ပၢင်တိုၵ်း သိုၵ်းမၢၼ်ႈယိုတ်းမိူင်း တင်း ၸုမ်းလုၵ်ႉၽိုၼ်ႉ တီႈၸႄႈဝဵင်းမိူင်းပၢႆး လႅၼ်လိၼ် တႆး-ယၢင်းလႅင်ၼၼ်ႉ ၾၢႆႇသိုၵ်းမၢၼ်ႈတၢႆ ဢမ်ႇယွမ်း 10 ၵေႃႉၼႆ ၽူႈမီးပုၼ်ႈၽွၼ်း တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF လၢတ်ႈ။

တပ်ႉသိုၵ်းမၢၼ်ႈၼႆႉ လုၵ်ႉတီႈဝဵင်းမိူင်းပၢႆးသေ သူင်ႇဢဵၼ်ႁႅင်းသိုၵ်းၵႂႃႇၼွၵ်ႈဝဵင်း ၼႂ်းဢိူင်ႇၼႂ်းဝၢၼ်ႈလႄႈ ၼႂ်းၵၢင်လိူၼ်မေႊၼႆႉ လႆႈပဵၼ်ပၢင်တိုၵ်းၵၼ်တင်း ၸုမ်းသိုၵ်းယၢင်းလႅင် KNDF လၢႆလၢႆၵမ်း။ ၽွင်းပၢင်တိုၵ်းၼႆႉ ၾၢႆႇသိုၵ်းမၢၼ်ႈ တၢႆ တေဢမ်ႇယွမ်း 10 ၵေႃႉ၊ ယိုတ်းလႆႈပႃး ၶိူင်ႈၵွင်ႈၵၢင်ႇၵမ်ႈၽွင်ႈၼႆ ၽူႈမီးပုၼ်ႈၽွၼ်း သိုၵ်းယၢင်းလႅင် KNDF ယိုၼ်ယၼ်တွပ်ႇဝႆႉတီႈသိုဝ်ႇ DVB ၼင်ႇၼႆ။

ၵဵဝ်ႇၵပ်းပၢင်တိုၵ်းၼႆႉသေ ၾၢႆႇတပ်ႉသိုၵ်းမၢၼ်ႈတႄႉ ဢမ်ႇပိုၼ်ၽၢဝ်ႇဢွၵ်ႇသင်။

မိူဝ်ႈၵၢင်ပီ 2025 ပူၼ်ႉမႃးၼႆႉ လုၵ်ႉတီႈသဵၼ်ႈတၢင်း ၾၢႆၶုၼ် – ပၢင်လွင်းသေ တပ်ႉသိုၵ်းမၢၼ်ႈထူဝ်းသိုၵ်းလေႃႇတိုၵ်း ၸုမ်းလုၵ်ႉၽိုၼ်ႉယဝ်ႉ ယိုတ်းၵုမ်းလႆႈၶိုၼ်းဝဵင်းမိူင်းပၢႆး။ ဝၢႆးလင်ၼၼ်ႉ သိုပ်ႇထူဝ်းသိုၵ်းၶႂၢၵ်ႈၼွၵ်ႈဝဵင်းမိူင်းပၢႆး ထႅင်ႈလႄႈ လႆႈပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉ။

ၼႂ်းႁူဝ်ပီ 2026 ၼႆႉ ၼွၵ်ႈလိူဝ်ဝဵင်းမိူင်းပၢႆးယဝ်ႉ တီႈၸႄႈဝဵင်း တီႈမူၵ်းသိူဝ်၊ ၽရူသူဝ်ႊ လႄႈ ၽႃသွင် (ၽႃးသွင်း) ၼႂ်းမိူင်းယၢင်းလႅင်ၵေႃႈ တပ်ႉသိုၵ်းမၢၼ်ႈ ထူဝ်းသိုၵ်းႁၢဝ်ႈႁႅင်းလႄႈ လႆႈပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉဝႆႉ ဝႃႈၼႆ။