ပျီႇတူႉၸိတ်ႉပဢူဝ်းPNO လွၵ်ႇငိုတ်ႈ တဵၵ်းၸႂ်ႉႁႂ်ႈၵူၼ်းပၢႆႈၽေးသိုၵ်း ဝၢၼ်ႈၼမ်ႉတူၵ်း ၼႂ်းၸႄႈဝဵင်းပၢင်လွင်း လႅၼ်လိၼ်တႆး-ယၢင်းလႅင် ပွၵ်ႈယူႇၶိုၼ်းႁိူၼ်းယေးယဝ်ႉ ၵဵပ်းငိုၼ်း ဢၢၼ်ႇႁူဝ်သႅၼ်ပျႃး ။
တႄႇႁူဝ်လိူၼ် မတ်ႉၶျ်ၼႆႉမႃး ၵူၼ်းပၢႆႈၽေးသိုၵ်း ၸိူဝ်းယူႇဝႆႉ ဝဵင်းပၢင်လွင်း လႄႈၼႂ်းၼွင်ႁၢႆးယႃႈၸိူဝ်းၼၼ်ႉ ယူႇတီႈပျီႇတူႉၸိတ်ႉPNO တဵၵ်းၸႂ်ႉပွၵ်ႈယူႇႁိူၼ်းၽႂ်မၼ်းသေ လွၵ်ႇငိုတ်ႈလၢတ်ႈဝႃႈ သင်ဢမ်ႇပွၵ်ႈမိူဝ်ႈၼႆၸိုင် တေယိုတ်းဢဝ်ႁိူၼ်းယေးၼႆယဝ်ႉ ။
တွၼ်ႈတႃႇၵႅမ်ႉထႅမ်ၸုမ်းပျီႇတူႉၸိတ်ႉပဢူဝ်းၼႆႉသေ ၵူၼ်းပၢႆႈၽေးသိုၵ်းၸိူဝ်းပွၵ်ႈယူႇႁိူၼ်း ယူႇတီႈပျီႇတူႉၸိတ်ႉပဢူဝ်း ၵဵပ်းငိုၼ်း 5 သႅၼ်ပျႃးၼႆလႄႈ ႁဵတ်းႁႂ်ႈၵူၼ်းပၢႆႈၽေးသိုၵ်းပွၵ်ႈယူႇႁိူၼ်းယေးယူႇယၢပ်ႇၵိၼ်းၸႂ်ၼႆယဝ်ႉ ။
ၵူၼ်းပိုၼ်ႉတီႈၼႂ်းၼွင်ႁၢႆးယႃႈလၢတ်ႈၽူႈတွႆႇႁွၵ်ႈဝႃႈ -“ ဢမ်ႇၸႂ်ႈဝၢၼ်ႈၼမ်ႉတူၵ်းဝၢၼ်ႈလဵဝ် ၊ ပေႃးပဵၼ်ပိုၼ်ႉတီႈၶဝ်( PNO ) ၵူႈဝၢၼ်ႈယဝ်ႉ ၊ တလဵဝ်ၼႆႉ ပေႃးပၢႆႈၽေးသိုၵ်းဝႆႉၼႆႉ ၶႂ်ႈမိူဝ်းယူႇၶိုၼ်းႁိူၼ်းၸဝ်ႈၵဝ်ႇၵေႃႈ ပေႃးဢမ်ႇမီးငိုၼ်း ပွၵ်ႈမိူဝ်းဢမ်ႇလႆႈၶႃႈ ၊ ပေႃးမိူဝ်း PNO ၶဝ်ၵဵပ်းငိုၼ်းၼမ်ၼႃႇလႄႈ ၵူၼ်းပွၵ်ႈမိူဝ်းၵေႃႈမီးၵမ်ႈဢႄႇၵူၺ်း”- ဝႃႈၼႆ ။
ဝၢၼ်ႈဢၼ်ပျီႇတူႉၸိတ်ႉပဢူဝ်းၵဵပ်းၶွၼ်ႇ ၵဵပ်းငိုၼ်း ၵူၼ်းပၢႆႈၽေးသိုၵ်း ၸိူဝ်းပွၵ်ႈယူႇႁိူၼ်း ၼၼ်ႉပဵၼ်တၢင်းဝၢၼ်ႈသွင်းပျွင်း ၊ လူင်ပႅၼ်ႈ ၊ ၵေႃမႆႉသၢင်း၊ ၼမ်ႉၼဵင်ႈ ၊ ၼမ်ႉတူၵ်း ၸိူဝ်းၼႆႉ- ၵူၼ်းပိုၼ်ႉတီႈလၢတ်ႈ ။
ၵဵဝ်ၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈႁဝ်းၶႃႈ ၶတ်းၸႂ်ၵပ်းသိုပ်ႇၸူး ၽူႈၶၢၼ်ပၢၵ်ႇ ပျီႇတူႉ ၸိတ်ႉ (PNO) ယူႇသေတႃႉ ၵပ်းသိုပ်ႇဢမ်ႇပႆႇလႆႈ။
လိူဝ်သေ ပျီႇတူႉၸိတ်ႉပဢူဝ်း ၵဵပ်းၶွၼ်ႇတီႈၵူၼ်းပၢႆႈၽေးသိုၵ်း ပွၵ်ႈမိူဝ်းယူႇႁိူၼ်းၼၼ်ႉယဝ်ႉ ၼႄၶေႃႈဢၢင်ႈလၢႆလွင်ႈၵဵပ်းၶွၼ်ႇတီႈၵူၼ်းပိုၼ်ႉတီႈသေဢမ်ႇၵႃး ၸႂ်ႉၵူၼ်းပိုၼ်ႉတီႈပၼ်ႇပုတ်ႈၵၼ် သူင်ႇႁေႃႇၶဝ်ႈႁေႃႇၽၵ်းမႃးၼႆႉ မီးမႃး ၸမ် 5 လိူၼ်ယဝ်ႉ – ၵူၼ်းၸၢႆးပိုၼ်ႉတီႈလၢတ်ႈ ။
ၵူၼ်းၸၢႆးဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ ပဵၼ်ၶွၼ်ႇၵႃး ၊ ၶွၼ်ႇႁၢပ်ႇၵၢၼ်သိုၵ်း ၊ ၵႃႈမၢၵ်ႇၵွင်ႈ ၊ ၵႃႈတၢင်းၵိၼ်တၢင်းယႅမ်ႉ ၸိူဝ်းၼႆႉ မဵဝ်ႈၼိုင်ႈယဝ်ႉမဵဝ်း ၼမ်ၼႃႇ ၊ ဢမ်ႇမီးၵေႃႈ လႆႈၵူႈယိုမ်သေပၼ်ဢေႃႈ ဢမ်ႇပၼ်ဢမ်ႇလႆႈၶႃႈ ၊ ၶွၼ်ႇၼိုင်ႈလိူၼ်ၼိုင်ႈလိူၼ်ၼႆႉ ဢၢၼ်ႁူဝ် သႅၼ်မၼ်း ၊ ၵူၼ်းမိူင်းႁဝ်းၶႃႈယူႇယၢပ်ႇၵိၼ်းၸႂ်ၵူႈမဵဝ်းဢေႃႈ”- ဝႃႈၼႆ ။
မိူဝ်ႈၽွင်းႁၢင်ပီ 2024 ၼၼ်ႉ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ႁူမ်ႈၵၼ်သေ ယၢမ်ႈ ယိုဝ်းၵၼ်တင်း တပ်ႉသိုၵ်းၽွမ်ႉႁူမ်ႈယၢင်းလႅင် ႁိမ်းႁွမ်းဝၢၼ်ႈၼွၵ်ႇဝူဝ်း၊ လွႆၵဵင်ႈ၊ ဝၢၼ်ႈၼမ်ႉ ၽႃမူ၊ ၾၢႆၶုၼ်၊ ဝၢၼ်ႈသွင်းပျွင်း ၸိူဝ်းမီးဝႆႉ ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း သေ ၵူၼ်း မိူင်း မွၵ်ႈ 2000 ၵေႃႉပၢႆ လႆႈငိူင်ႉပၢႆႈၽေးသိုၵ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ