ၸွမ်ၸိုင်ႈမိူင်းရတ်ႉသျႃး ပူႊတိၼ်ႊ လၢတ်ႈဝႃႈ – ပၼ်ႁႃပၢင်တိုၵ်းသိုၵ်းသိူဝ် ၵႄႈၵၢင် ရတ်ႉသျႃး တင်း ယူႊၶရဵၼ်ႊ ၸမ်တေယဝ်ႉတူဝ်ႈယဝ်ႉ ဝႃႈၼႆ။ ၸွမ်ၸိုင်ႈရတ်ႉသျႃးလၢတ်ႈၵႂႃႇ ၽွင်းမိူဝ်ႈႁူပ်ႉထူပ်းၵၼ်တင်း ၸုမ်းသိုဝ်ႇၶၢဝ်ႇ ၼႂ်းဝၼ်းတီႈ 9 လိူၼ်မေႊ ဝၼ်းပၢင်ၵႅဝ်ႈ ဢွင်ႇပေႉသိုၵ်း။

မိူဝ်ႈသိုၵ်းလုမ်ႈၾႃႉ ပွၵ်ႈၵမ်း 2 ၼၼ်ႉ သူဝ်ႊပီႊယႅတ်ႉ ယူႊၼီႊယမ်ႊ တိုၵ်းပေႉ သိုၵ်းၼႃႊသီႊ ၵျႃႊမၼီႊသေ ၸတ်းႁဵတ်းဝၼ်းဢွင်ႇပေႉသိုၵ်းမႃး ပိူဝ်ႈတႃႇယုၵ်ႉယွင်ႈဢဝ်ၵုင်ႇမုၼ် ၵူၼ်းမိူင်းသူဝ်ႊပီႊယႅတ်ႉ ၸိူဝ်းလႆႈလူႉတၢႆၵႂႃႇ 27 လၢၼ်ႉၵေႃႉ ဝႃႈၼႆ။

ရတ်ႉသျႃးၼႆႉ ပူၼ်ႉပႅၼ်ၶဝ်ႈတိုၵ်းၼႂ်းမိူင်းယူႊၶရဵၼ်ႊမႃး ၸဵမ်မိူဝ်ႈႁူဝ်ပီ 2022။ ပၢင်တိုၵ်းၼႆႉ ႁဵတ်းႁႂ်ႈၵူၼ်းတင်းၼမ် ဢွၼ်ၵၼ်မႆႈၸႂ် ၵူဝ်ပဵၼ်မႃးပၢင်တိုၵ်း ၼိဝ်ႊၶလီႊယိူဝ်ႊ မိူၼ်ၼင်ႇမိူဝ်ႈပီ 1962။

ၶၢဝ်ႇရၢႆႊတိူဝ်ႊတႄႉႁၢႆးငၢၼ်းဝႆႉဝႃႈ တႃႇ ရတ်ႉသျႃး တေတိုၵ်းပေႉ ယူႊၶရဵၼ်ႊ လႆႈၼၼ်ႉ ဢမ်ႇငၢႆႈ ဝႃႈၼႆ။ ယၢမ်းလဵဝ် ပၢင်တိုၵ်း ရတ်ႉသျႃး – ယူႊၶရဵၼ်ႊၼႆႉ ႁိုင်မႃးၶၢဝ်းတၢင်း 4 ပီယဝ်ႉ၊ ဝၢႆးလင်သိုၵ်းလုမ်ႈၾႃႉ ပွၵ်ႈၵမ်း 2 မႃးၼႆႉ ပဵၼ်ပၢင်တိုၵ်း ဢၼ်မီးၵူၼ်းလူႉတၢႆၼမ်လိူဝ်ပိူၼ်ႈ တီႈၵုၼ် ယူးရူပ်ႇ။

ၼႂ်းပၢင်တိုၵ်း ရတ်ႉသျႃး – ယူႊၶရဵၼ်ႊၼႆႉ မီးၵူၼ်းလူႉတၢႆၼပ်ႉႁူဝ်သႅၼ်ၵေႃႉ၊ ၼႂ်းမိူင်းယူႊၶရဵၼ်ႊၵေႃႈ မီးလွင်ႈတုမ်ႉတိူဝ်ႉလူႉၵွႆၵႂႃႇတင်းၼမ်။ မိူၼ်ၼႆ ရတ်ႉသျႃးၵေႃႈ လႆႈသဵင်း ငိုၼ်း ၵႃႈၸႂ်ႉၸၢႆႇၾၢႆႇၵၢၼ်သိုၵ်း ဢမ်ႇယွမ်း 3 ထရီႊလီႊယၼ်ႊ တေႃႇလႃႇ။ လိူဝ်ၼၼ်ႉ လွင်ႈၵပ်းသိုပ်ႇၵႄႈၵၢင် ရတ်ႉသျႃး တင်း ယူးရူပ်ႇ ၵေႃႈ မီးလွင်ႈၶဵင်ႈၶႅင်မႃး ဝႃႈၼႆ။

တီႈၼႂ်းပၢင်သပ်းၸႅင်ႈၶၢဝ်ႇၼၼ်ႉ ၸွမ်ၸိုင်ႈမိူင်းရတ်ႉသျႃး လၢတ်ႈၵႂႃႇပႃးဝႃႈ – ၸမ်တေလႆႈၶေႃႈတူၵ်းလူင်း လွင်ႈၼမ်ႉမၼ်းမဵၼ် လႄႈ ႁႅင်းထၢတ်ႈသၽႃႇဝ ၸွမ်းၵၼ်တင်းမိူင်း ၶႄႇယဝ်ႉ ဝႃႈၼႆ။ ပေႃးထိုင်မႃး ၼႂ်းႁၢင်လိူၼ်မေႊၼႆႉ ၸွမ်ၸိုင်ႈမိူင်းရတ်ႉသျႃး ပူႊတိၼ်ႊ တေဢွၵ်ႇၶၢဝ်းတၢင်းၵႂႃႇတီႈ မိူင်းၶႄႇ ၼႆယဝ်ႉ။