တႄႇၼႂ်းႁူဝ်လိူၼ်ၵျူႊလၢႆႊမႃးၼႆႉ ၵၢင်ႉၵႄႇၼႂ်းပွၵ်ႉၼႂ်းယွမ်ႇ ၼႂ်းၸႄႈဝဵင်းတူၼ်ႈတီး ၊ သီႇသႅင်ႇ ၊ ႁူဝ်ပူင်း ၸိုင်ႈတႆးပွတ်းၸၢၼ်း  ၵဵပ်းငိုၼ်းၵူၼ်းမိူင်းထႅင်ႈ ဝႃႈပဵၼ်တႃႇ ၸၢင်ႈၵူၼ်းၵႂႃႇႁၢပ်ႇ ၵၢၼ်သိုၵ်း ၸုပ်ႈ 25  ဝႃႈၼႆ ။

 မိူၼ်ၼင်ႇတီႈ ဢိူင်ႇၼႃးႁီး  ၸႄႈဝဵင်းတူၼ်ႈတီးၼၼ်ႉ ၵၢင်ႉၵႄႇၵဵပ်းငိုၼ်းၵူၼ်းမိူင်း တႃႇၸၢင်ႈၵူၼ်းၵႂႃႇႁၢပ်ႇၵၢၼ်သိုၵ်း။ မိူဝ်ႈဢွၼ်ႇတၢင်းၵဵပ်းႁိူၼ်းၼိုင်ႈလင်ၼႆႉ 1 မိုၼ်ႇပျႃး  ယၢမ်းလဵဝ်  ၵဵပ်းၼိုင်ႈလင် 18000 ပျႃး ဝႃႈၼႆ ။  

ၵူၼ်းဝၢၼ်ႈ ၽူႈၸၢႆးယူႇၼႂ်းဢိူင်ႇၼႃးႁီးလၢတ်ႈၽူႈတွႆႇႁွၵ်ႈဝႃႈ – “တလဵဝ်ၼႆႉ ၵူၼ်းတႄႉၶဝ်ဢမ်ႇယွၼ်းတီႈၵူၼ်းဝၢၼ်ႈ ယဝ်ႉ- ၵူၺ်းၵႃႈၶဝ်ယွၼ်းငိုၼ်းၽိူမ်ႉ တႃႇၸၢင်ႈၵူၼ်းၵႂႃႇႁၢပ်ႇၵၢၼ်သိုၵ်းၵူၺ်း ၊ ၶဝ်ၸၢင်ႈၸိူင်ႉႁိုဝ်တႄႉဢမ်ႇႁူႉ ၵူၼ်းဝၢၼ်ႈတႄႉ လိူၼ်ၼိုင်ႈယဝ်ႉလိူၼ်ၼိုင်ႈ လႆႈသႂ်ႇငိုၼ်းၼမ်မႃးတိၵ်းတိၵ်း ”- ဝႃႈၼႆ ။

ၼႂ်းၸႄႈဝဵင်းတူၼ်ႈတီးၼႆႉ တႃႇႁၢပ်ႇ ၵၢၼ်သိုၵ်းမၢၼ်ႈၼႆသေ ၼိုင်ႈဢိူင်ႇၼႆႉ လႆႈၵႂႃႇ 2  ၵေႃႉဢမ်ႇၼၼ် 3 ၵေႃႉ ။ ဢမ်ႇမီး ၵူၼ်းၶႂ်ႈၵႂႃႇလႄႈ ၵူၼ်းမိူင်းၼႂ်းပိုၼ်ႉတီႈ လႆႈၸၢင်ႈၵူၼ်းၵႂႃႇႁၢပ်ႇၵၢၼ်သိုၵ်းၼိုင်ႈၵေႃႉလႆႈပၼ်  80 သႅၼ်ထိုင် 100  သႅၼ်ပျႃး ၵူႈလိူၼ် ဝႃႈၼႆ ။

ငိုၼ်းတႃႇၵမ်ႉၸွႆႈ ႁၢပ်ႇၵၢၼ်သိုၵ်းၼႆႉ ၵၢင်ႉၵႄႇ ဢိူင်ႇၼိုင်ႈလႄႈဢိူင်ႇၼိုင်ႈ ဝၢၼ်ႈၼိုင်ႈလႄႈဝၢၼ်ႈၼိုင်ႈၵဵပ်းဢမ်ႇမိူၼ်ၵၼ်။   မၢင်ၸိူဝ်းၵဵပ်းငိုၼ်း   ၼိုင်ႈႁိူၼ်း 3 မိုၼ်ႇထိုင် 5 မိုၼ်ႇပျႃး  ၊ ၵၢင်ႉၵႄႇမၢင်တီႈသမ်ႉဢဝ်သဵၼ်ႈမၢႆ ၵူၼ်းဢၼ်ပႃးၼႂ်းသဵၼ်ႈၸိုဝ်ႈႁၢပ်ႇၵၢၼ်သိုၵ်းသေ ယွၼ်းၵူၼ်းၵူၺ်း၊ ၵူၺ်းၵႃႈပေႃးပဵၼ်ဝဵင်းယႂ်ႇဝဵင်းလူင် တီႈပၢႆးမၢၵ်ႈမီးၶႅမ်ႉၸိူဝ်းၼၼ်ႉတႄႉ  ၵဵပ်းငိုၼ်း ၼိုင်ႈႁိူၼ်းလႂ် 4သႅၼ်ထိုင် 5 သႅၼ်ပျႃးၵေႃႈမီး ၼႆယဝ်ႉ ။

လိူဝ်ၼၼ်ႉ ပိုၼ်ႉတီႈဢၼ်ၸုမ်းပျီႇတူႉၸိတ်ႉပဢူဝ်း PNO ၵုမ်းၵမ် မိူၼ်ၼင်ႇ ၼႂ်းၸႄႈဝဵင်းႁူဝ်ပူင်း ၊ တူၼ်ႈတီး ၊ သီႇသႅင်ႇ ၸိူဝ်းၼၼ်ႉၵေႃႈ တႃႇၵမ်ႉၸွႆႈ ၸုမ်းပျီႇတူႉၸိတ်ႉပဢူဝ်း PNOၼႆသေ PNOလူင်းၵဵပ်းထႅင်ႈ  6 လိူၼ်ၼိုင်ႈပွၵ်ႈ ၊ ၼိုင်ႈပွၵ်ႈသမ်ႉ 1 မိုၼ်ပျႃး ။ သင်ဢမ်ႇပၼ်လႆႈငိုၼ်း   တေလႆႈသူင်ႇၵူၼ်းၼႂ်းႁိူၼ်းၵႂႃႇၼႃႈသိုၵ်းဝႃႈၼႆ   ။

ၵူၼ်းၸၢႆးယူႇၼႂ်းထုင်ႉပူင်းလၢတ်ႈၽူႈတွႆႇႁွၵ်ႈဝႃႈ -“ဝၢၼ်ႈပဢူဝ်းၼႂ်းဢိူင်ႇဢတူင်းတေႃႇၸိူဝ်းၼၼ်ႉတႄႉ    လႆႈပၼ်ႇပုတ်ႈၵၼ် ၵႂႃႇၼႃႈသိုၵ်းၸွမ်း ၸုမ်းပျီႇတူႉၸိတ်ႉ PNO ၊ ငိုၼ်းၵေႃႈလႆႈပၼ် ၼႃႈသိုၵ်းၵေႃႈလႆႈၵႂႃႇၸိူင်ႉၼၼ်ႉၵေႃႈမီး”- ဝႃႈၼႆ ။ 

မိူၼ်ၼင်ႇၼႆႉ တီႈဝဵင်းမိူင်းၼၢႆး ၊ တူၼ်ႈတီး ၊ ၼမ်ႉၸၢင် ၸိုင်ႈတႆးပွတ်းၸၢၼ်းလၢႆလၢႆဝဵင်း ၵေႃႈတွၼ်ႈတႃႇႁၢပ်ႇၵၢၼ်သိုၵ်းၼႆသေ ၵၢင်ႉၵႄႇလူင်းၵဵပ်းငိုၼ်းၵူၼ်းဝၢၼ်ႈၵူၼ်းမိူင်း ၼိုင်ႈလိူၼ်ၼႆႉ 1 သႅၼ်ထိုင် 1 သႅၼ် 5 မိုၼ်ႇပျႃး ၵူႈလိူၼ်။ ပၢႆလိူဝ်ၵၢၼ်ႁႃၵိၼ်လဵင်ႉတွင်ႉယၢပ်ႇ ၵုမ်ႇလႆႈပၼ်တီႈၸုမ်းယိပ်းၵွင်ႈၵၢင်ႇမႃးယွၼ်းယူႇတိၵ်းတိၵ်းၸိူင်ႉၼႆ ၵူၼ်းမိူင်းဢွၼ်ၵၼ်ဢွၵ်ႇၼွၵ်ႈမိူင်း ၵႂႃႇႁႃငိုၼ်းဝၢၼ်ႈတႂ်ႈမိူင်းၼိူဝ်  ။ ၼႂ်းဢိူင်ႇၼႂ်းဝၢၼ်ႈဢမ်ႇၶႂ်ႈၵိုတ်းၽႂ်ယဝ်ႉ ဝႃႈၼႆ ။  

သိုၵ်းမၢၼ်ႈယိုတ်းမိူင်းၼႆႉ ပိုၼ်ၽၢဝ်ႇပၵ်းပိူင်ၵူၼ်းမိူင်းႁၢပ်ႇၵၢၼ်သိုၵ်းသေ   တႄႇၸႂ်ႉမႃး ပဵၼ်တၢင်းၵၢၼ်မိူဝ်ႈလိူၼ် ၾႅပ်ႉပိဝ်ႊရီႊ ပီ 2024 ။  ၵဵပ်းၵူၼ်းၼုမ်ႇ ဢဝ်ၵႂႃႇၾိုၵ်းၵၢၼ်သိုၵ်းဢမ်ႇၵိုတ်းဢမ်ႇလိုဝ်ႈ။ သိုၵ်းမၢၼ်ႈယၢမ်းပိုၼ်ႇၽၢဝ်ႇလၢတ်ႈဝႆႉဝႃႈ ၼိုင်ႈၸုပ်ႈၼႆႉ တေႁွင်ႉၵူၼ်းၵႂႃႇႁၢပ်ႇၵၢၼ်သိုၵ်း 5 ႁဵင်ၵေႃႉ ။ ႁွတ်ႈထိုင်မႃး  ၸုပ်ႈတီႈ 25 ယဝ်ႉ။ ႁူဝ်ၼပ်ႉၵူၼ်းတႅတ်ႈတေႃးႁူမ်ႈသဵင်ႈမီးၵႃႈႁိုဝ်သိုၵ်းမၢၼ်ႈဢမ်ႇပိုၼ်ၽၢဝ်ႇပဵၼ်တၢင်းၵၢၼ်သေတႃႉ ပေႃးၼပ်ႉတူၺ်းႁင်းၵူၺ်းတႄႉ ၵူၼ်းမိူင်းထုၵ်ႇတီႉ/ႁွင်ႉၵႂႃႇႁၢပ်ႇၵၢၼ်သိုၵ်း ၸွမ်းသိုၵ်းမၢၼ်ႈၼႆႉယၢမ်းလဵဝ်တင်းမူတ်း  မီးၸမ် 1သႅၼ် 3 မိုၼ်ႇၵေႃႉ ယဝ်ႉ ။

ၵူၼ်းၸိူဝ်းၵႂႃႇၸုပ်ႈႁႅၵ်ႈ ၸုပ်ႈဢွၼ်တၢင်းသုတ်းၸိူဝ်းၼၼ်ႉ ၸင်ႇႁႃလႆႈ ပွၵ်ႈႁိူၼ်းၶိုၼ်း။  ၵမ်ႈၼမ် ၵႂႃႇတၢႆပႅတ်ႈၼႃႈသိုၵ်းသေ ဢမ်ႇၸၢင်ႈပွၵ်ႈႁိူၼ်းၶိုၼ်းၵေႃႈမီး။

ႁွင်ႈၵၢၼ်ၽွင်းလူင်ၾၢႆႇႁႅင်းၵၢၼ်မိူင်းမၢၼ်ႈပိုၼ်ၽၢဝ်ႇဝႆႉၼႂ်းလိူၼ်ဢေႊပရိူဝ်ႊၼၼ်ႉဝႃႈ – ၵူၼ်းၸိူဝ်းႁၢပ်ႇၵၢၼ်သိုၵ်းယဝ်ႉၼၼ်ႉ သင်ဝႃႈၶႂ်ႈ ၵႂႃႇႁဵတ်းၵၢၼ်ၼွၵ်ႈမိူင်း တေႁႃၵၢၼ်ပၼ် –  ဝႃႈၼႆသေတႃႉ  ယူႇတီႈၸုမ်းၸွႆႈႁႃၵၢၼ်ၼွၵ်ႈမိူင်း လၢတ်ႈဝႃႈ တေမီးၽွၼ်းယွၼ်ႈၸွမ်းတၢင်းလင်ထႅင်ႈလႄႈဢမ်ႇၶႂ်ႈယုင်ႈၵဵဝ်ႇၸွမ်း ဝႃႈၼႆ။