ပလိၵ်ႈထႆး လိုပ်ႈလမ်းတီႉၺွပ်း ၸၢႆးၼုမ်ႇၵူၼ်းရတ်ႉသျႃႊလႄႈ ၼၢင်းယိင်းထႆး ဢၼ်ထၢႆႇၶလိပ်ႉဝီႊတီႊဢူဝ်ႊ “ႁူမ်ႈၵႃႇမၵၼ်ၼိူဝ်ရူတ်ႉၵႃးဢၼ်တိုၵ်ႉလႅၼ်ႈယူႇ” ၵၢင်ဝဵင်းလူင်ၽူးၵဵတ်ႇ မိူင်းထႆး။

ၶလိပ်ႉၸၢႆးယိင်းႁူမ်ႈၵႃႇမ ၵၼ်ၼိူဝ်ၵႃး လႄႇလဵပ်ႈၵၢင်ဝဵင်းၽူးၵဵတ်ႇ ၼၼ်ႉ ၽႄႈၼိူဝ်သိုဝ်ႇၼႅင်ႈသၢၼ် ဢွၼ်ႊလၢႆႊ ၼႂ်းဝၼ်းတီႈ 24/09/2025 ယၢမ်းၵၢင်ၶိုၼ်း။

ထိုင်မႃးဝၼ်းတီႈ 25/09/2025 ပလိၵ်ႈထႆး လိုပ်ႈလမ်းဢႅဝ်ႇႁႃတူဝ်ၶႃသွင်ၵေႃႉ – ၵႂႃႇတီႉလႆႈ ၽူႈၸၢႆးၵေႃႉၼၼ်ႉတီႈ ၶူင်ႇႁိူဝ်းမိၼ် သူႇဝၼ်းၼႃးၽုမ်း မိူင်းၵုင်းထဵပ်ႈ။ မၼ်းၸၢႆးပဵၼ်ၵူၼ်းမိူင်းရတ်ႉသျႃႊ ဢႃယုမီး 23 ပီ ၸိုဝ်ႈႁွင်ႉ ၵျွတ်ႉၶျ်။ ဝၢႆးၼၼ်ႉၶိုၼ်းသိုပ်ႇလမ်းႁႃတူဝ် ၼၢင်းယိင်းဢၼ်ပဵၼ်ၵူႈမၼ်းၸၢႆးၼိူဝ်ရူတ်ႉၼၼ်ႉ။ ၵႂႃႇထူပ်းႁၼ်တီႉၺွပ်းလႆႈမၼ်းၼၢင်းတီႈ ၽူးၵဵတ်ႇၶိုၼ်း။ လႆႈႁူႉဝႃႈမၼ်းၼၢင်းပဵၼ်ၵူၼ်းမိူင်းထႆး ဢႃယုမီး 42 ပီ။

ၸၢႆးရတ်ႉသျႃႊယွမ်းႁပ်ႉဝႃႈ ၵူၼ်းၼိူဝ်ရူတ်ႉၼၼ်ႉပဵၼ်မၼ်းၸၢႆးတႄႉတႄႉ။ ၵူၺ်းၵႃႈ ဢမ်ႇလႆႈႁူမ်ႈၵႃႇမၵၼ်တႄႉတႄႉ။ သၢင်ႈၶွၼ်ႊထႅၼ်ႉ တႃႇတၢင်ႇၶလိပ်ႉၼႂ်း ဢိၼ်ႊသတႃႊၵရႅမ်ႊမၼ်းၸၢႆး (မီးၵူၼ်းတိတ်းတၢမ် သႅၼ်ပၢႆ) ၼၼ်ႉၵူၺ်း။ မၼ်းၸၢႆးယၢမ်ႈႁဵတ်းၶလိပ်ႉၸိူင်ႉၼႆသေ တၢင်ႇၵႂႃႇ 2 ပွၵ်ႈပႃးၼႆႉယဝ်ႉ -ဝႃႈၼႆ။

ၼၢင်းယိင်းထႆးၼၼ်ႉၵေႃႈ လၢတ်ႈတီႈပလိၵ်ႈဝႃႈ -မၼ်းၼၢင်း လႆႈၵႃႈႁပ်ႉၸၢင်ႈ 1000 ဝၢတ်ႇ – တႃႇထၢႆႇၶလိပ်ႉဝီႊတီႊဢူဝ်ႊၸွမ်းၸၢႆးရတ်ႉသျႃႊ – ဝႃႈၼႆ။

ယၢမ်းလဵဝ်ပလိၵ်ႈထႆး ၵုမ်းၶင်တူဝ်ၶႃဝႆႉသေ တေတၢင်းၽိတ်း ၸၢႆးရတ်ႉသျႃႊၼၼ်ႉလူၺ်ႈ မၢႆမီႈ ႁဵတ်းသၢင်ႈလွင်ႈႁၢင်ႈႁၢႆႉတႃၼႂ်းပိုၼ်ႉတီႈၵၢင်ပၢင်ႇၵူၼ်းတၢင်းၼမ်၊ လႄႈတၢင်းၽိတ်း ပၵ်းပိူင်ၶွမ်ႊၽိဝ်ႊတိူဝ်ႊ- ၼႆသေ တေႁႂ်ႈလုမ်းတြႃး တတ်းသိၼ်ပၼ်တူတ်ႈတၢမ်ႇ။ ဝၢႆးလင်လႆႈႁပ်ႉတူတ်ႈတၢမ်ႇယဝ်ႉ တေလိုပ်ႈဢွၵ်ႇမိူင်းထႆး- တေဢမ်ႇပၼ်ၶဝ်ႈမိူင်းထႆးၶိုၼ်းတင်းၸူဝ်ႈတင်းၸၢတ်ႈ- ဝႃႈၼႆ။

ၼၢင်းယိင်းထႆးၼၼ်ႉၵေႃႈ တေလႆႈႁပ်ႉတူတ်ႈတၢမ်ႇတၢင်းၽိတ်းလူၺ်ႈပၵ်းပိူင် ႁဵတ်းသၢင်ႈလွင်ႈႁၢင်ႈႁၢႆႉတႃၼႂ်းပိုၼ်ႉတီႈၵၢင်ပၢင်ႇၵူၼ်းတၢင်းၼမ် – လုမ်းတြႃးတေတႅပ်းတတ်းပၼ်တူတ်ႈတၢမ်ႇၵႂႃႇ – လႆႈႁူႉၼင်ႇၼႆ။

ဝဵင်းလူင်ၽူးၵဵတ်ႇၼႆႉ ပဵၼ်ဝဵင်းယႂ်ႇဢၼ်တိတ်းၸပ်းၽင်ႇပၢင်ႇလၢႆႇ။ ဝဵင်းၵိုၼ်းတီႈမီးၵူၼ်းၼွၵ်ႈမိူင်းမႃးဢႅဝ်ႇယဵမ်ႈ။ တၢင်းမူၼ်ႈသိူဝ်းၵျေႃႇၵေႃႈမီးၼမ်။