တီႈမိူင်သူႈ လႄႈ ဝဵင်းၵေးသီး ၸိုင်ႈတႆးပွတ်းၸၢၼ်း ဢၼ်ၸတ်းပၢင်ပၼ်သဵင်ၵင်ၸႂ်တႃႇလိူၵ်ႈတင်ႈဝၼ်းမိူဝ်ႈၼႆႉ 25/01/2026 ၼၼ်ႉၵေႃႈ ၵူၼ်းဝၢၼ်ႈၼ်ၵႂႃႇပၼ်သဵင်ၵၢင်ၸႂ် မီးဢေႇၼႇလႄႈ ၵၢင်ႉၵႄႇပေႃးလႆႈလူင်းၼႂ်းပွၵ်ႉၼႂ်းယွမ်ႇ သေႃႇၸွမ်းၵိဝ်ႇၸွမ်းငွၼ်ႈ လၢတ်ႈႁႂ်ႈၵူၼ်းဝၢၼ်ႈ ၵႂႃႇပၼ်သဵင်ၵၢင်ၸႂ်ပင်လိူၵ်ႈတင်ႈ ဝႆးဝႆး ဝႃႈၼႆ။
ၼႂ်ၼႆႉ ၸွမ်းႁူင်းပၼ်သဵင်ၵၢင်ၸႂ်ၸိူဝ်းမီး ၼႂ်းဝဵင်းမိူင်းသူႈ ၊ ၵေးသီးၸိူဝ်းၼႆႉ မီးပလိၵ်ႈမၢၼ်ႈၵႂႃႇပႂ်ႉဢဝ်ႁူမ်ႇလူမ်ႈ ၼိုင်ႈတီႈမီး 10 ၵေႃႉ မၢင်တီမီးထိုင် 20 ၵေႃႉ ။ ၵူၼ်းဝၢၼ်ႈၵႂႃႇပၼ်သဵင်ၵၢင်ၸႂ်ဢေႇၼႃႇ ဝႃႈၼႆ။
တီႈဝဵင်းၵေးသီးၵေႃႈ ႁူင်းပၼ်သဵင်ၵၢင်ၸႂ်မၢင်တီႈ ၽူႈမီးပုၼ်ႈၽွၼ်းၸိူဝ်းပႂ်ႉႁူင်းပၼ်သဵင်ၵၢင်ၸႂ် ႁိုတ်းႁၢတ်ႇထဵတ်းသႂ်ႇၵူၼ်းဝၢၼ်ႈ။ ၵွပ်ႈၼႆလႄႈၵူၼ်းဝၢၼ်ႈဢမ်ႇၵႂႃႇပၼ်သဵင်ၵၢင်ၸႂ်ၼမ် ဝႃႈၼႆ။
ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – တီႈၵေးသီးၼႆႉ ၵူၼ်းၸိူဝ်းဢႃယုယႂ်ႇၶဝ်ၵႂႃႇတွတ်ႈၶႅပ်းၵၢင်ၸႂ် ဢမ်ႇပေႃးႁူႉတီႈပွင်ႇမၼ်းလီလီ။ ၺႃးၵူၼ်းပႂ်ႉႁူင်းတွတ်ႈသဵင်ၸိူဝ်းၼၼ်ႉ သဵင်လင်တေႃႇၸိူင်ႉၼႆၵေႃႈမီးၼႆၶႃႈ။ ၵူၼ်းထဝ်ႈမၢင်ၵေႃႉ ၶဝ်ဢမ်ႇႁူႉလၢႆးမၼ်းလီလီၼၼ်ႉၼႃႇၼေႃႈ။ ပေႃးထၢမ်ဢိတ်းဢွတ်းသမ်ႉ ၵူၼ်းဢၼ်ပႂ်ႉမၼ်းသမ်ႉ ၸႂ်ဢမ်ႇပေႃးယၢဝ်းသႂ်ႇ ။ ၵမ်ႈၼမ်ၵေႃႈတေပဵၼ် သြႃႇ ၊ သြႃႇမ တီႈႁူင်းႁဵၼ်းၸိူဝ်းၼႆႉၼင်ႇၵဝ်ႇ ” – ဝႃႈၼႆ။
ၵွပ်ႈၼႆလႄႈ တီႈဝဵင်းၵေးသီး ၵူၼ်းၵႂႃႇပၼ်သဵင်ၵၢင်ၸႂ်ဢေႇၼႃႇၼႆသေ ဝၢႆးဝၼ်းၼႆႉ ၵၢင်ႉၵႄႇ ၸွမ်းႁွင်ႉပၢဝ်ႇ ၼႂ်းပွၵ်ႉၼႂ်းယွမ်ႇထႅင်ႈဝႃႈ – “ ၵွၼ်ႇပႆႇထိုင် 4 မူင်းၼႆႉ ႁႂ်ႈၵူၼ်းၼႂ်းပွၵ်ႉၼႂ်းယွမ်ႇ ၵႂႃႇပၼ်သဵင်ၵၢင်ၸႂ် ႁႂ်ႈယဝ်ႉတူဝ်ႈ ” – ဝႃႈၼႆ။
မိူင်းသူႈၼႆႉ မီးႁူင်းတွတ်ႈသဵင် 32 ႁူင်း ၊ ၵေးသီး မီး 60 ႁူင်း ။ တင်းသွင်ဝဵင်းၼႆႉ ပိူင်လူင် မီးသွင်ပႃႇတီႇ ပႃႇတီႇသိူဝ်ၽိူၵ်ႇလႄႈ ပႃႇတီႇသၢင်ႇသီႈ ဢၼ်ၶဝ်ႈၶႄႉၼႂ်းပၢင်လိူၵ်ႈတင်ႈ ။ ၸိူဝ်းပဵၼ်ၵူၼ်းပိုၼ်ႉတီႈတႄႉ ဢၢၼ်းတွတ်ႈပၼ်သိူဝ်ၽိူၵ်ႇ ယူႇသေတႃႉ သိုၵ်းမၢၼ်ႈၵႆႉဢဝ်ၶႅပ်းၵၢင်ၸႂ်လူင်ႈၼႃႈ မႃးပေႉပုၼ်ႈၵူႈတီႈတီႈလႄႈ ၸွင်ႇသိူဝ်ၽိူၵ်ႇတေပေႉ ပႆႇၸၢင်ႈလၢမ်းလႆႈၼႆႉ ၵူၼ်းပိုၼ်ႉတီႈဢွၼ်ၵၼ်လၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ