ႁူဝ်လိူၼ်ၵျုၼ်ႊပီ 2026 ၼႆႉ ႁူင်းႁဵၼ်းလူင်ပွင်ၸိုင်ႈ တႄႇပိုတ်ႇပဵၼ်တၢင်းၵၢၼ်ပတ်းပိုၼ်ႉမိူင်းႁူမ်ႈတုမ် ၼႂ်းမိူင်းတႆး ၸႄႈဝဵင်းၸိူဝ်းဢမ်ႇမီးပၼ်ႁႃ ပၢင်တိုၵ်းသိုၵ်းသိူဝ် ၸိူဝ်းတိုၵ်ႉပဵၼ်ၼႂ်းၼႃႈတီႈ သိုၵ်းမၢၼ်ႈယိုတ်းမိူင်းၵုမ်းၵမ်ယူႇၼၼ်ႉၵေႃႈ ဢွၼ်ၵၼ်ပိုတ်ႇႁူင်းႁဵၼ်း ပဵၼ်တၢင်းၵၢၼ်ၵႂႃႇ ၸွမ်းၼင်ႇပၵ်းၵဝ်ႇပိူင်ၵဝ်ႇ မိူၼ်ၵူႈပီ ၼႆယဝ်ႉ။

မေႃသွၼ် ၽူႈၵွၼ်းႁူင်းႁဵၼ်းလူင်ပွင်ၸိုင်ႈ ၸၼ်ႉၵၢင် (အခြေခံအလယ်တန်းကျောင်းခွဲ) တီႈ ဝၢၼ်ႈၼႃးၸၢမ် ၸႄႈဝဵင်းမိူင်းသူႈ ဢၼ်မီးၼႂ်းၵႄႈၵၢင်ဝၢၼ်ႈၼမ်ႉၵတ်း လႄႈ မိူင်းသူႈ ၼၼ်ႉ မိပ်ႇငႅၼ်းႁႂ်ႈ လုၵ်ႈႁဵၼ်းၵူႈၸၼ်ႉ ၼႂ်းႁူင်းႁဵၼ်း ၶိုၼ်ႈႁူင်းႁဵၼ်း ၶၢဝ်းယၢမ်းလိူဝ်သေ ယွၼ်းငိုၼ်းၵႃႈသွၼ်လိၵ်ႈ ၼိုင်ႈၵေႃႉလႂ် ၼိုင်ႈလိူၼ် 20,000 ပျႃး ၼႆယဝ်ႉ။

ၵူၼ်းမိူင်းၵေႃႉယူႇၼႂ်းပိုၼ်ႉတီႈၼႂ်းဝဵင်းမိူင်းသူႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၵျွင်းဢူၵ်ႉ(ၽူႈၵွၼ်းႁူင်းႁဵၼ်း)ၼႆႉ ၸႂ်ႉလုၵ်ႈဢွၼ်ႇၶိုၼ်ႈႁူင်းႁဵၼ်းၶၢဝ်းယၢမ်းလိူဝ် (အချိန်ပို) ႁႄ ယဝ်ႉ ၵေႃႈ ယွၼ်းငိုၼ်းၵႃႈသွၼ်မၼ်းတီႈ လုၵ်ႈဢွၼ်ႇ ၼိုင်ႈၵေႃႉၼႆႉ 2 မိုၼ်ႇၼႆဢေႃႈ။ ၸိူဝ်းပေႃႈမႄႈလုၵ်ႈႁဵၼ်းၵမ်ႈၽွင်ႈ ဢမ်ႇမီးငိုၼ်းလႄႈ ၸင်ႇၵႂႃႇယွၼ်းတွင်းပၢၼ်ႇၵေႃႈ ဢမ်ႇၶႂ်ႈ ၽွမ်ႉလႃးလႃး။ သမ်ႉပၢႆဝႃႈ ပေႃးဢမ်ႇမႃးႁဵၼ်းလိၵ်ႈ ၶၢဝ်းယၢမ်းလိူဝ် (အချိန်ပို) တီႈႁူင်းႁဵၼ်းၵေႃႈ ၵေႃႉၼိုင်ႈ ၵူၺ်းၵေႃႈ တေဢမ်ႇလႆႈၵႂႃႇသွၼ်လိၵ်ႈတၢင်းၼွၵ်ႈ (ကျူရှင်) ၼႆၶႃႈဝႃႇ။ လုၵ်ႈဢွၼ်ႇတႃႇၵေႃႉၼိုင်ႈတႄႉ ၵွပ်ႈဝႃႈဢမ်ႇပၼ်လႆႈ ငိုၼ်းၵႃႈသွၼ်လိၵ်ႈၶၢဝ်းယၢမ်းလိူဝ်ၼၼ်ႉႁႄ ဢူႈမႄႈမၼ်း ပေႃးလႆႈၵႂႃႇဢဝ်ဢွၵ်ႇၵျွင်းဝႆႉယဝ်ႉၶႃႈဢေႃႈ” ၼႆယဝ်ႉ။

လႆႈႁူႉဝႃႈ မေႃသွၼ်လူင် ၵေႃႉမိပ်ႇငႅၼ်းႁႂ်ႈလုၵ်ႈႁဵၼ်းၵႂႃႇသွၼ်လိၵ်ႈၶၢဝ်းယၢမ်းလိူဝ် ၼႂ်းႁူင်းႁဵၼ်းၼႆႉ လုၵ်ႉတၢင်းႁူင်းႁဵၼ်း ၵေးသီးသေ တိုၵ်ႉၶၢႆႉမႃးတူၵ်းပုၼ်ႈၽွၼ်း တီႈႁူင်းႁဵၼ်း ၸၼ်ႉၵၢင် (ၵိင်ႇၽႄ) ဝဵင်းမိူင်းသူႈ ဝႃႈၼႆ။

ႁူင်းႁဵၼ်းလူင်ပွင်ၸိုင်ႈၼႆႉ မေႃသွၼ်မီးသုၼ်ႇႁွင်ႉလုၵ်ႈႁဵၼ်းသွၼ်ပၼ်လိၵ်ႈလႆႈၼႂ်းၶၢဝ်းယၢမ်းလိူဝ်(ၼွၵ်ႈၶၢဝ်းယၢမ်းႁဵၼ်း) ယူႇသေတႃႉ ဢမ်ႇမီးသုၼ်ႇဢဝ်ငိုၼ်း ၵဵပ်းငိုၼ်း ယွၼ်း ငိုၼ်းတီႈလုၵ်ႈႁဵၼ်း ၊ ပေႃႈမႄႈလုၵ်ႈႁဵၼ်းလႃးလႃး – ၼႂ်းပၵ်းပိူင်ၾၢႆႇပၢႆးပၺ်ႇၺႃႇမီးဝႆႉယူႇၼႆ မေႃသွၼ်ၼႂ်းႁူင်းႁဵၼ်းၸၼ်ႉသုင် တီႈၼိုင်ႈ ဝဵင်းမိူင်းၼၢႆး လၢတ်ႈၼႄၼင်ႇၼႆ။

မေႃသွၼ်ယိင်း ဢႃႇယု 30 ပီပၢႆ ၵေႃႉသွၼ်လိၵ်ႈၼႂ်းႁူင်းႁဵၼ်းၸၼ်ႉသုင် ယူႇၼႂ်းဝဵင်းမိူင်းၼၢႆးၵေႃႉၼိုင်ႈ လၢတ်ႈၼႄတီႈ ၽူႈတွႆႇႁွၵ်ႈဝႃႈ “ မိူဝ်ႈဝႃးၼႆႉၵူၺ်း ၽူႈမီးပုၼ်ႈၽွၼ်းၼႂ်းႁွင်ႈ ၵၢၼ်ပၢႆးပၺ်ႇၺႃႇ ၸၼ်ႉၸႄႈဝဵင်းၶဝ် ႁဵတ်းလိၵ်ႈပိုၼ်ဢွၵ်ႇဝႃႈ တေဢမ်ႇလႆႈၵဵပ်းငိုၼ်းၵႃႈသွၼ်လိၵ်ႈတီႈလုၵ်ႈႁဵၼ်းလႃးလႃးၼႆ လႆႈလူင်းလၢႆးမိုဝ်းၵၼ်ဝႆႉယဝ်ႉၶႃႈ။ ပေႃးပဵၼ်မေႃသွၼ်ၼႂ်းႁူင်းႁဵၼ်းလူင်ပွင်ၸိုင်ႈၼႆႉ တိုၼ်းတေဢမ်ႇလႆႈ ယွၼ်းငိုၼ်း ၵဵပ်းငိုၼ်း ၵႃႈသွၼ်လိၵ်ႈ တီႈလုၵ်ႈႁဵၼ်းသေဢိတ်းၵႃႈ။ ၼွၵ်ႈလိူဝ်ငိုၼ်းလိူၼ်ၸဝ်ႈၵဝ်ႇယဝ်ႉ တိုၼ်းတေဢမ်ႇလႆႈႁပ်ႉဢဝ်ငိုၼ်းတီႈၽႂ်လႃးလႃး” ၼႆဢေႃႈ။

ႁူင်းႁဵၼ်းၸၼ်ႉၵၢင် ဝဵင်းမိူင်းသူႈ ဢၼ်ပိုတ်ႇဝႆႉ တီႈဝၢၼ်ႈၼႃးၸၢမ်ၼၼ်ႉ လုၵ်ႈႁဵၼ်း တင်းသဵင်ႈမီးမွၵ်ႈ 130 ၵေႃႉ မေႃသွၼ်တင်းသဵင်ႈမီးမွၵ်ႈ 10 ၵေႃႉသေ ၸၼ်ႉႁဵၼ်းတႄႉ မီးတေႃႇထိုင် ၸၼ်ႉ 9 ဝႃႈၼႆ။

ၼၢင်းယိင်းဢႃႇယု 40 ပၢႆ ၵေႃႉယူႇဝႆႉ ၼႂ်းဝဵင်းမိူင်းသူႈ လၢတ်ႈၼႄတီႈ ၽူႈတွႆႇႁွၵ်ႈဝႃႈ “သွၼ်လိၵ်ႈၶၢဝ်း ယၢမ်းလိူဝ် (အချိန်ပို) ၼႆၼၼ်ႉ တီႈႁူင်းႁဵၼ်းၼၼ်ႉ ဢမ်ႇတွၼ်ႉယၢမ်ႈမီးမႃးသေပွၵ်ႈ။ ပေႃႈမႄႈလုၵ်ႈဢွၼ်ႇၵေႃႈ ဢွၼ်ၵၼ်လၢတ်ႈဝႃႈ ထိုင်ပၢၼ်မေႃသွၼ်လူင်ၵေႃႉမႃးမႂ်ႇၼႆႉ မႃးၵုမ်းႁူင်းႁဵၼ်း ၸင်ႇၵွႆႈတႄႇမီး။ သမ်ႉမႃးယွၼ်းငိုၼ်းပႃးလႄႈ ၵမ်ႈၽွင်ႈၵေႃႈ ဢမ်ႇပွင်ပဵၼ်လႆႈၼၼ်ႉၶႃႈၼႃႇ။ သွၼ်လိၵ်ႈပၼ်လုၵ်ႈဢွၼ်ႇၶဝ်ၶၢဝ်းယၢမ်းလိူဝ်ၼႆႉတႄႉ ဢမ်ႇပဵၼ်သင်ၼင်ႇၵဝ်ႇ” ဝႃႈၼႆ။

မၼ်းၼၢင်းလၢတ်ႈထႅင်ႈဝႃႈ – “သမ်ႉယွၼ်းငိုၼ်းၼမ်ၼၼ်ႉဢေႃႈ ပေႃးပဵၼ်ႁိူၼ်းဢၼ် မီးလုၵ်ႈဢွၼ်ႇ သွင်ၵေႃႉ သၢမ်ၵေႃႉၼၼ်ႉ ၵိၼ်းၸႂ်ၶႃႈဢေႃႈ။ လႆႈငိၼ်းဝႃႈ မိူဝ်ႈလဵဝ် မေႃသွၼ် တင်း ပေႃႈမႄႈလုၵ်ႈႁဵၼ်းၶဝ် လႆႈတူၵ်းလူင်းၵၼ်ဝႃႈ ၼိုင်ႈလိူၼ် 15,000 ပေႃးသွင်ၵေႃႉ 25,000 ၼႆဢေႃႈ။ ၵူၺ်းၽိူဝ်ႇၵႂႃႇပၼ်သမ်ႉဝႃႈ သွင်ၵေႃႉ 25,000 ဢမ်ႇလႆႈၼႆၼၼ်ႉ ၶႃႈၼႃႇ။ ယဝ်ႉၵေႃႈ မေႃသွၼ်လူင်သမ်ႉပၢႆ ၸႂ်လမ်ႁႄ တူပ်းၶူင်ႇ တူပ်းၽိူၼ်တေႃႇလုၵ်ႈဢွၼ်ႇဝႃႈ “ၽႂ်…ၵေႃႉလႂ်ဢမ်ႇမီးၼမ်ႉၸႂ် ၶႂ်ႈသွၼ်လိၵ်ႈၶၢဝ်းယၢမ်းလိူဝ်” ၼႆႁႄ ၸႂ်ႉၶဝ်လုၵ်ႉ ၸုၵ်းႁႄ ထၢမ်ဝႃႈ ယွၼ်ႉသင်ၼႆ လုၵ်ႈဢွၼ်ႇတွပ်ႇၵႂႃႇဝႃႈ ႁဝ်းဢမ်ႇမီးငိုၼ်းပၼ် ၵႃႈသွၼ်လိၵ်ႈ ၼမ်ၼႃႇၶႃႈၼႆ သမ်ႉဝႃႈ ပေႃးၼၼ် ဢမ်ႇလူဝ်ႇၵႂႃႇသွၼ်ၵျူႇသျိၼ်ႇတၢင်းၼွၵ်ႈႁႄ ၵေႃႉ” ဝႃႈၼႆ။

ႁူင်းႁဵၼ်းၸၼ်ႉဢွၼ်ႇ လႄႈ ၸၼ်ႉၵၢင် ဢၼ်ပိုတ်ႇဝႆႉ တီႈဝၢၼ်ႈၽႃယ ၊ ဝၢၼ်ႈပၢင်ႇၸွႆး ၸႄႈဝဵင်းမိူင်းသူႈၵေႃႈ မေႃသွၼ်ၸိူဝ်းတူၵ်းပုၼ်ႈၽွၼ်းတီႈႁူင်းႁဵၼ်းၶဝ် ပိုတ်ႇသွၼ်လိၵ်ႈ ၶၢဝ်းယၢမ်းလိူဝ်သေ ယွၼ်းငိုၼ်းၵႃႈသွၼ်လိၵ်ႈ တီႈလုၵ်ႈဢွၼ်ႇႁဵၼ်း ၼိုင်ႈၵေႃႉ ၼိုင်ႈလိူၼ်လႂ် 10,000 ထိုင် 15,000 ပျႃးယူႇ မိူၼ်ၵၼ် ၼႆယဝ်ႉ။

ယၢမ်းလဵဝ် ၵၢၼ်ၵႃႉၶၢႆ လွင်ႈႁႃၵိၼ်လဵင်ႉတွင်ႉ ၵူၼ်းမိူင်းသူႈ ၸိူဝ်းႁႃၸဝ်ႉၵိၼ်ၶမ်ႈၼႆႉ ယၢပ်ႇၽိုတ်ႇၵိၼ်းၸႂ် ဝႆႉတေႉတေႉသေ လႆႈငိုၼ်းၶဝ်ႈဢေႇႁႅင်းလိူဝ် ငိုၼ်းဢွၵ်ႇၵူႈလိူၼ်ၼၼ်ႉ။ ၼိုင်ႈလိူၼ်ၼႆႉ လႆႈသႂ်ႇငိုၼ်းၵႃႈၸၢင်ႈၵူၼ်းၵႂႃႇႁၢပ်ႇၵၢၼ်သိုၵ်းမၢၼ်ႈ ၼိုင်ႈလိူၼ် 17,000 ပျႃး၊ ၸၢင်ႈၵူၼ်း ၵႂႃႇပႂ်ႉဝၼ်း တႃႇၵူတ်ႇထတ်း ပႂ်ႉတူၺ်းသဵၼ်ႈတၢင်း လႄႈ ရူတ်ႉၵႃးပၼ်သိုၵ်းတႆးသမ်ႉ ၼိုင်ႈဝၼ်း 25,000 ပျႃး။