မိူဝ်ႈၼႆႉ ဝၼ်းတီႈ 16/6/2026 မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း မိူင်းႁူမ်ႈတုမ် (မိူင်းမၢၼ်ႈ) ႁွတ်ႈၽႅဝ်ဝႆႉ တီႈၼႂ်းမိူင်းၶႄႇ ပဵၼ်ဝၼ်းထူၼ်ႈသွင် လႆႈၵႂႃႇႁူပ်ႉထူပ်းဢုပ်ႇဢူဝ်းၸွမ်း သျီႊၵျိၼ်ႉၽိင်ႊ ၸွမ်ၸိုင်ႈမိူင်းၶႄႇ တီႈဝဵင်းလူင် ပိူၺ်ႇၵျိၼ်ႊ တင်းသွင်ၵေႃႉႁၢင်ႈႁႅၼ်း မီးၽႅၼ်ၵၢၼ်တႃႇလူင်းလၢႆးမိုဝ်းၸွမ်းၵၼ်ပဵၼ်တၢင်းၵၢၼ် ။

တွၼ်ႈၵၢင်ၼႂ် မိၼ်းဢွင်ႇလၢႆႇ ႁူပ်ႉထူပ်းဢုပ်ႇဢူဝ်းၸွမ်း သျီႊၵျိၼ်ႉၽိင်ႊ ယဝ်ႉသေ တွၼ်ႈဝၢႆးဝၼ်း တေႁူပ်ႉထူပ်း ဢုပ်ႇဢူဝ်းၸွမ်း ၸွမ်ၽွင်းလူင် လီႊၵျၢၼ်ႊ ၽူႈၼမ်းၼႂ်းမိူင်းၶႄႇ ၵေႃႉထီႉသွင် ။ တေသိုပ်ႇႁူပ်ႉ ဢုပ်ႇၸွမ်း ႁူဝ်ပဝ်ႈ ၵေႃႇမတီႇၶွၼ်ႊၵရႅတ်ႉၸိူဝ်ႉၸၢတ်ႈၶႄႇ၊ ၵေႃႉလူင်ႉလႅၼ်ႇၵတ်ႉၶႅၼ်ႇၾၢႆႇ ပၵ်းပိူင်ၾိင်ႈမိူင်းၶႄႇထႅင်ႈ – ဝႃႈၼႆ။

ၼႂ်းၶၢဝ်းတၢင်း မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ဢွၵ်ႇၶၢဝ်းတၢင်းၵႂႃႇမိူင်းၶႄႇၼႆႉ တင်းသွင်ၾၢႆႇ တေဢုပ်ႇဢူဝ်းၵၼ်ၵႂႃႇ လွင်ႈႁူမ်ႇလူမ်ႈသဵၼ်ႈတၢင်းၵုၼ်ႇၵႃႉတၢင်းၶၢႆ မိူင်းမၢၼ်ႈ- မိူင်းၶႄႇ ဢၼ်လႆႈၵိုတ်းယင်ႉဝႆႉ ၽွင်းပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းၼၼ်ႉၵူၺ်းဢမ်ႇၵႃး လွင်ႈၶူင်းၵၢၼ်သဵၼ်ႈတၢင်းႁွပ်ႈလူၵ်ႈ BRI ဢၼ်တေလတ်းၶၢမ်ႈၵႂႃႇၼႂ်းမိူင်းတႆးပွတ်းႁွင်ႇ လႄႈ မိူင်းမၢၼ်ႈ၊ တႃႇၵႄႈလိတ်ႈပၼ်ႁႃ လွင်ႈယုင်ႈယၢင်ႈၸွမ်းလႅၼ်လိၼ် ႁႂ်ႈပေႃးမီးလွင်ႈၼိမ်တဵင်ႈမၼ်ႈၶိုၼ်ႈၼၼ်ႉၵေႃႈ တေ ဢုပ်ႇဢူဝ်းပႃးၵႂႃႇ ပဵၼ်ပိူင်ယႂ်ႇ ၼႆယဝ်ႉ။

မိၼ်းဢွင်ႇလၢႆႇ လုၵ်ႉတီႈၶူင်ႇႁိူဝ်းမိၼ်သိုၵ်း ဝဵင်းလူင်ၼေႇပျီႇတေႃႇ ဢွၵ်ႇၶၢဝ်းတၢင်းၵႂႃႇမိူင်းၶႄႇ တင်ႈတႄႇ ဝၼ်းတီႈ 15 လိူၼ်ၵျုၼ်ႊ ယၢမ်းၵၢင်ၼႂ်ၸဝ်ႉ တေႃႇ ဝၼ်းတီႈ 19 လိူၼ် ၵျုၼ်ႊ။ တေယူႇမိူင်းၶႄႇ ႁိုင် 5 ဝၼ်း ။ မိူဝ်ႈပူၼ်ႉမႃး ၽွင်းဢွၵ်ႇၶၢဝ်းတၢင်းၵႂႃႇႁူပ်ႉ ၸွမ်ၸိုင်ႈမိူင်းဢိၼ်ႊတီႊယိူဝ်ႊၼၼ်ႉၵေႃႈ မိၼ်းဢွင်ႇလၢႆႇ ၵႂႃႇယူႇသဝ်း တွင်ႈတဵဝ်း 5 ဝၼ်း မိူၼ်ၵၼ် ။

မိူဝ်ႈဝႃး ဝၼ်းတီႈ 15/6/2026 ယၢမ်းတၢမ်းၶမ်ႈ မိၼ်းဢွင်ႇလၢႆႇ လႄႈ ၸုမ်းပွင်ၵၢၼ်လူင်ပွင်ၸိုင်ႈယိုတ်းမိူင်း ၵႂႃႇဢႅဝ်ႇယဵမ်ႈ ပိုၼ်ႉတီႈ ဢၼ်ၸႂ်ႉတိုဝ်းၶိူင်ႈဢၢႆႊထီႊသေၵေႃႇသၢင်ႈဝႆႉ ပဵၼ်မိူၼ်ဝဵင်းၼိုင်ႈ ဢၼ်မိူင်းၶႄႇသႂ်ႇၸိုဝ်ႈဝႆႉဝႃႈ အာကာသမြို့တော် (Aerospace City) ၼၼ်ႉသေ လဵပ်ႈႁဵၼ်းလွင်ႈ လွၵ်းလၢႆးပၢႆးသၢႆႊ ၵၢၼ်ၶူင်သၢင်ႈၸႂ်ႉတိုဝ်း IT ၶွင် ၵေႃႇပူဝ်ႇရေးသျိၼ်ႊပၢႆးသၢႆႊၶႄႇ (China Aerospace Science and Technology Corporation- CASC) ၊ ဢႅဝ်ႇယဵမ်ႈလဵပ်ႈႁဵၼ်းပႃး ႁွင်ႈၼႄပိုၼ်း Telecommunication System ၊ Earth Remote Sensing (ERS)၊ Baidu Navigation System ၊ ႁွင်ႈၾိုၵ်းႁေႃႈ လႅင်မိၼ်ဢႃႇၵႃႇသ ၸဵမ်ၸိူဝ်းၼႆႉ။