တႄႇဝၼ်းၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ မိူင်းႁူမ်ႈတုမ် ပဵၼ်ၽၢဝ်ႇဢွၵ်ႇဝႃႈ ပႃႇတီႇၵၢၼ်မိူင်းၸိူဝ်းတေ ၶဝ်ႈၶႅင်ႇ ၼႂ်းဝၼ်း ပၢင်လိူၵ်ႈတင်ႈ ႁဵတ်းလွင်ႈႁူၺ်းသူၼ်းလႆႈပဵၼ် တၢင်းၵၢၼ်ယဝ်ႉၼႆၼၼ်ႉမႃး ၼေႃႇၽွင်းတႅၼ်း တၢင်ႇပႃႇတီႇ သူၼ်းတုမ် တႃႇပၢင်လိူၵ်ႈတင်ႈ ၼႂ်းပိုၼ်ႉတီႈလႄႈ တင်းဢွၼ်ႊလၢႆႊသေတႃႉ ပႃႇတီႇသၢင်ႇသီႈတႄႉ ဢမ်ႇလူင်းပိုၼ်ႉတီႈ- ၵူၺ်းၵႃႈ သင်ႇၵၢင်ႉၵႄႇႁဵတ်းၵၢၼ်တႅၼ်းၶဝ်။
တႃႇၼေႃႇၽွင်းတႅၼ်းပႃႇတီႇသၢင်ႇသီႈ တေလႆႈၶႅပ်းမႄးၼမ်၊ ၼင်ႇႁိုဝ်ပႃႇတီႇသၢင်ႇသီႈ ပေႃးတေလႆႈဝၢၵ်ႈ (%) ၼမ်သုတ်း တင်းမိူင်း ပတ်းပိုၼ်ႉလႄႈ ၼႂ်းသၽႃးၵူႈၸၼ်ႉထၢၼ်ႈ ၼၼ်ႉ ၽူႈမီးပုၼ်ႈၽွၼ်း ၼႂ်းပႃႇတီႇသၢင်ႇသီႈ လႄႈ သိုၵ်းမၢၼ်ႈ ၼႂ်းပိုၼ်ႉတီႈ ၽႂ်မၼ်း ဝဵင်းလႂ်ဝဵင်းၼၼ်ႉ ၸီႉသင်ႇလူင်းတီႈ ၽူႈၵွၼ်းပွၵ်ႉ၊ ၵွၼ်းဢိူင်ႇၶဝ် ႁူၺ်းသူၼ်းလၢတ်ႈတီႈၵူၼ်းမိူင်း ႁႂ်ႈၵႂႃႇသႂ်ႇၶႅပ်းၵၢင်ၸႂ် ၼႂ်းဝၼ်း ပၢင်လိူၵ်ႈတင်ႈ ၼႆယဝ်ႉ။
ၼၢင်းယိင်း ဢႃႇယု 45 ပီ ၵေႃႉယူႇဝႆႉၼႂ်းဝဵင်းသီႇပေႃႉ လၢတ်ႈၼႄတီႈၽူႈတွႆႇႁွၵ်ႈဝႃႈ “ တီႈသီႇပေႃႉႁဝ်းၼႆႉ ၶဝ်ၵၢပ်ႈ (တိတ်း) သဵၼ်ႈၸိုဝ်ႈၵူၼ်းၸိူဝ်းတေလႆႈၵႂႃႇပၼ်ၶႅပ်းမႄးၼႆႉ မီးၵႂႃႇသွင်သၢမ်ၸုပ်ႈယဝ်ႉၶႃႈ။ ၶႅပ်းၵၢင်ၸႂ်လူင်ႈၼႃႈၵေႃႈ ၵမ်ႈၽွင်ႈပေႃးၵႂႃႇပၼ် ယဝ်ႉၶႃႈဢေႃႈ။ ငိၼ်းဝႃႈ သၢင်ႇသီႈပေႉဝႃႈၼႆ။ ပႃႇတီႇသၢင်ႇသီႈၶဝ်တႄႉ တူဝ်ၶဝ်ဢမ်ႇလူင်းသူၼ်းတုမ် ၊ လၢတ်ႈၵေႃႈဢမ်ႇလၢတ်ႈသင်။ ၵူၺ်းၼႃႇ ၶဝ်ၸီႉသင်ႇႁွင်ႉဢဝ် ၵွၼ်းပွၵ်ႉၵွၼ်းဢိူင်ႇ (အုပ်ချုပ်ရေးမှူး) ၶဝ်သေ လၢတ်ႈဝႃႈ ႁဝ်းၶႂ်ႈႁဵတ်းၸိူင်ႉၼၼ် ၸိူင်ႉၼႆဢိူဝ်ႈ ၼႆသေ ၵေႃႈ လုၵ်ႉတီႈဢူၵ်ႉၶျူၵ်ႉယေးမူးၶဝ် ၸႂ်ႉၼႆၵူၺ်းၼႃႇ။ ႁႂ်ႈပေႃးဝႃႈ လူင်းသူၼ်းတုမ် ၸွမ်းၼႂ်းပွၵ်ႉၼႂ်းဢိူင်ႇတေႉတေႉဢိူဝ်ႈၼႆ ဢမ်ႇႁၼ်လူင်းတေႉတေႉ။ သိူဝ်ၽိူၵ်ႇၵေႃႈ ဢမ်ႇသူၼ်းတုမ်လူင် ၶဝ်ယူႇၼိူဝ်ဝဵင်းသေၵေႃႈ တႅၼ်းၽွင်းၶဝ် သူၼ်းတုမ်ၼိူဝ် ဢွၼ်ႊလၢႆႊၵူၺ်း” ဝႃႈၼႆ။
ပၢင်လိူၵ်ႈတင်ႈဢၼ်ယဝ်ႉတူဝ်ႈၵႂႃႇဝၼ်းတီႈ 28/12/2025 ၼႆႉပႃႇတီႇၸိူဝ်းတေၶဝ်ႈပၢင်လိူၵ်ႈတင်ႈ ၼႂ်းမိူင်းတႆးၼႆႉ ပဵၼ်ပႃႇတီႇသၢင်ႇသီႈ (USDP) ၊ ပႃႇတီႇသိူဝ်ၽိူၵ်ႇ (SNDP) ၊ ပႃႇတီႇၵူၼ်းမိူင်း (PPP)၊ ပႃႇတီႇ PP ၸဵမ်ၸိူဝ်းၼႆႉဝႃႈၼႆသေတႃႉ ဢၼ်လၵ်းလၵ်းပႃႇတီႇလူင်တႄႉ တေမီးသွင်ပႃႇတီႇ ပႃႇတီႇသၢင်ႇသီႈ လႄႈ ပႃႇတီႇသိူဝ်ၽိူၵ်ႇ ။
ၸႄႈဝဵင်းၼႂ်းမိူင်းတႆးပွတ်းႁွင်ႇ ဝဵင်းမူႇၸေႊ၊ ဝဵင်းလႃႈသဵဝ်ႈ၊ ဝဵင်းၼွင်ၶဵဝ်၊ ဝဵင်းသီႇပေႃႉ၊ ဝဵင်းၵျွၵ်ႉမႄး၊ ဝဵင်းမိူင်းယႆ၊ ဝဵင်းတၢင်ႉယၢၼ်း ၸိူဝ်းၶဝ်ႈပႃးၼႂ်းသဵၼ်ႈၸိုဝ်ႈ ဢၼ်ၸတ်းႁဵတ်းပၢင်လိူၵ်ႈတင်ႈတင်းသဵင်ႈၼႆႉ သိုၵ်းမၢၼ်ႈယိုတ်းမိူင်း ၵုမ်းၵမ်လႆႈဝႆႉ ၼႂ်းဝဵင်းၵူၺ်း။ ၸိူဝ်းမူႇဝၢၼ်ႈၸွမ်းသၢပ်ႇဝဵင်း လႄႈ ၼွၵ်ႈဝဵင်းၼၼ်ႉ ပဵၼ်ၸုမ်းသိုၵ်းၵဝ်ႈၵၢင်ႉ လႄႈ ဢူၺ်းလီၶဝ် ၵုမ်းၵမ်သေ ပၼ်ႇၵၢၼ်ၽွင်းငမ်းဝႆႉ။
ပၢင်လိူၵ်ႈတင်ႈၼႆႉ သိုၵ်းမၢၼ်ႈယိုတ်းမိူင်း တေၸတ်းႁဵတ်းၵႂႃႇ 3 ပွၵ်ႈ။ ပွၵ်ႈၵမ်း 1 မိူင်းတႆးပတ်းပိုၼ်ႉ ပႃး 12 ၸႄႈဝဵင်း ၊ ပွၵ်ႈၵမ်း 2 ပႃး 17 ၸႄႈဝဵင်း၊ ပွၵ်ႈၵမ်း 3 ပႃး 9 ၸႄႈဝဵင်း။ၼႂ်းပွၵ်ႈၵမ်း 3 ၼၼ်ႉ မိူင်းတႆးပွတ်းႁွင်ႇပႃး 3 တီႈ ပဵၼ်ဝဵင်းသီႇပေႃႉ၊ ဝဵင်းၵျွၵ်ႉမႄး လႄႈ ဝဵင်းမၢၵ်ႇမၢင် ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ