တပ်ႉသိုၵ်းမၢၼ်ႈ တင်း တပ်ႉသိုၵ်းရတ်ႉသျႃႊ ႁူပ်ႉထူပ်းဢုပ်ႇဢူဝ်းၵၼ် တီႈၼေႇပျီႇတေႃႇသေ ၶွတ်ႇၽွတ်ႈၶွမ်ႊမတီႇ တႃႇႁူမ်ႈၵၼ်ၽဵဝ်ႈမူၺ်ႉ ၸုမ်းၵေႃႇၵၢၼ်ႁၢႆႉၵႂႃႇ ၼႆယဝ်ႉ။

မိူဝ်ႈဝၼ်းတီႈ 9 လိူၼ်တီႊသႅမ်ႊပိူဝ်ႊ ၾၢႆႇတပ်ႉသိုၵ်းမၢၼ်ႈ တူဝ်တႅၼ်းပဵၼ် ၸွမ်သိုၵ်း တၢၼ်းထၢႆႉ ယူႇၾၢႆႇလုမ်းႁဵတ်းၵၢၼ်ၵႅတ်ႇၶႄၸိုင်ႈမိူင်း (တပ်ႉပႆလိၼ်) သေ ၼမ်းၼႃႈလုၵ်ႈၼွင်ႉပွင်ႈပၢႆ ၶဝ်ႈႁူမ်ႈဢုပ်ႇဢူဝ်းၵၼ်တင်း ၵႅမ်ၽူႈၵုမ်းတပ်ႉပႆလိၼ် မိူင်းရတ်ႉသျႃႊ Colonel General Aleksandr Anatolyevich Matovnikov တီႈႁူင်းႁႅမ်း Jasmine ၼေႇပျီႇတေႃႇ။ ပဵၼ်ၵၢၼ်ႁူပ်ႉထူပ်းၵၼ် ၵမ်းထူၼ်ႈသၢမ် လႆႈႁူႉၼင်ႇၼႆ။

ၼႂ်းပၢင်ႁူပ်ႉထူပ်းၼၼ်ႉ ဢုပ်ႇဢူဝ်းၵၼ်ၵႂႃႇ တႃႇႁႂ်ႈၵၢၼ်သူင်ႇၶေႃႈမုၼ်းၶၢဝ်ႇသၢၼ် လႅတ်းဝႆးၽႂ်းၽၢႆ ၊ တႃႇႁူမ်ႈၵၼ်ႁဵတ်းသၢင်ႈ လွင်ႈၵၢၼ်ပၢႆးသၢင်ႊ ဢၢႆႊထီႊ (IT) ႁႂ်ႈၶိုတ်းၸၼ်ႉ၊ တႃႇယုၵ်ႉမုၼ်း ၼမ်ႉၵတ်ႉၵူၼ်းသိုၵ်းသေ ႁူမ်ႈၵၼ်ႁဵတ်းၵၢၼ် ၽဵဝ်ႈမူၺ်ႉၸုမ်းၵေႃႇၵၢၼ်ႁၢႆႉၵႂႃႇၼႆ သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဝႆႉၼင်ႇၼႆ။

ၶွမ်ႊမတီႇ တႃႇႁဵတ်းသၢင်ႈၵၢၼ်ၸတ်းၽႅၼ် ၽဵဝ်ႈမူၺ်ႉၸုမ်းၵေႃႇၵၢၼ်ႁၢႆႉ ၶွင်တပ်ႉသိုၵ်းမၢၼ်ႈ တင်း တပ်ႉသိုၵ်းမိူင်းရတ်ႉသျႃႊၼႆႉ တႄႇၶွတ်ႇၽွတ်ႈမႃး မိူဝ်ႈပီ 2021 ဝၢႆးလင်သိုၵ်းမၢၼ်ႈယိုတ်းဢႃႇၼႃႇ ၸိုင်ႈမိူင်း မိူင်းႁူမ်ႈတုမ် ၼႆယဝ်ႉ။

လႆႈႁူႉဝႃႈ ဢွင်ႈတီႈၸတ်းႁဵတ်းပၢင်ႁူပ်ႉထူပ်းဢုပ်ႇဢူဝ်းၵၼ်ၼႆႉ သိုၵ်းမၢၼ်ႈ တင်း သိုၵ်းရတ်ႉသျႃႊ ပၼ်ႇပုတ်ႈၵၼ်ႁဵတ်းၵႂႃႇတီႈၼေႇပျီႇတေႃႇ ၵမ်းၼိုင်ႈလႄႈ ဝဵင်းမေႃႊသၵူဝ်ႊ မိူင်းရတ်ႉသျႃႊၵမ်းၼိုင်ႈၼႆယဝ်ႉ။

ၵူၼ်းမိူင်းႁူမ်ႈတုမ်ဢမ်ႇႁၼ်လီ – လုမ်ႈၾႃႉဢမ်ႇႁၼ်လီဢမ်ႇၵမ်ႉထႅမ်သေတႃႉ သိုၵ်းမၢၼ်ႈၼႆႉ တႃႇသိုပ်ႇမီးဢႃႇၼႃႇၵုမ်းဝၢၼ်ႈမိူင်းၵႂႃႇၼၼ်ႉ ၶဝ်ႈႁႃႁဵတ်းၵေႃႉရတ်ႉသျႃႊ လႄႈ မိူင်းၶႄႇ ။ ဢိင်ၼိူဝ်လွင်ႈၼႆႉ တီႈသၽႃးလၢင်ႈ မိူင်းဢမေႊရိၵၼ်ႊ ၵေႃႈဢုပ်ႇၵုမ်ၵၼ်ၵႂႃႇမိူဝ်ႈႁၢင်လိူၼ်ၼူဝ်ႊဝႅမ်ႊပိူဝ်ႊ ပူၼ်ႉမႃးဝႃႈ – မိူင်းၶႄႇ လႄႈ ရတ်ႉသျႃႊၼႆႉ ပၼ်ၶိူင်ႈၵွင်ႈ ၵၢင်ႇလႄႈ လွၵ်းလၢႆးပၢႆးသၢင်ႊ ဢၢႆႊထီႊ (IT) တီႈသိုၵ်းမၢၼ်ႈဢမ်ႇၵိုတ်းဢမ်ႇထၢတ်ႇ။ ၵမ်ႉထႅမ်ပၼ်သိုၵ်းမၢၼ်ႈ ႁႂ်ႈပေႃးႁဵတ်းသၢင်ႈပၢင်လိူၵ်ႈတင်ႈဢၼ်ပွမ်လႆႈဢွင်ႇမၢၼ်သေ သိုပ်ႇမီးဢႃႇၼႃႇၵႂႃႇထႅင်ႈ၊ မိူၼ်တင်းပၼ်သိုၵ်းမၢၼ်ႈသိုပ်ႇပူၼ်ႉပႅၼ် ပိူင်တိုဝ်းၵမ်သိုၵ်းတေႃႇၵူၼ်းမိူင်းၵႂႃႇထႅင်ႈၵူၺ်း – ဝႃႈၼႆ။

ယွၼ်ႉပိူဝ်ႈမိူင်းဢမ်းၼၢတ်ႈ 2 ၸိုင်ႈမိူင်းၼႆႉၸွႆႈထႅမ်ပၼ်သိုၵ်းမၢၼ်ႈသေ- ဝၼ်းမိူဝ်ႈၼႆႉ မိူင်းႁူမ်ႈတုမ်မၢၼ်ႈၼႆႉ ၵူၼ်းမိူင်း ၼိုင်ႈၶိုင်ႈပၢႆ ၽၢၼ်ၵိၼ်းၶၢၼ်ၸႂ်ဝႆႉ။ ယွၼ်ႉပိူဝ်ႈပၢင် တိုၵ်းသိုၵ်းသိူဝ် – သိုၵ်းမၢၼ်ႈယိုဝ်းသႂ်ႇႁိူၼ်းယေးၵူၼ်းမိူင်းလႄႈ ႁူဝ်ၵူၼ်းမိူင်းမၢၼ်ႈ 3 လၢၼ်ႉၵေႃႉပၢႆ ႁၢမ်းႁႅၵ်းတီႈယူႇ ဢမ်ႇမီးႁိူၼ်းမီးယေးယဝ်ႉ။ ၵူၼ်းမိူင်းမၢၼ်ႈၼပ်ႉလၢၼ်ႉ ၵေႃႉ ၽူင်ႉပၢႆႈဢွၵ်ႇယၢၼ်မိူင်းၵႂႃႇႁႃႁဵတ်းၵၢၼ်ႁႃၵိၼ်လဵင်ႉတွင်ႉ မိူင်းႁိမ်းႁွမ်းဝႆႉၼႆ မိတ်ႉသ် ယၢင်ႊၵိမ်ႊ ႁူဝ်ပဝ်ႈသပ်ႉၵေႃႊမတီႊ ၾၢႆႇၼွၵ်ႈမိူင်း ဢမေႊရိၵၼ်ႊ ၵဵဝ်ႇလူၺ်ႈ ဢေႊသျႃႊလႄႈ ပၸိၾိၵ်ႉသ် လၢတ်ႈၵႂႃႇတီႈပၢင်ၵုမ်ၼၼ်ႉ ၼင်ႇၼႆ။