မိူင်းပင်ႊလႃႊတဵတ်ႉသ် တေပိုတ်ႇႁူင်းၸၢၵ်ႈ ႁႅင်းထၢတ်ႈၼိဝ်ႊၶလီႊယႃႊၼႆသေ တႄႇထႅမ်ႁႅင်းထၢတ်ႈ ယူႊရေႊၼီႊယမ်ႊယူႇယဝ်ႉၼႆ Rosatom ၸုမ်းၵေႃႊပူဝ်ႊရေႊသျိၼ်ႊ ႁႅင်းထၢတ်ႈၼိဝ်ႊၶလီႊယႃႊ မိူင်းရတ်ႈသျႃႊ  ပိုၼ်ၽၢဝ်ႇဢွၵ်ႇမႃးမိူဝ်ႈဝႃး 28/04/2026  ၼင်ႇၼႆ။

ၾၢႆႇၼိုင်ႈ လူင်ပွင်ၸိုင်ႈမိူင်းပင်ႊလႃႊတဵတ်ႉသ် ၵေႃႈပိုၼ်ၽၢဝ်ႇဝႆႉဝႃႈ ႁူင်းထၢတ်ႈၼိဝ်ႊၶလီႊယႃႊ (ရူႊၽႃႊ Rooppur) တေႉပၼ်ႇၵၢၼ်ၼႂ်းဢမ်ႇႁိုင်ဢမ်ႇၼၢၼ်းၼႆႉယဝ်ႉ ဝႃႈၼႆဝႆႉ။

ႁူင်းၸၢၵ်ႈ  ရူႊၽႃႊ Rooppur ၼႆႉ မီးႁိမ်းၾင်ႇၼမ်ႉ ပႅတ်ႊမႃႊ မီးၸဵင်ႇႁွင်ႇဝၼ်းတူၵ်း ဝဵင်းလူင် ၻႃႊၵႃႊ မွၵ်ႈ 160 ၵီႊလူဝ်ႊမီႊတႃႊ ။ တႄႇသၢင်ႈမႃးမိူဝ်ႈပီ 2017 ။ ၸႂ်ႉႁႅင်းငိုၼ်းၵႂႃႇ 1300 လၢၼ်ႉၻေႃႊလႃႊ ။  ႁႅင်းငိုၼ်း 90 ပိူဝ်ႊသႅၼ်ႊ လႆႈၵူႈဝႆႉတီႈ မိူင်းရတ်ႉသျႃႊ။  ပဵၼ်ႁူင်းၸၢၵ်ႈၼိဝ်ႊၶလီႊယႃႊလင်ႁႅၵ်ႈ ၼႂ်းမိူင်းပင်ႊၵလႃႊတဵတ်ႉသ် ဝႃႈၼႆဝႆႉ။

ယၢမ်းလဵဝ်တေတႄႇႁဵတ်းဢွၵ်ႇထၢတ်ႈၼိဝ်ႊၶလီႊယႃႊၵမ်းဢိတ်းဢိတ်းသေ ပေႃးၼႂ်းလိူၼ်ထူၼ်ႈ 8 ဢေႃႊၵတ်ႉသ်ၼႆႉတႄႉ ၸၢင်ႈတေႁဵတ်းဢွၵ်ႇႁႅင်းထၢတ်ႈမႃးလႆႈ  300 မႅၵ်ႊၵႃႊဝတ်ႉ ၼႆႉယူႇ – ရတ်ႉသျႃႊ ပိုၼ်ၽၢဝ်ႇဝႆႉၼင်ႇၼႆ။ ၾၢႆႇတၢင်းပင်ႊၵလႃႊတဵတ်ႉသ်တႄႉၵေႃႈ မုင်ႈမွင်းဝႆႉဝႃႈ ပီ 2027 သဵင်ႈၼႆႉ ၸၢင်ႈယုၵ်ႉလွင်ႈႁဵတ်းဢွၵ်ႇႁႅင်းထၢတ်ႈ ႁႂ်ႈၼမ်ၶိုၼ်ႈထိုင် 2400 မႅၵ်ႊၵႃႊဝတ်ႉ ဝႃႈၼႆယူႇ ။

ၸိုင်ႈမိူင်းပင်ႊၵလႃႊတဵတ်ႉသ်ၼႆႉ ၶဝ်ႈပႃးၼႂ်း 30 ၸိုင်ႈမိူင်းၼႂ်းလုမ်ႈၾႃႉ ဢၼ်ႁဵတ်းဢွၵ်ႇႁႅင်းထၢတ်ႈၼိဝ်ႊၶလီႊယႃႊယဝ်ႉလႄႈ – ယိူင်းဢၢၼ်းဝႆႉဝႃႈ တေၸၢင်ႈသူင်ႇၶၢႆပၼ်ႁႅင်းထၢတ်ႈၼိဝ်ႊၶလီႊယႃႊၼႂ်းၵုၼ်ၶဵဝ်ဢေႊသျႃႊ ဢၼ်မီးႁူဝ်ၼပ်ႉၵူၼ်း 170 လၢၼ်ႉၵေႃႉၼၼ်ႉယူႇ – ပႃးၼႂ်းၶေႃႈပိုၼ်ၽၢဝ်ႇၼၼ်ႉၼင်ႇၼႆ။

Ref; Reuters