တီႈၼႂ်းၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်းၼႆႉ ယၢမ်းလဵဝ် ဢမ်ႇမီးၵူၼ်းဝၢၼ်ႈ ၶႂ်ႈႁပ်ႉႁဵတ်းၵၢင်ႉၵႄႇၽူႈယႂ်ႇၵူၼ်းလူင်ဝၢၼ်ႈ ၊ ဢမ်ႇႁတ်းဢွၼ်ၼမ်းႁဵတ်းလွင်ႈတူင်ႉၼိုင် ၼႂ်းဝၢၼ်ႈၼႂ်းသူၼ်သင်သေလွင်ႈ ၊ ယွၼ်ႉၵၢင်ႉၵႄႇ ၼႂ်းၸႄႈဝဵင်းယႂႃႇငၢၼ်ႇ ၵႆႉထုၵ်ႇ ၶႃႈႁႅမ်ၼႆယဝ်ႉ ။
ၼႂ်းႁၢင်လိူၼ် ၵျႅၼ်ႊၼိဝ်ႊရီႊၼႆႉ မႃးသိုၵ်းမၢၼ်ႈထူဝ်းသိုၵ်းၶဝ်ႈ ႁွင်ႉႁဵတ်းပၢင်ၵုမ်ၵူၼ်းဝၢၼ်ႈ တီႈဝၢၼ်ႈၵုင်းသိမ် ၸႄႈဝဵင်းယႂႃႇငၢၼ်ႇသေ တဵင်ၵႂၢမ်းၼၵ်းဝႆႉလွင်ႈဝႃႈ ႁၢမ်ႈတိတ်းတေႃႇ ၵမ်ႉထႅမ် ၸုမ်းလုၵ်ႉၽိုၼ်ႉ၊ တေလႆႈၸွႆႈထႅမ်ၸုမ်း ၵမ်ႉထႅမ် သိုၵ်းမၢၼ်ႈ လႄႈ တေလႆႈထွမ်ၵႂၢမ်း ပိဝ်သေႃးထီး ပႃႈတႂ်ႈသိုၵ်းမၢၼ်ႈ ၸဵမ်ၸိူဝ်းၼႆႉတီႈၵူၼ်းပိုၼ်ႉတီႈဝႃႈၼႆ ။ ပိဝ်သေႃးထီး ပႃႈတႂ်ႈသိုၵ်းမၢၼ်ႈၵေႃႈ ၵႆႉၵႂႃႇမႃးၸွမ်းသိုၵ်းမၢၼ်ႈ ဢမ်ႇႁတ်းယူႇၼႂ်းဢိူင်ႇၼႂ်းဝၢၼ်ႈ- ဝႃႈၼႆ ။
ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵူၼ်းဝၢၼ်ႈႁဝ်း လႆႈၵူဝ်တၢင်းသွင်ၾၢႆႇဝႆႉလႄႈ ၽႂ်ဢမ်ႇၶႂ်ႈႁဵတ်း ၵၢင်ႉၵႄႇတီႈဝၢၼ်ႈ ၊ တလဵဝ်ၼႆႉ ၼႂ်းဝၢၼ်ႈၼႆႉမီးပိဝ်ႇသေႃးထီးၵူၺ်း ၊ ၶဝ်ၼၼ်ႉတင်း ဢမ်ႇႁတ်းယူႇၼႂ်းဝၢၼ်ႈ ၵႂႃႇၵႂႃႇမႃးမႃးၸွမ်း သိုၵ်းမၢၼ်ႈႁဵတ်းၼၼ်ၵူၺ်း ၊ ယွၼ်ႉဢမ်ႇမီးၵၢင်ႉၵႄႇၵူၼ်းပိုၼ်ႉတီႈႁဝ်းၶႃႈ ဢမ်ႇၸၢင်ႈပိုင်ႇဢိင်ၽႂ်ၶႃႈ”-ဝႃႈၼႆ ။
တႄႇပီ 2024 မႃး သိုၵ်းမၢၼ်ႈထႅမ်ႁႅင်းသိုၵ်းၶဝ်ႈ ၼႂ်းဝဵင်းၼႂ်းဝၢၼ်ႈ ၵမ်းလႂ်ၵေႃႈ ပူႇၵႄႇလႄႈ ၵူၼ်းမိူင်းၺႃးၶႃႈႁႅမ်ၵမ်းၼၼ်ႉ။ ၸွမ်းၼင်ႇသဵၼ်ႈမၢႆ ၸုမ်းၶၢဝ်ႇၽူႈတွႆႇႁွၵ်ႈ ၵဵပ်းဝႆႉ ၼၼ်ႉ တႄႇပီ 2024 ၼႆႉမႃး ၵူၼ်းပိုၼ်ႉတီႈလႄႈ ပူႇၵၢင်ႉပူႇၵႄႇ ၺႃးမၢပ်ႇၼႄးဝႃႈ ပဵၼ်ၵူၼ်းႁဵတ်းၵၢၼ်ဢဝ်ၶၢဝ်ႇပၼ်သိုၵ်းမၢၼ်ႈ ၼႆသေ ၺႃးႁႅမ်တၢႆၵႂႃႇ မီး 13 ၵေႃႉ။ ဢမ်ႇႁူႉဝႃႈပဵၼ်ၽႂ် ၸုမ်းလႂ်လူင်းမိုဝ်းၶႃႈႁႅမ်တၢႆ ၼႆယဝ်ႉ ။
ပိဝ်ႇသေႃးထီးတႂ်ႈသိုၵ်းမၢၼ်ႈ တီႈဝၢၼ်ႈၵုင်းသိမ်ႇၼႆႉ ပၼ်ၶေႃႈဢၢင်ႈဝႃႈ တႃႇၶဝ်ႈၼမ်ႉ တၢင်းၵိၼ် သိုၵ်းမၢၼ်ႈၼႆသေ ၵဵပ်းငိုၼ်းၸႂ်ႉသုၼ်ႇတူဝ်ၸဝ်ႈၵဝ်တီႈၵူၼ်းဝၢၼ်ႈ ၼိုင်ႈပွၵ်ႈၼႆႉ ၵဵပ်းငိုၼ်း 5000-10000 ပျႃး ႁဵတ်းႁႂ်ႈၵူၼ်းဝၢၼ်ႈ ဢမ်ႇမီးလွင်ႈယုမ်ႇယမ်ၸႂ်ထႅင်ႈ – ၵူၼ်းပိုၼ်ႉတီႈလၢတ်ႈ ။
ၼၢင်းယိင်းဢႃယု 30 လၢတ်ႈၽူႈတွႆႇႁွၵ်ႈဝႃႈ -“ၽွင်းသိုၵ်းမၢၼ်ႈၶဝ်ၶဝ်ႈမႃးပၵ်ႉတပ်ႉတီႈဝၢၼ်ႈၼႆႉ ဢဝ်ၵိၼ်တၢင်းၵိၼ်တီႈႁၢၼ်ႉၸိူဝ်းၼၼ်ႉလႄႈ တေလႆႈတႅၼ်းပၼ်ၼီႈၼႆသေ ၵဵပ်းငိုၼ်းၵူၼ်း ဝၢၼ်ႈ ၊ တီႈတႄႉမၼ်း ၵဵပ်းငိုၼ်းတွၼ်ႈတႃႇမၼ်းၵူၺ်း ၊ပေႃးၼီႈဢၼ်သိုၵ်းမၢၼ်ႈလူဝ်ႇပၼ် 3သႅၼ်ၼႆ ၼီႈပိဝ်ႇသေႃးထီးၼၼ်ႉၵေႃႈ ၶႂ်ႈမီး 3သႅၼ်ယဝ်ႉ ၊ သမ်ႉၵဵပ်းငိုၼ်းၵူၼ်းဝၢၼ်ႈ တႅၼ်းၼီႈ ပေႉၵိၼ်ၵူၼ်းဝၢၼ်ႈ”-ဝႃႈၼႆ ။
လိူဝ်ၼၼ်ႉ ၵူၼ်းဝၢၼ်ႈ လႆႈၵႂႃႇသူင်ႇပၼ် ႁေႃႇၶဝ်ႈ ႁေႃႇ ၽၵ်းတႃႇၶဝ် သိုၵ်းမၢၼ်ႈ ဢၼ်ၶဝ်ႈပၵ်းတပ်ႉၼႂ်းဢိူင်ၼႂ်းဝၢၼ်ႈ တီႈၵျွင်းမုၼ်ၸဝ်ႈတႃႇသေႇ ၊ တီႈၼႂ်းဝၢၼ်ႈ ၸိူဝ်းၼၼ်ႉ ၵေႃႈယိပ်း ၵွင်ႈၵၢင်ႇသေ ဢႅဝ်ႇႁႃယွၼ်းၵိၼ် မၢၵ်ႇမႆႉ ၊ ၽၵ်း ၊ ၵႆႇလဝ်ႈၶဝ်ႈၼိူဝ်ႉ ၸိူဝ်းၼႆႉ -ၵူၼ်းပိုၼ်ႉတီႈလၢတ်ႈ ။
မိူဝ်ႈဝၼ်းတီႈ 22/1/2026 ၼႆႉၵေႃႈ ပူႇၵႄႇ ဝၢၼ်ႈမျေႇၼီႇၵူင်း (မြေနီကုန်း) ၊ ဢိူင်ႇဢလႄႇၶျွင်ႇ ထုၵ်ႇၶႃႈႁႅမ်တၢႆ ႁဵတ်းႁႂ်ႈသိုၵ်းမၢၼ်ႈ ႁႅၼ်းသိုၵ်းသွၵ်ႈတဝ် ႁိမ်းႁွမ်းဝၢၼ်ႈ ပဵၼ်ပၢင်တိုၵ်းၵၼ်တင်း ၸုမ်းသိုၵ်းထၼူႉ။ ဝၢႆးၼၼ်ႉမႃးသိုၵ်းမၢၼ်ႈပၵ်းတပ်ႉၵူတ်ႇထတ်းၵူၼ်းၵႂႃႇမႃးႁၢဝ်းႁႅင်း ထိုင်ဝၼ်းမိူဝ်ႈၼႆႉ – ၵူၼ်းပိုၼ်ႉတီႈလၢတ်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ