသႃႇလူႇၼႆႉ ဢမ်ႇယွမ်း 300 ၵေႃႉ ႁူမ်ႈသဵင်ႈ ၼပ်ႉႁဵင်သႅၼ်ငိုၼ်းမၢၼ်ႈ ၼႆ ၵူၼ်းပိုၼ်ႉတီႈသိုပ်ႇလၢတ်ႈ။

သင်ဝႃႈ ႁွတ်ႈဝႆႉတီႈဢမ်ႇမီးလႅင်းၾူၼ်းလႅင်းၼႅတ်ႇၼႆၵေႃႈ ၼႂ်းၶၢဝ်းတၢင်း ၽၢၵ်ႇလိူၼ်သၢဝ်းဝၼ်းၼႆႉ ၵိုင်ႇလီ ဢွၵ်ႇမႃးလၢတ်ႈၵူၼ်းၼမ်ယူႇ ။ၼႆႉသမ်ႉ ႁၢႆၵႂႃႇပဵၼ် ပီပၢႆ ၽႂ်တေယုမ်ႇ ၼႆ ၵူၼ်းလၢႆးၶႃႈ ဢၼ်လူဝ်ႇလႆႈငိုၼ်းတီႈၼၢင်းသႃႇလူႇၵေႃႉၼိုင်ႈလၢတ်ႈၼင်ႇၼႆ –

ဢၼႄႇၶႃႈဝႃႈတႄႉ ၽၢၵ်ႇလိူၼ်သၢဝ်းဝၼ်း ၶိုၼ်းမႃးၵႄႈလိတ်ႈ ၶိုၼ်းမႃးလၢတ်ႈပၼ်ပိူၼ်ႈလႆႈယူႇ။ ၼႆႉသမ်ႉ ႁိုင်ၼႃႇတေႉတေႉဝႃႈဝႃႈသေ ဢၼ်လႂ်ၵေႃႈ ပေႃးမီးငဝ်ႈႁၢၵ်ႈသၢၵ်ႇသေႇမၼ်းၵႂႃႇမူတ်း ။ၽႂ်ၵပ်းသိုပ်ႇၵေႃႈဢမ်ႇလႆႈ ။ ၵမ်းၼႆႉ ၸင်ႇမႃးဝႃႈ တေၵႄႈလိတ်ႈပၼ်ႁႃၼႆ တေဢဝ်သၢၵ်ႈသေႇဢၼ်လႂ်ၼႆ ဝူၼ်ႉၸွမ်းပေႃးဢမ်ႇဢွၵ်ႇ

ဢိင်ၼိူဝ် လွင်ႈထၢင်ႇထိူမ် ၵူႈၸိူဝ်ႉၵူႈပိူင်ၸိူဝ်းၼႆႉ ၼင်ႇႁိုဝ်ပေႃးတေတႅၵ်ႇလႅင်းၵၼ်ၼၼ်ႉ ၼၢင်းသႃႇလူႇ ၸင်ႇဢွၵ်ႇလိၵ်ႈယိုၼ်ႈၸူးၽူႈၵဵဝ်ႇၶွင်ႈလၢႆတီႈလၢႆတၢင်း ဝၼ်းတီႈ 30/06/2026 ၼႆႉသေ တေဢၢၼ်း ပွၵ်ႈလၢႆးၶႃႈ ၵႄႈလိတ်ႈပၼ်ႁႃ ။ ယွၼ်ႉဝႃႈ ငိုၼ်းတွင်းၼႆႉ ဢမ်ႇၸႂ်ႈဢၼ်လူဝ်ႇပၼ်ၵူၺ်း ဢၼ်လူဝ်ႇလႆႈၵေႃႈ မီးယူႇ ၼႆ ၼၢင်းသႃႇလူႇ သိုပ်ႇလၢတ်ႈၼင်ႇၼႆ-

တၢင်းယိူင်းဢၼ်ၼႆႉၼႆ ၼႂ်းၵၢင်ၸႂ်ၶႃႈႁဝ်းတႄႉ ၶႃႈတေၶဝ်ႈမိူဝ်းၼင်ႈၵႄႈလိတ်ႈၵႄႈၶႆ ၵူႈၸိူဝ်ႉၵူႈဢၼ်ၵူလွင်ႈ ။ၽိတ်းလႄႈသင် ဢမ်ႇၽိတ်းလႄႈသင် ။ မိူဝ်ႈလဵဝ်ၼႆႉ ပေႃးဝႃႈတူဝ်ၶႃႈ ဢမ်ႇမိူဝ်းၵႄႈလိတ်ႈၼႆၼႆႉ တေၶွင်ႈၶမ်ၸႂ် ႁင်းၽႂ်ႁင်းမၼ်းတင်းသွင်ၾၢႆႇ ႁဵတ်းၼႆၶႃႈဢေႃႈ

ဝၢႆးသေ ၼၢင်းသႃႇလူႇ ဢွၵ်ႇလိၵ်ႈၽိုၼ်ၼႆႉယဝ်ႉ ၵူၼ်းဝၢၼ်ႈၵူၼ်းသူၼ်တႄႉ မုင်ႈမွင်းယူႇႁင်းၽႂ်မၼ်း ။ ၸူးၸႂ်ၵေႃႈ ၶႂ်ႈႁႂ်ႈမၼ်းၼၢင်းမႃးၵႄႈလိတ်ႈပၼ်ႁႃငိုၼ်းတွင်းၸိူဝ်းၼႆႉ ။
ၵူၼ်းဝၢၼ်ႈၵေႃႉၼိုင်ႈ ဢၼ်လူဝ်ႇလႆႈငိုၼ်းတီႈၼၢင်းသႃႇလူႇ သိုပ်ႇလၢတ်ႈ တၢင်းႁၼ်ထိုင်ၼင်ႇၼႆ-

တိူၵ်ႈတီႈဝႃႈ မၼ်းပဵၼ်ၵႂႃႇၸိူင်ႉၼၼ်ၼႆသေတႃႉၵေႃႈ ႁဝ်းၵေႃႈ ဢမ်ႇၸၢင်ႈႁဵတ်းသင်ၼင်ႇၵဝ်ႇ ။သင်ဝႃႈမၼ်းတေမႃးတႅၼ်းငိုၼ်းၶိုၼ်းၼႆ ႁႃတီႈဝႃႈပေႃးဢမ်ႇမီး။ ပေႃးဝႃႈမၼ်းၼၢင်းၵႂႃႇယူႇတၢင်းၼွၵ်ႈလႄႈ လႆႈယူႇယၢပ်ႇၵိၼ်ယၢပ်ႇ။သင်ဝႃႈမႃးၼႆၵေႃႈ ႁႂ်ႈမႃးတႅၼ်းၼီႈပိူၼ်ႈၽွင်ႈ ။ ပိူင်တႅၵ်ႈမၼ်း ပေႃးလူဝ်ႇတႅၼ်းပိူၼ်ႈ 500 ၼႆၵေႃႈ တႅၼ်း 250 လႄႈၼေႃႈ ။ႁဵတ်းၼႆၵႂႃႇၵူႈၵေႃႉၵူႈၵေႃႉၶႃႈလႄႈၼေႃႈ ။ ၶႃႈထၢင်ႇတႄႉ ပေႃးမၼ်းဢမ်ႇမီးငိုၼ်းႁူဝ်မိုၼ်ႇ(မိုၼ်ႇသႅၼ်) တႄႉမၼ်းဢမ်ႇၸၢင်ႈမႃးၶႃႈ။မၼ်းထုၵ်ႇႁႅင်းၼမ်ႁႅင်းၼႃႇ မၼ်းဢမ်ႇၸႂ်ႈဢေႇ ၸဝ်ႈႁႆႈၸဝ်ႈသူၼ်ၼႆႉ လၢတ်ႈပေႃးဢမ်ႇလႆႈယဝ်ႉ။ မၢင်ၵေႃႉ ၼႆႉ သမ်ႉပေႃးဢမ်ႇၸၢင်ႈႁဵတ်းသူၼ်ၶဝ်ႈၵၢပ်ႈယဝ်ႉၶႃႈလူး ၸူဝ်ႈႁဵတ်းၼႆသေၵႂႃႇၼႆႉ ။ မၼ်းဢမ်ႇမီးသင်ၶႃႈလႄႇ ၵူၼ်းႁႆႈႁဵတ်းသူၼ်ဢွၼ်ႇႁဝ်းၼႆႉၶႃႈၼႃ

ၼႂ်းၽိုၼ်လိၵ်ႈၼၢင်းသႃႇလူႇၼၼ်ႉ ပႃးဝႆႉဝႃႈ- သင်ဝႃႈ ပွၵ်ႈဝၢႆႇသၢႆႇမိူဝ်းလႄႈ ၼၢင်းသႃႇလူႇ ပဵၼ်သေၸိူဝ်ႉသေလွင်ႈ တုၵ်းယွၼ်းႁႂ်ႈ ၽူႈယႂ်ႇၵူၼ်းလူင်ၵူႈၸဝ်ႈၸဝ်ႈ ၸွႆႈၵူတ်ႇထတ်းပၼ် ၸိူဝ်းၵဵဝ်ႇၶွင်ႈၸိူဝ်းၼၼ်ႉ ။ သင်ဝႃႈ မီးၵူၼ်းႁဵတ်းသေ လွင်ႈလွင်ႈ တီႈတူဝ်ၼၢင်းသႃႇလူႇ ႁႂ်ႈလႆႈသၢႆႈတႅၼ်းပၼ် ႁပ်ႉပုၼ်ႈၽွၼ်း ပၼ်ႁႃဢၼ်ၼၢင်းသႃႇလူႇၼေမိူဝ်းၵႄႈလိတ်ႈၼႆႉသေၵမ်း ဝႃႈၼႆ။

လိူဝ်ၼၼ်ႉ ပႃးဝႆႉထႅင်ႈဝႃႈ – သင်ၽႂ်ၺႃးပၼ်ႁႃၸိူင်ႉၼႆ ဢမ်ႇၼၼ် မီးတၢင်းၽိတ်းသေၸိူဝ်ႉသေပိူင် တုၵ်းယွၼ်း ယႃႇႁႂ်ႈဢဝ်ၶႅပ်းႁၢင်ႈလုၵ်ႈလၢင်းၵေႃႉထုၵ်ႇၺႃးၼႄးဢမ်ႇၼၼ် ၵေႃႉမီးတၢင်းၽိတ်းၼၼ်ႉ တၢင်ႇၼိူဝ်ဢွၼ်ႊလၢႆႊ ။လုၵ်ႈဢွၼ်ႇၼႆႉ ပႆႇႁူႉသင် ဝႃႈၼႆဝႆႉ။