ၼၢင်းယိင်းဢွၼ်ႇ ၵူၼ်းမိူင်းသူႈ ပိုၼ်ၽၢဝ်ႇႁႃၵၢၼ် ၼိူဝ်ဢွၼ်ႊလၢႆႊ ၺႃးၵူၼ်းႁဵတ်းၵၢၼ်ၵျႃႊၽျႅၼ်ႉလၢတ်ႈဝႃႈ မီးၵၢၼ်လီ တီႈဝဵင်းတၢင်ႉယၢၼ်းၼႆသေ လွၵ်ႇလႅၼ်တီႉၺွပ်းတၢင်ႇ ၵႃးၵႂႃႇ ယွၼ်းၵႃႈထုတ်ႇတူဝ်တီႈၵူၼ်းတၢင်းႁိူၼ်းမၼ်းၼၢင်းၶိုၼ်း ။

ၼၢင်းယိင်းဢွၼ်ႇၵေႃႉၼႆႉ ဢႃယုတိုၵ်ႉလႆႈ 18 ပီ ယူႇဝၢၼ်ႈမႁေႇ ဢိူင်ႇမိူင်းဢွတ်ႇ ၸႄႈဝဵင်းမိူင်း သူႈ ။ ဝၢႆးလင်မၼ်းၼၢင်းတၢင်ႇလူင်းတီႈ ထိၵ်ႊထွၵ်ႉ ဝႃႈ ၶႂ်ႈလႆႈၵၢၼ်ၼႆယဝ်ႉဢမ်ႇႁိုင် မိူဝ်ႈဝၼ်းတီႈ 15/12/2025 ၸုမ်းၵူၼ်းၸၢႆးၼုမ်ႇ 6 ၵေႃႉ ဢဝ်ၵႃးမႃးႁပ်ႉမၼ်းၼၢင်းၵႂႃႇ တၢင်းၸႄႈဝဵင်းတၢင်ႉယၢၼ်း။ ဝၢႆးၼၼ်ႉ သိုပ်ႇၾူၼ်းယွၼ်းငိုၼ်းၵႃႈထုတ်ႇတူဝ်မၼ်းၼၢင်းၸူးၵူၼ်းတၢင်းႁိူၼ်းၶိုၼ်း 500 သႅၼ်ပျႃး ဝႃႈၼႆ။

ၽူႈမီးပုၼ်ႈၽွၼ်း ၼႂ်းဢိူင်ႇမိူင်းဢွတ်ႇ ၵေႃႉတူင်ႉၼိုင်ၵၢၼ်ၸွႆႈဢဝ် ဢွၼ်ႇယိင်းၵေႃႉၼၼ်ႉဢွၵ်ႇမႃး လၢတ်ႈတီႈ ၽူႈတွႆႇ ႁွၵ်ႈဝႃႈ – “မိူဝ်ႈတႄႇမၼ်းၼႆႉ ၵျႃႊၽျႅၼ်ႉၶဝ် ဢၼ်ပဵၼ် ၶႄႇၼၼ်ႉ ၶဝ်ႈၵႂႃႇၼႂ်းၾဵတ်ႉ၊ ၼႂ်းလၢႆးၶဝ်ႁႄ..ဝႃႈ ႁၼ်ၶဝ်တၢင်ႇတိၵ်းတွၵ်ႇဝႆႉဝႃႈ တူၵ်းၵၢၼ်တူၵ်းငၢၼ်းဢမ်ႇမီးၵၢၼ်ႁဵတ်းၼႆၼၼ်ႉၼႃႇ။ ယဝ်ႉၵေႃႈ တူင်ႉတၵ်ႉၶဝ်ႈၵႂႃႇ မိူၼ်ပဵၼ် မၢဝ်ႇပဵၼ်သၢဝ်ၵၼ်ႁႄ လၢတ်ႈတေႃႇဝႃႈ တၢင်ႉယၢၼ်းၼႆႉ မီးၵၢၼ် ႁဵတ်းဢိူဝ်ႈ။ ပေႃးၵျိူၵ်ႈၵေႃႈမႃးႁဵတ်း ပေႃးဢမ်ႇၵျိူၵ်ႈၵေႃႈ မိူဝ်းၶိုၼ်းလႆႈယူႇၼႆႁင်းမၼ်း။ မၼ်းၵေႃႈ လုၵ်ႉ တၢင်းမိူင်းလႃး ၶီႇလႅင်းၵႃးမႃးထိုင်တၢင်ႉယၢၼ်း မွၵ်ႈ 6 မူင်းၶိုင်ႈၼႆႉ။ မီးၸုမ်းၵူၼ်းၼိုင်ႈ ဢဝ်ၵႃးမႃးပႂ်ႉ ဝႆႉမွၵ်ႈ 2 လမ်း။ ၼွင်ႉဢွၼ်ႇၼႆႉ ၶဝ်ႈၵႂႃႇၼႂ်းၵႃးၶဝ်ယဝ်ႉၵေႃႈ ၵူၼ်းၵေႃႉဢၼ်ယူႇဝႆႉၼႂ်းၵႃးၼၼ်ႉ ဢဝ်ၽႅၼ်ႇပိၵ်ႉတႃမၼ်းၵမ်းလဵဝ်ႁႄ သႂ်ႇသေႃးမိုဝ်းပၼ်မၼ်းဝႆႉၵမ်းလဵဝ်။ ႁွင်ႉဢဝ်မၼ်းၵႂႃႇၶင်ဝႆႉ မွၵ်ႈ သွင်သၢမ်ဝၼ်းယဝ်ႉ ႁႂ်ႈမၼ်းသိုပ်ႇၾူၼ်းယွၼ်းၵႃႈထုတ်ႇတူဝ်မၼ်းတီႈႁိူၼ်း” ဝႃႈၼႆ။

ၼၢင်းယိင်းဢွၼ်ႇၼၼ်ႉ ၺႃးႁွင်ႉၵႂႃႇၶင်တူဝ်ဝႆႉၼႂ်းႁိူၼ်းလင်ၼိုင် တီႈၸႄႈဝဵင်းတၢင်းယၢၼ်း။ ႁိုင်မွၵ်ႈ 2-3 ဝၼ်းယဝ်ႉ ၾၢႆႇၸဝ်ႈၼႃႈတီႈ ၽူႈမီးပုၼ်ႈၽွၼ်းၶဝ် ၸင်ႇၵႂႃႇ ႁွင်ႉဢွၵ်ႇမႃးလႆႈ။ ယၢမ်းလဵဝ် ႁွတ်ႈထိုင်ၼႂ်းမိုဝ်းပေႃႈမႄႈမၼ်းၼၢင်းဝႆႉ လွတ်ႈၽေးလီငၢမ်းသေတႃႉ ယိင်းဢွၼ်ႇၼၼ်ႉ တုမ်ႉတိူဝ်ႉပၢႆးၸႂ်ၵႂႃႇလႄႈ ထိုင်တီႈဢမ်ႇႁတ်းဢွၵ်ႇႁွင်ႈ ဢမ်ႇႁတ်းႁူပ်ႉၵၼ်တင်းၽႂ်သေၵေႃႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ သဵင်မႄႈမၼ်းၼၢင်း လႄႈ ၵေႃႉသိုပ်ႇၾူၼ်းယွၼ်းငိုၼ်းၵႃႈထုတ်ႇတူဝ် မၼ်းၼၢင်း ၽႄႈဢွၵ်ႇမႃးၼိူဝ်သိုဝ်ႇတူင်ႇဝူင်းၵူၼ်း။ ၼႂ်းၶလိပ်ႉသဵင်ၼၼ်ႉ မႄႈ ယိင်းဢွၼ်ႇ တင်းႁႆႈတင်းယွၼ်းႁႂ်ႈလူတ်း ပၼ်ၵႃႈၶၼ် ဢၼ်ၶဝ်ယွၼ်းမႃး။

ၾၢႆႇၵူၼ်းလွၵ်ႇလႅၼ်ၼၼ်ႉတႄႉ လၢတ်ႈဝႃႈ – “ဢမ်ႇၸၢင်ႈႁဵတ်းႁိုဝ်ယဝ်ႉၶႃႈပႃႈ။ ၶႃႈလၢတ်ႈၼႄပႃႈႁဝ်းၶႃႈၼေႃ .. တၢင်းပုၼ်ႉၸႂ်ႉႁဝ်းယွၼ်း 500 သႅၼ်။ ၶႃႈၶိုၼ်းလၢတ်ႈတီႈၼွင်ႉဝႃႈ ယွၼ်း 400 ၼႆလႄႈ ၼွင်ႉၸင်ႇလၢတ်ႈပႃႈႁဝ်းဝႃႈ 400 ။ ပေႃးယဝ်ႉပႃႈႁဝ်းဝႃႈ ပႃႈႁဝ်းဢမ်ႇမီး..ၶႃႈၶိုၼ်းဝႃႈ 320 ဢၼ်ၼႆႉပႃႈႁဝ်းသမ်ႉႁႂ်ႈၶႃႈယွမ်းထႅင်ႈၼႆ…” ၼႆယဝ်ႉ။

မိူဝ်ႈဝၼ်းတီႈ 19 ယၢမ်းၵၢင်ၶိုၼ်း 11 ထိုင် 12 မူင်း လိူၼ်တီႊသႅမ်ႊပိူဝ်ႊ ၾၢႆႇၸဝ်ႈၼႃႈတီႈ ၽူႈမီးပုၼ်ႈၽွၼ်းၶဝ် ၸင်ႇၵႂႃႇ တီႉၺွပ်းဢဝ်လႆႈ ၵူၼ်းၼုမ်ႇၸိူဝ်းလွၵ်ႇႁွင်ႉဢဝ် ယိင်းဢွၼ်ႇၼၼ်ႉၵႂႃႇ တီႈႁိူၼ်းလင်ၼိုင်ႈ ဢၼ်မီးတၢင်း ပႃႇႁဵဝ်ႈၶႄႇ ပူၼ်ႉၸဝ်ႈမိူင်းပႃႇႁဵဝ်ႈၶႄႇ ပဵၼ်ၾၢႆႇသၢႆႉတၢင်းလူင် ၼႂ်းပွၵ်ႉ 6 ၸႄႈဝဵင်းတၢင်ႉယၢၼ်း ၼႆယဝ်ႉ။

လႆႈႁူႉဝႃႈ ဢွင်ႈတီႈၵႂႃႇတီႉၺွပ်းလႆႈ ၵူၼ်းၸၢႆးၸိူဝ်းႁွင်ႉဢဝ်တူဝ်ယိင်းဢွၼ်ႇၵႂႃႇၶင်သေ ယွၼ်းၵႃႈထုတ်ႇတူဝ် မၼ်းၼၢင်းၼႆႉ ပဵၼ်ၼႂ်းၼႃႈတီႈသိုၵ်းမၢၼ်ႈယိုတ်းမိူင်းၵုမ်းၵမ် ဝႃႈၼႆ။

ၽူႈတူင်ႉၼိုင်ၸွႆႈထႅမ် ၵၢၼ်တူင်ႇဝူင်းၵူၼ်းၵေႃႉၼိုင်ႈ လၢတ်ႈပၼ်ၾၢင်ႉတီႈၼုမ်ႇယိင်းၼုမ်ႇၸၢႆး ၼႂ်းမိူင်းတႆး တင်းသဵင်ႈဝႃႈ – “ဢွၼ်ႇယိင်းၸိူဝ်းဢႃႇယုလဵၵ်ႉသေ တိုၵ်ႉၶႂ်ႈႁူႉ ၶႂ်ႈႁၼ် ၶႂ်ႈလႆႈ ၶႂ်ႈမီးၸိူဝ်းၼၼ်ႉ ၶႂ်ႈႁႂ်ႈၾၢင်ႉ ၵၼ် တင်းသဵင်ႈ။ ၵၢပ်ႈမိူဝ်ႈလဵဝ်ၼႆႉ ငိုၼ်းၵေႃႈႁႃယၢပ်ႇ။ ၵူၼ်းဢမ်ႇလီ ၶႂ်ႈႁႃငိုၼ်းငၢႆႈႁႄ ၵူၼ်းၸိူဝ်းၸႂ်ႉလွၵ်း လၢႆးၸိူင်ႉၼႆၼႆႉ ၼမ် ၼႃႇ။ မိူဝ်ႈဢွၼ်တၢင်းတႄႉ ႁဝ်းယၢမ်ႈငိၼ်းၶၢဝ်ႇၼိူဝ်ဢွၼ်ႊလၢႆႊၵူၺ်း။ ၵမ်းၼႆႉ ၵူၼ်းၼႂ်းပွၵ်ႉ ၼႂ်းဢိူင်ႇႁဝ်း ထူပ်းၺႃးလွင်ႈတေႉၸိူင်ႉၼႆ ႁဝ်းၵေႃႈတူၵ်းၸႂ်တေႉတေႉဝႃႈဝႃႈဢေႃႈ။ လွင်ႈၸိူင်ႉၼႆ လီမႆႈၸႂ်တေႉတေႉဢေႃႈ” ဝႃႈၼႆ။

လင်သိုၵ်းမၢၼ်ႈယိုတ်းမိူင်းသေ ၼႂ်းမိူင်းတႆးပွတ်းႁွင်ႇ ၵိူတ်ႇပဵၼ်ပၢင်တိုၵ်းသိုၵ်းသိူဝ်၊ ပၢႆးမၢၵ်ႈမီးၸိုင်ႈမိူင်း တူၵ်း၊ လုၵ်ႈဢွၼ်ႇႁၢမ်းသုၼ်ႇလႆႈႁဵၼ်းသွၼ် ၼပ်ႉႁူဝ်မိုၼ်ႇၵေႃႉ၊ ၵူၼ်း မိူင်းႁၢမ်းၵၢၼ် ယၢပ်ႇၽိုတ်ႇတႃႇ ႁႃၵိၼ်လဵင်ႉတွင်ႉ လဵင်ႉၼႃႈႁိူၼ်းႁင်းၽႂ်မၼ်း။ ၵူၼ်းၼုမ်ႇ လႆႈဢွၵ်ႇဝၢၼ်ႈယၢၼ်မိူင်း ႁႃၵၢၼ်ႁဵတ်းတႃႇ ၵႄႈလိတ်ႈပၼ်ႁႃၼႃႈႁိူၼ်း။

ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ဢၼ်မီးယိူင်းဢၢၼ်းဝႃႈ တေၽဵဝ်ႈမူၺ်ႉၸုမ်းၵျႃႊၽျႅၼ်ႉ ၸိူဝ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၼႆၼၼ်ႉၵေႃႈ ႁိုင်ၼၢၼ်းမႃး ၶၢဝ်းတၢင်း 2 ပီပၢႆၵေႃႈ ယင်းပႆႇ ႁဵတ်းလႆႈၼင်ႇယိူင်းမၢႆသေဢမ်ႇၵႃး ၸုမ်းၵျႃႊၽျႅၼ်ႉ ယိုင်ႈၶႅၼ်းၽႄႈၸွတ်ႇလၢမ်း ၼႂ်းမိူင်းႁူမ်ႈတုမ်ပတ်းပိုၼ်ႉထႅင်ႈလူးၵွၼ်ႇ။

ၽူႈလူင်ႉလႅၼ်ႇၾၢႆႇလဵပ်ႈႁဵၼ်းၵၢၼ်ၽဵဝ်ႈမူၺ်ႉၵျႃႊၽျႅၼ်ႉ Jason Tower ယၢမ်ႈထတ်းသၢင်လၢတ်ႈၼႄဝႆႉ ဝႃႈ – ၵၢၼ်ၽဵဝ်ႈမူၺ်ႉၵျႃႊၽျႅၼ်ႉၼႆႉ မူႇလဵဝ်ၸုမ်းၼိုင်ႈႁဵတ်းႁင်းၵူၺ်း ဢမ်ႇဢွင်ႇမၢၼ်လႆႈ။ ၸုမ်းယိပ်းၵွင်ႈ ၵၢင်ႇတင်းသဵင်ႈ တေလႆႈႁူမ်ႈမိုဝ်းၵၼ်သေ သၢင်ႈမူႇပိူင် ႁဵတ်းပေႃႇလသီႇ တႃႇၽဵဝ်ႈမူၺ်ႉ ႁႂ်ႈတႅတ်ႈၼႅတ်ႈသေ လူင်းမိုဝ်းႁဵတ်းသၢင်ႈ ဢဝ်လိူင်ႈ ၵူၼ်းၸိူဝ်းၵဵဝ်ႇၵွင်ႉမၼ်းၵႂႃႇတေႉတေႉဝႃႈဝႃႈ ၸင်ႇတေပဵၼ်ၵၢၼ် – ၼႆယဝ်ႉ။