ႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ(ထူၺ်ႇဢူၵ်ႉ)ဝၼ်းၼမ်ႉၸၢင်ၸိုင်ႈတႆးပွတ်းၸၢၼ်း သင်ႇ ၵူၼ်းမိူင်းႁွင်ႉပၢင်ၵုမ် ၸႂ်ႉလိူၵ်ႈၵၢင်ႉၵႄႇၵွၼ်းဢိူင်ႇပွၵ်ႉယွမ်ႇၵေႃႉမႂ်ႇ ၵေႃႈဢမ်ႇမီးၽႂ်ၶႂ်ႈ ႁၢပ်ႇ ႁၢမ်ဝႃႈၼႆ။

 ဝၼ်းတီႈ 17/6/ 2026 ယၢမ်းၵၢင်ၼႂ် 9 မူင်း ႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ ႁွင်ႉ ပၢင်ၵုမ်  ၵူၼ်းမိူင်းၼႂ်းပွၵ်ႉ 4 ဝဵင်းၼမ်ႉၸၢင်  သေႁႂ်ႈၵူၼ်းဝၢၼ်ႈၵူၼ်းမိူင်းလိူၵ်ႈတင်ႈ ၽူႈၵွၼ်းပွၵ်ႉ ၽူႈၵွၼ်းဢိူင်ႇမႂ်ႇ ။

  ဢမ်ႇမႃးဢမ်ႇလႆႈၼႆလႄႈ ၵူၼ်းမိူင်းမႃးၶဝ်ႈႁူမ်ႈပၢင်ၵုမ် 500 ၵေႃႉ။ ၼႂ်းဝၼ်းၼၼ်ႉ ၶၢၼ်းလိူၵ်ႈ    ၸုမ်းၾၢႆႇၵုမ်းၵၢၼ်(ကြီးကြပ်ရေးအဖွဲ့ ) 5 ၵေႃႉ – တွၼ်ႈတႃႇတေ ၸတ်းႁဵတ်းပၢင်လိူၵ်ႈတင်ႈ ၽူႈၵွၼ်းပွၵ်ႉ/ ၽူႈၵွၼ်းဢိူင်ႇမႂ်ႇၵႂႃႇၼႆယဝ်ႉ ။

ၼၢင်းယိင်းၵူၼ်းမိူင်းဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ -“တလဵဝ် ၵၢင်ႉၵႄႇတႄႉ ပႆႇလိူၵ်ႈ ၊ လိူၵ်ႈ ၸုမ်းၵုမ်းၵၢၼ် 5 ၵေႃႉဢွၼ်တၢင်း ၊  ပွၵ်ႉႁဝ်းၶႃႈတႄႉ လႅပ်ႈတေလိူၵ်ႈၶိုၼ်းၵၢင်ႉၵႄႇ ၵေႃႉၵဝ်ႇၵူၺ်း ၊ ၽႂ်ၵေႃႈဢမ်ႇၶႂ်ႈႁဵတ်းၶႃႈလႄႇ ၊  ဢၼ်ပိူၼ်ႈဢမ်ႇၶႂ်ႈႁဵတ်းၵၢင်ႉၵႄႇၼႆႉ ပိူၼ်ႈၶၢၼ်ႉႁႃပၼ်ၵူၼ်းတႃႇၵႂႃႇႁၢပ်ႇၵၢၼ်သိုၵ်း – ပေႃးၶဝ်ၶၢၼ်းမႃးၼၼ်ႉၶႃႈၼေႈ ”- ဝႃႈၼႆ ။

 ဝဵင်းၼမ်ႉၸၢင်ၼႆႉ မီး 5 ပွၵ်ႉ။ တႄႇၸဵမ်ဢဝ် ဝၼ်းတီႈ 14 လိူၼ်ၵျႃၼ်ႊ ၼၼ်ႉမႃး ႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ  ၶၢၼ်းႁွင်ႉပၢင်ၵုမ် ၵူၼ်းမိူင်းပွၵ်ႉလႂ်ပွၵ်ႉၼၼ်ႉ ၼိုင်ႈဝၼ်းၼိုင်ႈပွၵ်ႉ လိူၵ်ႈၵူၼ်း 5 ၵေႃႉ တႃႇတေၵုမ်းတူၺ်း ၸတ်းႁဵတ်းပၢင်လိူၵ်ႈတင်ႈ ၵၢင်ႉၵႄႇမႂ်ႇၵႂႃႇ ။ ၼိုင်ႈပွၵ်ႉ မီးၵူၼ်းၶဝ်ႈႁူမ်ႈ ၼႂ်းၵႄႈ 200-500 ၵေႃႉ ၼႆယဝ်ႉ ။

ဝၢႆးသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ၵၢင်ႉၵႄႇၼႂ်းပွၵ်ႉၼႂ်းဢိူင်ႇ လႆႈႁဵတ်းၸွမ်းပိူင်သိုၵ်းမၢၼ်ႈၽွင်းငမ်းဝဵင်း ၊ တီႈဝဵင်းၼမ်ႉၸၢင်သမ်ႉ ပဵၼ်ပိုၼ်ႉတီႈပျီႇတူႉၸိတ်ႉ ၸုမ်းယိပ်းၵွင်ႈၵၢင်ႇတူင်ႉၼိုင်ႇယူႇသဝ်းၼမ်လႄႈ ႁဵတ်းႁႂ်ႈၵၢင်ႉၵႄႇ ဢမ်ႇမီးလွင်ႈႁူမ်ႇလူမ်ႈ  ယၢပ်ႇၸႂ် ဢမ်ႇမီးၽႂ်ၶႂ်ႈႁပ်ႉတၼ်းႁဵင်း ၵၢင်ႉၵႄႇ- ၵူၼ်းပိုၼ်ႉတီႈလၢတ်ႈ  ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၽႂ်ၵေႃႈဢမ်ႇၶႂ်ႈႁဵတ်းၵၢင်ႉၵႄႇတီႈၼမ်ႉၸၢင်ၼႆႉ  ၊   ပေႃးသိုၵ်းမၢၼ်ႈ ၸႂ်ႉႁႃပၼ်ၵူၼ်းတႃႇႁၢပ်ႇၵၢၼ်သိုၵ်းၼႆႉၵၢင်ႉၵႄႇယၢပ်ႇၸႂ်ၼႃႇ ၊ လႆႈၼႃႈမႆႈတေႃႇၵူၼ်းမိူင်း။  ယဝ်ႉၵေႃႈ ဢမ်ႇမီးလွင်ႈႁူမ်ႇလူမ်ႈပႃး ၊  ၵႂႃႇလႃႈလီႈလၢၵ်ႈဢဝ်လုၵ်ႈလၢင်းပိူၼ်ႈ သူင်ႇပၼ် သိုၵ်းမၢၼ်ႈ တႃႇႁၢပ်ႇၵၢၼ်သိုၵ်းဢမ်ႇလႆႈ ၊ မၼ်းၵဵဝ်ႇၶွင်ႈၵၼ်တင်းၸုမ်းယိပ်းၵွင်ႈၵၢင်ႇသေၸုမ်းၸုမ်းဝႆႉလႄႈ ၵၢင်ႉၵႄႇလႆႈၵူဝ် ဢမ်ႇႁတ်းႁဵတ်းသင်”- ဝႃႈၼႆ ။

ၽႂ်ၶိုၼ်ႈမႃးပဵၼ် ၵၢင်ႉၵႄႇ ၊ ၽူႈၵွၼ်းပွၵ်ႉၵေႃႈယဝ်ႉ ပိူင်လူင် ႁႂ်ႈတူၺ်းထိုင်ၵူၼ်းဝၢၼ်ႈၵူၼ်းမိူင်း ႁႂ်ႈလွတ်ႈၽေးလႄႈ ႁႂ်ႈပဵၼ်ၵၢင်ႉၵႄႇ ဢၼ်မီးလွင်ႈၽဵင်ႇပဵင်းတွၼ်ႈတႃႇၵူၼ်းဝၢၼ်ႈၵူၼ်းမိူင်းၼႆ ၵူၼ်းၸၢႆးပိုၼ်ႉတီႈလၢတ်ႈၼင်ႇၼႆ ။

ၼႂ်းပိူင်သၽႃးမိူင်းႁူမ်ႈတုမ်မၢၼ်ႈ ၵွၼ်ႇသိုၵ်းပႆႇယိုတ်းမိူင်းၼၼ်ႉ ဢုပ်ႇၵုမ်တူၵ်းလူင်းၵၼ်ဝႆႉဝႃႈ ဢၼ်ၽူႈၵွၼ်းပွၵ်ႉ – ဢိူင်ႇ လီဝႆႉၼမ်ႉၼၵ်းၼႆႉ မီး 3 ၶေႃႈ ။ ၼႂ်းတွၼ်ႈၵၼ် 5 မၢႆ 11 ( ခ) ၼၼ်ႉ ပႃးဝႆႉဝႃႈတေဢမ်ႇလႆႈၸႂ်ႉ သုၼ်ႇတိုဝ်ႉတၢင်း ဢၼ်လႆႈပဵၼ်ၽူႈၵွၼ်းပွၵ်ႉၵွၼ်းဢိူင်ႇၼၼ်ႉသေ ႁဵတ်းၵိၼ်ၼႂ်းၵႄႈမၼ်း ။ 11(ဂ) ၼၼ်ႉသမ်ႉဝႃႈ တေလႆႈႁပ်ႉႁဵတ်းပုၼ်ႈၽွၼ်း ႁႂ်ႈမႅၼ်ႈၸွမ်းပၵ်းပိူင်မၢႆမီႈ ၼႆၸိူဝ်းၼႆႉ ။

လိူဝ်ၼၼ်ႉ ပႃးဝႆႉထႅင်ႈဝႃႈ ၽူႈၵွၼ်းပွၵ်ႉ- ဢိူင်ႇၼႆႉ တေလႆႈတူၺ်းထိုင်ပၼ် လွင်ႈယူႇသဝ်းၵိၼ်သၢင်ႈၵူၼ်းမိူင်း ၊ ႁႂ်ႈမေႃၶိုင်ပွင်ပၼ် ၾၢႆႇၽႃသႃ သႃသၼႃ ၼႂ်းပိုၼ်ႉတီႈ ၊ ႁႂ်ႈပူၵ်းပွင်ပၼ် လိၵ်ႈလၢႆး ၾိင်ႈငႄႈၾိင်ႈထုင်း လႄႈ ပၢႆးပၺ်ႇၺႃႇ ပၢႆးယူႇလီ လႄႈ ႁႂ်ႈပူၵ်းပွင်ပၼ်လွင်ႈၶိုၼ်ႈယႂ်ႇ ၼႂ်းပိုၼ်ႉတီႈ ၼႆၸိူဝ်းၼႆႉ။