ဝၢႆးသိုၵ်းယိုတ်းမိူင်းၶၢဝ်းတၢင်း 5 ပီပၢႆၼႆႉ ၵူႈၸိူဝ်ႉၵူႈလွင်ႈလႅၵ်ႈလၢႆႈ သုတ်ႉၶၢႆႉၸူးလွင်ႈႁၢႆႉၸႃႉ၊ လွင်ႈၶိုၼ်ႈယႂ်ႇၵေႃႈ ယဵၼ်းပဵၼ်လွင်ႈတူၵ်းတႅမ်ႇတူၵ်းယေႃႈ ။ ပေႃးတႅၵ်ႈၵၼ်တင်းတၢင်ႇၸိုင်ႈမိူင်း မိူင်းမၢၼ်ႈ ပဵၼ်မိူင်းဢၼ်ၵွတ်းၽၢၼ် ၵႂႃႇတိၵ်းတိၵ်း ။ ၼႂ်းမိူင်းတႆးၵေႃႈ ယွၼ်ႉမီးလွင်ႈႁုၵ်ႉႁၢႆႉၼမ်မႃးလႄႈ ၶႅၵ်ႇၼွၵ်ႈမိူင်းၶဝ်ႈထိုင်ယၢပ်ႇ ။

ယႃႇဝႃႈၶႅၵ်ႇ တေႃႈၼင်ႇ ၵူၼ်းမိူင်းႁဝ်းၵူၺ်း ၵႂႃႇမႃးႁႃၵၼ်ယၢပ်ႇ။ ၼႂ်းၵႄႈမီးလွင်ႈၵူတ်ႇထတ်းထဵတ်ႈထၢမ်ႁၢမ်ႈႁႄႉႁၢဝ်ႈႁႅင်းယူႇၼႆႉ တီႈဝဵင်းဝၢၼ်ႈငႂ်ႈၵမ်းၵမ်းမီးလွင်ႈၶႃႈႁႅမ်ၵၼ်တၢႆ။ ၵူၺ်းၵႃႈ ဢမ်ႇသူႈမီးၸုမ်းလႂ်ၵႄႈလိတ်ႈပၼ်ႁႃၼႆႉ ။ ၼႂ်းလိူၼ်မေႊ 2026 ၼႆႉၵူၺ်း ၶႃႈႁႅမ်ၵၼ် ၵၼ်ႉၸၼ်ၵၼ်မီးဢမ်ႇၵိုတ်းဢမ်ႇထၢတ်ႇ။ ၵူၺ်းၵႃႈၵူၼ်းမိူင်းဢမ်ႇၸၢင်ႈသူင်ႇၶၢဝ်ႇပိုၼ်ၽႄႈ ယွၼ်ႉဢမ်ႇမီးသၢႆၾူၼ်း ဢိၼ်ႊထိူဝ်ႊၼႅတ်ႉ လႄႈဢမ်ႇမီးလွင်ႈႁူမ်ႇလူမ်ႈ။

ဝဵင်းဝၢၼ်ႈငႂ်ႈ ႁိုဝ် ဝဵင်းယႂႃႇငၢၼ်ႇၼႆႉ ယူႇၼႂ်းၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ။ ဝၢႆးသိုၵ်းယိုတ်းမိူင်းသေ ပဵၼ်ဢွင်ႈတီႈဢၼ် ၸုမ်းလုၵ်ႉၽိုၼ်ႉ လႄႈ သိုၵ်းမၢၼ်ႈ ၶဵင်ႇၶႅင်ႈတေႃႇၵၼ်မႃးဢမ်ႇထၢတ်ႇဢမ်ႇဝၢႆး ။
ပေႃးၸုမ်းသိုၵ်းၼင်ႇၵၼ် တုမ်ႉတိူဝ်ႉၵၼ်မႃးယဝ်ႉၼႆ ၵမ်ႈၼမ် ဢၼ်လႆႈယၢပ်ႇၵိၼ်းၶၢၼ်ၸႂ်သမ်ႉပဵၼ်ၵူၼ်းမိူင်း ။ ယွၼ်ႉဝၢၼ်ႈငႂ်ႈၼႆႉ ပဵၼ်ၼႃႈလိၼ်ဢၼ်ဢမ်ႇၼိမ်တဵင်ႈလႄႈ ပၵ်းပိူင်ၸိုင်ႈမိူင်းၵေႃႈ ဢမ်ႇႁူမ်ႇငမ်းသင်လႆႈ ။ ၽႂ်ၶႂ်ႈၶႃႈၵၼ် တဵၵ်းတဵင်ၵၼ်ၵေႃႈ ပဵၼ်ငၢႆႈငၢႆႈၵူၺ်းၼႆ ၵူၼ်းဝၢၼ်ႈငႂ်ႈၵေႃႉၼိုင်ႈလၢတ်ႈ။

မိူဝ်ႈၼႂ်းႁူဝ်လိူၼ်မေႊ 2026 ဝၼ်းတီႈ 4 ၼၼ်ႉ ၵူၼ်းမိူင်းဢၼ်လတ်းၵႂႃႇမႃး သဵၼ်ႈတၢင်း ဝၢၼ်ႈငႂ်ႈ – ဝဵင်းလိူဝ်ႇ ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ဢဝ်မိတ်ႈတႅင်းသေ ၸူၼ်ရူတ်ႉၶိူင်ႈၵႂႃႇ ။ လွင်ႈလၵ်ႉလွင်ႈၸူၼ်ရူတ်ႉၶိူင်ႈၼႆႉ ၼိုင်ႈဝူင်ႈလႂ် ၼိုင်ႈဝၼ်းတႄႉ တီႈဢေႇသုတ်းမၼ်း ဝႃႈၼႆ။

လိူၼ်မေႊ ဝၼ်းတီႈ 5 ၼၼ်ႉ ၵူၼ်းမိူင်းထူပ်းႁၼ် ၶၢပ်ႈတူဝ် ၽူႈတူင်ႉၼိုင်ၼႂ်းၸုမ်းပျူၸေႃးထီး တႂ်ႈသိုၵ်းမၢၼ်ႈၵေႃႉၼိုင်ႈ ၼွၵ်ႈဝဵင်း ။ ဢႃယု မွၵ်ႈ 50 ပၢႆ ။ ၼႂ်းဝၼ်းတီႈ 2 လိူၼ်မေႊၼၼ်ႉသမ်ႉ ၵူၼ်းဝၢၼ်ႈငႃးသူႇ ၺႃးၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶဝ်ႈႁိူၼ်းတီႉၺွပ်းမတ်ႉၵေႃႉပဵၼ်ပေႃႈလႄႈ လုၵ်ႈၸၢႆးသွင်ၵေႃႉသေဢမ်ႇၵႃး ဢဝ်မိတ်ႈတႅင်းပႃး ၼၢင်းယိင်းၼႂ်းႁိူၼ်းၼၼ်ႉၵေႃႉၼိုင်ႈ ၼႆယူႇ။

လိူၼ်မေႊ ဝၼ်းတီႈ 7 ၼၼ်ႉသမ်ႉ ယိင်းဢွၼ်ႇ ဢႃယု 14 ပီၵေႃႉၼိုင်ႈ ၺႃးၵူၼ်းၸၢႆး ဢႃယု 40 ၸိုဝ်ႈ မွင်ႇတူး ၵၼ်ႉၸၼ်တီႈဝၢၼ်ႈတပိၼ်ႇပျေႃႇ ။ ၽွင်းၼၼ်ႉ မႅၼ်ႈမိူဝ်ႈယိင်းဢွၼ်ႇၼၼ်ႉ ဢွၵ်ႇႁိူၼ်းၵႂႃႇပိတ်းၼဵင်ႈ ။ မွင်ႇတူး ၽူႈပူၼ်ႉပႅၼ်ၼၼ်ႉ ၽွင်းဢဝ်တူဝ်ၵူတ်ႇထတ်းထဵတ်ႈထၢမ်ယူႇၼၼ်ႉ ပၢႆႈလွတ်ႈဝႆႉ ဝႃႈၼႆ။

ဝၼ်းတီႈ 14 လိူၼ်မေႈၼၼ်ႉသမ်ႉ သွင်ၽူဝ်မေး ပွၵ်ႉၵၢတ်ႇ(ပွၵ်ႉၸေးတၢၼ်း) ၺႃးၸုမ်းဢမ်ႇႁူႉၾၢႆႇ ၶႃႈႁႅမ်လူႉတၢႆတင်းသွင် ။ ၵေႃႉပဵၼ်ၽူဝ် ယၢမ်ႈပဵၼ်ၼၢႆးၼႃႈၶၢႆဝူဝ်း ၊ ယၢမ်ႈမီးပၼ်ႁႃၵၼ်တင်းၵူၼ်းသိုဝ်ႉၵူၼ်းၶၢႆယူႇ။ ဢၼ်လူႉတၢႆၼႆႉ ၸွင်ႇၵဵဝ်ႇၸွမ်းလွင်ႈသိုဝ်ႉၶၢႆ ဢမ်ႇမီးၽႂ်လၢတ်ႈလႆႈ ၼႆ ၵူၼ်းပိုၼ်ႉတီႈလၢတ်ႈ။

ၼႂ်းလိူၼ်မေႊ ဝၼ်းတီႈ18 ၼႆႉ ၵူၼ်းၸၢႆး ယူႇဝၢၼ်ႈမျၢႆႇၼၼ်ႉၵေႃႈ ၺႃးမၢပ်ႇၼႄးဝႃႈ ပဵၼ်ၵူၼ်းပၼ်ၶၢဝ်ႇသိုၵ်းမၢၼ်ႈၼႆသေ မီးၸုမ်းဢမ်ႇႁူႉၾၢႆႇငွႆးယိုဝ်းလူႉတၢႆ ။ ဝၼ်းတီႈ 20 ၼၼ်ႉသမ်ႉ ၵူၼ်းၸၢႆး ၼႂ်းဝၢၼ်ႈၵျွၵ်ႉငႅတ်ႉ ဢႃယု 30 ပီ ဢၼ်ပဵၼ်ၵူၼ်းၸုမ်းပျူႇၸေႃးထီးလႄႈ ၵူၼ်းၸၢႆးထႅင်ႈၵေႃႉၼိုင်ႈ ၺႃးၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶႃႈႁႅမ် ၼႆၸိူဝ်းၼႆႉ။

ၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈဝၢၼ်ႈငႂ်ႈၼႆႉ မီးပဵၼ်လၢႆၸုမ်းသေတႃႉ လွင်ႈႁူမ်ႇလူမ်ႈၵူၼ်းမိူင်းတႄႉ ၸုမ်းလႂ်ၵေႃႈ ဢမ်ႇဢဝ်ပုၼ်ႈၽွၼ်းပၼ်လႆႈတဵမ်တီႈ ။ ၸုမ်းလႂ်ၵေႃႈဝႃႈ တင်ႈတပ်ႉမႃး တႃႇၵူၼ်းမိူင်းလွတ်ႈၽေးၵတ်းယဵၼ်ၼႆလွၼ်ႉလွၼ်ႉ ။ ၵူၺ်း ၵူၼ်းမိူင်းသမ်ႉ လႆႈၵူဝ်ၶိုၼ်းၸုမ်းယိပ်းၵွင်ႈၵၢင်ႇ ၼႆ ၵူၼ်းပိုၼ်ႉတီႈလၢတ်ႈ။

ၸုမ်းယိပ်းၵွင်ႈၵၢင်ႇ ဢမ်ႇၸုမ်းၼိုင်ႈၵေႃႈ ၸုမ်းၼိုင်ႈ ဢဝ်ၵူၼ်းမိူင်း ပဵၼ်ၶိူင်ႈမိုဝ်းသေ တိုၵ်းတေႃးႁဵတ်းၶဵၼ်တေႃႇၵၼ်ၵူၺ်းလႄႈ ၸုမ်းလႂ်ၵေႃႈ ဢမ်ႇၽဵဝ်ႈမူၺ်ႉၸုမ်းလႂ်လႆႈတႄႉတႄႉ ။ ၵူၼ်းမိူင်းတႄႉ တေမူၺ်ႉဢွၼ်တၢင်းယဝ်ႉၼႆ ၼၢင်းယိင်း ၵူၼ်းဝၢၼ်ႈငႂ်ႈၵေႃႉၼိုင်ႈလၢတ်ႈၼင်ႇၼႆ

ပေႃးတူၺ်းၸုမ်းၾၢႆႇလႂ်ၵေႃႈ ဢမ်ႇပၼ်လွင်ႈႁူမ်ႇလူမ်ႈပၢႆးတူဝ်ပၢႆးၸႂ်ပၼ်ၵူၼ်းမိူင်းလႆႈတႄႉတႄႉ ။ ပေႃးၾၢႆႇၼိုင်ႈ တေမႃးဢဝ်လွင်ႈႁူမ်ႇလူမ်ႈပၼ်ၵူၼ်းမိူင်းၼႆ ထႅင်ႈၾၢႆႇၼိုင်ႈသမ်ႉ ဢမ်ႇႁၢၼ်ႉၸႂ် ။ ဢၼ်ၶဝ် ဢမ်ႇႁၢၼ်ႉၸႂ်တႄႉ ပဵၼ်သိုၵ်းၼင်ႇၵၼ် ။ ၵူၺ်းၵႃႈ ၶဝ်သမ်ႉမႃးၶႃႈႁႅမ်ၵူၼ်းမိူင်း ။ ၵူၼ်းမိူင်းၵူၺ်း ပဵၼ်တူဝ်ယိူဝ်ႇ ။ သိုၵ်းမၢၼ်ႈၵေႃႈ ပေႃးဢမ်ႇမိူၼ်ၸႂ်ၶဝ်ၼႆႉ ၵႆႉတီႉၺွပ်းၵူၼ်းမိူင်းသေ ႁႃၶေႃႈၽိတ်းဢၼ်ပုၼ်ႉဢၼ်ၼႆႉ

ၶိူင်ႈၸႂ်ႉၶူဝ်းသွႆႈ ၼႂ်းႁိူၼ်းယေး ၸိူဝ်းၼႆႉ ၵေႃႈ ၺႃးသိုၵ်းမၢၼ်ႈ ဢဝ်ၸႂ်ႉ ၊ ရူတ်ႉၵႃး ၸိူဝ်းၼႆႉ ပေႃးဢဝ်ၵႂႃႇၸႂ်ႉယဝ်ႉ ၵွႆတီႈလႂ် ပႅတ်ႈတီႈၼၼ်ႈ ဢမ်ႇသူႈသၢႆႈတႅၼ်းသင်ပၼ်ၵူၼ်းမိူင်း ၊ ၸဝ်ႈရူတ်ႉၵႃး ပေႃးလႆႈၵႂႃႇဢဝ်မႃးမႄးႁင်းၵူၺ်းၶိုၼ်း ၼႆ ၵူၼ်းဝၢၼ်ႈၸိူဝ်းယူႇ ၾၢႆႇႁွင်ႇဝၢၼ်ႈငႂ်ႈၼၼ်ႉ လၢတ်ႈၼင်ႇၼႆ ။

ယွၼ်ႉမီးၸုမ်းယိပ်းၵွင်ႈၵၢင်ႇ ၶဵင်ႈၶႅင်ၵၼ်ဝႆႉယူႇသေႇသေႇလႄႈ ၵူၼ်းမိူင်းထူပ်းၽေးသင်ၵေႃႈ ၵမ်းလိုၼ်း ႁၢမ်းၵၢၼ်ၵမ်ႉၸွႆႈ ။ ယွၼ်ႉသိုၵ်းၸုမ်းလႂ်ၵေႃႈ ဢမ်ႇဢဝ်ပုၼ်ႈၽွၼ်းလႆႈတဵမ်တီႈ ။ ၵုမ်ႇၼႄးၵၼ်ၶိုၼ်းၵူၺ်းၼႆ ၼၢင်းယိင်းဝၢၼ်ႈငႂ်ႈၵေႃႉၼိုင်ႈလၢတ်ႈၼင်ႇၼႆ။

သင်ဝႃႈ မီးလွင်ႈလူႉလွင်ႈသုမ်းမႃး ဢမ်ႇၼၼ် ၵူၼ်းမိူင်းၺႃးၶႃႈႁႅမ်မႃးၼႆ သိုၵ်းၾၢႆႇၼႆႉသမ်ႉ ၼႄးသိုၵ်းၾၢႆႇပုၼ်ႉၼႆသေ ဢဝ်လုတ်ႈၼႂ်းၵႄႈမၼ်းပႅတ်ႈ။ ၸုမ်းလုၵ်ႉၽိုၼ်ႉသမ်ႉၼႄးသိုၵ်းမၢၼ်ႈ ၊ သိုၵ်းမၢၼ်ႈသမ်ႉ ၼႄးၶိုၼ်းၸုမ်းလုၵ်ႉၽိုၼ်ႉ ႁဵတ်းၼႆမႃးတႃႇသေႇ။ တီႈတႄႉ သိုၵ်းမၢၼ်ႈ ၵုမ်းမိူင်းဝႆႉလူး ၊ ႁႂ်ႈ သိုၵ်းမၢၼ်ႈဢဝ်ပုၼ်ႈၽွၼ်းၵႄႈလိတ်ႈပၼ်ၼႆၵေႃႈ သမ်ႉဢမ်ႇလႆႈထႅင်ႈၼင်ႇၵဝ်ႇ

တႄႇဢဝ် ႁူဝ်ပီ 2026 မႃး တေႃႇထိုင် လိူၼ်မေႊၼႆႉၵူၺ်း ၵူၼ်းပိုၼ်ႉတီႈ လႄႈ ၼပ်ႉပႃး ၸုမ်းပျူႇၸေႃးထီး ၺႃးၶႃႈႁႅမ် ဢမ်ႇယွမ်း 20 ၵေႃႉယဝ်ႉဝႃႈၼႆ။
ၼႂ်းဝၢၼ်ႈငႂ်ႈၼႆႉ ၸဵမ်မိူဝ်ႈ 2021 ၼၼ်ႉမႃး မီးၸုမ်းပျူႇၸေႃးထီး တႂ်ႈသိုၵ်းမၢၼ်ႈ ၊ ပျီႇတူႉၸိတ်ႉပဢူဝ်း PNO ၊ သိုၵ်းထၼူႉ လႄႈ PDF ၸိူဝ်းၼႆႉ တူင်ႉၼိုင်ဝႆႉ ။